Mga tiangge, payagan na para sa dagdag-kita

ni Imee Marcos - @Imeesolusyon | October 20, 2021

Dahil lumuluwag na ang mga community quarantine, kahit malayu-layo pa ang Pasko at hindi pa nga sumasapit ang paggunita sa Undas, payagan na natin ang operasyon ng mga tiangge. Bakit 'kanyo? Aba, eh, para naman pandagdag-trabaho sa ating mga kababayan.

Ang sabi nga ng DTI, wala namang pagbabawal ang IATF sa operasyon ng mga tiangge. At bilang chairman ng Senate committee on economic affairs, it's about time na bigyang-pagkakataon din ang maliliit na negosyante na kumita. Tulong din ito sa paunti-unting pagsigla ng ating ekonomiya.

Kadalasan, eh, huling linggo ng Nobyembre nag-uumpisa nang magsulputan ang mga tiangge para sa Holiday Season o Kapaskuhan. Pero this time, kung maaga natin silang papayagang magbukas kahit nga wala pang Undas, magkakahanapbuhay na sila at kikita na.

Saka, pabor din 'yan sa ating mga konsiyumer o mamimili, 'di ba? Kasi kung maagang makakapamili ang ating mga kababayan para sa Kapaskuhan, eh, makakamura sila at menos gastos. Kasi nga, pagsapit ng Disyembre, dumodoble na ang presyo ng mga bilihin.

Agree naman ako sa hirit ng DTI na ang mga LGUs na ang dapat magdesisyon per barangay sa pagbubukas ng mga tiangge, dahil sila ang nakakakita sa dami ng mga tinatamaan ng COVID-19 sa kani-kanilang nasasakupan. Eh, kung nakikita naman nila na maglalagay lalo sa peligro sa virus ang tiangge, eh, 'di 'wag na.

Hindi rin kasi tayo dapat maging kampante kahit bumaba na ang COVID-19 cases, dahil nand'yan pa rin ang nakaabang na virus at anumang oras, eh, puwedeng maging sanhi ito ng panunumbalik ng paglobo ng numero ng mga tinatamaan ng nakamamatay na sakit, 'di ba?!

IMEEsolusyon naman d' yan, dapat obligado ang maliliit nating mga negosyante na makipag-koordinasyon sa kani-kanilang LGUs kung papayagan sila at kailangang matiyak na maipatutupad dito ang istriktong 'minimum public health standards'.

Sakaling aprubado ng LGUs, maiging makapagtakda agad ang mga lokal na pamahalaan ng kani-kanilang guidelines na dapat istriktong masusunod ng mga may tiangge at mga mamimili. Kailangang istrikto, ha? Dahil kung hindi ang inyo ring komunidad ang magdurusa sa COVID-19, 'di ba?!

IMEEsolusyon naman sa seguridad na magsisigurong masusunod ang health protocols, pagtulungan na ng ating kapulisan at mga barangay tanod ang pagbabantay sa mga pasaway sa social distancing at face masks. Plis 'wag na kayong malilingat dahil buhay ng bawat isa sa inyong komunidad ang nakataya. Agree?!

Mga botanteng OFWs, itrato nang maayos ng embassy officials!

ni Imee Marcos - @Imeesolusyon | October 18, 2021

Mahalaga ang papel ng bawat OFWs sa ating bansa. Sa ating panahon, itinuturing din silang mga bayani. Malaking bahagi ng remittance nila ang pumapasok sa kabang bayan.

Pero kamakailan, nawalan ng respeto ang ilang embassy officials, partikular sa OFWs sa Taiwan, nang sungitan at basta na lang palayasin nang maghabol para makapagparehistro at magkaroon ng tsansang makabahagi sa paparating na eleksiyon.

Nakalulungkot makita ang ganitong sitwasyon na sa isang iglap, kapwa pa Pinoy ang gagawa nito sa ating mga kababayan na inaasahan sanang sila ang magbibigay ng maayos na trato at proteksiyon sa ating mga kababayang OFWs. Ano ang nangyari?

Eh, ikatwiran ba naman ng embassy official sa Taiwan na last minute sila? Daing ng ating OFWs doon, hindi sila last minute dahil ilang araw bago ang deadline sila nagpuntahan o nag walk-in sa lugar para makapagparehistro, kundangan ba naman na dapat nagrehistro sila online at hindi na puwede dahil puno na.

Namasahe sila, nagsi-day off, at masigasig na magparehistro, pero ano ng dinatnan nila roon, na-humiliate pa sila? Napakaraming reklamo rin ang mga OFW sa Middle East na bumibiyahe galing sa malalayong lugar para lang makarating sa mga embahada ng ‘Pinas. Santisima! Bakit ganun ang trato sa ating mga kababayang OFWs?

IMEEsolusyon, Comelec, paki-check ninyo ang pangyayaring ‘yan at baka gawin din ‘yan sa iba pang bansa. Makisuyo na pagsabihan naman ang ating mga opisyales doon na nakatalaga sa registration na irespeto at itrato ng maayos ang ating mga kababayan, maayos na paliwanagan, at bigyan ng pagkakataong makapag-parehistro.

Reminder, registration pa lang, baka naman ‘pag mismong botohan na, maulit ang mga hindi maayos na trato sa ating mga kababayan! Pakisiguro na napapanatili ang pagpapahalaga sa ating OFWs.

IMEEsolusyon na sana ay mabigyan pa ng pagkakataong makahabol ang iba pa o baka puwedeng bigyang-ekstensiyon kung posible sa mga walk-in na gustong magrehistro. Pihadong marami pang OFWs ang gustong humabol.

Remember Comelec, inilaanan ang inyong ahensiya ng badyet ng ating pamahalaan para makapagbigay ng maayos na serbisyo sa ating mga kababayan, lalo na sa OFWs na bilyones ang kontribusyon sa ating ekonomiya. Dahil sa mga remittance ng OFW, nakakaahon ang ating ekonomiya. Alam naman nating mabilis na tutugon ang Comelec sa ating panawagan. Plis lang!

Problemado ang mga teachers at estudyante… Kailangang ilabas ng DepEd ang

detalyadong listahan ng mga naipamigay na gadgets.

ni Imee Marcos - @Imeesolusyon | October 13, 2021

Napakahalaga ng edukasyon, kaya kahit new normal na ano’ng paraan man ito, tuloy ang edukasyon o pag-aaral ng mga bata. At ayon nga sa DepEd, modular distance learning ang piniling opsiyon sa Basic Education-Learning Continuity Plan ng nasa mahigit siyam na milyong estudyante ngayong school year.

Sa modular learning, puwedeng printed o digital ang gamitin sa mga module. Eh, base sa pahayag ng DepEd, maraming magulang at estudyante ang pumili sa mga naka-imprentang module kasi nga maraming walang gadget, tulad ng laptop at tablet. Kung matatandaan ninyo bago pa man mag-pandemya, mega-push na tayong mabigyan ng libreng gadget ang mga estudyante at guro.

Sa panig ng DepEd, aminado silang malaking hamon sa kanilang pondo ang pagpapa-imprenta ng mga modules. Daing ng DepEd, mahal o mas magastos ito, unang-una sa papel, na may negatibong epekto rin sa environment — magastos sa ink, gayundin sa maintenance ng mga printing machines na napakahirap umanong imentina.

Kaya pinu-push ng DepEd ang gradual na pag-digitize na ng edukasyon sa Pilipinas, lalo na’t maraming bansa na rin ang gumagawa nito ngayong may pandemya at mas matipid pa nga raw.

Sa harap nito, gulantang tayo sa laki ng inihirit na pondo ng DepEd na nasa P11.3 bilyon para sa kanilang computerization program, mula sa kasalukuyang P5.6 bilyon. Mahigit pa sa doble ‘yan, ang laki, ha? Eh, hindi malayong mapagsuspetsahan ‘yan ng publiko.

Katwiran naman ng DepEd mula sa 37,221 computer packages nila ngayong taon, target nila itong itaas sa 109,140. At take note, nilinaw nilang hindi pa naidi-distribute ang lahat ng mga ito dahil katatapos lang ng bidding process?! Juicekoday, ano’ng petsa na?!

Noong 2019, inihayag ng ahensiya na nasa 3,800 ang computer packages na nai-deliver nila at 36,679 nga raw noong 2020. Sa ganang atin, hindi maitatangging mapagdududahan ang bagong hirit na badyet ng DepEd, pero para maalis ‘yan, IMEEsolusyon na ilabas ng ahensiya ang detalyadong listahan ng mga naipamahagi nang mga gadgets.

Agree tayo sa paglipat ng modular learning tungo sa digital, basta masiguro lang na transparent sa pondo, suportado natin ang badyet na ‘to. Saka IMEEsolusyon naman, eh, sana nga ay magawan na ng paraan ng DICT, NTC at telcos ang mabilis na connectivity, lalo na’t ang medium ng education sa iba’t ibang bansa ay digital na. Kaya natin ‘to! Pak!