'Wag mag-import ng asukal kung sapat ang supply

ni Imee Marcos - @Imeesolusyon | February 18, 2022

May naamoy tayong kakaiba sa Sugar Regulatory Administration. Takang-taka tayo kung bakit todo-push ito sa importasyon ng 200,000 metric tons ((MT) ng asukal sa katuwirang may shortage raw dahil napinsala ang industriya dahil sa Bagyong Odette?

Talaga ba?

Ganun?! Eh, bakit reklamo ng mga sugar farmers na nakarating sa ating tanggapan, walang shortage sa supply, isang gilingan lang ng asukal ang binaha ng bagyo at naayos na ito habang ang iba pang sugar mills sa buong bansa, eh, gumagana naman?

Eh, mismong United Sugar Producers Federation (UNIFED) sa Negros, kung saan nakabase ang 13 sa 27 sugar mills sa bansa, eh, nagsabi rin na isang linggo lang ito nagsara dahil sa baha ang Southern Negros Development Corporation Mill sa Kabankalan, Negros Occidental!

Mukhang pinalulusot ng SRA ang pag-angkat ng libu-libong tonelada ng imported na asukal ng mga pangunahing manufacturers ng softdrinks at iba pang 'sugared products', tulad ng kendi at biskwit. Hay nako, I smell something fishy!

Hmmm... Meron nga bang pinapaboran ang SRA? Eh, talaga bang may naipangako itong sugar manufacturers sa SRA? Hello, hindi normal na pursigido ang isang ahensiya na mag-import gayung wala naman daw shortage!

Mabuti na lang naging IMEEsolusyon dito ang pagharang ng korte at naglabas ito ng Temporary Restraining Order sa nasabing importasyon! Palakpakan! Reminder naman sa SRA para hindi mapagdudahan, ilantad sa publiko ang listahan ng mga pinayagang mag-angkat ng asukal para makita kung may mga ‘sweetheart deal', 'di bah!

Pero, hindi pa tapos ang problema ng ating sugar farmers, nasa peligro pa rin na hindi sila makapagtanim sa susunod na crop season, dahil napakataas ng presyo ng fertilizer, gayundin ang presyo ng gasolina, kaya naman marami na sa kanila ang nagsanla na ng lupain, o ang iba, eh, nagtatanim na lang ng kamote!

Sa harap niyan, bilang chairman ng Senate committee on economic affairs, IMEEsolusyon na magpatupad agad ang ating pamahalaan ng 'price freeze' sa fertilizer, pero dapat siguruhing 'for emergency use' lang ito at dapat gawin itong gobyerno-sa-gobyerno, 'di ba!

Bukod d'yan, dapat din ibaba ang dami ng mga inaangkat na asukal o mag-iskedyul ng pautay-utay na pagde-deliver na hindi kasabay ng milling season, habang pinag-aaralan pa ang paggawa ng mga lokal na abono para sa pangmatagalang programa para rito.

Pakatandaan natin, ang maliliit na sugar farmers ang bumubuo sa 85% ng ating sugar industry, at kapag binalewala lang ang kanilang kalagayan, kakapusin tayo sa suplay at tiyak tataas, lalo n ang presyo ng asukal sa merkado. Hindi malayong maghingalo ang industriya ng asukal sa ating bansa. Katakot 'yan, ha?

‘Wag mag-petiks sa pagtiyak ng seguridad ng mga OFWs sa Ukraine

ni Imee Marcos - @Imeesolusyon | February 16, 2022

Nagtataka tayo sa ating mga opisyal ng gobyerno, tila pepetiks-petiks at hindi kumikilos para sa mga OFWs at Pinoy migrants sa gitna ng diumanong banta ng Russian invasion sa Ukraine.

Nakaabang na ang ating mga kababayan doon kung ano ang kanilang dapat na gawin.

Aba, eh, sabi ng ating mga kababayan, ni wala pa raw ipinararating sa kanilang contingency plan sakaling magkagulo.

Tanging ang ginagawa lang daw ngayon, kinukuha pa lang ang mga pangalan ng mga gustong umuwi sakali mang matuloy ang giyera sa Ukraine.

Eh, ang tanong, paano kung bigla ngang sumiklab ang giyera, paano sila? Saka lang bibigyan ng instruction ng DFA, OWWA at mga tao natin sa pinakamalapit na Philippine embassy? Ano bah!

Take note, wala tayong embassy sa Ukraine, kundi nasa Poland pa! Bakit nga ba wala pang klarong plano? Nangangapa na ang ating mga kapwa Pilipino doon! Eh, last year pang balita ang napipintong gulo. Hello!

Halos nasa 400 Pilipino sa Ukraine. Napaisip tuloy tayo na ‘yan ba ang dahilan kaya hindi pa ganon ka-komprehensibo ang pagkakasa ng mga plano at pagkilos ngayon ng ating mga opisyal?

Juicekolord!

Hindi porke kakarampot lang ang mga kababayan natin doon, tila lelembot-lembot kayo at walang kagyat na pagkilos para asikasuhin ang kalagayan nila! Ano’ng ibig sabihin niyan, kikilos kayo kapag andyan na ang aktwal na bakbakan?

‘Wag i-underestimate ang sitwasyon. IMEEsolusyon na maghanda na ng todo para wala tayong sablay! Latagan na ng contingency plan.

Kabilang dito ang pagkakasa ng maayos na komunikasyon sa OFWs, lugar kung saan sila tatakbo para pik-apin at ililikas, badyet sa kanilang masasakyan sa paglikas.

Gayundin, ikasa na ang safety health protocols oras na makauwi na sa ‘Pinas at transportasyon na rin pauwi sa kani-kanilang mga bahay.

Bago pa man sumiklab ang giyera sa Ukraine, agapan na rin natin ang impact nito o epekto sa ating ekonomiya, dahil siguradong sisirit ang presyo ng langis sa world market.

IMEEsolusyon na manmanan ng ating pamahalaan ang presyo ng langis at ikonsidera na taasan ang ating reserba, sa harap ng tinatayang pagsirit sa $120 dolyar kada bariles mula sa $90 hanggang $95 dolyar ngayon. Dapat din na matukoy na agad ang mga alternatibo nating pagkukunan.

Mas maigi nang maging maagap sa paghahanda, kaysa naman magkumahog at mataranta kapag nasa peligro na ang buhay ng ating mga kababayan at mahuli sa paghahanda sa dagok nito sa ating ekonomiya. Kaya plis DFA, OWWA, mga opisyal ng ating pamahalaan, kilos na agad, Now na!

Mga lokal na isda, protektahan at tangkilikin; importasyon, gawing huling opsiyon!

ni Imee Marcos - @Imeesolusyon | February 14, 2022

Sermon ang inabot sa atin ng Department of Agriculture (DA) at Bureau of Fisheries and Aquatic Resources (BFAR) sa pagdepensa sa importasyon ng 60,000 tonelada ng isda hanggang Marso ng taong ito.

Hindi kasi nila pinakinggan ang mga lokal nating mangingisda at National Fisheries and Aquatic Resources Management Council o NFARMC na hindi kailangang mag-angkat dahil nga sapat ang suplay ng isda! Ano bah!

Sandamakmak ang kuwestiyon natin sa fish importation na ‘yan, kamakailan lang sa pagdinig sa Senado. Una, sa usapin na mga coop na naman, na walang kakayahan ang mag-i-import ng milyun-milyong dolyar na isda, na certified importer daw?! ‘Di ba, ginamit din ng mga hamak na coop sa pagpasok ng bigas, bawang atbp.?

Paano ba maging importer? Bakit may mga “suki” ang DA mula pa January 2021 na may supply na agad — matagal ng may stock o na smuggle na? Pharmally na naman ba ito?

Naku, ha? DA Sec. Willie, uwi na dali! I-chika mo ang mga matitino mong dahilan! Bakit absent ka sa hearing!

Juskoday!

Hmmm… Napapaisip tuloy tayo kung nakaka-proud nga ba na inirekomenda natinsi DAR sa kanyang puwesto, eh, ang alam lang pala, magpapalamon sa mga dambuhalang importer at smuggler? Hay naku, Ginoong Willie, sikat ka raw sa abroad dahil sa husay mo sa tungkulin, eh, talaga ba?! Weh, ‘di nga?!

Valentine’s na. At isa sa mga loves natin ang ating mga lokal na mangingisda. Kaya bilang chairman ng Senate committee on economic affairs, IMEEsolusyon para mapatatag ang supply ng isda. Una, paikliin ang closed fishing season o buksan ng maaga at iwanang bukas sa mga commercial fishers sa mga lugar na kapos ang supply.

Ikalawa, tulungang ipa-barko ang suplay ng isda mula sa Mindanao hanggang Luzon at Visayas; repasuhin ang mga pamumuhunan sa mga ginagamit na pasilidad matapos ang bawat ani tulad ng blast freezing at cold storage, gayundin ipagamit na ang 60% na paupahan sa mga fishpond.

Ikatlo, dapat nang amyendahan ang Fisheries Code para di makapag-angkat ang DA ng walang permiso ng NFARM at kailangang bawiin na ang mga certificate ng importasyon, ‘di bah!

Panghuli sa tingin natin, ha? May basehan ang mga mangingisdang Pinoy na kasuhan ng agricultural sabotage at technical smuggling ang DA, BFAR, Bureau of Customs at Philippine Fisheries Development Authority.

Okay lang ang mag-import kung talagang kapos na sa pagkain at wala nang ibang remedyo, pero huling hakbang na dapat ‘yan. Prayoridad na protektahan natin ang sariling lokal na mga produkto, ang ating mga lokal na mangingisda, para mapatatag natin ang presyuhan ng mga pagkain sa merkado! ‘Ika nga, we love our own! Agree?