Ibigay agad ang SRA at hazard pay…‘WAG HINTAYING MAG-RESIGN NANG SABAY-SABAY ANG MGA HEALTH WORKERS

ni Imee Marcos - @Imeesolusyon | September 03, 2021

Sa ikatlong pagkakataon, dismayado tayo sa pangakong napako ng Department of Health. Hindi pa rin naibigay ang Special Risk Allowance ng mga health workers at hazard pay na ipinangako nilang ipamamahagi sa lalong madaling panahon.

Aba, mahigit lang sa 20, 000 ang uunahing bigyan ng SRA, pero reklamo to the max pa rin ang ating mga kababayang health workers dahil hindi pa rin tumupad ang DOH sa itinakda nitong petsa. ‘Ika nga nila, marami pa rin ang hindi nakatatanggap, lalo na ang mga nasa LGUs.

Kaya naman, natuloy ang protesta ng mga health workers nationwide! Eh, kung hindi magmamadali ang DOH na gawan ng paraan ang hazard pay at SRA na binigyan naman ng bilyones na budget at matagal na nilang hinihingi, nagbanta silang magpapatuloy ang kanilang kaliwa’t kanang protesta.

Reminder natin sa DOH, nakakapangambang totoo kapag hindi maibibigay agad ang kanilang hirit na mga benepisyo, lalo na kung itutuloy nila ang bantang mass resignations! Juicekolord, ano na ang mangyayari sa mga COVID-19 patients? Biruin ninyong sumampa na sa mahigit dalawang milyon ang mga Pinoy na na-COVID!

Ano ba talaga ang dahilan na hindi mabayaran ang health workers? Saan na ang pondong inilaan sa inyo, DOH? Hihintayin n’yo pa bang tuluyan silang magsipag-resign nang sabay-sabay?

Plis lang, isama rin sa bibigyan ng mga hazard pay ‘yung mga janitress, guards ng ospital at iba pang hospital staff dahil lantad din sila sa virus, ha?

IMEEsolusyon sa problemang ito, unang-una ay ‘wag mangangako ng petsa ang DOH na hindi kayang panindigan. Never maging paasa sa mga frontliners na buwis-buhay ang pagseserbisyo sa mga pasyenteng na-COVID.

Ikalawa, IMEEsolusyon na gawin nang puspusan ang pagbibigay-prayoridad sa mga isyu ng mga benepisyo. Hingin na ang tulong ng iba pang ahensiya ng gobyerno na may kinalaman dito, tulad ng Department of Budget and Management, dahil baka may mahugutan pa ng pera.

IMEEsolusyon din na i-push lang ng husto sa mga kasamahan nating mambabatas ang need na suporta para sa dagdag-pondo, ngayong pinag-uusapan ang National Budget para sa susunod na taon. Pagtulung-tulungan na nating malutas ito, plis lang. Patotohanin ang awa sa pagbigay ng SRA at hazard pay ng ating mga healthcare workers, now na!

Buwagin na ang PS-DBM!

ni Imee Marcos - @Imeesolusyon | September 01, 2021

Nakaka-tatlong hearing na ang Senate Blue Ribbon Committee para busisiin ang isyu ng overpriced na mga facemask at face shield na binili ng Procurement Service ng Department of Budget and Management o PS-DBM. Pero, malabo pa rin kung ano talaga ang dahilan kung bakit mahal ang pagkakabili nito?

Biruin n’yo naman, P27 ang kada piraso ng facemask na pagkakabili ng PS-DBM habang P120 naman sa bawat piraso ng face shield gayung may nabibiling P2 sa kada piraso ng facemask at P10-P20 naman sa face shield. Juicekolord ang laki talaga ng diperensiya!

Pero, ang nakakaimbyerna, paulit-ulit ang katwiran na may emergency kuno at dahil sa law of supply and demand na kung gipit and supply at maraming gustong bumili ay tumataas ang presyo sa pagbenta. Naku, may butas ang katwirang ‘yan, partikular na sa face shield!

FYI, ang Pilipinas lang ang gumagamit ng face shield na compulsory, ha? So, hindi maikakatuwiran na tumaas ‘yan dahil in-demand sa buong mundo! Duh!

Ang tanong natin, ano ba talaga ang dahilan ng overpriced na facemask at face shield na ‘yan?! Hmmm... I really smell something fishy! Biruin n’yo naman kasi kung bakit pa kayo sa abroad bumili, ‘di ba? Nagsumikap na nga ang ating mga garment factory na isantabi muna ang paggawa ng damit, gumastos pa para masuplayan ang sinasabi ninyong shortage ng mga facemask. Eh, anyare? Bakit hindi kayo sa kanila bumili? Naku, paki-explain nga ‘yan, PS-DBM?

Isa pa, malaking tanong sa atin, bakit ipinasa ng Department of Health ang malaking pondong P42 bilyon sa PS-DBM para sila ang mag-bid at bumili? At masaklap, nakabili na nga ang PS-DBM, pero ibinalik sa DOH at ibinebenta raw? Eh, umaangal ang mga LGUs, dapat libre na ang supply sa kanila, pero bakit kailangan nilang bilhin? Ano ‘yun?

Dahil d’yan, ‘yun, nakatengga na lang sa kanilang bodega ang mga imported PPEs at walang gustong bumili sa mahal ng presyo. Mind you, kuwestiyunable pa ang mga kinuhang tatlong supplier d’yan ng PS-DBM, ha? ‘Yung isang supplier ang negosyo ay nasa construction, tapos biglang naging medical na? OMG!

Hay naku! Kaya ang mga IMEEsolusyon d’yan, balikan ang National Procurement Law at kung tayo lang ang masusunod, buwagin na ang PS-DBM na ‘yan. Agree?

Repasuhin ang mapang-abusong quasi-judicial powers ng PhilHealth!

ni Imee Marcos - @Imeesolusyon | August 27, 2021

Dalawang ospital na hindi nabayaran ang utang ng PhilHealth ang nagsara, isa rito ay sa Samar at isa sa Davao. ‘Yan na nga ang ating kinatatakutan, nangyari na!

Hindi lang ‘yan, ayon kay Dr. Jose De Grano, presidente ng Private Hospitals Association of the Philippines Incorporated o PHAPi, may iba pa silang miyembrong ospital ang nagbabalak na talagang magsara pero sikap to the max pa rin na makahanap ng paraan para makaalpas sa problemang pinansiyal.

Juicekolord! Sobra na ang ating pag-aalala. Bakit ba usad-pagong ang PhilHealth, ano ba?! Eh, kung magbabayad kayo ng utang sa mga ospital, puwede ba na bilis-bilisan naman! ‘Kalokah! ‘Wag nang puro satsat at pangako, gawin na ‘yan ASAP!

Eh, kundangan ba namang kung anu-ano pang idinadahilan, may paimbe-imbestiga pa sa mga ospital. Hello! Ngayon n’yo lang ‘yan gagawin? Nasa kasagsagan tayo ng paglobo ng kaso ng COVID-19 dahil sa Delta variant, kung anu-ano’ng klaseng variant na ang lumalabas!

Aba, tila sumosobra at abuso na ang quasi-judicial powers na ‘yan ng PhilHealth! Unahin n’yo munang magbayad, por Diyos, por santo! Aanhin mo ang damo kapag patay na ang kabayo?! Heller! ‘Wag nang hintaying madagdagan pa ang mga magsasarang ospital!

Mabuti sana kung lahat ng Pinoy kayang magbayad ng buo sa kanilang hospital bills. Ano na lang ang gagawin natin d’yan kapag lahat ng ospital kumalas na sa PhilHealth at nawalan na ng diskuwento ang mga pasyente — COVID-19 man ‘yan o anumang sakit? Aber?

Pero anyways, IMEEsolusyon natin, repasuhin na ang mapang-abusong quasi-judicial powers ng PhilHealth. IMEEsolusyon din na ‘wag nang ituloy muna ang TSPC o temporary suspension of payment of claims ng PhilHealth na parang ginigipit, lalo na ang mga ospital.

Tila may katotohanan ang sinasabi ng PHAPi na nagtatago lang ang PhilHealth sa mga paimbe-imbestiga muna ng TSPC para maiwasan na tapusin na ang bayarin sa mga ospital.

Reminder, mamemeligro hindi lang kayong nasa PhilHealth, may kapamilya at kaanak kayong naoospital din. At kapag tuluyan nang kumalas ang mga ospital sa PhilHealth dahil sa inyong pagkakautang, saan tayo pupulultin pare-pareho, sa kangkungan?

Bilib tayo kay PhilHealth chair Dante Gierran, na mapagkakatiwalaang lingkodbayan, pero may ilang tao siya sa legal department ng ahensiya na kanyang kabaligtaran. Bayaran na ang mga utang ninyo sa mga ospital bago pa mahuli ang lahat, Plis lang!