May Delta variant na nga, may tax variant pa, ‘kalokah!

ni Imee Marcos - @Imeesolusyon | July 27, 2021

Umuusad at hindi pa halos nakababangon ang ating export-industry, tila mabobokya pa ang kakarampot nilang kita.

Eh, bakit kamo? Biruin ninyong alisin ba naman ng BIR ang 12% exemption sa value added tax na nagpapababa sa halaga ng mga raw materials, packaging supplies at iba pang serbisyo sa mga export-oriented manufacturers, kabilang ang critical healthcare supplies?! Ano ba!

Aba, eh, kung may Delta variant na banta ngayon sa ating kalusugan, eh, ito nama’y tila “tax variant” sa negosyo ng ating mga exporters. Itong bagong sulpot na regulasyon sa buwis o ang ‘BIR regulation 9-2021’ ang malaking banta sa unti-unti pa lang na bumabangong export industry ng bansa.

Naghihingalo na nga ang industriya, babawiin pa ng ‘tax variant’ ‘yung kakarampot na benepisyo ng mga exporter. Lahat mauuwi lang sa wala! ‘Kalokah!

Tulad na lang nitong mga garment exporters na nagsikap na makaagapay sa pandemya. Nawalan sila ng mga orders para sa ginagawa nilang damit, kaya pinalitan nila ng mga PPE, lab gowns at surgical masks para lang mabawasan ang masesesante sa trabaho at matuloy pa rin ang pagsuweldo sa mga natirang empleyado.

FYI, IMEEsolusyon sa kanilang proteksiyon vs ‘tax variant’, eh, ‘yung ating itinutulak na Senate Bill 1708 or ang “Healthcare Manufacturing and Pandemic Protection Act”, na noong isang taon pa natin naihain.

Hindi lang ito makahihikayat ng mga foreign investor, kundi makatutulong din sa pagpapanatili ng trabaho sa Pilipinas!

Take note, sa ilalim ng panukala, kapag may pandemya o anumang health emergency, lahat ng ibinebenta ng mga exporter na critical healthcare products sa loob o sa labas man ng bansa ay ituturing na export sales kaya mabibigyan ito ng exemption sa VAT at iba pang bayarin. At, huwag ka, and’yan pa rin ang iba pang export incentives o panghihikayat sa negosyo.

Saka, ang ating mga exporter sa special economic zones ay puwedeng hanggang 80% ang gawing produksiyon para sa lokal na pangangailangan. Maikakarga pa rin ito bilang export sale requirements na nakasaad sa ating batas.

At higit sa lahat, ang ating panukala ang mag-oobliga rin sa gobyerno na unahing bumili ng mga healthcare supplies sa mga local manufacturer, basta sure lang na hindi lalampas ng 25% ang presyo nila kumpara sa pinakamababang tawad ng mga foreign supplier.

Aba, eh, kung noon pa sana bumili ang DOH sa ating mga local manufacturers na kapareho lang ang produkto at mas mura, hindi pa sila nakaladkad sa kontrobersyang nag-overpriced daw ang pagbili ng PPEs na nagkakahalagang Php1.8 million, ‘di ba?

Dapat paghandaan ang super-scary na calamity!

ni Imee Marcos - @Imeesolusyon | July 23, 2021

Nakababahala na ang kaliwa’t kanang kalamidad na nangyayari sa iba’t ibang panig ng mundo. Kamakailan, matindi ang pagbahang naranasan sa Europa kung saan maraming nalagas na buhay. May wildfire sa Australia at U.S., heatwave sa Canada at iba pang hindi pangkaraniwang pangyayari sa ibang bansa.

Sa atin sa Pilipinas, heto nga at tag-ulan na naman at kasabay ng COVID-19 ang pananalasa ng ilang mga bagyo kabilang ang Fabian at ang tinatawag na panahon ng Habagat. Marami na tayong pinagdaang pagsubok sa mga bagyong hindi natin malilimutan tulad ng nakakikilabot na pamiminsala ng Ondoy at Yolanda.

Eh, di ba nga ang mga kababayan natin sa Tacloban, Leyte ay tinamaan ng matinding pagbaha dulot ni “Yolanda” at ng storm surge na dala-dala nito? Hindi biro ang delubyong nangyayari kaya’t napakaimportanteng hindi natin ito babalewalain, ‘di ba? Kahit pa may COVID, kailangang tutok din tayo sa usapin sa Climate Change.

May mahalagang papel na gagampanan ang Pilipinas bilang isa sa mga signatory ng Paris Accord upang masolusyunan ang problema sa global warming, kung saan merong maliliit na isla sa Pacific Ocean ang nanganganib.

Ang global warming ay ang pagtaas ng temperatura ng himpapawid at ng mga karagatan sa ating mundo. Ang pangunahing sanhi ng global warming ay ang pagtaas ng lebel ng carbon dioxide at iba pang greenhouse gases na nagmula sa pagsusunog ng mga produkto mula sa petrolyong langis, pagsusunog ng kagubatan at iba pang kagagawan ng tao.

Epekto rin ng global warming ang pagtaas ng sea level, pagbabago sa dami ng ulan, madalas na pagbaha, matinding pagbugso ng init, pagdami ng bagyo, pagkatunaw ng mga dambuhalang ice glaciers, at iba pang super-scary na calamity!

IMEEsolusyon natin, eh, magmalasakit tayo sa ating kalikasan at kapaligiran. Nakasalalay sa ating mga kamay para maiwasang lumala ang pagkasira ng kalikasan na magdudulot ng climate change, ‘di ba! Kapag nagpabaya tayo at wala tayong ginawa, lalala ang epekto ng global warming sa mga tao, at babalik ito sa ating lahat. Tayo ang mabibiktima ng mga kalamidad.

IMEEsolusyon na gawin natin ang ating parte upang maiwasan ang paglala ng global warming. Ito ay maaaring simple lamang, tulad ng paggamit ng mga environment-friendly na kagamitan at ng pag-iwas sa mga straw at plastic.

Malaki rin ang magiging role ng mga tatakbo sa eleksiyon at mapapaupo sa puwesto. Hoping tayo na sinuman ang manalo at maging bagong lider sa susunod na taon, tututukan nito ang climate change!

Krisis sa edukasyon sa ‘Pinas, bigyang-pansin!

ni Imee Marcos - @Imeesolusyon | July 21, 2021

Nabulabog tayo kamakailan sa report ng World Bank na may krisis sa edukasyon sa Pilipinas kung saan binanggit nitong kulelat ang mga estudyanteng Pinoy o mahina sa asignaturang Science, Math at Reading. Juicekoday!

Paano ba naman hindi matataranta ang Department of Education at Malacañang, eh, i-report ba naman ng World Bank na 80 percent ng mga Pilipinong estudyante ay hindi nakaabot sa minimum proficiency level.

Nakita umano ito sa assessment noong 2018 at 2019, kung saan lumahok ang Pilipinas sa Program for International Student Assessment (PISA) noong 2018 at sa Trends in International Mathematics and Science Study noong 2019. Sumali rin ang ating bansa sa first cycle ng Southeast Asia Primary Learning Metrics o SEA-PLM noong 2019.

Mas nakakaloka nang sabihin ng World Bank na lumala ang krisis sa edukasyon sa ating bansa dahil sa pandemya sabay banggit na 10 hanggang 22 percent lang ng mga estudyante sa Grade 4, 5 at 9 ang naka-iskor ng above minimum proficiency.

Take note, mga friendship, kumambiyo ang World Bank at nag-sorry nang palagan ang kanilang report ng DepEd. Nilinaw ni Education Secretary Leonor Briones na hindi man lang sila kinonsulta ng WB nang ilabas ang naturang report gayung luma ang mga datos na ginamit nito!

Pero, sa ganang atin, true namang na-‘wow mali’ ang World Bank. Gayunman, kailangan tayong hindi magpabaya at i-maintain natin o mas i-improve ang kalidad ng edukasyon sa ating bansa.

At nito ngang nagdaang hybrid hearing sa Senado, kamakailan, natuon ang pansin sa pangangailangan ng pagkakaroon ng ‘common language’ sa mga mag-aaral. Eh, ‘di ba, may 171 tayong wika o dialects at sa nasabing bilang, apat na lang ang hindi ginagamit?

Nakikita nating IMEEsolusyon para mas mapabilis at mapataas ang grado sa mga exam ng mga bata, eh, desisyunan na ng Department of Education kung anong ‘common language’ ang gagamitin sa pag-aaral ng mga estudyante na kanilang mas maiintindihan.

Reminder, ang common language na mapipili ng DepEd ay dapat balanse sa mga diyalekto ng mga mag-aaral sa iba’t ibang rehiyon, para mas makatulong itong magpaangat sa edukasyon ng mga mag-aaral sa Pilipinas. Agree?