‘Pinas, napag-iiwanan sa Asya pagdating sa internet, puro interruptions na, super-hina pa ng signal!

ni Imee Marcos - @Imeesolusyon | December 7, 2020

Papasok na ang 2021, at tila matatagalan pa bago tayo bumalik sa normal. Kaya yakapin na natin at paghandaan ng todo ang tinatawag nating new normal.

Meaning, puro virtual at online pa rin ang mamamayagpag hanggang sa susunod na taon dahil matagal-tagal pa ang laban natin kontra sa COVID-19. Hangga’t wala tayong bakuna para sa virus, tiis-tiis tayo para iwas sa COVID!

‘Yun nga lang, tila palaging naghihingalo ang ating mga internet connection, juskoday! Eh, mas marami pa yatang buffering o interruptions, at super-hina ng signal although nakakaraos naman. Pero sa ating mga Pinoy, hindi dapat ganyan na hanggang nakakaraos, okay lang. Mag-effort naman ang mga telco na pagandahin ang serbisyo nila!

Kung tutuusin, kulelat talaga tayo sa ating mga kapitbahay sa Asia pagdating sa internet. Palagi nating pinupukpok at inuurirat ang ating mga IT experts at telcos, pero tila baga tayo sirang plaka lang sa kakukulit natin para sa maayos na speed at internet connection. Eh, walang-wala tayong panama sa Vietnam, santisima! Sana all!

Magmula sa mga eskuwelahan, mga iba’t ibang ahensiya ng ating gobyerno, hanggang sa ating mga bahay, ang hirap kumonek sa internet. Kahit sa data na lang, super-hina talaga at palyado ang signal. Kahit saan, makaririnig ng reklamo at nababalaho ang ating mga trabaho at responsibilidad kasi nga everything is online and virtual na, ‘di ba! Sakit sa bangs ang bagal!

Pero no worries, mga friendship, may IMEEsolusyon tayong naiisip. Kailangan mag-invest rin ang ating pamahalaan sa IT o sa telcos. Dapat talaga mabigyan ito ng budget. It’s about time na may sariling internet service provider ang gobyerno na pag-aari ng taumbayan. Mahirap kaya ang umaasa na lang tayo forever sa mga pribadong kumpanya na ang pangunahing objective ay kumita.

Target nating mawasak na ang digital divide sa ‘Pinas. At kapag everything sa internet, eh, super-bilis na ang koneksiyon, ‘speedy gonzales’ na rin ang serbisyo-publiko ng mga ahensiya ng ating pamahalaan. At higit sa lahat, bibilis din ang usad ng ating ekonomiya. Agree? Keri natin ‘yan. Push natin ‘yan, ‘te!

Face-to-face classes sa mga lugar na walang COVID, buksan na!

ni Imee Marcos - @Imeesolusyon | December 4, 2020

Ano ba ang mas importante, sabong o edukasyon? Hay nako, nakapagtataka kung bakit ba inunang payagang buksan ang mga sabungan kaysa eskuwelahan! Bakit nga ba?

Grabe to the max naman at lumalabas mas essential pa ngayon ang pagsusugal kaysa eskuwelahan, nako ha! ‘Wag ganyan. Eh, biruin n’yo naman — mas maraming COVID cases sa ibang bansa kesa ‘Pinas, pero bukas na ang mga eskuwelahan sa kanilang lugar.

Kung tutuusin, nakaka-8 weeks na ang mga modules sa online learning pero paulit-ulit pa rin ang problema. Bukod sa kakulangan ng modules, hirap ang mga magulang sa pagsagot sa mga aralin, hindi makadalo sa online classes dahil walang pang-load, mahina ang signal o wala talagang signal. Juskoday!

IMEEsolusyon natin d’yan ay buksan na ang face-to-face classes! Pero nililinaw natin, ha, hindi ito in general kundi roon lang sa mga eskuwelahang may kakayahang magpatupad ng health protocols kontra sa pagkalat ng COVID-19.

Bukod d’yan, gawin ang pagbubukas ng mga face-to-face classes sa mga lugar na wala nang naitatalang kaso o kakaunti na lang ang kaso ng virus. ‘Di ba?! Hindi natin sinasabing buong Pilipinas ito. Agree?

Kumpiyansa naman tayong istriktong masusunod ng mga eskuwelahan, guro at estudyante ang mga pagsusuot ng face mask at face shield, gayundin ang mga physical distancing sa mga silid-aralan, tamang paghuhugas ng mga kamay, bentilasyon, priority testing at tracing.

Naniniwala tayong mas safe ang mga titser sa mga paaralan, at ito ang pinakaligtas na lugar para sa mga bata sa panahong may pandemya. Wala naman naitala o naipahayag, at ‘di rin napatunayang superspreader ng virus ang mga schools, ‘di ba?

Saka may psychological effect pa sa mga bata kapag online lang nag-aaral. Meron pang napaulat na nag-suicide raw? Iba lang talaga ang face to-face interaction ng mga estudyante. Kaya wish nating i-consider ito ng DepEd at ng IATF. Plis lang!

Kadiwa Rolling Stores laban sa mga mapagsamantalang traders...

Sagot sa sumisirit na presyo ng mga bilihan, now na!!!

ni Imee Marcos - @Imeesolusyon | December 2, 2020

Super mahal ng mga bilihin ngayon, grabe to the max ang sipa ng presyo kahit nasa state of calamity ang buong Luzon. At may umiiral na price freeze pa! Ano ba ‘yan!

Mahigit sampung araw na ang state of calamity pero tuluy-tuloy at hindi makontrol ang halos dobleng pagsirit ng presyo ng mga gulay at root crops, naku, ha?!

Bakit ba arya nang arya itong price hike, eh, wala na ngang makain ang mga sinalanta kamakailan lang ng Bagyong Ulysses, at may pandemya pa.

Aba, eh, calling-calling DA at DTI! Puro na lang ba kayo pangakong napapako? Sabi kayo nang sabi na makokontrol ang presyo ng mga bilihin, pero nganga pa rin ang taumbayan. Santisima!

Hindi na rin makasunod sa SRP ng gobyerno ang mga tindero dahil limitado lang ang supply dulot ng pananalanta ng mga bagyo. Dagdag pa ang mga mapagsamantalang trader o middlemen, kaya ‘yun sirit agad ang presyo ng bilihin.

Ang IMEEsolusyon d’yan, dagdagan ang iilang Kadiwa rolling stores ng DA! Makakamura talaga ng malaki ang mga mamimili since direct ang supply ng mga magsasaka at mga meat manufacturers sa Kadiwa! Take note, umubra ‘yan 40 years ago, kaya magiging epektibo rin ‘yan ngayon!

Tutal din lang may pondo naman ang DA, DTI at iba’t ibang ahensiya ng gobyerno na makukubra sa ilalim ng Price Act sa panahon ng emergency at state of calamity, bakit hindi gamitin ang pondong ‘yan para magparami pa ng mga Kadiwa rolling store, ‘di ba?

Ang Kadiwa rolling store ang kagyat na IMEEsolusyon sa naghihirap nating mga kababayan na kaliwa’t kanan ang pasanin dahil sa pandemya at sunud-sunod na mga bagyo! Kaya, plis lang, mangialam na ang ating gobyerno at magpadala ng mga Kadiwa sa iba’t ibang panig ng ating bansa!