Naghihingalong kumpanya, puwedeng utay-utayin ang 13th Month pay

ni Imee Marcos - @Imeesolusyon | November 2, 2021

Tuwing tumutuntong ang ‘BER months at nangangamoy Pasko, napapangiti tayong lahat dahil may inaasahan tayong 13th month pay at mga bonuses. Pero ngayong may pandemya, may inaasahan pa ba tayong 13th month pay? Siyempre, dapat lang!

Remember, mandatory sa ilalim ng Presidential Decree 851, ang mga may-ari ng kumpanya at establisimyento ay inaatasang bayaran ang kanilang mga empleyado ng 13th month pay, bago ang ika-4 Disyembre o mismong araw nito kada taon.

Take note, ang 13th month pay na itinakda ng batas ay hindi dapat bababa sa katumbas ng isang buwan o one-twelfth (1/12) ng total basic salary na kinita ng empleyado sa loob ng calendar year.

Saka, sa ilalim naman ng TRAIN LAW, ang 13th Month pay at iba pang bonuses ay hindi taxable basta hindi ito lalampas sa P90,000.

Pero, hindi natin maisasantabi na maraming kumpanya ang nagsara at maraming kumpanya ang nagbawas ng mga empleyado at kailangan nilang ‘maghigpit sinturon’, kaya problemado sila ngayon kung paano nila mababayaran ang 13th month pay.

Well, IMEEsolusyon natin d’yan, kung hindi kaya, aba, eh, puwede naman gawing ‘staggered’, painut-inot ang bigay, o hati-hatiin! Eh, ano ang magagawa natin kung talagang krisis tayo ngayon, ‘di ba?

IMEEsolusyon din natin d’yan ‘yung maliliit na mga negosyo, o ‘yung small and medium enterprises o SMEs, eh, puwede namang tulungan at pautangin ng ating pamahalaan, partikular na sa Small Business Corporation.

Ngayong may pandemya, magtutulung-tulong tayo, ‘ika nga, para-paraan lang ‘yan para makatalima tayo sa ating obligasyon. Malaking tulong ang 13th month pay sa mga empleyado para kahit paano’y maging masaya at mairaos ang pang-Noche Buena ng bawat pamilya.

Agree?

Palargahin ang COVID-19 testing capacity… Pagod na ang mga tao sa sistemang lockdown

ni Imee Marcos - @Imeesolusyon | October 29, 2021

Halos matatapos na ang taon, hindi pa rin matapus-tapos ang mga lockdown para kontrolin ang COVID-19 pandemic sa bansa. Bakit ba palaging ito ang takbuhan natin na solusyon sa pagkalat ng virus?

Bagama’t may magagandang bunga naman ang mga lockdown para makontrol ang virus, pagod na ang mga tao sa sistemang lockdown. Malaking abala sa buhay natin, trabaho at ekonomiya ang mga lockdown na ‘yan! Dapat tayong masanay mamuhay kasama ang virus!

At kahit ‘ika nga bumababa na ang kaso ng impeksiyon, lalo na’t dumarami na ang nababakunahan, patuloy pa rin ang lockdown. ‘Santisima! Aba, eh, nakakaumay na. Take note, tayo ang isa sa mga bansang may pinaka-mahabang lockdown kontra sa COVID-19. Sa ganang atin, over na ito, OA na!

Tanong lang natin, paano na lang tayo lalo na ang mahihirap nating kababayan? Mind you, ‘ika nga ng mga Bisaya, “Hurot na ang bulsa o wala nang mahuhugot si Juan para may maipakain sa kanyang pamilya kasi nga naiipit ng mga lockdown, ‘di makatrabaho!”

Saka pati ekonomiya natin, pabulusok na talaga. Reminder, bilang chairman ng Senate committee on economic affairs, need na nating ibangon ang ating ekonomiya. Marami na ang dumarating na bakuna at dumarami pa ang mga bakunado!

It’s about time na baguhin na natin ang sistemang ‘to ng lockdown sa pagkontrol sa COVID-19. ‘Ika nga ni Aling Nena, kailangan na nating kumayod, kumita para makabawi ng kaunti at makaahon sa tindi ng krisis na dulot ng pandemya!

IMEEsolusyon dito, stop na ang mga lockdown! Baguhin na natin ang estratehiya, paano? Sa halip na lockdown, ang COVID-19 testing capacity ng ating bansa ang paigtingin at siguradong maaga nating matutukoy ang mga may kaso ng impeksiyon at maagap silang maihihiwalay.

Pero para umusad ang pinaigting na testing capacity ng bansa, seryosohin nating mapondohan ito sa badyet para sa susunod na taon, ‘di ba? Ang mga lockdown, nakokontrol lang ang COVID-19, pero hindi naman ganap na nasusugpo. Puspusang testing ang kailangan para mapigilang kumalat ang virus.

Cash grant sa mga tsuper, pabilisin plis lang!

ni Imee Marcos - @Imeesolusyon | October 27, 2021

Hindi pa man tuluyang bumababa ang Alert Level 3 at nasa kasagsagan pa tayo ng pandemya, dagdag-pahirap na naman ang pagtaas ng presyo ng gasolina sa ating mga kababayang tsuper!

Hindi pa nga sila nakakabawi man lang sa kita, heto na naman ang oil price hike! Pang-walo na 'yan, ha? Remember, hindi sila pumasada sa sunud-sunod na mga lockdown hanggang marami nang nahilang jeep ang mga bangko at dumanas ng matinding hirap sa loob ng 20 buwan dahil sa pandemya.

Juicekolord, eh, wala na nga silang kita, may taas-presyo ng gasolina, kay dami pang dagdag-gastos, tulad sa plastic barrier, PCR test, alcohol, face shield, at iba pa.

Awang-awa tayo sa mga jeepney driver! Eh, 'di ba, iilan lang ang pinayagang jeep na makabiyahe at nauna pa ang mga colorum na mga bus at PUVs sa dating ruta ng mga tradisyunal na jeep? Saka matatandaan nyo ba na kasagsagan ng estriktong mga lockdown, eh, namalimos na rin sila? 'Kalokah!

At mas matindi pa, eh, linggu-linggo na nga ang oil price hike, wala man lang pampalubag-loob sa mga jeepney driver, at bawal pa ring lumabis sa 50% passenger capacity kahit bumaba na tayo sa Alert Level 3! Santisima, ano bang sistema 'yan DoTr at LTFRB! Hello! Maawa naman kayo sa kanila!

Mabuti na lang, nag-anunsiyo ang Development Budget Coordination Committee (DBCC) na magpapalabas ng P1-bilyong cash grants para sa mga tsuper ng Public Utility Vehicles (PUVs) mula sa bahagi ng 2021 national budget sa ilalim ng Support for Infrastructure Projects and Social Programs.

At ipamamahagi ang cash grants sa 178,000 tsuper ng PUVs gamit ang sistema ng Pantawid Pasada sa ilalim ng LTFRB. Salamat naman sa Diyos! Pero para hindi ito maudlot at matulad sa mga reklamo sa mga ayuda ng mga na-lockdown, IMEEsolusyon dito na gagawin nating bantay-sarado ang pamimigay nito.

Aabangan natin at ipu-push na mabilis nang mai-release ang nasabing cash grants ng mga tsuper ng jeepney sa nalalabing buwan ng taong ito. Kailangang ma-monitor talaga ito kasi baka mamaya usad-pagong ang pamamahagi o baka patulugin din ang pondo, eh, wala nang makain ang mga tatay at kuyang jeepney driver at mga pamilya nila! Plis 'wag naman nating hayaang mangyari na grasya na maging bato pa!