Gora na sa makabagong testing technology at magpabakuna laban sa virus na deadly!

ni Imee Marcos - @Imeesolusyon |December 01, 2021

May mass vaccination na! Inaasahan nating lahat ay magpapabakuna na plis lang! Harinawa!

Aba, 70% ng mga Pinoy ang target na mabakunahan bago matapos ang taong ito!

At sa ngayo’y nasa 40 milyon pa lang ang fully vaccinated o 36% ng tinatayang nasa 111 milyong Pilipino at aminin man natin sa hindi, mahihirapan tayong makamit ang nasabing target na herd immunity ngayong 2021.

Unang-una, dahil sa pag-aatubili o hesitancy ng karamihan na magpabakuna dahil sa takot sa adverse effects; ikalawa, problema sa paghahatid ng bakuna sa malalayo at bulubunduking probinsiya; ikatlo, ang kawalan ng imbakan ng mga bakuna; ikaapat, ang lumolobong kakapusan ng mga hiringgilya sa buong mundo.

Bagama’t, hindi natin inaalis na mula sa pinakamataas na 26,000 kada araw na nagka-COVID noong Setyembre hanggang sa isanlibo na lang at pababa pa ang impeksiyon, hindi tayo dapat maging kampante kahit pa lumuluwag na ang mga community quarantine at ating ekonomiya!

Bakit?

Bukod sa Delta variants, may panibagong variant na tinawag na Omicron na unang natukoy sa South Africa. Naghahanda na ang mga health expert sa senaryo na maging ang kasalukuyang mga bakuna ay maaaring hindi ganun ka-epektibo laban dito, na talaga namang nakakatakot!

Ngayong malapit na ang Pasko, baka dahil sa sobrang saya ng selebrasyon ay malimutan ang social distancing at iba pang health protocols, ‘wag naman, pagod na tayo sa lockdown!

Sa harap nito, para sa atin ay hindi sapat ang mass vaccination lang kundi makailang beses na nating sinabi na IMEEsolusyon na paigtingin pa ng massive COVID-testing para maagap na matukoy ang mga infected at maagap silang maihiwalay.

Dapat samantalahin na ng gobyerno at pribadong sektor ang alok ng World Health Organization na makabagong blood testing technology! Libre ang lisensiya sa pagpapagawa niyan na swak na IMEEsolusyon sa hindi patas na pamamahagi ng mga bakuna sa buong mundo, lalo na sa mas mahihirap na bansang tulad natin. Eh, bukod d’yan user-friendly o madali pang gamitin sa mga probinsiya. Hindi kailangan ng komplikadong equipment pang-laboratoryo.

May kasunduan na wala nang babayaran ang mga naghihirap na bansang kukuha ng lisensiya sa nasabing teknolohiya at tuturuan pa sila kung paano ito gamitin. Bongga, ‘di ba?!

Seryosohin natin ang paglaban sa pandemya at puspusan na, para hindi malusutan ng Omicron.

Gora na sa alok na makabagong testing technology at magpabakuna na laban sa virus na deadly!

Agree?

Ayudang pangkalusugan at pangkabuhayan, now na!

ni Imee Marcos - @Imeesolusyon | November 26, 2021

Bahagya nang lumuluwag ang community quarantine sa iba’t ibang panig ng ating bansa at lumuluwag na rin ng kaunti ang ating ekonomiya.

Dahil umuusad o kasisimula pa lang ng pagbubukas ng ating ekonomiya, marami pa rin sa ating mga kababayan ang walang trabaho, o nasa mahigit pa sa 4 million base na rin sa pinakahuling rekord ng Philippine Statistics Authority.

Mula nang tumama ang pandemya at naramdaman nating mga Pinoy ang dagok nito mula noong Marso ng nagdaang taon, rescue to the max ang programang tinatawag na Assistance to Individuals in Crisis Situation (AICS) ng DSWD.

Pero ‘yun nga lang, sa simula ay nagkagulo sa listahan, at sandamakmak ang reklamong hindi naabutan ng tulong o mabagal ang usad ng ayuda. At sa gitna niyan, kabilang tayo sa mga agad na nagtanong sa DSWD kung ano ang problema at nagbigay tayo ng mga suhestiyon o rekomendasyon para maisaayos ito.

At sa ngayon, marami-rami pa rin ang hindi nararating ng AICS kung saan nabibigyan ng mula P1,000 hanggang P5,000 ang bawat indibidwal na kapos na kapos pa rin, walang trabaho at walang pantustos sa pangkain.

Para naman mas bumilis at mas maging masistema pa ang distribusyong niyan, yaman din lamang na ang inyong lingkod, eh, panay ang rekomenda ng mga puwedeng gawin, heto na nga, naging IMEEsolusyon na natin bilang chairman ng Senate committee on economic affairs na makisawsaw at nagdesisyong tumulong sa kanila sa pamamahagi.

Bilang katuwang na tayo ng DSWD, pinaspasan na natin ang pagpapaabot ng ayudang pangkalusugan at pangkabuhayan sa ating mga kababayan. ‘Ika nga, marami-rami pang aabutan ng tulong sa mga karapat-dapat na lugar at indibidwal na makatanggap ng AICS hanggang sa katapusan ng Disyembre.

Ganyan lang naman dapat, kung meron tayong reklamo, tingnan natin ang puwedeng IMEEsolusyon at magagawang kontribusyon kaysa puro tayo reklamo, wala naman tayong ginagawa, ‘di ba?!

‘Wag nating gawing kostumbre ‘yan, kung may maitutulong tayo, go na! Keri nating labanan ang pandemya, basta lahat tayong mga Pilipino ay nagkakaisa!

Ibigay na ang pondo ng Fertilizer para sa farmers

ni Imee Marcos - @Imeesolusyon | November 22, 2021

Malapit na ang susunod na planting season, kaya problemado ngayon ang ating mga magsasaka. Bakit? Sumirit kasi ang presyo ng pataba.

Sa sumbong ng mga magsasaka natin sa ilang probinsiya, umaaray na sila hindi pa man nakapagsisimulang magtanim, dahil hindi na nila alam kung saan sila huhugot ng perang pambili ng abono.

Biruin n'yo naman, idinaing ng mga magsasaka na mahigit sa doble ang itinaas ng presyo ng mga pataba. Ang 50-kilos kada sako ng Urea ay nagkakahalaga na ngayon ng PhP2,300;

]Complete Fertilizer (14-14-14) na mabibili na sa PhP1,750; at 16-20-0 mix na ibinibenta na ngayon sa PhP1,650.

Ang mga nasabing presyo ay mas mataas pa sa naisapublikong presyo ng Fertilizer and Pesticide Authority (FPA) nitong nagdaang linggo na nasa average lang na PhP2,0333.58 para sa Urea, PhP1,542.28 para sa Complete Fertilizer at PhP1,422.08 naman para sa 16-20-0 fertilizer, meaning, malayo 'yan sa reyalidad na nai-publish nila! Naku, ha?

Tanong lang natin, eh, nasaan ba kasi ang subsidiya ng DA, eh, hindi ba dapat ipinamamahagi 'yan ilang buwan bago pa ang planting season? Take note, hindi 'yan apektado ng pandemya dahil meron na dati pang badyet na inilaan d'yan!

Nakakaalarma ang pagsirit ng presyo ng fertilizer kasi kapag mataas ang presyo ng pataba, awtomatik may epekto 'yan sa rice production ng mga magsasaka at tiyak na may domino-effect din 'yan sa presyo ng mga lokal na bigas na ating binibili! Santisima!

Eh, aaray na naman tayo na mataas ang presyo ng bigas niyan!

IMEEsolusyon d'yan, plis naman DA, 'wag n'yo namang patutulugin ang pondong laan sa subsidiya sa pataba para sa mga magsasaka, sila ang mapeperwisyo niyan. Pakibigay na habang puwede pang maihabol, now na!

IMEEsolusyon din para naman hindi na tayo umasa sa mga imported na mga pataba, aba, mag-produce na kasi ng sariling atin. Plis, pakitutukan ito para naman hindi tayo nakadepende lang doon. Remember, matatangkilik na ang sariling atin, less pa 'yan sa ating gastusin, 'di ba?

Pahalagahan natin ang mga magsasaka sa ating bansa, unahin ang kanilang mga pangangailangan para naman maging matatag ang seguridad at supply ng ating pagkain!

Agree?