Mga dam, kailangang nang i-rehab

ni Imee Marcos - @Imeesolusyon | April 6, 2022

Sobrang init! ‘Yan ang daing ng marami nating mga kababayan lalo na't summer time na talaga ngayon. At siguradong sa sobrang init ng panahon, mas mabilis na bababa ang lebel ng tubig sa mga dam at ‘di malayong magdulot ito ng tag-tuyot sa mga palayan at mga taniman!

At sa usaping dam, kung sa ngayon eh 191 meters ang level ng tubig sa Angat dam, abah eh bago pa magsimula ang susunod na administrasyon ay siguradong aabot sa critical level na 180 metro kung walang ulan.

Eh ang Angat dam pa naman ang pinagkukunan ng supply ng tubig ng nasa 12 milyong mga taga-Metro Manila at irigasyon sa mga magsasaka sa Pampanga at Bulacan. Paano na lang yan?!

Mukhang kinakailangan na nating magsagawa ng 'rain dance' tulad ng mga ginagawa ng ating mga katutubo, hmmm. Nakakapag-alala kasi nga eh talagang dapat sana eh may mga pag-ulan dahil sa pagtaya ng PAGASA na may mahabang La Niña, di bah?

Kaya ngayon eh nagkukumahog ang ating mga awtoridad sa cloud seeding at nakakasa na rin ang mga pagrarasyon ng tubig at posibleng hindi na lang sa gabi magrasyon ng tubig kundi aabot pa ito sa araw! Hay apo, mahabaging Diyos!

'Yang cloud seeding at pagrarasyon ng tubig, pansamantalang pansalo ang mga ‘yan. IMEEsolusyon natin sa nagbabadyang mga tag-tuyot eh ‘yung ating susunod na administrasyon na kahit nahaharap sa kakapusan ng badyet, kinakailangang palakasin ang pamumuhunan sa mga maliliit na ‘water impounding system’ na mag-iimbak ng mga tubig-ulan sa panahon ng tag-ulan.

Ang mga ito ay mga dam na hindi lalampas sa 30 metro ang taas at may kakayanang mag-imbak ng nasa 50 milyong metro-kubikong tubig. Eh kahit ang mga nagsasaka sa mataas na lugar ay makikinabang dito.

Take note, ayon sa PAGASA, mas mababa lang sa 10% ang naiimbak nating tubig-ulan dahil karamihan sa mga ito eh dumadaloy papuntang karagatan.

Kaya need din natin talagang magkaroon ng pasilidad para sa 'rainwater harvesting.’

Reminder hindi lang pang-irigasyon sa mga palayan, mga palaisdaan o sanitasyon ng kalunsuran o mga paglilinis ng mga kotse at iba pa magagamit ang mga naimbak na tubig sa 'rain harvesting facilities' kundi makababawas din ‘yan sa pagbaha sa panahon naman ng tag-ulan, di bah?!

IMEEsolusyon din natin na maawa naman tayo sa ating mga lumang dam na tulad ng Angat, Pantabangan, at Magat, plis isailalim din natin ang mga ‘yan sa rehabilitasyon para mapakinabangan pa nang husto ng mga susunod na henerasyon.

Abah eh ni kahit isang rehab ‘di nakatikim ang mga nasabing dam gayong noon pang 1967 hanggang 1983 pa yan binuksan. Susmaryosep! Masyado tayong naging kampante.

IMEEsolusyon natin sa krisis sa tubig, matuto rin tayong magtipid o iwasang mag-Asyong Aksaya! Di bah! I-recycle natin ang mga tubig. ‘Yung mga pambanlaw na tubig sa paglalaba, puwede rin nating gamitin na pang-mop ng sahig o ipandilig o ibuhos sa banyo! Para-paraan lang ‘yan! Agree?!

Mga kasambahay, ‘wag kalimutan sa taas-sahod

ni Imee Marcos - @Imeesolusyon | April 1, 2022

Sa gitna ng tumitinding kahirapan dahil sa patuloy na pagsirit ng presyo ng petrolyo dulot ng ‘di matapos-tapos na bakbakan sa pagitan ng Ukraine at Russia, hindi lang mga ordinaryong worker o manggagawa ang naapektuhan ng krisis. Isa sa matindi ring naghihirap ngayon ang ating mga kasambahay.

Kung magkaka-umento man sa sahod ang mga ordinaryong obrero, abah eh dapat namang ‘wag kaligtaan ang ating mga kababayang kasambahay.

Una, bukod sa super-liit na suweldo ng ating mga kasambahay, pahalagahan din natin na katuwang ng mga working nanay at tatay ang ating mga kasambahay. Sila ang tumitingin at nagsisigurong malinis, maayos ang ating pamamahay, maging ang ligtas na kalagayan ng ating mga anak.

Eh kung titingnan natin, ‘di makabubuhay ang kita ng ating mga kasambahay lalo na ‘yung mga nasa probinsiya na sumasahod lang ng mula P2,000 hanggang P2,500 kada buwan kumpara sa Metro Manila at Central Visayas na nasa P5,000.

Gasino na nga lang ba ang P2,000 kada buwan, na kulang na kulang na pambadyet sa pagkain, kuryente, tubig at iba pang gastusin sa bahay, di bah? Paano ‘yan pagkakasyahin sa rami ng bayarin, eh patuloy din ang pagtaas ng presyo ng bilihin dulot ng pagsirit ng presyo ng krudo sa world market?

Eh kung ang mga manggagawa ngang sumasahod ng medyo lampas pa sa minimum wage, hindi na mapagkasya ang sinasahod lalo pa kaya sila sa panahon ngayon? Kaya tama lang na 'wag naman kalimutan na mabigyan din ng gobyerno ng umento ang kanilang mga suweldo di bah?!

IMEEsolusyon na isama na rin sila sa posibleng mabibigyan ng umento sa minimum wage na hirit ng mga manggagawa sa Regional Tripartite and Productivity Boards (RTWPBS). Ihabol natin sa mga rerebyuhing sahod ng mga manggagawa sa papasok na buwan ng Abril, ang suweldo ng mga kasambahay.

Sa ngayon, binigyan ng hanggang katapusan ng Abril ang wage boards para isumite ang kanilang rekomendasyon na taasan ang minimum wage ng mga manggagawa sa iba’t ibang lugar sa bansa.

Kung matatandaan natin noong 2019, nasa P2,309 ang sahod ng mga stay-in na kasambahay sa BARMM, habang nasa P5,815 naman sa mga kasambahay na nasa Kamaynilaan.

Sa ngayon, mahigit sa 1.4 million ang nagtatrabaho bilang mga kasambahay sa ating bansa.

Katuwang natin ang mga kasambahay at malaki ang kontribusyon nila para sa malinis, malusog at magandang tirahan ng bawat pamilyang Pinoy. Kaya bigyan din naman sila ng karapat-dapat na pasahod, di bah?!

Survival grab bag, ikasa; Disaster response sa mga apektado ng pag-aalburuto ng taal, paigtingin

ni Imee Marcos - @Imeesolusyon | March 29, 2022

Matapos ang pagputok ng Bulkang Taal noong Enero 2020, heto na naman ang panibagong nakagugulantang na pagsabog ng bulkan.

Tila nanumbalik ang takot ng ating mga kababayan para sa kanilang buhay at kabuhayan.

Wala naman tayong masasabi sa mga disaster response ng ating national government at mga LGU. Talaga namang to the rescue at inilikas nila agad ang mga residenteng apektado ng pagputok ng Bulkang Taal partikular na 'yung mga nakatira sa Agoncillo, Laurel Batangas.

Napapabuntunghininga na lang tayo na ngayong lumuluwag-luwag na ang restriksyon sa pandemya, pumalit naman ang dagok ng pag-aalburuto ng bulkan.

Harinawa eh, humupa agad ang nagngangalit na Taal volcano.

Sa gitna ng mga pabugso-bugsong mga pag-aalburuto ng bulkan, makabubuting mas paigtingin natin ang pagsasanay sa kahandaan sa sakuna ng ating mga kababayang taga-Batangas, di bah!

Isa sa IMEEsolusyon n'yan, masiguradong maihahanda ng mga Batangueño nating mga kababayan ang ilang pangunahing mga kailangan sa ganitong mga kalamidad o sakuna.

Partikular na ang 'grab bag o survival kit' ng bawat miyembro ng pamilya na naglalaman ng mga ID, mga food pack, kendi, tubig, ilang mga damit, first aid kit, wet wipes, lubid, flashlight, flare, cellphone, mga power bank, mga baterya, ballpen, papel, cash money, compass at mapa, kumot o blanket, face mask tulad ng N95.

Pero para naman sa pangmatagalang plano, regular nating sanayin ang mga lokal na residente doon pagdating sa disaster response at obligahin natin ang bawat pamilya na magtabi ng listahan ng mga contact number ng mga lokal na disaster officials na kanilang tatawagan sa tuwing nag-aalburuto ang bulkan at nangangailangan ng rescue ang mga residente.

Pangmatagalan namang IMEEsolusyon ang ating rekomendasyong maglatag ng klarong planong programang pangkabuhayan para sa mga residenteng nakatira sa paligid ng bulkan para naman umalis na sila sa danger zone at huwag nang bumalik pa doon kapag humupa na ang galit ng Bulkang Taal.

Aminin man natin o hindi, hindi natin basta-basta mapapaalis o mapapalipat ang ating mga kababayang nakatira malapit sa bulkan dahil naroon ang kanilang kabuhayan at tirahan lalo na ang farming at turismo di bah?

Kaya kailangan talagang malatagan sila ng ating gobyerno katuwang ang LGUs at mga pribadong grupo sa Batangas ng nasabing 'livelihood programs' na may maganda-gandang kita.

Hindi natin kayang mahulaaan kung kailan mag-aalburuto ang bulkan, kaya mas maiging anumang oras ay lagi silang handa para masigurado rin natin ang kanilang kaligtasan. Agree?