Hangga't maaari ay 'wag munang umutang ngayong pandemya

ni Imee Marcos - @Imeesolusyon | September 18, 2021

Ngayong may pandemya at gipit na gipit ang ating mga kababayan, madalas na takbuhan, eh, 'yung mga lending companies na madaling mag-apply kahit sa cellphone lang.

Samu't sari ito sa cellphone at namamayagpag pa rin sila kung saan magpapakita lang ng dalawang government IDs, at magbibigay ng mga limang reference na may kaukulan ding contact number. Kabilang sa mga hinihinging reference ay mga kamag-anak, kaibigan at ka-trabaho.

Sa unang tingin, ikaw ay makaluluwag dahil mabilis nga naman maproseso at dahil sa dami nila nakatutuksong umutang dito, umutang doon.

Pero 'yun nga, aba, eh, base sa reklamong inilapit sa atin, kung umutang ng P5,000, halos tatlong libo o minsa'y kalahati na lang ang makukuha mo. Juicekolord, kaltas agad! At hindi lang 'yun, kapag nahuli ng pagbabayad, mayroon pang kasamang pananakot?!

Eh, ang siste pa ng mga lending company, tinatawagan nila lahat ng ibinigay na reference at minsan ay ipinahihiya pa ng husto ang taong nangutang sa kanila. Kumbaga, hina-harass ng mga ito ang mga umutang?! Juicekoday!

Kung ganito naman pala ang sistema ng mga lending companies, sa halip na makatulong, eh, lalo pang nagpapabaon sa nanghihiram ng pera at namamahiya pa!

Aba, kung ganyan rin lang, IMEEsolusyon d'yan, eh, 'wag na umutang sa ganyang mapanggipit na mga lending companies. Maigi pang sa kakilala o sa kaibigan na lang manghiram, pero siguraduhin mo namang ito rin ay iyong mababayaran sa petsang iyong itatakda.

IMEEsolusyon din na kung wala namang trabaho at wala ring katiyakang suweldo, 'wag na isubo ang sarili sa pag-utang sa ganyang mapang-harass na lending companies. 'Di ba?! Eh, kung may kakarampot na suweldo, matutunan nating pagkasyahin at ibadyet ng maayos. Magtanim tayo ng malunggay na puwedeng makain at iba pang mga gulay, mag-alaga ng mga sisiw sa bakuran at iba pa, 'di ba?!

IMEEsolusyon din sa mapanggipit na mga lending companies, ang mabantayan ang mga ito at puwede naman silang mapanagot sa kanilang mga panggigipit sa mga nanghihiram sa kanila! Ayon nga sa Securities and Exchange Commission (SEC) bawal ipahiya at i-harass ang mga nangungutang.

Pero kailangan na masiguro munang ang hiniramang lending companies ay lehitimo dahil kung hindi mababalewala rin ang reklamo sa SEC. Dapat ring masigurong may sapat na ebidensiya at mga dokumentong susuporta sa mga inirereklamong mga lending company at kailangang may valid government ID ang isang complainant.

Para naman maiwasan ang mga ganitong mga abala, iwasan na nating mangutang sa mga lending companies. Remember, mga dear, habang maiksi ang kumot, magtiis na munang mamaluktot.

Facemask, face shield, at iba pang PPEs, itapon nang maayos!

ni Imee Marcos - @Imeesolusyon | September 17, 2021

Heto na naman tayo, mula nang magpandemya noong nakaraang taon, nanawagan tayong ayusin na ang medical waste disposal. Pero nakadidismayang malaman, na mas tumaas pa pala ngayon ang medical waste sa bansa. Juicekolord!

Base sa isang report, mula June 1, 2020 hanggang July 31 sa taong ito, nakapagtala ng 1,697.20 metric tons kada araw ng kabuuang health care waste ang Pilipinas. Santisima!

Kasama na nga riyan ang PPEs, facemasks, face shield at maging ang mga syringe na ginagamit sa vaccination program.

Aminado naman ang Department of Environment and Natural Resources (DENR) na talagang mas dumami o mas tumaas ang mga medical waste sa ating bansa sa patuloy na pamiminsala sa atin ng COVID-19.

Nakababahala ito, ha? Delikado ito sa ating kalusugan, sa mga hayop at sa kalikasan! Reminder mga friendship, ang bawat hayop na mapipinsala ng mga medical waste ay katumbas rin ng posibleng kakapusan ng malinis nating makakain, tulad na lang sa karagatan.

Aba, eh, ‘di ba nga, maraming medical waste ang napupunta sa dagat at marine resources ang naaapektuhan? Nand’yan ang napuluputan ang mga pawikan, nakakain ang mga isda ng basura mula sa mga hospital na kanila ring ikinamamatay! Ilan lang ‘yan, ha? Eh, paano pa ang ating kalikasan? Juicekolord!

Habang sa tao, marami tayong kababayan na kahit may pandemya, eh, dahil sa kahirapan tuloy ang kanilang pangangalakal sa mga basurahan. Paano na kung makalkal nila ang mga medical waste na ‘yan, eh, ‘di nahawahan din sila ng veerus! Nakupo! Que Horror!

IMEEsolusyon, bukod sa pagsasaayos ng DENR ng proper medical waste disposal, ihirit na rin natin sa mga LGUs na mas maging responsible sa kanilang mga nasasakupan at mas maging istrikto sa tamang pagtatapon nito. Ipa-segregate o ipahiwalay natin ang mga medical waste

sa normal na mga basura sa bawat bahay.

Pakiusapan nawa ng LGUs ang bawat barangay na maging istrikto sa medical waste segregation. Palagyan na rin natin ng mga label ang mga medical waste kung kinakailangan para makapag-ingat rin ang ating kababayang garbage collector para hindi mahawa ng virus.

Kung may mga iresponsable namang citizens na nagtatapon ng medical waste sa alinmang water ways at karagatan, warningan sila at kung walang kadala-dala at paulit-ulit nilang gagawin, eh, kahit pagmultahin na kung matigas talaga ang ulo at ayaw sumunod.

Protektahan natin ang ating kalusugan sa deadly virus na ito na posibleng makuha sa mga medical waste, ingatan din natin ang kalikasan at mga hayop sa mga pakalat-kalat na basurang naging proteksiyon ng mga mamamayan sa pandemya. Protektahan din natin ang kalikasan.

Agree?

Libreng dialysis, itinampok sa kaarawan ni Apo Marcos

ni Imee Marcos - @Imeesolusyon | September 15, 2021

Sa kasagsagan ng pandemya, maraming kababayan nating may iba’t ibang sakit ang nahihirapan ngayon maka-avail ng mga tulong-pinansiyal para sa kanilang karamdaman.

Saka siyempre, mas inuuna ngayong asikasuhin ng ating pamahalaan ang mga pasyenteng may COVID-19, lalo na’t ang virus ay talaga namang naglalagay sa peligro sa buhay nating lahat, ‘di ba?

Dahil sa kaliwa’t kanang lockdown, maraming nawalan ng trabaho. Kaya naman, pati ang pagpapagamot ng hypertension, kidney diseases at iba pang sakit na nangangailangan ng dialysis, eh, kapos na sila. Maging ang mga pilantropong tumutulong sa kanila, nagtitipid na rin.

Aba, eh, hindi hamak na mahal talaga ng pagpapa-dialysis at halos mabaon sa utang ang mahihirap nating mga kababayan para mamintina ito.

Magkano na nga ba ang pagpapa-dialysis ngayon? Hindi ba nagkakahalaga ito ng hindi kukulangin sa P3, 000 kada session? Santisima, eh, pano na lang ang mga kababayan nating kahit pambili ng pagkain ay kinakapos, juicekoday, kawawa talaga!

IMEEsolusyon sa pansamantalang walang mapagkunan ng pambayad sa dialysis, harinawa’y ang dalawang araw na pamimigay natin ng libreng dialysis ay pantawid man lang sa kawalan ng pambayad at hoping tayo, na nakabawas din ito sa kanilang pag-iisip saan huhugot ng pera.

Itinaon natin ang libreng dialysis sa kaarawan ng aking ama at mahal na si dating Pangulong Ferdinand Marcos tuwing a-onse ng Setyembre na halos tatlong taon na nating ginagawa sa National Kidney and Transplant Institute o NKTI.

Laking pasalamat ng NKTI sa 2-day event na natulungan ang mahigit 300 pasyente natin sa hemodialysis at peritonial dialysis na anila’y malaking bagay kahit paano, para madugtungan ang buhay ng mga can’t afford nating mga kababayan.

‘Ika nga, ang maliit mang bagay na tulong ay makababawas din sa mga alalahanin at problema ng mga naghihikahos nating kababayan ngayong may pandemya, ‘di ba!

‘Wag mawawalan ng pag-asa kahit may pandemya, basta tulung-tulong tayo sa abot ng ating makakaya, kahit paano ay makapagbibigay tayo ng ginhawa! Keri natin ‘yan!