Tuluy-tuloy ang pagtatayo ng mga Super Health Center

ni Bong Go - @Bisyo Magserbisyo | July 30, 2022

Kaisa tayo sa pagsuporta sa mga prayoridad ng bagong administrasyon. Kaya sumabak nang muli sa trabaho sa Senado ang inyong Kuya Bong Go sa pagsisimula ng 19th Congress. Taglay natin ang panibagong sigla dahil ‘eto na naman tayo sa tungkulin at pangako na makalikha ng mga batas para sa patuloy na pag-angat ng kalagayan ng mga kapwa natin Pilipino at pagkakaloob ng mas komportableng buhay.

Muli tayong binigyan ng oportunidad bilang Chair ng Senate Committee on Health. Nagpapasalamat tayo sa tiwala na pamunuan ang komite, lalo ngayong marami pa rin tayong kinahaharap na krisis pangkalusugan. Maipagpapatuloy natin ang mga ginagawa sa nakalipas na tatlong taon, lalo na nitong pumutok ang pandemya, partikular ang pagpapalakas sa ating healthcare system.

Sa pagbubukas pa lang ng 19th Congress ay agad na nating isinumite ang mga prayoridad na panukalang batas, kabilang ang pagtatayo ng Center for Disease Control and Prevention at ng Virology Science and Technology Institute of the Philippines. Patuloy ang pagtatayo ng mga Super Health Centers sa mga malalayong komunidad sa buong bansa para hindi na kailangang bumiyahe ng mga pasyente sa malalaking lungsod.

At tulad nang nabanggit ng Pangulo, maraming kinahaharap na hamon ang ating bansa. Bilang bahagi ng mayorya sa Senado, maaasahan ng ating kapwa senador ang suporta para masolusyunan ang mga problema ng ating bansa at kaisa para maisakatuparan ang mga programa at proyekto ng bagong administrasyon.

Bilang Chair ng Senate Committee on Health, suportado natin ang desisyon ng DOH na payagan ang second booster para sa mga edad 50 pataas at 18 hanggang 49 na may comorbidities. Mas malaki ang tsansa natin ngayon na tuluyang makontina ang pandemya kung mas maraming Pilipino ang mababakunahan. Kaya ang apela ko sa lahat nating kababayang kuwalipikado sa bakuna, samantalahin ang vaccine rollout para mas protektado laban sa virus.

Nalungkot at nabagbag ang ating kalooban dahil sa naganap na lindol sa hilagang Luzon, lalo na sa lalawigan ng Abra, nitong Miyerkules, Hulyo 27. Ang unang pumasok sa ating isipan ay sana’y walang nasaktan sa ating mga kababayan.

Tiwala tayo na palaging handa ang pamahalaan para matulungang makabangon agad ang mga kababayan nating naaapektuhan ng lindol. Handa rin tayong tumulong sa kahit anong kapasidad. Sa katunayan, ilang minuto matapos ang lindol ay agad nagplano ang ating tanggapan kung paano makapaghahatid ng tulong at mga pangunahing pangangailangan sa mga residente sa mga lugar na labis na napinsala at naapektuhan.

Ang pangyayaring ito ay paalala na kailangang mas pagtibayin pa lalo ang paghahanda para sa anumang krisis o trahedya. Kaya patuloy nating ipinaglalaban na maipasa ang panukala na magtatag ng Department of Disaster Resilience.

Kailangan natin ng departamento na ang pangunahing tungkulin ay hindi lang maghatid ng agarang tulong sa mga biktima ng sakuna at kalamidad, kundi maging ang pagtiyak sa mabilis na pagbangon at rehabilitasyon ng mga apektadong komunidad.

Ang mabilis na pagbabalik sa normal na sitwasyon ang isa sa pinakamahalagang magiging mandato ng itatatag na DDR.

Nananawagan din tayo sa ating mga kapwa mambabatas na ipasa ang isinumite nating Mandatory Evacuation Center bill na naglalayong magtayo ng evacuation center sa bawat lalawigan, siyudad at munisipalidad na ligtas at kumpleto sa bawat pangangailangan ng mga pansamantalang lilikas dito.

Hindi tayo titigil ipaglaban ang mga panukalang batas dahil pinakaimportante sa lahat ang buhay ng bawat Pilipino. Huwag nating hintayin na may iba pang sakuna o trahedya na mangyari. Umaksyon agad tayo para proteksyunan ang sambayanang Pilipino.

Samantala, sa kabila ng pagiging abala sa tungkulin, hindi tumitigil ang ating tanggapan sa paghahatid ng ayuda sa mga kababayan nating may kinahaharap na krisis bukod sa pandemya.

Agad nating sinaklolohan ang mga pamilyang biktima ng magkakahiwalay na insidente ng sunog tulad ng 34 sa Bgy. Guadalupe, Cebu City; 23 sa Bgy. 183, Pasay City; at 11 pa sa Bgy. Basak at Pajo sa Lapu-Lapu City, Cebu.

Nagbigay-tulong din tayo sa mga kababayan nating higit na nangangailangan sa malalayong komunidad tulad ng 1,547 mahihirap na residente ng Moalboal, Cebu; 561 sa Enrile, Cagayan; at 337 pa sa Siniloan, Laguna.

Hindi rin natin kinaligtaan ang mamahagi ng suporta sa 2,200 benepisaryo mula sa Manay, Davao Oriental na personal nating binisita; mga miyembro ng iba’t ibang sektor tulad ng 1,200 benepisaryo mula sa Banaybanay; at 1,100 pa sa Lupon, sa probinsya pa rin ng Davao Oriental. Napagaan din natin ang dalahin ng 216 benepisaryo mula sa Dupax del Sur, Nueva Vizcaya.

Muli nating binisita ang Island Garden City of Samal sa Davao del Norte para bigyan ng tulong ang 12 pamilyang biktima ng insidente noon sa Auring Village sa Bgy. Cawag.

Hindi talaga masasabi kung ano ang magaganap sa bawat araw. Kailangan ng panalangin, pagtutulungan at bayanihan para malampasan ang mga pagsubok na ating nararanasan.

Suportahan din natin ang panawagan ng pamahalaan na mas maging matatag, palaging handa at walang maiiwan habang unti-unti tayong bumabangon sa mga krisis bilang nagkakaisang sambayanang Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suportahan ang solusyon ni P-BBM sa mga problema ng bansa

ni Bong Go - @Bisyo Magserbisyo | July 27, 2022

Sa State of the Nation Address ni Pangulong Ferdinand “Bongbong” Marcos, Jr. noong Hulyo 25, 2022, inihayag niya ang estado o kalagayan ng ating bansa at inilatag ang mga solusyon sa mga isyung ating kinahaharap.

Masaya tayo dahil marami siyang nabanggit na karamihan ay bahagi rin ng mga prayoridad na panukalang batas na isinumite natin sa 19th Congress, partikular ang pagpapalakas sa healthcare system, tulad ng pagtatayo ng Center for Disease Control and Prevention, ng Virology Science and Technology Institute of the Philippines. Tulad ng isinulong nating Super Health Centers, suportado rin natin ang hangarin ni Pangulong Marcos na magtatag ng mga specialty hospitals sa iba pang bahagi ng bansa.

Ito ang dahilan kung bakit mayroon tayong Malasakit Centers — para gobyerno na ang lumapit sa mga tao. Sa pagkakaroon ng mga dagdag-specialty hospitals maging sa labas ng Metro Manila, hindi na mahihirapan ang mga Pilipino, saanman silang sulok ng bansa. Kung tutuusin, pera nila ito. Ibinabalik lang natin sa kanila sa pamamagitan ng mas madaling malalapitan at maayos na serbisyo at huwag natin silang pahirapan sa pagkuha ng tulong.

Sa kasalukuyang sitwasyon ay suportado natin ang panawagan na huwag mag-lockdown. Basta siguraduhin lang na kaya ito ng healthcare system, dahil una at pinakaimportante sa lahat ang buhay ng bawat Pilipino.

Tama na maingat na balansehin ang kalusugan at ekonomiya. Subalit, hindi ito magagawa ng pamahalaan lang. Kaakibat sa polisiyang ito ang disiplina at kooperasyon ng mamamayan upang maimplementa nang maayos ang mga health protocols at mas marami pa ang mabakunahan, lalo na ng booster shots.

Tandaan, ang bakuna lamang ang tanging solusyon para malampasan ang pandemya at makabalik tayo sa normal nating pamumuhay lalo na ngayong tumataas na naman ang COVID-19 cases.

Sang-ayon din tayo sa pagbabalik ng face-to-face classes, pero importante na pangalagaan natin ang buhay at kaligtasan ng bawat kabataan.

Nagpapasalamat din tayo kay Pangulong Marcos dahil ipagpapatuloy at palalawakin niya ang Build, Build, Build program na pamana ng administrasyon ni dating pangulong Rodrigo Duterte. Ang mga proyektong ito ay nakalikha ng maraming trabaho at nagpagaan sa buhay ng mga Pilipino, partikular sa transportasyon at pakikinabangan maging ng mga susunod pang henerasyon. ‘Ika nga niya, “Build Better More”!

Umaasa tayong mas maraming imprastruktura ang maitatayo, lalo na sa mga rural areas. Kung naririyan sa malalayong lugar ang imprastraktura, magkakaroon ng pagkakataon ang mga kababayan nating naninirahan doon, lalo na ang mahihirap ng mas mabilis na access sa mga serbisyo ng pamahalaan, magkakaroon ng mga negosyo, makalilikha ng mga trabaho at aangat ang kabuhayan, lalo na ang agrikultura na prayoridad ng ating Pangulo.

Natutuwa tayo sa pangako niyang pagbibigay ng atensyon sa OFWs at binigyang-pugay niya ang pagkakalikha sa Department of Migrant Workers sa ilalim ng Administrasyong Duterte. Nabuo ang DMW sa pamamagitan ng Republic Act 11641 na inakda natin at ng ating mga kasamahan sa Senado at kinalauna’y nilagdaan para maging ganap na batas ni dating pangulong Duterte. Ngayon ay may departamento nang nakatutok sa OFWs at kapag may problema’y hindi na sila magpapaikut-ikot pa sa iba’t ibang ahensya.

Bagaman at hindi nabanggit ang tungkol sa peace and order, mahalaga na maipagpatuloy ang laban sa kriminalidad. Sa ilalim ng Administrasyong Duterte ay naramdaman ng mga Pilipino na ligtas sila kahit umuwi ng gabi. Kung patuloy ang pagbaka sa kriminalidad, nasusugpo rin natin ang paglaganap ng ilegal na droga at ang korapsyon.

Sang-ayon din tayo na walang bahagi ng ating bansa—maliit man o malaki—na maaangkin ng mga dayuhan.

Bilang miyembro ng mayorya sa Senado, handa tayong makipagtulungan para maisakatuparan ang pangarap ng mamamayan.

Maaasahan din ng administrasyong Marcos ang ating suporta, lalo na sa paglikha ng mga batas na nakasentro sa pagseserbisyo sa ating mga kababayan tulad ng pagtiyak na may murang pagkain sa bawat mesa, paglikha ng mga trabaho, edukasyon, imprastruktura, pangangalaga sa OFWs, kahandaan sa mga sakuna at kalamidad at marami pang iba.

Ang pinakaimportante ay gawing mas komportable ang buhay ng mga Pilipino lalung-lalo na ang mahihirap na isang kahig isang tuka at walang inaasahan kundi ang pamahalaan, walang magugutom at walang maiiwan sa ating hangaring makabalik na sa normal na pamumuhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagkakaisa ang susi sa maunlad na bayan

ni Bong Go - @Bisyo Magserbisyo | July 22, 2022

Sa pagbubukas ng bagong 19th Congress, nagsumite tayo ng mga panukalang batas na naglalayong mas patatagin at gawing mas matibay ang bansa sa pagtugon sa iba’t ibang hamon ng panahon. Ang mga batas ay bahagi ng ating mga adbokasiya at bilang suporta sa naging hangarin ni dating pangulong Rodrigo Duterte na makapagbigay ng mas maginhawang buhay sa mga Pilipino.

Kasalukuyan pa nating nilalabanan ang pandemya dala ng COVID-19. Naniniwala rin tayo na hindi ito ang kahuli-hulihang hamon sa kalusugan ng mamamayan. Kung kaya’t isinusulong natin ang mga panukalang batas upang mas patatagin pa ang healthcare system.

Kabilang na ang pagbibigay ng libreng annual medical check-up para sa bawat Pilipino at libreng Comprehensive Dialysis Benefit Package para sa mga miyembro ng PhilHealth, Advanced Nursing Education, pagtatag ng Centers for Disease Control at Virology Science and Technology Institute of the Philippines, pagkakaroon ng Emergency Medical Services System, Amendments to the Insurance Code upang mas matutukan ang mga Health Maintenance Organizations at pagbibigay ng Barangay Health Workers Benefits.

Madalas tayong tamaan ng mga kalamidad dahil sa epekto ng climate change at ating lokasyon sa Pasipiko. Kaugnay nito, muli nating isinumite ang Disaster Resilience Bill na naglalayong magtatag ng Department of Disaster Resilience na ahensyang tututok kapag may sakuna at iba pang emergency.

Kabilang din sa mga panukala ang Rental Housing Subsidy para sa mga nawalan ng bahay dahil sa mga sakuna, pagkakaroon ng Mandatory Evacuation Center sa bawat lungsod, bayan at lalawigan at pagkakaroon ng National Housing Development Production and Financing Program para sa mas maayos na programang pabahay sa mga Pilipino.

Sa Lunes, Hulyo 25, 2022 ay ihahatid ni Pangulong Ferdinand Marcos, Jr. sa mga Pilipino ang kanyang unang State of the Nation Address o SONA para ihayag ang kasalukuyang kalagayan ng ating bansa at ang kinahaharap na mga suliranin, at kung ano ang mga plano at magiging aksyon ng kanyang administrasyon upang maresolba ang mga iyon.

Dahil marami ang nawalan ng trabaho at negosyo, marami pa rin ang nahihirapan, lalo na pagdating sa kanilang pangunahing pangangailangan, tulad ng pagkain. Inaasahan nating tatalakayin ni Pangulong Marcos, Jr. ang seguridad sa pagkain at ang magiging papel ng sektor ng agrikultura para matiyak na may sapat at murang pagkain sa mesa ng bawat pamilyang Pilipino. Kailangan din natin makapagbigay ng mga trabaho, lalo na sa kanayunan, kung kaya’t isinusulong din natin ang pagkakaroon ng Rural Employment Assistance at pag-institutionalize ng One Town One Product.

Umaasa tayong ipagpapatuloy din ng administrasyon ang mga proyektong nasa ilalim ng “Build Build Build Program” ni dating pangulong Duterte dahil bukod sa ginhawa na hatid ng mga ito sa publiko ay nakalilikha rin ng maraming kabuhayan at nakaaakit ng maraming investors. At kung maganda ang mga imprastruktura, yumayabong din ang turismo at iba pang industriya.

Kaisa tayo sa hangarin ni Pangulong Marcos, Jr. na gawing mas handa, matatag at matibay ang bansa upang tuluyan nating malampasan ang pandemya at masigurong walang Pilipinong maiiwan sa ating full recovery. Patuloy lang tayo sa pagkakaisa at bayanihan para maisakatuparan ang hangaring magkaroon ng mas magandang bukas at mas maginhawang buhay.

Sa kabuuan, sa unang taon ng administrasyon ni P-BBM ay umaasa tayong makaaagapay ang ating bansa at tayong mga Pilipino sa mga hamon ng kasalukuyang panahon para patuloy na umunlad ang ating ekonomiya.

Para maisagawa iyon, kailangan natin ng mas malakas at matatag na healthcare system para tuluyan na tayong makabangon sa pandemya, may tiyak na supply ng pagkain, mas ligtas ang ating mga komunidad at mabilis ang magiging pagtugon sa mga sakuna at kalamidad, at mas maraming imprastruktura ang maitatayo upang mas maraming malikhang trabaho para sa mga Pilipino.

Kaakibat din ng layuning ito ang pagkakaroon ng ligtas at tahimik na mga komunidad sa iba’t ibang sulok ng bansa. Dapat maipagpatuloy ang laban kontra korapsyon, kriminalidad at ilegal na droga upang panatag ang loob ng mga Pilipino at sama-sama tayong makikipagtulungan tungo sa iisang pangarap para sa ating minamahal na Pilipinas.

Samantala, tuluy-tuloy ang paghahatid ng ating tanggapan ng tulong sa mga kababayan nating labis na nangangailangan. Ngayong linggo ay pinagaan natin ang dalahin ng mga pamilyang biktima ng magkakahiwalay na insidente ng sunog tulad ng 67 pamilya sa Valenzuela City; 57 sa Bgy. Duljo Fatima, Cebu City; 39 sa Bgy. 60 Tondo, at 18 naman sa Bgy. 394, Quiapo, Manila; 35 sa Bgy. Addition Hills, Mandaluyong City; at anim pa sa Bgy. Handumanan at Felisa sa Bacolod City.

Tinugunan din natin ang pangangailangan ng mga kababayan nating kapos sa panggastos, tulad ng 500 benepisaryo sa Valenzuela City; 359 sa Diadi at Quezon, Nueva Vizcaya; at 333 sa Quezon City.

Kahapon, personal tayong bumisita para bigyan ng ayuda ang 1,450 nating kababayan mula sa Barangay R. Castillo, Lapu-Lapu at Ubalde sa Davao City.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.