Early voting ng seniors, PWDs at frontliners, i-certify sanang urgent!

ni Imee Marcos - @Imeesolusyon | February 17, 2021

Wala nang atrasan ang nakatakdang eleksiyon sa 2022 kahit may pandemya. Naglabas na ang Comelec ng calendar of activities, at ang filing ng certificates of candidacy para sa lahat ng elective positions ay sa Oct. 1 hanggang 8 na.

Ang campaign period para sa national positions ay nakatakda sa February 8 hanggang May 7, 2022; at March 25 hanggang May 7 naman para sa local.

Pero kaakibat niyan dapat masigurong 100% handang-handa tayong lahat, lalo na ang Comelec para iwas-hawahan ng virus.

Hindi na tayo magpapatumpik-tumpik pa, walang oras ang dapat masayang ngayong taon. Dapat trabahuhin na agad ng Comelec ang lahat ng kailangang paghahanda sa gaganaping halalan.

Bilang chairman ng Senate Committee on Electoral Reforms and People’s Participation, obligasyon ng inyong lingkod na mamitik sa mga nangunguyakoy at siguraduhing walang “mañana habit” o “mamaya na” sa mga dapat gawin agad.

Take note, ang pagpaplano para sa eleksiyon ay naging mas kumplikado dahil sa pandemya. Remember, hindi garantiya ang bakuna na wala nang hawahan ng virus na mangyayari kapag nagkaroon na ng siksikan sa mga presinto.

Sa harap nito, IMEEsolusyon d’yan ay mega-push tayo sa Senate Bill No 1104 noon pang Oktubre na magkaroon ng early voting ang mga senior at PWDs. Idaragdag dito ang mga health workers, poll watchers, teachers, mga pulis, militar at mga taga-media.

Ang kagandahan na mauna sila sa pagboto, iwas-COVID para sa vulnerable sectors at maiingatan ang kalusugan ng mga frontliners. Huwag nating pahirapan ang mga nakatatanda at may kapansanan na makipagsiksikan sa araw mismo ng eleksiyon kung may paraan naman para mauna sila. Agree?

Nagpaparamdam na rin tayo kay Pangulong Rodrigo Duterte na sana nga, sertipikahan bilang urgent ang early voting. Kumpiyansa naman tayong mapagbibigyan tayo ng ating mahal na Pangulo.

May sapat bang imbakan para sa mga bakuna kasabay ng tripleng dami ng imported na karneng baboy?

ni Imee Marcos - @Imeesolusyon | February 15, 2021

Ngayong nag-aabang na tayong lahat sa pagdating ng COVID-19 vaccines ngayong Pebrero, mukhang wala pang linaw sa kung paano masisigurong may sapat na imbakan para mapanatiling ligtas at epektibo ang mga ito.

Kasabay ng pagdating ng mga bakuna ang kautusan ng Department of Agriculture na triplehin ang importasyon ng karneng baboy bilang solusyon sa shortage daw ng supply bunsod ng ASF (African Swine Fever).

Hindi malinaw kung gagamitin ng pamahalaan ang mga pasilidad ng Cold Chain Association of the Philippines (CCAP), ang multi-sectoral group na siyang humahawak sa storage at distribution ng mga imported na chilled at frozen food products.

Sa hearing sa Senado noong January 15, nagpahayag ang CCAP ng kahandaan kung sakaling magdesisyon ang gobyerno na gamitin ang kanilang serbisyo. Pero sinabi ng Department of Health na sila ay direktang nakikipag-usap sa mga pharma-grade service providers dahil sa lubhang sensitibo ang mga bakuna sa handling at temperatura.

Ayon sa CCAP, inilalagay nila ngayon sa 70% ang kanilang operating capacity mula sa kabuuang 400,000 metric tons full capacity.

Kahit tumaas ang kapasidad ng 10% to 15% o mahigit kumulang 40,000 metric tons, ayon sa planong inilahad noong Disyembre, maaaring magkulang pa rin ito para sa tripleng minimum access volume (MAV) na 162,000 metriko tonelada. Malamang marami ang mahihikayat na mag-angkat ng karneng baboy dahil sa diskwento sa buwis.

IMEESolusyon naman d'yan, eh, gamitin na ang emergency budget na P24 billion na inilaan sa Bayanihan 2 para sa Department of Agriculture. May kapasidad silang tulungan ang mga hog raisers sa transportasyon ng mga baboy galing Visayas at Mindanao para madagdagan ang supply at mapababa ang presyo sa Metro Manila.

In fairness, ginagawa na ito ng DA nitong mga nakaraang araw. Sana lang ay magresulra ito sa mababang presyo ng baboy kahit wala ng price ceiling.

Dapat din bigyan ng DA ang mga magbababoy ng mga testing kits para sa lumalaganap pa ring ASF para agarang maisalba ang mga baboy na hindi pa nahahawa sa sakit.

Magdesisyon na rin ang gobyerno kung gagamitin ang CCAP para sa storage ng mga bakuna at kung kaya ng CCAP na gawing pharma-grade ang mga pasilidad nila.

Kasabay dito ang paglatag ng malinaw na sistema sa paglalagyan ng mga bakuna mula sa airport, sa pag-iimbakan nito hanggang sa makarating sa mga LGUs at sa mga liblib na pook sa ating bansa.

Huwag nang magpatumpik-tumpik pa. Iwas na tayo sa huli man at magaling, huli pa rin, at baka mauwi tayo sa sirang mga karne at sirang mga bakuna, ‘wag naman sana!

“Gulay na bouquet”, patok na panregalo ngayong Valentine’s Day!

ni Imee Marcos - @Imeesolusyon | February 12, 2021

Uy, Valentine’s Day na! Usung-uso ang pagmamahal ngayon. Mahal ang baboy at manok, pati na rin gulay at isda! ‘Kalokah!

Nagmahal na nga ang lahat, lalo na ang mga presyo ng pagkain, kaya’t afford pa ba natin mag-celebrate ng Valentine’s Day at magbigay ng regalo sa ating minamahal?

Kaya naman, ang mga mister, boyfriend at manliligaw, pihadong isip-isip ng maigi kung anong regalo ang kaya nilang ibigay sa kanilang mga sweetheart sa Araw ng mga Puso kahit na may pandemya pa riyan.

Tayo kasing mga Pinoy, kahit nga sagad na sa buto ang hirap, nakagagawa pa rin ng paraan kapag pumapag-ibig na, ‘di ba! Natural na romantiko at thoughtful ang mga mangingibig natin, talaga naman!

Pero, may I suggest sa mga boys, maging praktikal na kayo sa pagreregalo. Kaunting creativity lang naman ang kailangan kahit pa gaano kahirap ang buhay. Paano?

IMEEsolusyon natin d’yan, eh, imbes na chocolates, karneng baboy na pang-ulam ang iregalo ninyo sa inyong loveydoves. I’m sure ma-appreciate nila ‘yan sa mahal ba naman ng baboy ngayon!

O, kaya, imbes na bulaklak, mga gulay na nakahugis bouquet ang ihandog ninyo kay misis. Mura na at praktikal, makatawag-pansin pa.

Natatandaan n’yo ba noong magmahal ang bigas dahil sa shortage, maraming natuwang misis nang regaluhan sila ng bigas ng mga mister noong Valentine’s Day!

Ngayon naman, bulaklak na gulay, o regalong karne — pasok ‘yan sa banga! Maniwala kayo sa hindi, magiging abot hanggang sa tenga ang ngiti ng inyong mga loves! Pramis.

Aba, isipin n’yo naman hindi lang mga misis, girlfriend at nililigawan ang matutuwa niyan, kundi mas higit ang mga nagtitinda ng gulay at baboy! Oh, di ba, naging romantiko ka na ngayong Valentine’s Day, nakatulong ka pa!

Happy Valentine’s Day sa inyong lahat! At Kung Hei Fat Choi sa ating mga kaibigang Tsinoy!