Scholarship grant sa mga anak ng magsasaka, dagdagan!

ni Imee Marcos - @Imeesolusyon | October 25, 2021

Mga magsasaka ang isa sa pangunahing napakaimportanteng sektor ng ating bansa. Dugo’t pawis ang kanilang puhunan para masuportahan ang seguridad sa pagkain ng mga Pinoy.

At ngayon ngang ika-49 nang taon o halos kalahating siglo mula nang ilunsad ang Presidential Decree 27 para sa land reform o reporma sa lupa sa buong bansa, nakakadismayang hindi nabibigyan ng pansin ang mga anak ng mga magbubukid. Bakit kamo?

Aba, eh, imbes na matuwa, mas maraming farmers ang dismayado dahil sa kakarampot lang o nasa 33 lang ang inaprubahang scholarship ng Department of Agrarian Reform o DAR gayung libu-libong anak nilang benepisaryo nito ang nag-apply! Santisima, eh, 'no wonder' na pakonti nang pakonti ang mga batang magsasaka. ‘Di ba?!

Kung tutuusin, ang mga anak ng mga magsasaka ang susunod sa kanilang yapak o magpapatuloy ng mga nasimulan ng kanilang mga magulang at makapagbibigay pa ng mas advanced na kaalaman sa pagsasaka kung mas marami sana ang nagawaran ng scholarship. Pero iilan nga lang ang nabigyan.

Saka kapag nawalan ng interes at hindi nakapag-aral ng agrikultura ang kanilang mga anak, tatanda na ang mga magulang nila, magkaka-krisis sa mga bilang ng mga farmers at hindi rin malayong magka-krisis tayo sa pagkain sa hinaharap!

Takang-taka naman tayo na nasa P2.37 milyon lang ang ginastos sa scholarship grant, samantalang pinatulog lang ng DAR ang nasa P800 milyon nitong pondo sa kontrobersiyal na PS-DBM o Procurement Service-Department of Budget and Management.

Bakit naman ganyan ang DAR, nagdamot kayo sa libo-libong nag-apply na mga anak ng mga magsasaka lalo na't ang mahal ng matrikula ngayong may pandemya?! Wala ba kayong nakikitang magandang kahihinatnan ng scholarship grant?

At mas oks pa sa inyo na ilipat at itengga ang pondo sa PS-DBM, para lang palabasin na may nilaanan kayong proyekto? Ano bang meron d’yan? Reminder, nai-flag na ang mga pondong ‘yan ng COA ha! Ano ba!

But anyways, IMEEsolusyon ng DAR, eh, bumawi sa ating mga magsasaka sa pamamagitan ng paglalaan ng mas malaking pondo para sa scholarship grant sa inyong budget sa 2022.

Saka, plis silipin n’yo rin ang mga lupaing pansakahan na puwede pang ipamahagi sa mga magsasaka. Kung problemado kayo sa Bicol, Western Visayas at Eastern Visayas, puwede namang asikasuhin muna ninyo ang ibang rehiyon para naman tumaas ang accomplishment record ninyo. Remember, ‘Pinas ang may pinakamahabang land reform program sa buong mundo! Juicekoday!

Pahalagahan natin ang mga magsasaka at itodo na ang scholarship grants sa kanilang mga anak. Hay naku, 100% na garantiya na masusuklian tayo ng mas masaganang ani.

Agree?

Mga tiangge, payagan na para sa dagdag-kita

ni Imee Marcos - @Imeesolusyon | October 20, 2021

Dahil lumuluwag na ang mga community quarantine, kahit malayu-layo pa ang Pasko at hindi pa nga sumasapit ang paggunita sa Undas, payagan na natin ang operasyon ng mga tiangge. Bakit 'kanyo? Aba, eh, para naman pandagdag-trabaho sa ating mga kababayan.

Ang sabi nga ng DTI, wala namang pagbabawal ang IATF sa operasyon ng mga tiangge. At bilang chairman ng Senate committee on economic affairs, it's about time na bigyang-pagkakataon din ang maliliit na negosyante na kumita. Tulong din ito sa paunti-unting pagsigla ng ating ekonomiya.

Kadalasan, eh, huling linggo ng Nobyembre nag-uumpisa nang magsulputan ang mga tiangge para sa Holiday Season o Kapaskuhan. Pero this time, kung maaga natin silang papayagang magbukas kahit nga wala pang Undas, magkakahanapbuhay na sila at kikita na.

Saka, pabor din 'yan sa ating mga konsiyumer o mamimili, 'di ba? Kasi kung maagang makakapamili ang ating mga kababayan para sa Kapaskuhan, eh, makakamura sila at menos gastos. Kasi nga, pagsapit ng Disyembre, dumodoble na ang presyo ng mga bilihin.

Agree naman ako sa hirit ng DTI na ang mga LGUs na ang dapat magdesisyon per barangay sa pagbubukas ng mga tiangge, dahil sila ang nakakakita sa dami ng mga tinatamaan ng COVID-19 sa kani-kanilang nasasakupan. Eh, kung nakikita naman nila na maglalagay lalo sa peligro sa virus ang tiangge, eh, 'di 'wag na.

Hindi rin kasi tayo dapat maging kampante kahit bumaba na ang COVID-19 cases, dahil nand'yan pa rin ang nakaabang na virus at anumang oras, eh, puwedeng maging sanhi ito ng panunumbalik ng paglobo ng numero ng mga tinatamaan ng nakamamatay na sakit, 'di ba?!

IMEEsolusyon naman d' yan, dapat obligado ang maliliit nating mga negosyante na makipag-koordinasyon sa kani-kanilang LGUs kung papayagan sila at kailangang matiyak na maipatutupad dito ang istriktong 'minimum public health standards'.

Sakaling aprubado ng LGUs, maiging makapagtakda agad ang mga lokal na pamahalaan ng kani-kanilang guidelines na dapat istriktong masusunod ng mga may tiangge at mga mamimili. Kailangang istrikto, ha? Dahil kung hindi ang inyo ring komunidad ang magdurusa sa COVID-19, 'di ba?!

IMEEsolusyon naman sa seguridad na magsisigurong masusunod ang health protocols, pagtulungan na ng ating kapulisan at mga barangay tanod ang pagbabantay sa mga pasaway sa social distancing at face masks. Plis 'wag na kayong malilingat dahil buhay ng bawat isa sa inyong komunidad ang nakataya. Agree?!

Mga botanteng OFWs, itrato nang maayos ng embassy officials!

ni Imee Marcos - @Imeesolusyon | October 18, 2021

Mahalaga ang papel ng bawat OFWs sa ating bansa. Sa ating panahon, itinuturing din silang mga bayani. Malaking bahagi ng remittance nila ang pumapasok sa kabang bayan.

Pero kamakailan, nawalan ng respeto ang ilang embassy officials, partikular sa OFWs sa Taiwan, nang sungitan at basta na lang palayasin nang maghabol para makapagparehistro at magkaroon ng tsansang makabahagi sa paparating na eleksiyon.

Nakalulungkot makita ang ganitong sitwasyon na sa isang iglap, kapwa pa Pinoy ang gagawa nito sa ating mga kababayan na inaasahan sanang sila ang magbibigay ng maayos na trato at proteksiyon sa ating mga kababayang OFWs. Ano ang nangyari?

Eh, ikatwiran ba naman ng embassy official sa Taiwan na last minute sila? Daing ng ating OFWs doon, hindi sila last minute dahil ilang araw bago ang deadline sila nagpuntahan o nag walk-in sa lugar para makapagparehistro, kundangan ba naman na dapat nagrehistro sila online at hindi na puwede dahil puno na.

Namasahe sila, nagsi-day off, at masigasig na magparehistro, pero ano ng dinatnan nila roon, na-humiliate pa sila? Napakaraming reklamo rin ang mga OFW sa Middle East na bumibiyahe galing sa malalayong lugar para lang makarating sa mga embahada ng ‘Pinas. Santisima! Bakit ganun ang trato sa ating mga kababayang OFWs?

IMEEsolusyon, Comelec, paki-check ninyo ang pangyayaring ‘yan at baka gawin din ‘yan sa iba pang bansa. Makisuyo na pagsabihan naman ang ating mga opisyales doon na nakatalaga sa registration na irespeto at itrato ng maayos ang ating mga kababayan, maayos na paliwanagan, at bigyan ng pagkakataong makapag-parehistro.

Reminder, registration pa lang, baka naman ‘pag mismong botohan na, maulit ang mga hindi maayos na trato sa ating mga kababayan! Pakisiguro na napapanatili ang pagpapahalaga sa ating OFWs.

IMEEsolusyon na sana ay mabigyan pa ng pagkakataong makahabol ang iba pa o baka puwedeng bigyang-ekstensiyon kung posible sa mga walk-in na gustong magrehistro. Pihadong marami pang OFWs ang gustong humabol.

Remember Comelec, inilaanan ang inyong ahensiya ng badyet ng ating pamahalaan para makapagbigay ng maayos na serbisyo sa ating mga kababayan, lalo na sa OFWs na bilyones ang kontribusyon sa ating ekonomiya. Dahil sa mga remittance ng OFW, nakakaahon ang ating ekonomiya. Alam naman nating mabilis na tutugon ang Comelec sa ating panawagan. Plis lang!