Sa P136 sugar price hike kada kilo; DA, SRA, DTI kilos na! imbestigahan at dapat may panagutin asap

ni Imee Marcos @Imeesolusyon | May 3, 2023

Nababahala ako sa biglang pagsipa ng presyo ng asukal. Tila gumagalaw na naman ang mga galamay ng mga negosyanteng mapagsamantala, ha! Aba, nakakagulat na biglang sipa hanggang sa P136 ang kada kilo ng asukal sa mga supermarket, grabe!

Anyare, bakit may sugar price hike? Eh, ‘di ba, bumabaha ngayon ng mga imported na asukal sa merkado? ‘Di ba nga, inaprub ‘yung 440,000 metric tons importation sa ilalim ng Sugar Order No. 6 para raw mapababa ang presyo ng asukal sa merkado?

Abah, eh, bakit may pagsirit ng presyo ng asukal ngayon? Para saan pa na nag-angkat tayo, sisipa rin pala ng ganyan kalaki ang presyo? Santisima!

Sa latest monitoring mismo ng Sugar Regulatory Administration (SRA), naglalaro ang retail price sa P90.95 hanggang P136 ang kada kilo ng asukal sa mga grocery sa Metro Manila. Sa mga public market naman ay pumapalo ito sa pagitan ng P88 hanggang P110 kada kilo.

Sa ganang akin, hindi malayong namamayagpag na naman ang mga traders at hoarders at pinasisirit ang presyo ng asukal para naman kumita na naman sila. Ano bah, wala na bang katapusan ito?

IMEEsolusyon nito, SRA, Department of Agriculture (DA) at Department of Trade and Industry (DTI), plis mas maging mahigpit at mas matindi ang pagtutulungan para supilin ang pamamayagpag ng mga hoarders at mga mapagsamantalang traders kaya tumataas ang presyo ng asukal. Plis, hindi pa tayo nakakabawi mula sa pandemic, and’yan na naman mga ‘yan!

Uulitin ko na naman ang IMEEsolusyon na kapag may napatunayang may hoarders, panagutin na ‘yan at sampolan ng kulong at multa para naman may madala at ‘di na manamantala!

Klarong-klaro na economic sabotage ito dahil buong bayan ang piniperhuwisyo nila!

Agree?

NFA iwasang mag-import, sa local farmers lagi bumili ng pang-buffer stock, pero ‘wag mambarat!

ni Imee Marcos @Imeesolusyon | April 20, 2023

Heto na naman ang hirit na importasyon ng bigas. Kamakailan lang, humirit ang National Food Authority (NFA) na umangkat ng 330k metric tons ng bigas bilang pampuno ng buffer stock nito. Pero laban-bawi lang ang peg kasi biglang umatras ang NFA sa importasyon.

Buti nga at binawi na nila dahil kung hindi, kawawa na naman ang ating farmers, makakakumpitensya ang mga imported na bigas at tiyak na wala na naman silang kikitain!

Eh, kung tutuusin, ang presyo ng imported rice ay nasa $490 hanggang $590 kada metric tons o P26.50 kada kilo hanggang P32.45 ang landed cost na mas mahal pa sa mga lokal na bigas mula sa ating mga magsasaka.

IMEEsolusyon na pang-buffer stock ang pagbili n’yo sa ating mga lokal na magsasaka para masuportahan pa natin ang kabuhayan ng ating local farmers! Di bah?

Mas makakatipid ang NFA sa lokal na bigas, abah, nasa P20 hanggang P21 lang naman ang kada kilo ng palay, ah! ‘Ika nga, nakatipid ka na, nakatulong ka pa sa ating mga magsasaka.

Pero pakiusap ko na mas taasan naman sana ang farmgate price ha, ‘wag n’yo hong baratin ang ating mga lokal na magsasaka!

Saka kung buffer stock ang pag-uusapan, hindi naman tumigil ang private importation ng bigas na makakadagdag pa rin ‘yan sa buffer stock natin.

Sa kabilang banda, pakiusap ko rin sa ating mga kasamahan sa gobyerno, pakibilisan ang pagpapalabas ng fertilizer at seed subsidy para maiwasang tumaas ang presyo ng bigas.

Lastly, reminder ko lang at palagi ko namang sinasabi na plis, ‘wag naman nating laging gawing solusyon ang importasyon agad. Eh, tanging mga trader at importers ang makikinabang d’yan, ‘di bah?

Pag-rehab ng mga Dam at pagtayo ng Water impounding system, solusyon sa krisis sa tubig!

ni Imee Marcos @Imeesolusyon | April 10, 2023

Nag-abiso ang Maynilad nitong nakaraang mga araw na magkakaroon sila ng 19 oras na water interruption araw-araw.

Kapos daw kasi sila ng tubig na isu-supply sa kanilang mga customer. Pero tinanggihan nga raw ng National Water Resources Board (NWRB) ang hirit nilang dagdag-alokasyon sa harap ng krisis sa tubig.

Sa harap niyan, matagal ko nang IMEEsolusyon ang mamuhunan tayo sa pagtatayo ng mga water impounding system, kung saan maaaring mag-imbak tayo ng mga rain water tuwing tag-ulan at magagamit natin ito ngayong may water crisis.

IMEEsolusyon din na i-rehabilitate na natin ang ating mga dam na source ng ating water supply.

Abah, eh, mayroon na nga raw sira ang mga aqueduct na dinaraanan ng tubig mula sa mga dam, saka kopong-kopong pa ang mga dam na ‘yan. Eh ‘di ba, mula nang buksan ang Angat, Pantabangan at Magat Dam way back 1976 hanggang 1983, kahit isang beses ay hindi pa ito nakatikim ng rehabilitasyon.

Take note, tiyak na darami pa ang water rationing na mangyayari dahil hindi biro ang araw-araw na water interruption na ‘yan, ha. Santisima!

Remember, hindi lang mga ordinaryong household ang apektado sa tuwing bumababa ang supply ng tubig mula sa nasabing mga dam kundi maging ang mga magsasaka natin sa Pampanga at Bulacan.

‘Yung Cloud-seeding, eh, pansamantalang pansalo lang ‘yan sa problema sa tagtuyot.

Mahalagang unahin natin na itayo ang maliliit na water impounding system at ang rehabilitasyon ng ating mga dam. Dapat isagawa ‘yan ASAP, lalo na't may inaasahang El Niño. Agree?