Kapag maikli pa ang kumot, mamaluktot at kapag walang kumot, mag-tumbling na! ‘Kalokah!!!

ni Imee Marcos - @Buking | August 28, 2020

Sa panahon ngayon na hirap na hirap tayo, pagdating sa badyetan. Effort kung effort ang pagba-budget ngayon lalo pa’t kakarampot ang iba-budget.

Kaya talagang effort din ang budget management sa halagang ibibigay na dagdag-ayuda sa ilalim ng Bayanihan 2 Bill para sa iba’t ibang sektor na apektado ng COVID-19 pandemic, hindi ko kinaya!

Paano ba naman na hindi pahirapan ang pagbaba-budget ngayon kung ‘yung babadgetin na pondo ay hahagilapin lang. ‘Kalerki, ‘di ba? Grabe to the max ang gagawin natin para pagkasyahin ang hinihanap pa lang na pera!

Ang P162 bilyon, mga frennie, ang orihinal na badyet para sa Bayanihan 2 pero bumaba sa P140 bilyon. Meron naman daw na standby funds, kaya ‘wag mag-alala.

Biruin n’yo, sa P140 bilyon, didiretso sa bangko ang P50 bilyon para sa loan ng MSMES o Micro, Small & Medium Enterprises at kakarampot na lang ang natitira para sa tourism sector, transport group, health workers at OFWs. Jusko day, ang haba ng listahan!

Pinakamasaklap pa nito, ang orihinal na inilalaan natin para sa Cash-for-work program at Tulong Panghanapbuhay sa Ating Disadvantaged/Displaced Workers o TUPAD ng DOLE sa bersiyon ng Senado ay natapyasan pa at P5 bilyon na lang ang natira, ‘maryosep talaga!

Napakapayat talaga, naghahanap pa kami saan kukuha ng pondo, eh, lahat dumaraing na. Nakakalerki talaga! Kaya nga masasabi nating kapag maikli pa ang kumot, bumaluktot at kapag wala nang kumot, mag-tumbling na! Ha-ha-ha!

Kaya naman, mungkahi natin, eh, i-divert ang pondo sa 2020 budget, gamitin na muna ang travel fund ng mga opisyal ng gobyerno. Ibuhos na lahat ng pondo sa ayuda sa ating mga kababayang naghihirap, saka na ang travel-travel na ‘yan ng mga gov’t officials, ‘di ba! Saka COVID-time ngayon, mahirap nang bumiyahe! Agree?

Sindikato at korupsiyon sa PhilHealth, inamin ni Health Sec. Duque na totoo, jusko!

ni Imee Marcos - @Buking | August 26, 2020

Saan nga ba nahuhuli ang isda? Eh, ‘di ba nga sa bunganga? Ha-ha-ha!

Ganyan ang nangyari kay Health Sec. Francisco Duque III, na napaamin natin sa Senate inquiry na may sindikato at korupsiyon sa PhilHealth. Oh, ‘di ba, ang bongga!

Nakorner natin ang kalihim at hindi na nakaiwas pa sa ating mababagsik na tanong, mga besh at itinodo na talaga natin ang paggisa para naman madale natin ang info kung talagang may alingasngas sa ahensiya at kung sinu-sino ang mga sangkot. Eh, ilang dekada na yatang nagtagal si Mr. Secretary bilang chairman ng board ng PhilHealth.

Pero silencio ang kalihim sa kontrobersiya, until such time na na-invite siya at nagisa sa Senado na akin namang sinamantala kaya naman, hayun, umamin ang lolo n’yo na malamang meron nga raw korupsiyon sa loob at sindikato sa mga fraudulent claims! Boom panes, huli ka balbon!

Eh, nang tanungin natin siya kung may kasalananan o may pagkukulang si PhilHealth President at Chief Executive Officer Ricardo Morales, huwaw! Tila iwas-pusoy ang kalihim at nagsabi lang na wala raw siyang ebidensiya na direktang mag-uugnay kay Morales sa mga alingasngas sa PhilHealth!

Pa-demure-demure pa ang lolo n’yo sa pagsagot at tablado, aketch sa ibang mga tanong ko, lalo na sa isyu ng bansag sa kanya na “Ninong” siya ng mga dating opisyal ng PhilHealth noong nasa trono pa siya bilang PhilHealth chairman of the board. ‘Di raw niya knows ‘yon? Hmmm…

Dami niyang palusot, hay, eh, kung ako naman ang tatanungin, buking na siya mga amiga!

Eh, kahit ‘yung tanong kung bakit magkaiba ang listahan ng DOH at PhilHealth sa fraudulent claims ng mga ospital, juskoday, halata ang lolo na nagtatakip sisipatin pa raw niyang mabuti ang mga documents at datos. Ha-ha-ha!

Talagang hinihikayat natin ang kalihim na tumulong sa imbestigasyon sa mga pagngungulembat sa pondo sa PhilHealth, eh, sabi nga sa wikang Bisaya, juicekoday, ginoo ko, hurot na ang pondo! Kaya naman, plis lang Sec. Duque, have a heart, don’t save them!

Kasalukuyang pondo ng PhilHealth, dapat bantay-sarado!!!

ni Imee Marcos - @Buking | August 24, 2020

Hindi na natapus-tapos ang malawak at matagal na pamamayagpag ng sinasabing korupsiyon sa PhilHealth. Kaya habang wala pang linaw, dapat sigurong huwag na munang pakialaman ‘yung P10 bilyon na ilalagay daw sa nasabing ahensiya.

Hay naku, mga frennie, malalim talaga ang ugat ng anomalya riyan at isa sa mga pangunahin d’yan, eh, ‘yung talamak na “Pera sa Pneumonia Scam”. ‘Yan ‘yung simpleng sipon lang ang sakit tapos idedeklarang pneumonia para may mai-reimburse ang ospital sa ahensiya. Eh, ‘di ba, ang galing, laking kickback na!

Ang nakapagtataka ay kung bakit nakalulusot ang mga ganyang scam? Eh, ‘di kasi ‘yan mao-audit dahil sa kakulangan sa Republic Act 11332 o ang batas na mandatong iulat ng ahensiya sa gobyerno ang anumang nakahahawang sakit.

Ganito kasi ‘yan, hindi tugma ang pneumonia sa depenisyon ng batas sa tinatawag na “notifiable disease”, kaya “nagagawang ibalewala ng mga buwitre-bandido sa PhilHealth ang detalyadong pagsiwalat sa mga kaso ng pneumonia at tuloy ang singil-suhol ng mga ospital.” Gets n’yo?

Meaning, mga friendship, nailulusot ng mga bandidong buwitre sa PhilHealth ang paglalabas ng pera para bayaran ang mga ospital sa simpleng sakit, na sipon lang pero ginawang pneumonia ng mga tao ahensiya. ‘Kalokah!

Super-duper ang lalim ng talamak na kubrahan d’yan sa PhilHealth. Hirit nating suspendihin din muna ang paniningil ng premium contribution sa mga miyembro. Aba, eh, nobody knows, kung madadale ulit ang mga ‘yan ng sinasabi nilang sindikato sa loob. He-he-he!

Para iwas din na lumalim pa ang pangangawat ng pondo, eh, suggestion nga rin, na bumuo muna ang ating gobyerno ng account para ilipat at mabantayan ang kasalukuyang pondo ng PhilHealth at ilipat rin sa Department of Budget and Management (DBM) ang procurement o pagkuha ng equipment ng PhilHealth habang magulo pa ang usaping pinansiyal ng ahensiya.