‘Out of this world’ na lang palagi ang panuntunan ng IATF

ni Imee Marcos - @Imeesolusyon | August 20, 2021

Nagbabadyang palalawigin na naman ang ECQ sa Metro Manila oras na matapos na ito ngayong araw, kaya kabado na naman ang marami dahil ang tanong nila, kaya pa ba ng badyet na makapagbigay-ayuda?

Lalo na naman ang MSMEs o ‘yung Micro Small and Medium Enterprises tulad ng mga nagkakarinderya, may sari-sari store, at iba pang maliliit na negosyo. Daing nila, naghihingalo na lalo ang kanilang mga pangkabuhayan.

Ito ring LGUs, kahit naunawaan nila ang purpose ng lockdown, hilung-hilo na if ano naman ang mga susunod na ibababang patakaran sa dami ng community quarantine na dagdag-pahirap sa mga nasasakupang ka-barangay dahil hindi na sila makagalaw para makapagtrabaho.

‘Yun nga lang, hindi rin maiaalis na problemado ang bawat barangay at lalo na ang maliliit na negosyante, dahil talagang sagad na ang kanilang mga pinansiyal, ‘di ba!

Pero sa dami kasi ng iba’t ibang ahensiya ng gobyerno na may kani-kanyang rules tuwing may lockdown, tulad sa mga checkpoint, sa curfew, sa mga safety protocols sa bawat barangay, sa transportasyon, at iba pa, eh, tila sabog at nahihilo na ang mga LGUs at ating mga kababayan sa dami ng do’s and don’t’s.

Eh, sa atin naman, IMEEsolusyon para mas maging klaro at mas malinaw ang baba ng utos o bagong mga patakaran sa mga community quarantine, mas makabubuting isali na ang mga LGUs at MSMEs sa Inter-Agency Task Force o IATF para rin naman makonsulta sila.

Unang-una, nabubulaga na lang ang mga MSMEs, eh, number one silang tatamaan kapag may mga bagong lockdown, sapul agad ang kanilang mauunsiyameng kita. Kaya mas magandang isali na sila sa IATF.

Ikalawa ‘yung LGUs, takang-taka rin tayo kung bakit hindi sila kasali sa IATF gayung sila ang direktang nagpapatupad ng mga lockdown sa bawat nasasakupang barangay. Dapat meron silang malaking ‘say’ sa IATF.

Need na makasama sila sa IATF dahil sila ang direktang nakakakita ng sitwasyon kapag nagpatupad ng lockdown, at para rin naman hindi na maging ‘out of this world’ ang mga panuntunan ng IATF.

Saka ang IATF, eh, puro naman cabinet members ang miyembro niya, eh, meron silang kani-kanyang trabaho na mas dapat nilang tutukan. Bakit hindi na lang gawing IMEEsolusyon, eh, bumuo na ng sariling Task Force na puro COVID lang ang tutok at hindi nahahati ang atensiyon, ‘di ba?

Hindi natin sinasabing buwagin ang IATF, ang kailangan talaga ay may command center, ‘ika nga. Pero gawing command center na makatotohanan, hindi ‘yung kung sinu-sino ang member.

Ano’ng say n’yo?

Uniform vaccination cards ng mga OFWs, paspasan ang paggawa!

ni Imee Marcos - @Imeesolusyon | August 18, 2021

Nakadidismaya ang sinapit ng ilan nating OFWs na pa-Hong Kong. Kung tutuusin, punumpuno na sana sila ng pag-asa na makapagtatrabaho at makakaalis na agad sa gitna ng pandemyang puro na lang pagsubok at hirap sa buhay.

Pero biglang naudlot ang pag-asa nilang makaalis nang tanggihan ng Hong Kong ang kanilang vaccination cards. Hay naku! Masaklap talaga, biruin n’yo naman, sinikap nilang makumpleto ang lahat ng requirements, kahit pa ipangutang nila para lang makaalis at makatrabaho sa HK, pero sa sinamang-palad, bulilyaso!

Eh, bakit ba naman kasi, hindi naagapan na malamang ang kailangan pala ng HK, eh, ‘yung uniform o hindi paiba-ibang vaccination cards! Santisima, na-delay tuloy ang kanilang pag-alis.

Magkakaiba talaga ang bawat bansa sa kani-kanilang panuntunan, lalo na sa uri ng bakuna laban sa COVID-19. Hindi naman natin puwedeng palagan ‘yun dahil ‘yun ang patakaran ng kanilang bansa. Ang kailangan nating gawin, eh, sundin talaga ang kanilang mga requirements.

At IMEEsolusyon d’yan ay gawin na ASAP ang uniform o iisang vaccination card na galing sa gobyerno. Papalitan nito ang mga iba’t ibang iniisyu ng napakaraming local government units. Para mapa-Hong Kong man ‘yan o iba pang bansa, eh, preparado na ang ating OFWs at maiiwasang ma-reject ang kanilang entry sa iba’t ibang bansa.

Remember din na kung walang klaro at komprehensibong database o kalalagyan ng impormasyon, magdudulot ito ng kalituhan sa mga OFW.

Umaapela tayo sa Department of Information and Communication Technology o DICT at DOH na paspasan ang paggawa ng uniform vaccination cards. Balita natin inaayos na, pero siguraduhin nilang bibilisan nila ang pagre-release nito para hindi naman matengga ng matagal sa pag-alis ang mga OFW.

‘Wag na nating paghintayin pa ang ating OFWs, wag nang magpatumpik-tumpik pa. Kilos na, para naman magkaroon na rin sila ng kaunting pag-asa na paunti-unting maka-ahon sa paghihirap na dulot ng pandemya. Plis lang!

PhilHealth, bayaran nang buo ang utang sa mga ospital, plis lang!

ni Imee Marcos - @Imeesolusyon | August 13, 2021

Malaki ang banta ngayon ng Delta variant sa ating bansa, kaya naman inilagay sa ECQ ang Metro Manila at may posibilidad pang palawigin ito ayon na rin sa Department of Health. Nakakatakot!

At sa harap nga niyan, patuloy pa rin ang pagtaas ng kaso ng COVID-19, at pinakamalaking naitala, eh, nitong Miyerkules na pumalo na sa 12,021 sa loob lang ng isang araw. Que horror!

Hindi malayong mas tumaas pa ang COVID-19 cases kaya marami na ring mga ospital ang puno, kasama na ang mga ospital sa Visayas at Mindanao na lumolobo na rin ang mga kaso ng mga tinamaan ng virus.

Dahil dito, nangangailangan ang mga ospital ng karagdagang hospital beds, mga oxygen tanks, PPEs at dagdag na mga nurses at hospital staff o healthcare workers. Pero limitado na at napakanipis na ng kanilang mga pondo. Eh, bakit kamo?

Numinipis ang pondo ng mga ospital dahil sa patuloy na hindi pagbabayad ng buo sa kanila ng PhilHealth. Eh, ang tanong, bakit matagal nang panahon, bigo pa rin ang ahensiya na magbayad ng buo?

Nagtataka naman tayo sa PhilHealth, sabi ng sabi na mayroon silang pera mula sa gobyerno, pati koleksiyon at buo rin daw ang kanilang reserve fund na P220 billion. Ano ang mga 'yan, press release lang? Ano ba?!

Kung patuloy na dededmahin ng PhilHealth ang responsibilidad nito sa mga ospital at pautay-utay pa rin ang gagawin ninyong pagbabayad gayung may pondo naman, IMEEsolusyon nating pananagutin kayo sa Senado. Pababalikin natin sila roon at tilad-tilarin natin ang detalye ng mga utang na hindi bayad.

Bubusisiin natin bawat sentimo bakit hindi pa rin nababayaran ang mga utang sa mga ospital gayung sila mismo ang nagdeklarang may pera naman kayo. Ano ba?! Plis naman, buhay ng bawat Pinoy ang nakasalalay sa hindi ninyo pagbabayad. Bakit hindi n'yo kayang bayaran ng buo gayung meron namang pondo? Aber, pakipaliwanag nga?