Maghanda kahit wala pang outbreak… Huwag dedmahin ang cholera

ni Imee Marcos - @Imeesolusyon | November 14, 2022

Kasabay ng mga pagbaha dahil sa sunud-sunod na bagyo, isa sa mga sakit na dumarapo sa ating mga kababayan ay ang cholera.

Alam n’yo ba, mga friendship, na sa unang sampung buwan ng taong ito, halos quadrupled o apat na beses na mas dumami ang mga kaso ng cholera o nasa 3,729 kumpara last year, na nasa 976 lang?! Grabe, ‘di ba?!

Mula Agosto 28 hanggang Setyembre 24 lang, eh, nakapagtala ang DOH ng 254 cholera cases, partikular sa Eastern at Western Visayas, gayundin sa Bicol.

Isa sa pangunahing sanhi nito ay ‘yung maruming tubig-inumin. Eh, alam naman natin, ‘di ba, tag-ulan at maraming bagyo at ang ating water system, eh, apektado palagi.

Remember, kapag hindi naagapan ang cholera at nagkaroon ng matinding dehydration o natuyuan ang pasyente ay nauuwi ito sa kamatayan.

Sa tala ng DOH, mayroong 33 nasawi at 14 sa mga ito ay sa nakaraang tatlong buwan lang.

Bagama’t sinabi ng DOH na manageable pa naman ang mga kasong ito, aba, ‘wag natin balewalain.

‘Yung LGUs, discretion nila ang magdesisyon kung magdedeklara ng outbreak. May mga bakuna naman para sa cholera, meron ding tableta lang na iniinom. Pero alam n’yo bang may shortage ng vaccine sa buong mundo para sa cholera?

Ayon sa World Health Organization, huminto na ang dalawang manufacturer ng cholera vaccine sa paggawa nito kaya iisa na lang ang manufacturer nito—na sanhi ng shortage sa bakuna. Kunsabagay, malayo pa naman tayo sa mga kaso ng 27 bansa na talagang mayroong outbreak.

Pero para sa atin, ‘wag natin hintayin pang lumala at dumami ang mga kaso ng cholera sa bansa.

IMEEsolusyon, unang-una pa lang, lalo na ang ating mga kababayang nasa probinsya na walang access sa malinis na tubig sa panahon ng baha, magpakulo tayo ng tubig-inumin.

Ikalawa, para sa medyo may pera, bago pa magkaroon ng baha o sa panahon ng tag-ulan, mag-imbak na ng mineral water. Ikatlo, meron ding tableta na pang-purify ng tubig.

Ika-apat sa LGU naman, plis, maghanda na ng water purifier na puwedeng ma-access ng nasasakupan ninyo sa panahon ng kalamidad. Mahal ang magkasakit at buhay ang nakataya kaya dapat huwag nating balewalain ang kalinisan ng ating tubig-inumin.

Hirit din natin sa LGUs at DOH, silip-silip ang water sanitation at access sa malinis na tubig ng inyong nasasakupan, para maremedyuhan agad at makahingi rin ng ayuda sa national government kung kinakailangan. Agree?

Makatarungang suweldo sa mga nurse

ni Imee Marcos - @Imeesolusyon | November 1, 2022

Kapag nurse ang pinag-usapan, saludo ako sa kanilang sektor. Totoong matapang at mga bayani. Eh, 'di ba nga, sila ang pumupunta noong kasagsagan ng pandemya, pagkatapos sila rin ang unang tinuturukan ng mga bagong pasok na mga bakuna kontra sa COVID-19. Hindi bah! Over ang katapangan!

Pero 'yun nga lang, nakakasakit sa damdamin na sa tinatagal-tagal na ng Philippine Nurses Act of 2020, nitong kamakailan lang naipatupad. At bagamat naipatupad na nga, aba, eh, may bungi pa!

Biruin n'yo naman, ang dapat sana na mapakinabangan ng lahat ng nurse na nilalaman ng Nurses Act na 'yan, eh, iilan lang ang nakakatikim ng biyayang taas-suweldo.

Ibig kong sabihin, bigla raw kasing sumulpot ang DBM circular na tanging mga regular lang ang mabibigyan ng salary upgrade 15 o taas-suweldo. Santisima!

Eh, tulad ng inaasahan natin, dismayado ang ating mga heroes na job order o contractual nurses. Kumbaga, pera na ay naging bato pa! Hindi kasi isinasama sa salary upgrade yung mga job orders na nasa DOH, lalo na 'yung mga nasa LGUs. Bakit?

Kaya naman, ang ating mga nurses ay na-echapwera sa suweldo na kanila sanang aasahan na pang-compensate sa kanilang buwis-buhay na trabaho.

Hay, nakupo! Sa ganang akin, huwag i-discriminate ang mga contractual na mga nurse. Aba, ang trabaho naman ng regular, eh, pareho rin ng trabaho ng contractual, 'di ba?

Para sa akin, patas lang na isama na sila sa salary grade 15. Kung tutuusin, sabi nga ng ating DOH-OIC na si Maria Rosario Vergeire, marami pang kulang na nurses at bukas ang mga plantilla position.

IMEEsolusyon na bigyang-prayoridad ang mga contractual para sa kakulangan ng mga regular.

Performance wise, hindi matatawaran ang husay nila at subok na sila. Bakit pa ba maghahanap ng bagong ite-train sa dami ng mga pasyenteng dapat tugunan agad.

Huwag nating pahirapan pa ang ating mga sarili, bigyan naman natin sila ng patas na pagkakataon para umusad ang kanilang mga kabuhayan sa buwis-buhay nilang pagtugon sa tungkulin. Agree?

I-push ang programang pangkalusugan sa mga seniors kada bgy

ni Imee Marcos - @Imeesolusyon | October 12, 2022

Kamakailan ipinagdiwang ang Linggo ng Katandaan o Elderly Week. At kasabay ng okasyon, lumabas din ang report na kalahati ng populasyon ng senior citizen ay nahaharap sa panganib ang kalusugan dahil sa kahirapan.

Base ito sa report ng Commission on Population and Development o POPCOM. Lumilitaw sa nasabing report na 30% ang hindi malusog at 86% ang hindi makapagpatingin sa mga doktor dahil sa kawalan ng pera.

At dahil hindi nila maayos ang kalusugan at kahirapan, marami ring senior citizen natin ang bantad sa mga mental disabilities at depression, lalo na 'yung mga balo na at tinamaan ng Alzheimer’s Disease.

Talagang sa mga kapus-palad nating mga senior citizen, kinakailangan natin ngayon ang mas espesyal na atensyon! Mahirap kaya maging lola at lolo na, ha, lalo na’t mahirap na nga'y dinapuan pa ng sakit, 'di bah?

Ikinakatwiran na lang ng ibang mahirap na senior citizen na huwag silang gamutin dahil matanda na rin sila. Pero, sa ganang akin, huwag nating pabayaan ang mga senior.

IMEEsolusyon na nakikita ko para maiwasang magkasakit ang mga senior, agree ako na dapat magkaroon ng komprehensibong programang pangkalusugan sa elderly, kaakibat ng preventive program kontra sa anumang uri ng karamdaman.

Siyempre, malaki ang papel dito ng ating mga LGUs, kaya pakiusap natin na sa bawat barangay o komunidad, magkasa ng mga programang pangkalusugan tulad ng joint planting activity ang mga senior sa bawat barangay. Marapat na maglaan ng bakanteng lote o lugar na pagtataniman ang matatanda.

Puwede ring ibalik na natin 'yung mga ‘zumba’ o pag-eehersisyo kada umaga na siyempre, estrikto pa rin dapat na sumusunod sa mga health protocols na puwedeng gawin sa mga plaza.

Livelihood programs, tulad ng paggawa ng mga handicraft na malilibang ang mga lolo’t lola, kung saan ang magagawa nila ay kanila ring puwedeng ibenta.

Isang beses kada linggo para sa libreng pagpapa-check up ng mga senior citizen sa doctor ng bawat health center sa bawat barangay. At kung maaari rin sana ay mabigyan na sila ng mga libreng bitamina.

Ilan lang 'yan sa mga puwedeng remedy para maprotektahan at maiwasang hindi magkasakit ang matatanda. Ang anumang pisikal na aktibidad na puwede nilang daluhan at pagiging aktibo, iwas na sakit ng kasu-kasuan at iba pang karamdaman, 'di bah!