OFWs, gawing mala-girl scout at boy scout ng gobyerno sa bawat krisis sa abroad!

ni Imee Marcos - @Imeesolusyon | February 25, 2022

Sandamakmak ang mga pagsubok na dinaranas ngayon ng ating OFWs. At ilan dito ay ‘yung sigalot ng Russia at Ukraine at ang sinasabing mga nagka-COVID-19 na OFWs sa Hong Kong na tinerminate ng employer ang kanilang mga kontrata.

Nakaabot nga ang balita sa ating tanggapan na walang matuluyan ang mga may COVID-19 na OFWs dahil pinaalis sila ng kanilang employer. Pero, sabi ay fake news na pagala-gala na lang sila sa mga parke at plaza sa Hong Kong? Ano ba talaga?

Ayon naman sa DOLE, OWWA, POEA, OWWA, nasa proseso na ang pagtulong sa mga nagka-COVID-19 na OFWs sa Hong Kong. Mula sa pagpapalikas sa kanila, tulong-pinansiyal at posibleng pagpapadala ng medical team ng ‘Pinas sa HK. Naku, bakit pa pinag-aaralan, dapat gora na ASAP!

Pansin lang natin, mula nang maging senadora ang inyong lingkod, madalas na nakararating sa ating tanggapan ang hinaing na atrasado ang kilos at tulong ng ating mga opisyal ng gobyerno sa iba’t ibang kinahaharap na krisis ng ating OFWs abroad.

Hay, wala pa kasi tayong Department of OFWs na tututok d’yan dahil pinoproseso pa at wala pang sapat na datung!

Sa harap ng mga nare-recycle na problema ng OFWs sa abroad, nakikita nating IMEEsolusyon ang paglalatag ng listahan ng mga posibleng krisis o problemang kanilang kaharapin, kaakibat ang mga kaukulang hakbang o solusyon na puwede nilang gawin.

Tulad ng problema at solusyon sa diskriminasyon, hindi nasuwelduhan, hinarass o minaltrato ng amo, etsetera-etsetera.

Kabilang sa mga puwede ilatag na solusyon ang pagbibigay sa OFWs ng mga listahan o pangalan ng mga opisyal ng gobyerno na agad nilang mahihingan ng mga tulong at paglalatag ng mga lugar na kanilang tatakbuhan o pagkakanlungan sa oras ng peligro.

Dapat din magkaroon ng ‘OFWs Hotline’ sa bawat embahada ng Pilipinas abroad na 24/7 na may sumasagot at hindi answering machine lang. Dapat obligahin ang OFWs na kabisaduhin ito o mailista bago pa sila ma-deploy sa kani-kanilang amo.

Dapat ding maglagay ng opisyal na ‘OFW Website o FB page’ sa bawat bansa kung saan 24/7 na makokontak at madali nilang mahihingan ng tulong ang mga opisyal ng embassy o konsulada.

Dapat ding mailagay dito ang contact number na madaling matatawagan ang mga opisyal o tauhan ng OWWA, POEA at DOLE.

Darami pa ang mga krisis sa abroad at uulan pa rin ang problema ng mga OFW. Ang tanong, palagi na lang ba tayong magkukumahog kung kailan nasa peligro na talaga ang buhay nila?

Pero kung gagawing mala-girl scout at boy scout ang OFWs at 24/7 alerto ang ating mga opisyal ng gobyerno na may maayos na koordinasyon sa iba’t ibang bansang may migrante at manggagawang Pinoy, madaling lapitan at madaling makontak, kahit ano pang bagyo ang harapin ng mga Pilipino sa abroad, malulusutan nila. Agree?

Pagalingan na lang magtipid dahil panay taas-presyo ang mga bilihin!

ni Imee Marcos - @Imeesolusyon | February 23, 2022

Sa harap ng paunti-unting panunumbalik sa new normal ngayong may pandemya, unang quarter pa lang taon ay inuulan na tayo ng sunud-sunod na pagtaas ng presyo ng langis. Hay, grabe!

Hindi pa nga tayo nakakabangon sa pandemya, nasa ika-walo na ang oil price hike! Sa ganang atin, hindi keri ng fuel subsidy para sa mga tsuper, magsasaka at mangingisda ang pagsirit ng presyo ng krudo sa world market, na malamang ay lalo pang sisipa dahil sa nakaambang giyera ng Ukraine at Russia. Santisima!

Limitado lang kasi ang mga fuel subsidy na inilaan sa 2022 national budget. Tanong pa nga natin d'yan, hanggang kailan tatagal ang fuel subsidy? Keri ba hanggang sa mga susunod pang oil price increase?

Sa pinakahuling report, umabot na sa $90 dollars kada bariles ang presyo ng krudo sa world market at posible pa raw sumipa ng lampas 100 dollars! Que horror! Paano na lang tayo niyan, lalo na ang mahihirap nating mga kababayan?

Sa pagtaas ng presyo ng gasolina mula noong New Year, aba, kung tutuusin, katumbas na ng halos dalawang kilo ng bigas ang halaga niyan bawat litro noh!

Habang hinihintay ng mga tsuper ang fuel subsidy, iniisnab pa rin ang kanilang hirit na pagtaas ng singil sa pasahe. Eh, angal nga ng mga driver, 'di ba, ang kita nila napupunta na lang sa panggasolina?! Mabahaging Diyos, paano na?! Kaya no wonder, magsasagawa na sila ng tigil-pasada!

Hindi talaga natin makokontrol ang presyuhan sa langis sa world market. Pero bilang chairman ng Senate committee on economic affairs, pangmatagalang IMEEsolusyon ang lakihan ang reserbang langis ng bansa at susuportahan natin 'yan sa Senado.

Nanghihinayang tayo noong 2020 nang humina ang benta ng langis sa world market pero hindi natin sinamantala na mura ang presyo. Kasagsagan 'yun ng mga lockdown at paralisado ang galaw ng lahat ng tao at pagnenegosyo.

Habang may oras pa, dalian na ang pag-compute sa kailangang reserbang langis ng Pilipinas at pagplanuhan na ang pag-angkat. 'Ika nga, "huli man at magaling, maihahabol din". Agree?!

Chain reaction ng pagsirit ng presyo ng langis ang pagtaas ng pamasahe at mga bilihin.

Sa gitna niyan, IMEEsolusyon ang ilang mga tipid tips. Una, matutong maglakad, lalo na kung malapit naman sa paroroonan, 'wag nang sumakay o kaya mag-bike na lang.

Sa gasul, eh, bili na lang ng lutuang de-uling na puwede ring pang-kahoy na pamalit natin para hindi agad maubos ang gasul. Sa bilihin, magtanim ng mga halamang malimit gamitin sa kusina, tulad ng kamatis, sibuyas, bawang, basil, pandan kalamansi at iba pang masustansiyang gulay, tulad ng malunggay.

Kung may pwesto sa inyong bahay, mag-alaga na rin ng manok, may libre ka pang itlog!

Baka may maibenta pa, 'di bah! Itodo na natin lahat ng pagkukuripot at pagtitipid! Sa susunod, bilang kuripot na senadorang Ilokana, aba, eh, may tips tayo sa mga katipiran, abangan!

Kilalanin si Nanay Siony ang aming Super Yaya

ni Imee Marcos - @Imeesolusyon | February 21, 2022

Bago pa man magpandemya, maraming “working nanay” ang kumukuha ng mga tagapag-alaga ng kani-kanilang anak o “yaya” kapag swak pa sa kanilang badyet.

Kinakain kasi sila ng oras sa kanilang trabaho at kaysa abalahin pa ang mga lolo at lola ng mga bata para sila alagaan, eh, nagha-hire na sila ng mga tagapag-alaga sa kanilang mga anak o yaya.

Ang mga yaya ang ikalawang nanay ng ating mga anak. Hindi biro ang kanilang mga sakripisyo at pagod sa pag-aalaga ng mga batang hindi nila kadugo na minamahal rin nila ng totoo.

Alam ko kaya ang feeling at ng aking ading na si Bongbong na magkaroon ng yaya. Si Nanay Resureccion “Siony” Bunag ang ikalawang nanay naming magkakapatid.

Si Nanay Siony ang nagpapaligo, naghahanda ng aming pagkain at nag-aasikaso ng lahat ng aming mga pangangailangan. Hindi namin siya makakalimutan at hindi matatawaran ang kanyang pagmamahal at pasensiya sa aming magkakapatid kahit pa kami nga, eh, naging makulit din.

At paglipas nga ng napakaraming taon, eh, nagsilakihan na kami at nahiwalay na sa amin si Nanay Siony, lalo na noong kami ay namuhay sa Amerika at ibang bansa.

Pero ngayong 2022, malaking sorpresa na nagkaroon kami ng komunikasyon kay Nanay Siony!

Ang saya! Sa tulong ng social media at mga netizen, inaasahan namin ang kapana-panabik naming “reunion” kay Nanay Siony.

Excited na tayo at aking mga kapatid na makita at ma-kumusta ang aming ikalawang Nanay Siony na ngayo’y 80 years old na. Sasalubungin natin si Nanay Siony ng napakahigpit na yakap sa tindi ng pagka-miss sa kanya. Hay, kaysarap ng pakiramdam! Mahal namin kayo, Nanay Siony!

‘Wag nating isantabi ang hindi matatawarang pag-aaruga sa atin ng mga “Super Yaya”.

Kahit naglalakihan na tayo, IMEEsolusyon na suklian natin sa ating abot-kayang pamamaraan at lingunin ang kanilang pagmamahal sa atin at pananatilihin din nating bukas ang komunikasyon sa kanila.

Hindi lang pera, kundi paminsan-minsan, mas mahalaga pa rin na dinadalaw natin sila ng personal para mas ma-feel nila ang ating pagpapahalaga sa kanila. Sa lahat ng mga yaya na naging parte ng ating buhay, saludo tayo sa inyo!