Krisis sa edukasyon sa ‘Pinas, bigyang-pansin!

ni Imee Marcos - @Imeesolusyon | July 21, 2021

Nabulabog tayo kamakailan sa report ng World Bank na may krisis sa edukasyon sa Pilipinas kung saan binanggit nitong kulelat ang mga estudyanteng Pinoy o mahina sa asignaturang Science, Math at Reading. Juicekoday!

Paano ba naman hindi matataranta ang Department of Education at Malacañang, eh, i-report ba naman ng World Bank na 80 percent ng mga Pilipinong estudyante ay hindi nakaabot sa minimum proficiency level.

Nakita umano ito sa assessment noong 2018 at 2019, kung saan lumahok ang Pilipinas sa Program for International Student Assessment (PISA) noong 2018 at sa Trends in International Mathematics and Science Study noong 2019. Sumali rin ang ating bansa sa first cycle ng Southeast Asia Primary Learning Metrics o SEA-PLM noong 2019.

Mas nakakaloka nang sabihin ng World Bank na lumala ang krisis sa edukasyon sa ating bansa dahil sa pandemya sabay banggit na 10 hanggang 22 percent lang ng mga estudyante sa Grade 4, 5 at 9 ang naka-iskor ng above minimum proficiency.

Take note, mga friendship, kumambiyo ang World Bank at nag-sorry nang palagan ang kanilang report ng DepEd. Nilinaw ni Education Secretary Leonor Briones na hindi man lang sila kinonsulta ng WB nang ilabas ang naturang report gayung luma ang mga datos na ginamit nito!

Pero, sa ganang atin, true namang na-‘wow mali’ ang World Bank. Gayunman, kailangan tayong hindi magpabaya at i-maintain natin o mas i-improve ang kalidad ng edukasyon sa ating bansa.

At nito ngang nagdaang hybrid hearing sa Senado, kamakailan, natuon ang pansin sa pangangailangan ng pagkakaroon ng ‘common language’ sa mga mag-aaral. Eh, ‘di ba, may 171 tayong wika o dialects at sa nasabing bilang, apat na lang ang hindi ginagamit?

Nakikita nating IMEEsolusyon para mas mapabilis at mapataas ang grado sa mga exam ng mga bata, eh, desisyunan na ng Department of Education kung anong ‘common language’ ang gagamitin sa pag-aaral ng mga estudyante na kanilang mas maiintindihan.

Reminder, ang common language na mapipili ng DepEd ay dapat balanse sa mga diyalekto ng mga mag-aaral sa iba’t ibang rehiyon, para mas makatulong itong magpaangat sa edukasyon ng mga mag-aaral sa Pilipinas. Agree?

Mga hakbang para sa COVID-proof na 2022 elections, paspasan na!

ni Imee Marcos - @Imeesolusyon | July 19, 2021

Kaunting kembot na lang ay eleksiyon 2022. Ilang buwan na lang October na at maghahain na ng kandidatura para sa mga posisyong national at local.

Ngayong may pandemya, hoping tayo na hindi nito maudlot at hindi maging magulo ang halalan, o malagay sa peligro ang lahat ng mga kandidato at botante.

Maraming kinahaharap na hamon ang Comelec ngayon dahil nga sa iba’t ibang patakaran ng bawat LGUs ngayong may pandemya. ‘Wag naman sanang maging dahilan ang mga ito para magkaaberya ang botohan.

Unang-una, sa kampanya pa lang, hindi pa batid kung paano ang magiging sistema dahil wala nang rally-rally ng libu-libo. Singkuwenta katao lang ang papayagan, limitado na ang lahat.

Kombinasyon na ngayon ng face-to-face at online campaigning. As in, bawal na ang beso-beso, halik sa mga bata at pakikipagkamay.

Well, kailangan habang may natitira pang panahon, bilisan na lalo ng ating komisyon ang pagkakasa sa lahat ng mga dapat na gawing guidelines para iwas sa hawaan. Ganitong gipit na tayo halos lahat sa oras, IMEEsolusyon ang pinu-push nating ilang hakbang para sa COVID-proofing, ‘ika nga, ng election.

At kabilang nga dyan ang inaasahan natin na agarang pagpapasa ng early voting bill sa pagbabalik ng sesyon sa Senado nitong Hulyo kung saan mauuna ang mga senior citizen, PWDs, buntis at katutubo sa pagboto.

Ikalawang IMEEsolusyon, lahat ng LGUs, ilatag na ang kani-kanilang guidelines para sa COVID-proof elections at baka naman puwedeng isumite na nila ito sa kinauukulan para naman hindi na mangapa ang bawat kandidato at mga botante sa mga dapat gawin sa campaign period pa lang.

Ikatlong IMEEsolusyon, ang kooperasyon at pagtutulungan ng lahat para maging ligtas tayo sa virus. Kumpiansa naman tayo na tulad sa naging plebisito sa Palawan, um-okey naman ito at naka-survive sa gitna ng pandemya. Tayong mga Pinoy pa ba? Keri natin ito!

Stop na muna ang VAT sa langis habang may pandemya, pls. lang!

ni Imee Marcos - @Imeesolusyon | July 14, 2021

Pang-walong magkakasunod na linggo na itong oil price hike. At hindi natin maisasantabi ang dagdag-pasanin at pag-angal ng ating mga kababayan.

Eh, kahit kasi lumuwag ng kaunti ang restriksiyon sa community quarantine, marami pa ring walang trabaho at walang pinagkakakitaan. Kaya dagdag-pahirap ang oil price increase sa gastusin ng ating mga kababayan.

Hay talaga naman, pahirap na nang pahirap ang buhay! At ang panibagong oil price hike ay awtomatikong may domino-effect na pagtaas-presyo ng mga bilihin, pasahe, agrikultura at iba pang essentials. Juicekoday!

Paano na lang ang mga super-hirap na halos wala nang makain? Nitong Martes, nagmahal ang gasolina ng P1.15 kada litro, P0.60 naman sa kada litro ng diesel at P0.65 sa kada litro ng kerosene. Pero kung pagsamahin lahat ng price hike mula Enero, pumalo na sa P13 kada litro ang itinaas ng gasolina, P10 naman sa kada litro ng diesel, at P9 sa kada litro ng kerosene.

Hindi natin mapigilan pa sa ngayon ang oil cartel, na matagal na nating sakit sa ulo. Automatic nang magmamahal ngayon ang bilihin.

In the meantime, IMEEsolusyon para maibsan ng kaunti ang bigat ng krisis na dulot ng oil price hike, makabubuting suspendihin na muna nang isang taon ang Value Added Tax sa oil products.

Siguradong malaking ginhawa ito sa ating motorista, konsiyumer at naghihikahos nating mga kababayan. ‘Di ba? Lalo na’t hindi pa natin batid kung kailan matitigil ang pamemerwisyo ng pandemyang ito! Ewan ko nga ba, parami nang parami ang variant ng Covid-19, ‘kaloka!

Harinawa’y ikonsidera ng ating kinauukulan ang suspensyon sa VAT. Lalo na’t wala nang mahuhugot pa ang ating mga konsiyumer at motorista, talagang super-said na ang bulsa!