Pag-isipang mabuti bago ibenta ang NAIA

ni Imee Marcos - @Imeesolusyon | June 6, 2022

May suhestiyon na ibenta na lang ang Ninoy Aquino International Airport. Ayon mga friendship kay outgoing Finance Secretary Carlos Dominguez, makabubuting ibenta na lang ang NAIA para maging pondo ng gobyerno.

Pero ang ating mga empleyado sa Manila International Airport, eh, kontra rito. Paliwanag ni Andy Bercasio, pangulo ng Samahan ng mga Manggagawa ng Paliparan, nasa mahigit isanlibo silang mga regular na empleyado na hayagang kontra lalo na't malaki naman daw ang kinikita nito.

Sa ganang atin naman, IMEEsolusyon na sipating mabuti ang mga posibleng consequences o puwedeng mangyari bago ito ibenta o isapribado. Kung ipipilit namang ibenta, huwag lahatin. Baka dahil sa panay na lang benta tayo nang benta, magising na lang tayo, wala nang pag-aari ang ating gobyerno, 'di ba?

Bigyan din nating halaga o timbanging mabuti kung mas makagugulo o mas may malaking disadvantage ang nasabing suhestiyong pagbebenta.

IMEEsolusyon naman sa kalumaan nito, eh, bakit hindi natin unti-unting pagplanuhan ang modernisasyon nito sa mga susunod na panahon kapag may sapat nang badyet?

Panghuli, eh, 'di ba nga ang pangunahing prayoridad ng aking Ading na Pangulo na makabigay-trabaho sa mga Pinoy? Eh, unang mangyayari kapag ibinenta ang NAIA, magkakasibakan o magkakatanggalan ng mga empleyado! Paano na lang sila at kanilang hanapbuhay, kanilang mga pamilya? IMEEsolusyon d'yan, dapat isakontrata ng gobyerno at ng sinumang bibili ng NAIA na may malilipatan ang mga empleyadong maaabala ang hanapbuhay.

Marami pang puwedeng gawin para magkaroon ng pondo ang ating pamahalaan at 'wag tayong padalos-dalos sa benta ng benta ng mga assets ng gobyerno. 'Ika nga, "think a hundred times" bago ito gawin. Agree?!

'Pinas walang shortage sa isda; Nabuking na tangkang importasyon, pigilan!

ni Imee Marcos - @Imeesolusyon | May 27, 2022

Nabuking na habang abala ang lahat sa bilangan ng boto sa pagka-presidente at bise presidente, naglabas ng utos si Agriculture Secretary William Dar para sa panibagong importasyon ng isda.

Pirmado ni Dar ang Administrative Order 10-2022 para sa importasyon ng 38,695 metriko-toneladang small pelagic fish na tulad ng galunggong, sardinas at mackerel, dahil nga daw sa kapos ang supply natin at mataas ang presyo nito sa mga palengke.

Hello, Secretary Dar! 'Yung mismong taga-National Fisheries and Aquatic Resources Management Council o NFARMC eh nagsabing hindi n'yo kinonsulta sa planong importasyon at hindi rin daw n'yo 'yan napag-usapan sa second-quarter meeting noong April 29!

Plis DA, sumunod tayo sa Section 61-c ng Fisheries Code kung saan obligado kayong komunsulta sa NFARMC sa mga desisyong nakakaapekto sa mga stakeholder sa industriya ng pangingisda, partikular d'yan sa maitim n'yong balak na importasyon ng isda!

Bilang chairman ng Senate Committee on Economic Affairs, I tell you, kung industriya ng commercial fishing at aquaculture ang pag-uusapan, walang kakapusan sa lokal na supply ng isda at ang anumang pagtaas sa presyo nito ay dahil sa tumataas na presyo ng langis!

Saka, juiceko no! tapos na ang closed fishing season at kababalik lang sa kanilang kabuhayan ng mga lokal na mga mangingisda, eh bakit pa kayo nag-iisyu ng mga CNI (certificate of necessity to import), aber?

Tigilan n'yo ang imbentong kapos tayo sa supply ng isda, panis na ang katwirang 'yan, nagamit n'yo na sa unang bahagi ng taon noong huli kayong mag-angkat ng isda! Ano bah!

IMEEsolusyon bago ilabas ang ganyang mga utos na importasyon, plis komunsulta kayo sa mga apektadong sektor! Siguruhing karapat-dapat ang katwiran at basehan n'yo sa pag-aangkat ng mga isda, bago talaga payagan! Plis, itigil na ang midnight deal na 'yan, puwede?!

IMEEsolusyon na bago ang importasyon, iprayoridad ang mga lokal na isda! Remember, tag-hirap ngayon ang buong mundo at mas naghihirap tayong nasa Asya, tulungan naman natin ang mga lokal nating mangingisda, 'wag natin silang ietsapuwera.

Plis gawing huling opsyon ang mga imported na isda at iba pang produkto!

Tag-ulan na, i-ready na ang mga bagay na pang-emergency

ni Imee Marcos - @Imeesolusyon | May 21, 2022

Panahon na ng tag-ulan, ayon na rin sa deklarasyon ng PAGASA, at maaaring maranasan ang pag-ulan sa hapon o gabi.

Tuwing tag-ulan, nakakapangamba na naman ang kaliwa't kanang mga baha. Bagama't may hangover pa sa eleksyon ang lahat, kilos na tayo nang maaga para menos perhuwisyo 'pag lumakas na ang pag-ulan.

Ayon nga sa PAGASA, kahit rainy season na ngayong Mayo pa lang, maaari pa ring makaranas ng mainit na panahon o ang tinatawag na monsoon break, kaya samantalahin na natin 'yan at simulan na natin ang paghahanda.

Kung medyo mabagal ang kilos sa paglilinis ng mga kalat sa eleksyon, ang IMEEsolusyon d'yan eh magboluntaryo na tayo at magkanya-kanyang linis para hindi magbara at magdulot ng pagbaha sa mga kanal at estero. Hindi biro ang mga panganib na lilikhain ng parating na tag-ulan ha!

Bukod sa baha, kailangan din nating mag-ingat sa laganap na sakit na dengue at leptospirosis na nangyayari tuwing may pagbaha at nagiging stagnant o 'di gumagalaw ang tubig-baha sa mga kanal, mga estero, sapa, pati na rin sa mga kalye sa siyudad.

'Yung mga lugar sa ating bahay na madalas na nadadale ng baha, unti-untiin na nating ayusin at alisin doon ang ating mga gamit, itaas na natin. Iwas na sa kalat at pagbabara ng mga daluyan ng tubig, iwas pa sa sakit na dengue na dala ng lamok at sa leptospirosis na dala naman ng daga.

IMEEsolusyon din na ngayon pa lang i-ready na rin natin ulit ang ating mga ‘grab bag’ kung saan nakalagay ang first aid kit, iba pang mga gamot, mga flashlights, IDs, ekstrang mga damit, kumot, maliit na radyo, compass at iba pa, para anytime na may sakuna o biglang bumagyo, meron na tayong madadampot agad na pang-emergency na mga gamit.

Ikatlong IMEEsolusyon, i-ready na rin natin ang mga listahan ng mga ahensya ng gobyerno na madalas nating tinatawagan kapag kailangan ng rescue tuwing may baha o bagyo.

Ikaapat, magtabi-tabi na tayo at unti-unting bumili ng mga pagkain na 'di nasisira para sa panahon ng tag-ulan, tulad ng mga noodles, asukal, kape, mga biskwit at iba pa. Higit sa lahat, syempre, magtabi na ng extra cash sa ating grab bag.

Ikalima, kung may sira ang ating mga bubong, simulan na nating tapal-tapalan para 'di tayo mapasok ng tubig kapag tumitindi ang tag-ulan. Bumili na rin tayo ng mga baterya para sa mga flashlight natin, mga power bank, at mga charger.

Ikaanim na IMEEsolusyon, siyempre, ihanda na rin natin ang mga lugar na paglilikasan sa ating mga alagang hayop, magtabi-tabi na rin tayo ng kanilang pagkain at mga gamot.

Pakatandaan, iba na ang maagap, dahil siguradong hindi lang buhay natin ang maliligtas, kundi maging ating mga alagang hayop, mga gamit at kabuhayan.