Ga-holen na pandesal, ‘wag naman sana!

ni Imee Marcos - @Imeesolusyon | January 28, 2022

Paboritong almusal nating mga Pinoy ang pandesal. At ngayon ngang may pandemya, nakaambang maging mala-pandemic o “Pandesal na Anemic” na ang ating makakain. ‘Kalokah!

Bakit kamo? Aba, eh, kani-kanyang diskarte na ngayon ang mga nahihirapang panadero kung paano sila makatitipid sa gastos dahil pataas nang pataas ang presyo ng mga sangkap ng mga tinapay o pandesal, tulad ng harina. Kaya naman, hindi malayong bawasan na nila ang sangkap nito para makatipid. Hay, buhay!

Bukod sa pagtitipid sa sangkap nito, diskarte rin nilang humirit na ng tatlong pisong dagdag-presyo sa mga tinapay dahil hindi na nagbago ang presyo mula pa noong 2016.

Maliban sa mga sangkap, pataas din nang pataas ang halaga ng LPG at iba pang gastos sa pagpapatakbo ng negosyo.

Kaya sure ‘yan, papalag ang mga konsiyumer sa dagdag-presyo at lalo silang aaray dahil hindi malayong maging mala-pandemic o “pandesal na anemic” ang mabibiling pandesal dahil tinipid sa sangkap. Aruy! Huwag naman sanang maging ga-holen na lang ang laki niyan! ‘Kalerkey!

Sa harap niyan, eh, bilang chairman ng Senate committee on economic affairs, IMEEsolusyon d’yan, eh, puwede nang umeksena ang DTI at magtakda na ng price freeze sa mga sangkap ng mga tinapay, ‘di ba?!

Panandalian ding IMEEsolusyon ang importasyon ng arina, ngunit dapat pang-emergency use lang at G2G o gobyerno-sa-gobyerno ang usapan. At para sa pangmatalagang IMEEsolusyon, dagdagan na ng nutrisyon ang mga tinapay, tulad ng ginamit sa Nutribun noong dekada ‘70.

Remember, guys, ‘yung Nutribun noong araw. Puwedeng dagdagan ang sangkap niyan, tulad ng kamote, cassava, monggo, kalabasa, patatas at bigas at mas puwede ‘yan pagyamain pa sa protina kapag ginamitan ng mani at malunggay! Oh, ‘di bah?

Kaya, kailangan bago pa man makapagtaas-presyo ang mga tinapay, paspasan na ang pagkilos, price freeze na agad sa mga sangkap para maluwagan ng kaunti ang ating mga panadero at mga konsiyumer! Sunod na ikasa ang mga naturang IMEEsolusyon!

Naku, ha? Ayoko ng pandesal na ga-holen o pandesal na anemic! Kayo ba, gusto n’yo?

Ipantay sa suweldo ng mga nurse at pulis ang sahod ng mga guro

ni Imee Marcos - @Imeesolusyon | January 26, 2022

Sa gitna ng pagiging busy ng marami sa mga trending na balita sa pulitika sa harap ng papalapit na eleksiyon, mga kaso COVID-19, sitwasyon ng mga healthcare workers ay nagpapapansin ngayon ang ating mga guro sa kanilang sitwasyon.

Umaaray na ang mga guro bilang isa sa mga frontliners, maliit pa rin ang kanilang suweldo gayung nahaharap din sila sa mapanganib na sitwasyon ngayong may pandemya.

Ayon nga sa Alliance of Concerned Teachers, bagama’t naipatupad na ng ating pamahalaan ang Salary Standardization Law o SSL, malayo sa natatanggap nilang dagdag-sahod ang unang mga naipangakong dodoblehin ang kanilang suweldo dahil kabilang sila sa mga frontliner.

Eh, sa ganang atin, may punto ang mga guro na sagad sa buto ang paghihirap, puyat, pagod sa blended learning at lalo na ‘yung mga gurong taga-probinsiya na walang sawang gumagawa, nagpapaimprenta at naghahatid ng module ng kanilang estudyante na tumatawid ng mga ilog, bundok at kahit pa may banta ng Omicron variant.

Pasalamat na lang at pinatigil na muna ang mga naumpisahang limited na face-to-face classes at online classes sa ngayon dahil sa tumitinding banta ng Omicron variant na papahupa na rin naman daw sa ngayon ang tinatamaan dahil sa tumataas na bilang ng mga bakunado.

Nai-stress ang ating mga guro, paano nila pagkakasyahin ang kakarampot nilang sahod sa gitna ng panibagong banta ng pagtaas ng presyo ng tinapay, mataas na presyo ng isda, tumataas na presyo ng gasolina at mga serbisyo? ‘Kalokah!

Buwis-buhay na nga sila, butas pa ang bulsa, eh, sino nga naman ang hindi makukunsumi sa kanilang kalagayan. At heto nga, bunga ng kanilang desperasyon, eh, kahit sa mga mahahalal na opisyal sa paparating na eleksiyon nananawagan na sila na isulong na madoble ang kanilang suweldo.

Sa ganang atin, IMEEsolusyon na baka naman puwedeng ikonsidera ng ating gobyerno na maipantay nga naman ang kanilang suweldo sa mga nurses at pulis na tumatanggap ng Php30,000 na bagong pasok pa lang sa trabaho at ‘wag din naman sana bababa sa Php16,000 kada buwan ang suweldo ng mga non-teaching staff.

Aba, eh, kailangan nila ng disenteng suweldo para makaagapay sa mga kinahaharap na mga pagtaas-presyo ng bilihin at pangunahing serbisyo, ‘di ba?! Remember, sila ay kabilang sa mga limot nating bayani, na buwis-buhay pa bilang frontliner ngayong may pandemya.

‘Wag naman natin silang kalimutan at memenosin ang kanilang suweldo, dahil sila ang ikalawang nanay, tatay ng ating mga anak at sila ang humuhubog sa kanilang kaalaman at kahusayan sa pagtatamo ng magandang kinabukasan. Agree?!

Da, 'wag mameke ng shortage sa supply ng isda para makapag-import, plis lang!

ni Imee Marcos - @Imeesolusyon | January 24, 2022

Ngayon ay 2022 na, pero wala pa ring kupas ang gobyerno sa pagdepende sa importasyon kada magkakaroon ng diumanong shortage sa pagkain at kung anu-ano pang kailangan natin. 'Kalokah!

Juiceko naman, ibahin na natin ang tono, may pandemya na't lahat, mag-eeleksiyon na nga, 'utak-imported' pa rin tayo? Ano ba 'yan? Eh, itong pinakahuli, aangkat na naman ang Department of Agriculture ng panibagong 60,000 metriko tonelada (MT) ng isda kasi nga raw may shortage sa supply ng galunggong, sardinas at mackerel? Weh, hindi nga?!

Totoo bang kapos tayo sa isda? Santisima, eh, mismong mga lokal na mangingisda natin, pumapalag sa panibagong importasyon at nagsasabing hindi tayo kapos sa isda, at sa katunayan ay maraming lokal na isda na tulad ng tilapya at bangus, hello! Bulag-bulagan lang ang peg?

Itong DA, eh, tila si Palos, puro palusot para lang makapag-import. Teka lang, may naamoy tayong kakaiba, ha? Mabuti sana kung talagang matibay ang pruweba na kapos tayo sa supply dahil daw sa Bagyong Odette.

Eh, ang kaso, pumiyok ang mga mangingisda at nagsabing, bingi-bingihan lang ang DA sa payo at rekomendasyon ng National Fisheries and Aquatic Resources (NFARC) na hindi naman kailangang mag-isyu pa ng certificate of necessity to import sa unang tatlong buwan ng 2022.

'Wag tayong isama sa mga gogoyoin! Hello, magtatapos na nga ang closed fishing season sa Pebrero at Marso, ibig sabihin, magbubukas na ang mga pangisdaan sa Western Samar, Palawan at Zamboanga, so, ano ang sinasabing kakapusin sa supply ng isda?

Saka, eh, hindi ba nga, ipaalala natin sa DA na may mga 'available' pa na halos 35,000 MT ng mga isda na nakaimbak mula noong 2021, bukod pa sa 11, 015 MT na bukas pa para sa mga aplikanteng importer.

Take note, ha, mismong sa datos ng BFAR kamakailan lang, eh, nasa 14,349 MT pa lang ang naibebentang mga isda sa merkado o pamilihan mula sa 60,000 MT na inilaan sa 25 importers na nag-apply pa lang para sa 48,985 MT. Tapos, humihirit na naman kayo ng panibagong importasyon? Ano ba, ha?

Pakiusap, 'wag naman pekein ang shortage sa supply para lang makapag-angkat na naman! Pero para marinig natin ang inyong panig DA peeps, eh, bilang tayo ay chairman ng Senate committee on economic affairs, bibigyan ko kayo ng tsansa! IMEEsolusyon para tilad-tilarin ang isyung 'yan, bubusisiin na lang natin sa Senado at nakapaghain na tayo last week ng resolusyon para rito!

Sa ganang atin naman, kapag may kakulangan, mapa-isda man 'yan o iba pang suplay ng pagkain, 'wag palaging magkumahog na mag-angkat! Papatayin n'yo lang ang kabuhayan ng ating lokal na mga mangingisda. IMEEsolusyon na iprayoridad natin ang mga lokal na isda at hindi imported! Plis lang!