'Pinas walang shortage sa isda; Nabuking na tangkang importasyon, pigilan!

ni Imee Marcos - @Imeesolusyon | May 27, 2022

Nabuking na habang abala ang lahat sa bilangan ng boto sa pagka-presidente at bise presidente, naglabas ng utos si Agriculture Secretary William Dar para sa panibagong importasyon ng isda.

Pirmado ni Dar ang Administrative Order 10-2022 para sa importasyon ng 38,695 metriko-toneladang small pelagic fish na tulad ng galunggong, sardinas at mackerel, dahil nga daw sa kapos ang supply natin at mataas ang presyo nito sa mga palengke.

Hello, Secretary Dar! 'Yung mismong taga-National Fisheries and Aquatic Resources Management Council o NFARMC eh nagsabing hindi n'yo kinonsulta sa planong importasyon at hindi rin daw n'yo 'yan napag-usapan sa second-quarter meeting noong April 29!

Plis DA, sumunod tayo sa Section 61-c ng Fisheries Code kung saan obligado kayong komunsulta sa NFARMC sa mga desisyong nakakaapekto sa mga stakeholder sa industriya ng pangingisda, partikular d'yan sa maitim n'yong balak na importasyon ng isda!

Bilang chairman ng Senate Committee on Economic Affairs, I tell you, kung industriya ng commercial fishing at aquaculture ang pag-uusapan, walang kakapusan sa lokal na supply ng isda at ang anumang pagtaas sa presyo nito ay dahil sa tumataas na presyo ng langis!

Saka, juiceko no! tapos na ang closed fishing season at kababalik lang sa kanilang kabuhayan ng mga lokal na mga mangingisda, eh bakit pa kayo nag-iisyu ng mga CNI (certificate of necessity to import), aber?

Tigilan n'yo ang imbentong kapos tayo sa supply ng isda, panis na ang katwirang 'yan, nagamit n'yo na sa unang bahagi ng taon noong huli kayong mag-angkat ng isda! Ano bah!

IMEEsolusyon bago ilabas ang ganyang mga utos na importasyon, plis komunsulta kayo sa mga apektadong sektor! Siguruhing karapat-dapat ang katwiran at basehan n'yo sa pag-aangkat ng mga isda, bago talaga payagan! Plis, itigil na ang midnight deal na 'yan, puwede?!

IMEEsolusyon na bago ang importasyon, iprayoridad ang mga lokal na isda! Remember, tag-hirap ngayon ang buong mundo at mas naghihirap tayong nasa Asya, tulungan naman natin ang mga lokal nating mangingisda, 'wag natin silang ietsapuwera.

Plis gawing huling opsyon ang mga imported na isda at iba pang produkto!

Tag-ulan na, i-ready na ang mga bagay na pang-emergency

ni Imee Marcos - @Imeesolusyon | May 21, 2022

Panahon na ng tag-ulan, ayon na rin sa deklarasyon ng PAGASA, at maaaring maranasan ang pag-ulan sa hapon o gabi.

Tuwing tag-ulan, nakakapangamba na naman ang kaliwa't kanang mga baha. Bagama't may hangover pa sa eleksyon ang lahat, kilos na tayo nang maaga para menos perhuwisyo 'pag lumakas na ang pag-ulan.

Ayon nga sa PAGASA, kahit rainy season na ngayong Mayo pa lang, maaari pa ring makaranas ng mainit na panahon o ang tinatawag na monsoon break, kaya samantalahin na natin 'yan at simulan na natin ang paghahanda.

Kung medyo mabagal ang kilos sa paglilinis ng mga kalat sa eleksyon, ang IMEEsolusyon d'yan eh magboluntaryo na tayo at magkanya-kanyang linis para hindi magbara at magdulot ng pagbaha sa mga kanal at estero. Hindi biro ang mga panganib na lilikhain ng parating na tag-ulan ha!

Bukod sa baha, kailangan din nating mag-ingat sa laganap na sakit na dengue at leptospirosis na nangyayari tuwing may pagbaha at nagiging stagnant o 'di gumagalaw ang tubig-baha sa mga kanal, mga estero, sapa, pati na rin sa mga kalye sa siyudad.

'Yung mga lugar sa ating bahay na madalas na nadadale ng baha, unti-untiin na nating ayusin at alisin doon ang ating mga gamit, itaas na natin. Iwas na sa kalat at pagbabara ng mga daluyan ng tubig, iwas pa sa sakit na dengue na dala ng lamok at sa leptospirosis na dala naman ng daga.

IMEEsolusyon din na ngayon pa lang i-ready na rin natin ulit ang ating mga ‘grab bag’ kung saan nakalagay ang first aid kit, iba pang mga gamot, mga flashlights, IDs, ekstrang mga damit, kumot, maliit na radyo, compass at iba pa, para anytime na may sakuna o biglang bumagyo, meron na tayong madadampot agad na pang-emergency na mga gamit.

Ikatlong IMEEsolusyon, i-ready na rin natin ang mga listahan ng mga ahensya ng gobyerno na madalas nating tinatawagan kapag kailangan ng rescue tuwing may baha o bagyo.

Ikaapat, magtabi-tabi na tayo at unti-unting bumili ng mga pagkain na 'di nasisira para sa panahon ng tag-ulan, tulad ng mga noodles, asukal, kape, mga biskwit at iba pa. Higit sa lahat, syempre, magtabi na ng extra cash sa ating grab bag.

Ikalima, kung may sira ang ating mga bubong, simulan na nating tapal-tapalan para 'di tayo mapasok ng tubig kapag tumitindi ang tag-ulan. Bumili na rin tayo ng mga baterya para sa mga flashlight natin, mga power bank, at mga charger.

Ikaanim na IMEEsolusyon, siyempre, ihanda na rin natin ang mga lugar na paglilikasan sa ating mga alagang hayop, magtabi-tabi na rin tayo ng kanilang pagkain at mga gamot.

Pakatandaan, iba na ang maagap, dahil siguradong hindi lang buhay natin ang maliligtas, kundi maging ating mga alagang hayop, mga gamit at kabuhayan.

Mga campaign materials linisin na para iwas-sunog at baha

ni Imee Marcos - @Imeesolusyon | May 16, 2022

Halos isang linggo na ang nakalipas mula nang matapos ang halalan at heto na ang sobrang daming mga tambak na basura ng mga campaign materials. Hindi naman maiaasa ang lahat ng paglilinis sa mga kolektor ng basura!

Kahit saan ka lumingon, kaliwa’t kanan ang mga nakasabit na mga tarpaulin, mga papel o polyetos na ginamit sa kampanya at eleksyon kada barangay at sa bahay-bahay.

Reminder mga friendship, bukod sa masakit sa mata, abah eh takaw-sunog din ang mga election paraphernalia na ‘yan. Sobrang init pa naman ngayon ng panahon!

IMEEsolusyon na pakiusapan na ng bawat kandidato ang kanilang mga tagasuporta at mga volunteers na tumulong sa pagtatanggal at paglilinis ng mga campaign materials.

IMEEsolusyon para iwas-sunog, ‘wag nating ipasunog ang mga campaign materials na ‘yan. Sa halip na itapon, ‘yung iba puwede nating ipa-recycle para mapakinabangan.

Tulad ng mga tarpaulin at mga plastik na ‘yan, puwede ‘yang gawing trapal sa mga traysikel kontra ulan at init. Puwedeng gawing tolda o pantakip sa mga bahay o kahit sa bahay ng mga alaga nating hayop kaysa naman bumili pa tayo di bah?! Puwede rin ‘yang gawing sako na tapunan ng mga basura, tyagain na lang na tahiin.

Remember, meron ding panawagan ang ating DENR sa mga kandidato, mga supporters at mga volunteers nila na sundin ang tamang pagtatapon ng basurang campaign materials sa ilalim ng Republic Act (RA) 9003 o ‘yung Ecological Solid Waste Management Act of 2000.

Napakahalaga nito para sa ating kalikasan.

Kapag kasi sinusunog ang mga plastic sa bawat bahay na ‘di ginagamitan ng incinerator, abah eh makasisira ‘yan sa ating ozone layer. Agree ako sa DENR na nakikipagkoordinasyon sa Comelec para talagang susundin ng mga kandidato, supporters at volunteers ang tamang paglilinis o pagtatapon ng mga campaign materials.

Mas mahirap na maabutan din ng tag-ulan ang mga kalat na ‘yan, lalo na’t maghu-Hunyo na o aarangkada na ang rainy season.

‘Wag nating hintayin na maging dahilan ng bara sa mga estero, kanal at sapa ang mga basurang 'yan kapag sa panahon ng tag-ulan at mga pagbaha. Agree? Kaya gora na tayo, maglinis na ng mga basurang 'yan, now na!