Mga opisyal at empleyado ng gobyerno, hindi dapat exempted sa COVID testing at quarantine!

ni Imee Marcos - @Imeesolusyon | February 10, 2021

Nakakaalarma ang pagpayag ng IATF na ‘wag nang dumaan pa sa COVID testing at quarantine ang mga empleyado ng gobyerno na kailangang bumiyahe sa iba’t ibang lugar sa bansa para sa opisyal na gawain. Nakakaloka ‘yan, ha?

Hindi magandang halimbawa para sa mamamayan na halos isang taon ng matiyagang sumusunod sa mga itinakdang health protocols. Bakit sa isang iglap lang, may mga exempted na? At mga taong gobyerno pa!

Hindi natin maisip kung ano ang malaking kadahilanan kung bakit dapat may exemptions sa swab test at quarantine. Immune ba sila sa virus? Paano pala kung may carrier na walang sintomas at nahawaan ang mga residente ng lugar na kanilang pinuntahan?

Hindi nga ba at mas mabilis daw makahawa ang bagong variant ng COVID-19, bukod sa more deadly w ito? Ano ang logic sa pagbigay ng exemption kahit na sabihing para mapabilis ang pagtupad nila sa tungkulin, kung ang resulta naman nito ay lalong dumami ang mga kaso ng impeksiyon?

Huwag naman sanang ganyan. Marami na ang nagsakripisyo sa mga community quarantine, maraming kumpanyang nagsara at manggagawang nawalan ng trabaho, na tila masasayang lang sa kaunting pagluluwag para sa iilan.

May “double standard” ba sa implementasyon ng COVID testing at quarantine? ‘Wag masyadong kampante, porke may mga bakuna nang paparating, please naman. Masyadong mapangahas at delikado ang exemption na ‘yan!

Maaari rin sabihing special treatment ‘yan para sa mga empleyado ng gobyerno, na minsan nagiging mitsa pa ng pagkapamahak. Tiyak din na magpapahirap sa mga LGU na makontrol ang pagkalat ng impeksiyon at sa pagpapasunod sa mga nasasakupan kasi may nakitaan ng espesyal na trato!

IMEESolusyon d’yan, eh, ang ating IATF, kailangan din magpahinga. Mag-recharge, ‘ika nga, para makapag-isip-isip ng maayos. Naniniwala tayong ang desisyon na ‘yan ay bunsod siguro ng sangkaterbang pressure na mahigit isang taon na din nilang dala-dala.

Mabuti sana kung hindi sila papalagan ng mga taga-LGU. Hirap na rin ang ating mga lokal na opiayal, ‘wag na sana nating dagdagan sila ng alalahanin na puwede naman maiwasan. Keri natin umisip ng iba pang paraan!

Eleksiyon 2022: Keri nating matuloy kahit may pandemya

ni Imee Marcos - @Imeesolusyon | February 3, 2021

Matagal-tagal pa ang laban natin sa pandemya, pero hindi ito dapat maging dahilan para mahinto ang marami nating mahahalagang aktibidad sa ating bansa.

Isa na riyan ang nakatakdang eleksiyon sa Mayo 2022. Unang-una tayong maging determinado na ituloy ang national at local elections bilang pagsasa-alang-alang na rin sa kautusan ni Pangulong Rodrigo Duterte na ayaw itong maipagpaliban.

Paparating na ang iba’t ibang COVID-19 vaccines at maaaring sumailalim na tayo sa totoong new normal, kaya’t yakapin na natin ang sitwasyon at makibagay sa mga dapat na gawin. Kahit paano’y dire-diretso ang ating pamumuhay sa gitna ng pandemya na may kasama pa ring pag-iingat at pagsunod sa mga safety protocols.

Maraming bansa ang nagpaliban ng eleksiyon nitong nagdaang taon sa kasagsagan ng mga lockdown o community quarantine. At nitong Enero 19 lang, naitala ng International Foundation for Election Systems na na-postpone ang eleksiyon sa 69 bansa at walong teritoryo.

Pero nagdesisyon din ang ilan sa mga ito na itutuloy ang kanilang eleksiyon ngayong taon, kabilang na ang Australia, Canada, Germany, Hong Kong SAR at United Kingdom.

Kung ang South Korea, kinaya nila noong Abril sa kasagsagan ng pandemya, paniguradong kakayanin din natin. Tagumpay at ligtas ang eleksiyon doon and take note, mas lumaki pa ang bilang ng mga botanteng lumahok! Bongga, ‘di ba?

IMEEsolusyon naman d’yan ay walang iba kundi ang maagang pagpaplano at paghahanda. Ito ay makababawas din sa hamon sa pagiging lehitimo ng resulta ng eleksiyon.

Kaya naman ang inyong lingkod, bilang chairperson ng Committee on Electoral Reforms and People’s Participation, todo ang isinasagawa nating hearings sa Senado para maikasa na ang plano.

Hindi madalian ang paghahanap ng dagdag-pondo at paglalatag ng mga hakbang na konektado sa pandemya, kaya dapat maagap tayo sa istriktong paghahanda. Magtulungan na tayo, kering-keri natin ‘yan. Tara na. Karerin na natin!

Ayuda sa naiwang pamilya ng SAF44, hanggang ngayon wala pa?!

ni Imee Marcos - @Imeesolusyon | February 1, 2021

Anim na taon na ang nagdaan mula nang mangyari ang Mamasapano tragedy noong January 2015 kung saan 44 na Special Action Force commandos ang namatay sa engkuwentro kontra mga rebelde. Pero hanggang ngayon, marami pa ring hinaing ang mga naulila nilang pamilya.

Nakadidismaya dahil hustisya pa rin ang panawagan ng mga naiwan ng SAF44 na ginawaran ng natatanging Medal of Valor, Order of Lapu Lapu, noong April 2018 ni Pangulong Rodrigo Duterte. Ang kanilang pagkasawi ay bunsod ng operasyon para matimbog ang mga teroristang sina Zulkifli bin Hir alias Marwan at Basit Usman.

Super-worried tayo sa lagay ng mga naiwang pamilya ng magigiting na mga pulis. Hanggang kailan kaya sila maghihintay para maibigay sa kanila ang lahat ng benepisyo?

IMEEsolusyon para sa mga naulilang pamilya, huwag na sanang patagalin pa ang proseso. Hindi na dapat pa maging atrasado ang tulong-pinansiyal sa kanila. Kung tutuusin, dapat ilang buwan lang mula nang mangyari ang trahedya, ASAP sanang naigawad ang mga kaakibat na benefits.

Kabilang ang monthly gratuity na itinaas sa P75, 000 mula sa P20, 000, at libreng education at medical services sa mga dependents. Bukod pa rito ang pagbibigay sa kanila ng prayoridad sa iba’t ibang programa ng pamahalaan tulad ng diskuwento sa ilang mga establisimyento at sa transportasyon o pagbibiyahe.

Napakapersonal ng isyung ito dahil marami sa SAF44 ay mga taga-Norte at kabilang sa mga indigenous communities. Marami sa kanila ay pumapasok sa pagka-pulis dahil sa kahirapan, huwag naman sana natin ipagkait ang mga benepisyong nararapat para sa kanilang mga pamilya.

Hinding-hindi natin dapat ilibing ang pag-asa ng mga naulila na makamit ang hustisya. Itodo ang benepisyo at hindi dapat atrasado! Sa totoo lang, hindi kayang matumbasan ng mga benepisyong ‘Yan ang sakripisyo ng SAF44. Tratuhin natin sila bilang magigiting na bayani ng ating bansa.