3,000 Registered Nurses, need ngayon sa Amerika!

ni Imee Marcos - @Imeesolusyon | January 6, 2021

May good news na bumungad pagpasok ng 2021, at ‘yan ay ang job opportunity sa U.S. para sa ating mga nurse. Bongga, ‘di ba!

Nangangailangan ang Amerika ng 3, 000 Registered Nurses, partikular sa mga State ng California, Texas, Florida, Minnesota at New York.

Kapos na kapos daw sa nursing staff ang mga nasabing lugar dahil sa patuloy na pagdami ng COVID-19 cases sa Estados Unidos. Bukod sa kakatapos na Christmas holidays, flu season din sa kanila dahil sa winter kaya’t marami sa mga health workers ang nagkakasakit at hindi makapagtrabaho.

IMEEsolusyon ang balitang ito para sa mga Pilipinong nurses sa abroad na nawalan ng trabaho, o ‘yung mga nabalaho sa pag-a-abroad dahil naharang sa pag-alis bunsod ng mga protocols kontra sa COVID-19.

IMEEsolusyon din ang oportunidad na ito sa patuloy na kawalan pa ng malinaw na national policy para maka-recover sa unemployment sa ating bansa.

Inaasahan din nating dahil may mga bakuna na kontra sa virus, maiibsan nito kahit paano ang matinding kawalan ng trabaho. At kapag may trabaho, gaganda na paunti-unti ang ating ekonomiya at maging ang iba’t ibang bansa na apektado ng pandemya.

Sa dami ng pinagdaanan nating pagsubok nitong nagdaang taon — sakuna, kalamidad, pandemya, unemployment, pagsasara ng mga maliliit na negosyo at bagsak na ekonomiya — eh, go lang nang go tayo sa paggawa ng mga paraan para makabangon.

Tiyak na makakaahon din tayo ngayong 2021 — ang panahon ng paghilom. “New normal” mang matatawag ang ating sitwasyon, masasanay din tayo at matututong mag-adjust. Kapit lang at walang sukuan! Agree?

Dapat tuluyang walisin ang mga bulok sa PNP, now na!

ni Imee Marcos - @Imeesolusyon | January 4, 2021

May mga padrino ba si Nuezca kaya nakalusot sa kanyang mga dating kaso?

Hindi pa man tayo nakakaraos sa samu’t saring kinahaharap na problema — pandemya, bagyo, lindol, at iba pa — humabol pa ang karima-rimarim na pagpatay ng pulis sa isang mag-ina sa Tarlac, kamakailan.

Mabuti na lang at nakunan ng video ng mga nakasaksi ang harapang pamamaril ni Police Staff Sergeant Jonel Nuezca sa mag-inang Sonya at Frank Anthony Gregorio, at nai-post sa social media. Kung hindi, baka nakalusot na naman ang abusadong pulis na ‘yan.

Take note, mahaba na pala ang listahan ng mga kaso ni Nuezca. Pero ang nakapagtataka, lahat ay nalusutan niya? Nakakahiya naman ang kanyang angas sa mga kapwa niya pulis na tapat sa tungkulin.

Biruin n’yo, nitong nagdaang taon, lusot siya sa dalawang homicide case? Dismissed o ibinasura ayon sa rekord ng pulisya! Nasuspinde naman siya noong 2014 dahil sa pagtangging magpa-drug test, may kaso siyang grave misconduct noong 2013, at serious neglect of duty noong 2016 dahil sa hindi pagtestigo sa isang drug case.

Nakakaalarma ang lantarang pamamaril ng pulis na ito. Tila ba sanay na sanay at parang practice target lang ang ginawa sa mag-ina. Mukhang regular na ‘hitman’ lang ang peg.

Ang tanong, sino ang padrino ni Nuezca? Kaninong bata ba ito? Kaninong pader siya nakasandal?

Kung sinuman ang ‘ninong’ o ‘mga ninong’ niyan, IMEEsolusyon ko riyan, eh, kalkalin at imbestigahan at nang magkaalaman na!

Base sa Republic Act 8551, pati mga superior niya dapat imbestigahan dahil layunin ng batas na ‘yan ay ireporma at i-reorganize ang PNP, at tuluyan nang walisin ang mga bulok sa organisasyon.

Ikalawa, rebyuhin at siguruhing regular ang psychological at drug test ng mga pulis, na hindi nabibili ang resulta, ha!

Naiparating sa ating tanggapan na ilang “sponsor” at mga kaklase ng mga police recruit ang bumibili umano ng resulta ng nasabing mga neuro test at drug tests! Grabe!

Panghuli, plis lang PNP, puspusan naman ang gawin ninyong pagpapahinto sa bentahan ng mga ilegal na armas sa Northern provinces dahil yan ang ugat ng mga krimen!

Huwag sanang hayaan masira ang buong PNP dahil lang sa iilang masasamang-loob sa inyong hanay. Saludo pa rin kami sa inyong sinumpaang tungkulin “to serve and protect”. Keri ‘yan!

Recruitment agency na walang assurance na ibinibigay sa kaligtasan ng mga OFWs, sampolan!

ni Imee Marcos - @Imeesolusyon | December 30, 2020

Magpapalit na ng taon at pagpasok ng 2021, maraming hamon ang ating haharapin bukod sa COVID-19.

Isa na riyan ang kapakanan ng ating mga OFWs na napapabalita na namang nabibiktima ng human trafficking.

Kamakailan, natanggap ng ating opisina ang hinaing ng ilang OFWs na na-recruit sa Morroco. Sila raw ay nakararanas ng pang-aabuso ng kanilang mga employer.

Nand’yan ‘yung napipilitan silang magtrabaho kahit hindi sila pinapasuweldo dahil hinahawakan ng kanilang mga amo ang kanilang pasaporte bukod sa sinasaktan pa sila.

Tulad ng dinaranas ng ibang mga kababayan nating nagtatrabaho sa Middle East, inaabuso rin sila ng kanilang mga amo. Eh, ano ba ang ginagawa ng ating mga opisyal na itinalaga sa Morocco?

IMEEsolusyon para hindi na maulit ang mga ganyang insidente, eh, plis naman, habulin at pitikin ng mga awtoridad ang mga recruitment agency na walang assurance na ibinibigay sa kaligtasan ng ating OFWs.

Bukod d’yan, sa ating mga embahador sa bawat bansa na may OFW, ‘wag naman kayo magpabaya. Pakibilisan ang pag kilos at ‘wag hintaying lumalala pa ang sitwasyon. Tama na ang “mañana habit” o “bukas na mentality”. Buhay at kaligtasan ng kapwa natin Pilipino ang nakataya rito.

Well, hindi natin matitiis ‘yan at sa pagbubukas muli ng sesyon ng Kongreso sa Enero, magpa-follow up tayo sa kanilang kalagayan. ‘Wag naman pangako na palaging napapako na aasikasuhin sila, gawin na ASAP!

Remember, sila’y tinagurian nating mga bagong bayani at hindi matatawaran ang kontribusyon nila sa pag-unlad ng ating bansa.