Mga aberya, ‘di na dapat maulit sa susunod na halalan

ni Imee Marcos - @Imeesolusyon | May 11, 2022

Tapos na ang botohan pero ongoing pa ngayon ang bilangan ng balota. Sa kabuuan, masasabi natin na okay naman ang naging takbo ng halalan.

Pero sa kabila n’yan, marami pa ring nakalusot na aberya. Kabilang na nga rito ang pagkasira ng mga Vote Counting Machine sa maraming lugar, pero mabuti naman at maagap din naman ang ating mga kasamahan sa Commission on Elections at nagawan nila ng remedyo o paraan.

May nai-report din na nagsubo sa VCM ng balota, pero paglabas ng resibo, iba ang lumabas na pangalan sa kanilang ibinoto. Santisima bakit kaya? Ayon naman daw sa Comelec eh wala namang matibay na ebidensya ang mga nagsasabi n’yan, hay naku.

May ilan ding karahasang nangyari kung saan merong namatay na guro, ilang mga sekyu na nasugatan. Pero sabagay, isolated cases lang naman ‘yan ayon nga sa ating kapulisan.

May mangilan-ngilan ding naranasang maagang brownout, pero naibalik din naman daw agad ang suplay ng kuryente. Alam naman ninyo na allergic tayong mga Pinoy kapag may brownout, eh iba na ang iniisip ng karamihan, na walang iba kundi ang dudang may magic o pandaraya na nagaganap di bah?

Sa ating Overseas Absentee Voting naman ‘yung mga nasa abroad, eh napakababa ng mga bumoto, eh tingnan natin bakit nga ba Lunes at Huwebes lang ginawa ang botohan na inireklamo rin ng maraming OFWs natin dahil meron nga daw silang mga trabaho kaya ‘di nakaboto.

Sa gitna ng samu’t saring aberyang ‘yan, kahit pa naging maayos ang takbo ng ating halalan sa kabuuan, eh bilang chairman ng Senate Committee on Electoral Reforms and People's Participation, siyempre, IMEEsolusyon ng inyong lingkod eh oras na magbalik-normal na at may sesyon na sa Senado, atin ‘yang ipabubusisi.

IMEEsolusyon naman natin sa ating OFWs na mababa ang turn-out ng boto, hahanapan natin ng paraan kung paano mabibigyan sila ng kumbinyenteng panahon ng pagboto at maiwasan din ang iba pang mga aberya at kalituhang na-engkuwentro.

Iisa-isahin natin ang mga aberyang ‘yan, para sa mga susunod nating eleksyon eh maplantsa na nang tuluyan at mas maging makinis pa o maayos ang takbo ng ating halalan.

Pagtulungan natin na maisaayos ang mga naging butas sa ating halalan, hindi para manisi o magdiin ng sinumang tao o grupo kundi para maresolbahan natin para sa susunod na eleksyon, hindi na ito mangyari pa ulit. Agree?

Ibalik ang orihinal na sistema ng ‘kadiwa’, sagot sa global food crisis!

ni Imee Marcos - @Imeesolusyon | May 5, 2022

Nakakapangamba ang kakaharapin nating krisis sa pagkain sa buong mundo. Dahil nga ito sa ‘di pa rin natatapos na dagok ng pandemya, krisis sa langis, at nagpapatuloy na giyera ng Ukraine at Russia.

At sa harap n’yan eh kailangan tayong mga Pinoy, gumawa agad ng mga hakbang para maprotektahan ang ating sapat na supply ng pagkain. Dapat ‘di tayo kampante at maging maagap.

Kung tutuusin, dapat ngayon pa lang maikasa na natin at maisaayos ang mahinang sistema ng distribusyon ng mga “sariling ating mga produktong pang-agrikultura” para maasahan ang ating suplay ng pagkain, di bah?

Hindi kasi tayo dapat umaasa nang umaasa sa mga imported na supply ng bigas, asukal, gulay at prutas, isda, karne ng baboy, baka, at manok. Kailangan paunti-unti eh mailalatag na natin ang mga sariling produktong mga Pinoy at gawing matatag ang industriya ng pagsasaka sa ating bansa.

IMEEsolusyon para sa nakaambang krisis sa pagkain, dapat maging epektibo ang sistema ng distribusyon ng lokal na ani bago umangkat ng mga imported, di bah!

Ngayon ang tamang panahon para magmenor-menor tayo sa mga imported na mga produkto at piliin lang ang mga siguradong kapos tayo sa food supply bago umangkat. Madami tayong sariling agri-products na itinatapon na lang, at masaklap nabubulok na lang dahil sa hindi mabenta.

IMEEsolusyon nga d’yan eh, ibalik natin nang buo ang orihinal na sistema ng Kadiwa, kung saan noong dekada ‘70 direktang bumibili ang ating gobyerno sa mga magsasaka at nagbebenta ang mga ito na walang ganansya, o di bah? Para kikita na ang mga magsasaka, ‘di mabubulok ang kanilang mga produkto, murang-mura pang mabibili ng publiko!

IMEEsolusyon din para sa legasiya ng mga matatanda na nating mga magsasaka, harinawa eh ang susunod na administrasyon, tulungan at pondohan ang mga programa para sa ating mga kabataang mga magsasaka o ‘yung programang Young Farmers Challenge na inihain kong Senate Bill 884 noong unang salta ko pa lang sa Senado noong 2019.

Abah, its about time na kumuha na tayo ng mga batang mga magsasaka na hitik sa bagong mga ideya sa harap ng namamatay nang bokasyon ng pagsasaka. Kaya ‘wag na tayong magpatumpik-tumpik pa, gawin na natin ‘yan. Now na!

Oras ng botohan ng OFWs i-extend, para iwas-aberya habang maaga

ni Imee Marcos - @Imeesolusyon | April 20, 2022

Samu't saring aberya ang sumalubong sa pag-arangkada ng isang buwang botohan ng ating OFWs sa iba’t ibang bansa. May na-delay na election paraphernalia, doble-doble ang mga mail-in ballots o kaya’y di pa nakakarating, sinasabing may ‘shade’ na ang ibang balota, may mga OFWs na ‘di pa nakapagparehistro, may hindi nakaboto dahil sa siksikan, etc.

Sa mga nakarating nga sa ating tanggapan, eh meron ding iba na hindi talaga nila alam kung saan sila pupunta para bumoto habang ang iba eh hindi na raw nakapagparehistro dahil tapos na, at ang iba nama’y naipit sa napakahabang pila dahil sa iilan lang ang voting precinct. Hay, Apo, kay daming mga gusot.

Eh ang mga ‘yan eh nangyari sa Hong Kong, Singapore, U.S., Italy, New Zealand, Saudi Arabia, United Kingdom at Sweden.

Nakababahala ‘yan ha, nagsisimula pa lang medyo marami-rami nang aberya. Santisima!

Mantakin mo naman ‘yang mga ganyang aberya, eh posibleng maulit sa iba pang bansa na may malaking populasyon ng mga botanteng OFWs. ‘Wag na nating hintayin na kung kelan last minute doon lang tayo kikilos. Naku, eh libu-libong OFWs ang ‘di makakaboto nang ganyan ha!

Bilang chairman ng Senate Committee on Electoral Reforms and People’s Participation, ako eh humihirit sa mga taga-Commission on Elections (Comelec) na ang pinakamabilis na IMEEsolusyon d’yan eh palawigin ang oras ng pagboto ng ating OFWs sa mga embahada at konsulada ng ‘Pinas.

Saka, pakisuyo na lang Comelec, IMEEsolusyon din ang paigtingin pa ng Comelec at ng Department of Foreign Affairs (DFA) ang pagbibigay ng impormasyon sa ating OFWs kung saang presinto o voting precinct sila nakatakdang bumoto.

May oras pa naman o hindi pa huli ang lahat para maagapan ang mga problema sa botohan ng mga OFWs. Medyo pakibilis-bilisan lang ang kilos para mas maagang maresolbahan ang mga aberyang ‘yan. Pagtulungan na n’yo, Comelec at DFA. Keri n’yo ‘yan!