Early voting ng ilang sektor para sa ligtas na May 2022 elections, bigyang prayoridad!

ni Imee Marcos - @Imeesolusyon | May 28, 2021

Wala nang anim na buwan ang natitira, maghahain na ng kandidatura sa Oktubre ang mga tatakbo sa May 2022 elections. Pero, gaano na ba kahanda ang pamahalaan partikular ang Commission on Elections, lalo na’t nasa gitna tayo ng pandemya?

Dapat nating masiguro ang safety sa COVID-19 ng milyun-milyong botante kabilang ang nasa 9.8 milyong senior citizens, 9.2 milyong indigenous people (IPs), 2.2 milyong buntis at 1.7 milyong may kapansanan o persons with disability (PWDs) na dapat bigyan ng alternatibong “arrangement” ng pagboto.

Hindi biro at hindi dapat maliitin ang sitwasyong nasa pandemya tayo at ang pangamba nilang mahawaan ng sakit habang bumoboto. Hindi pa kasama riyan ‘yung mga guro, poll watchers, pulis at sundalo, maging taga-media na full time ang pagtutok sa kanilang trabaho sa araw ng eleksiyon.

Napakahalagang ngayon pa lang ikinakasa na kung paano sila boboto, lalo na’t may pandemya at hindi malayo ang posibilidad na maging super spreader ng virus ang mga lugar ng botohan. Kailangan talagang may mga grupong makaboboto ng mas maaga at maisaayos agad ang sistema para dito.

IMEEsolusyon natin d’yan ay ang Senate Bill 1104 o Early Voting bill na itinutulak natin noon pang 2019. Ngayong may pandemya, dapat natin palawakin ang listahan ng mga delikadong grupo ay isama ang mga tagapaglingkod sa araw ng eleksiyon. Dalawa hanggang 30 calendar days bago ang itinakdang petsa ng eleksiyon ang inirerekomenda natin para sila makaboto ng maaga.

IMEEsolusyon din para sa Comelec, eh, kailangang maiayos na mas madaling mapuntahan ang mga polling precincts para sa mga lolo’t lola, buntis at PWDs. Gayundin ang mga masasakyan ng mga IPs na nakatira sa mga malalayong bundok. Gamitin bilang voting venues ang outdoor facilities tulad ng mga stadium, auditorium, multi-purpose halls at mga parking lot sa mga mall.

Para umusad naman ‘yan, kailangang badyetan ang nasabing safety measures at mga taong kikilos para rito, lalo na’t inaasahan nating magdodoble ang work shift ng mga guro sa eleksiyon.

Dagdag pa rin sa IMEEsolusyon ng Comelec ang mail-in voting na dapat masimulan na kahit sa iilang lugar muna, lalo na’t inihayag naman ng Philippine Postal Corporation na kakatapos lang ng pag-upgrade sa kanilang computer system.

Mabilis ang oras at araw, ‘wag na nating pairalin ‘yung ugali na kung kailan malapit na saka lang doon kikilos. Buhay ang nakataya sa mga handang bumoto sa eleksiyon, ha! ‘Wag natin silang pahirapan, lalo na ang mga matatanda, buntis, PWDs at mga frontliners sa eleksiyon!

“One-stop shop” para sa mga OFW, oks!

ni Imee Marcos - @Imeesolusyon | May 26, 2021

Hanggang ngayon, marami pa ring hassle sa target na pagtatayo ng Department of Overseas Filipinos o DOFIL. Unang-unang ay nakaaabala ang isyu ng teritoryo sa mga ahensiya ng gobyerno.

Tayong nasa Senado, willing i-push ang sinertipikahang urgent ni Pangulong Rodrigo Duterte na DOFIL. Para kasi ‘yan sa ating mga kababayang OFWs, kaya go tayo!

Saka bilang konsiderasyon sa mga hinaing ng ating mga OFW, suportado nating lahat sa Senado ang DOFIL. Kailangan nila ng one-stop shop na pupuntahan at hindi ‘yung paikut-ikot sa iba’t ibang ahensiya ng gobyerno para sa kanilang hinihinging tulong.

Pero, ano magagawa natin kung nag-aaway-away sa teritoryo ng mandato at badyet ang mga ahensiya ng gobyerno? Ayaw pa rin kasing bitawan ng kasalukuyang mga departamento, tulad ng DOLE, DFA, at DSWD ang mga ilan sa kanilang mga nakakabit na ahensiya.

Ang hindi nila nakikita, kapag na-consolidate o pinagsama-sama na ang mga ahensiyang ‘yan, tiyak na menos-gastos na ang gobyerno, magagamit pa sa pondo para mailikas ang mga OFWs na gusto nang makauwi sa ating bansa.

‘Yun nga lang, paano tayo uusad niyan, kung ang ahensiya ng gobyerno, eh, ayaw bitawan ang mga attached agencies nila na tulad ng Philippine Overseas Employment Administration (POEA), Overseas Workers’ Welfare Administration (OWWA), at Labor Affairs Bureau sa ilalim ng DOLE; Office of Migrant Workers’ Affairs and Commission on Filipinos Overseas sa ilalim ng DFA; International Social Services Office sa ilalim ng DSWD; at ang Office of Muslim Affairs sa ilalim ng tanggapan ng Pangulo.

Kung hindi mawawakasan ang aberyang ‘yan, walang kahihinatnan ang DOFIL. Pero habang ganyan kagulo, IMEEsolusyon dito ang palawakin na lang ang POEA bilang National Overseas Employment Authority (NOEA) na mas matipid pa.

Lalo na’t nahaharap tayo sa marami pang problemang pampinansiyal kapag nagpatuloy pa itong mga dagok ng pandemya sa ating bansa. Aba, push na muna natin ang NOEA. Kaysa naman itodo na natin dito ang lahat sa nagkakagulo pang pag-apruba sa DOFIL.

Pagsekreto sa publiko ng brand ng bakuna? no way!

ni Imee Marcos - @Imeesolusyon | May 24, 2021

Heto na naman ang Department of Health, may bagong pakulo na ‘wag nang ipaalam sa publiko kung anong brand ng COVID-19 vaccine ang ituturok sa kanila. Para raw hindi maging choosy at pa-iniksiyun na kung ano ang available. No way!

FYI lang, DOH, ang bawat pasyente ay may karapatang malaman kung anong klaseng bakuna ang ituturok sa kanila! Juice ko noh, tigilan nila tayo. Alam nilang pang-emergency use lang ‘yan! ‘Di ba nga, wala pang total commercial clearance ang ibinigay ng WHO sa kahit anong brand ng bakuna? Hello!

Kailangan pa bang i-memorize ‘yan? Sob­rang unethical o labag sa prinsipyo na sadyang kulang ang ibibigay na impormasyon sa bawat pasyenteng Pilipino. Emergency use authorization o EUA pa nga lang ‘yan, ipagkakait pa ba ang brand?

Reminder, dapat malaman ng publiko kung ano ang mga banta pati ang mga benepisyo ng bawat bakuna kontra COVID-19, upang maka­pagbigay ang bawat pasyente ng tinatawag na informed consent o mulat na pagsang-ayon bago mabakunahan. Kung kulang na sa umpisa ang impormasyon, pati pag-aaral ng bisa at epekto ng mga bakuna eh maantala. Ano ba talaga ang itinatago?

Papaano tayo pipirma ng ‘consent form’ kung kulang ang impormasyon nakalahad sa atin?

Eh, kahit vaccine card may mga puwang para pangalanan ang brand, manufacturer, batch number at lot number pa? Paano ‘yan isusumite ng maayos? Ibig bang sabihin, itatago ang mga vial o lalagyan ng mga bakuna, aalisin ang tatak, itatapon ang mga kahon? Nagpapatawa ba kayo, DOH?

‘Yan na lang ba ang naiisip na paraan ng DOH para hindi na pumalag at hindi maging choosy ang tao sa bakuna? Eh, mas matatakot magpabakuna ang tao niyan, at hindi na magtitiwala sa ahensiya. Ang publiko ay mas nag­­titiwala na tuloy sa nababasa nila sa social media tulad ng Facebook, kaysa DOH! Hay naku!

Pero, IMEEsolusyon natin d’yan, dapat ayusin pa ng DOH ang kanilang information campaign sa pagpapabakuna, dahil hindi pa rin nalilinawagan ang taumbayan na kahit anong vaccine, gawa man sa U.S. o sa China ay epektibo sa pagpababa ng tiyansansang ma-ospital kahit mahawaan ng COVID.

Kailangan din mahikayat ang mga eksperto at kinatawan sa medisina na makapagsasalita sa kahalagahan ng kahit anong klaseng bakuna laban sa virus. Ipa-brodkas o isapubliko na ‘yan, ulit-ulitin lang. Bilib me, may epekto ‘yan! Agree?