Tulong at proteksyon sa mga taga-media

ni Bong Go - @Bisyo Magserbisyo | October 22, 2022

Hindi tayo tumitigil sa pangakong pagseserbisyo sa abot ng aking makakaya para sa bawat Pilipino, lalo na ang mahihirap at walang ibang matakbuhan. Patuloy tayong pupunta sa iba’t ibang komunidad upang maghatid ng tulong, mapakinggan ang hinaing ng ating mga kababayan, masolusyunan ang mga problemang inyong hinaharap at makapag-iwan ng ngiti sa oras ng inyong pagdadalamhati.

Noong Oktubre 20 ay bumiyahe tayo patungong Mandaue City, Cebu at personal ko nating inalam ang kalagayan ng mga kababayan natin na apektado ng pagbaha. Pinangunahan natin ang pamamahagi ng ayuda sa halos isang libong benepisaryo mula sa iba’t ibang barangay, at mayroon pang mahigit 3,000 na makatatanggap din ng ayuda ngayon.

Kahapon, Oktubre 21 ay agad nating pinuntahan ang mga kababayan nating naging biktima ng sunog sa Malabon City. Personal din tayong nag-abot ng tulong sa mahigit isang daang pamilyang nasunugan.

Tulad ng madalas nating sabihin, mahirap ang sitwasyon ng mga nasunugan, binaha o tinamaan ng sakuna dahil nauwi lang sa wala ang kanilang mga pinaghirapan, bukod pa sa wala agad pagkukunan ng pangunahing pangangailangan at gastusin.

Ang ating relief team ay nakarating naman ngayong linggo sa iba’t ibang komunidad sa ating bansa para sa patuloy na adhikaing mapagaan ang mga dalahin ng ating mga kababayan habang patuloy na nakikipaglaban sa epekto ng pandemya at iba pang krisis.

Ang mga kababayan nating apektado ng bagyo tulad ng 500 sa Gapan, Nueva Ecija, at 39 sa New Washington sa Aklan ay nakatanggap ng tulong. Merong 21 na mga kababayan nating apektado ng sunog mula sa Balingasag at El Salvador City, Misamis Oriental ang nakatanggap din ng suporta.

Nagsagawa tayo ng serye ng pamamahagi ng ayuda sa iba’t ibang lugar sa Bohol at nasuportahan natin ang 1,052 benepisaryo sa Pilar; 325 sa Anda; 258 sa Dimiao; 199 sa Sevilla; at 189 pa sa Lila. Hindi rin natin kinaligtaan ang 1,900 na nangangailangan sa Zamboanga City; 600 sa San Pablo City, Laguna; at 1,000 sa Tanza, Cavite.

Sa Rizal, 500 benepisaryo sa Rodriguez ang ating natulungan, at 450 pa sa Taytay. Dagdag pa rito ang 689 benepisaryo sa Magsaysay, Lanao del Sur; 500 sa Dingalan, Aurora; 333 sa Orani, Bataan; at 190 pa sa San Fernando City, La Union.

Tuluy-tuloy rin ang pagkakaloob natin ng tulong-pangkabuhayan sa maliliit nating negosyante para sumigla ang kanilang lokal na ekonomiya. Sa Ilocos Norte, napagkalooban ng gobyerno ng pandagdag sa kanilang puhunan ang 105 MSMEs sa San Nicolas, 83 sa Paoay, at 76 pa sa Banna. Nakarating din tayo sa La Union para naman palakasin ang 109 MSMEs sa Luna, 75 sa Bangar, 199 sa Bauang at Naguilian, at 20 pa sa Sudipen.

Bukod dito, patuloy din ang ating trabaho sa Senado bilang mambabatas at lingkod-bayan.

Dagdag pa rito, suportahan din natin ang mga sektor na nagiging gabay at haligi natin sa ating paglilingkod sa bayan. Kasama na ang mga nasa media at entertainment industry.

Mahal natin ang mga taga-media. Pantay-pantay ang aking pagtingin sa kanila sa radyo man sila, online, telebisyon o dyaryo—pribado o gobyerno. Napakahalaga ng papel ng media sa paghahatid ng balita at impormasyon. Ang media rin ang nagsisilbing mata, tainga at dila ng mga tao para iparating ang kanila ang mga karaingan na nangangailangan ng agarang pansin at solusyon.

Proteksyunan natin ang buhay ng bawat mamamahayag. Kaya noong panahon ni dating Pangulong Rodrigo Duterte, binuo niya ang Presidential Task Force on Media Security (PTFoMS) dahil prayoridad niya na proteksyunan ang media. Basta siguraduhin lang na tama ang trabaho at tama ang pagbabalita.

Alam ko rin ang hirap na dinaranas ng mga taga-media. Bukod sa panganib na kanilang sinusuong makapaghatid lang ng tama at makabuluhang balita, may sarili rin silang pamilya na binubuhay. Ito ang dahilan kaya bilang pag-alalay sa kanila at sa mga taga-entertainment industry, isinulong ko ang Senate Bill No. 1183 o ang Media and Entertainment Workers Welfare Act.

Kapag naisabatas ito, magiging mandatory na ang pagkakaroon nila ng detalyadong kontrata bago sila magsimula ng trabaho. Kasama rin dito ang mga dapat nilang matanggap na benepisyo. Ipaglalaban ko ito upang tuluyang maging batas bilang pagkilala sa dedikasyon nila sa kanilang propesyon at tungkulin nila sa buong sambayanang Pilipino.

Walang Pilipino na dapat maiwan sa ating muling pagbangon. Ipagpapatuloy natin ang pagtulong. Nagsisilbing lakas ko ang aking paninindigan na, “Ang serbisyo sa tao ay serbisyo rin sa Diyos.”

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Hakbang laban sa kalamidad, susi sa matatag na bansa

ni Bong Go - @Bisyo Magserbisyo | October 19, 2022

Noong Oktubre 13 ay naging isa sa panauhing pandangal at tagapagsalita ang inyong Senador Kuya Bong Go sa ginanap na 7th MCLE-Accredited National Convention of Public Attorneys na inorganisa ng Public Attorneys Office sa pamumuno ni PAO chief Atty. Persida Acosta. Tumanggap din ang inyong lingkod ng parangal mula sa PAO bilang “Outstanding Senator.”

Bagama't nakatataba ng puso ang mga ganitong parangal lalo pa at galing sa PAO na ang tungkulin ay magkaloob ng libreng tulong na legal sa mahihirap na Pilipino, sabi ko nga sa kanila, tulad nila ay ginagawa ko lang naman ang aking tungkulin nang walang hinihinging kapalit. With or without an award, magseserbisyo ako sa abot ng aking makakaya dahil bisyo ko ang magserbisyo. Saludo naman tayo sa PAO at sa kanilang mga abogado na nagtatanggol sa hukuman para matiyak na may hustisya sa lahat, lalo na sa mga karaniwang Pilipino.

Samantala, habang papalapit ang Kapaskuhan ay patuloy pa ring dinadalaw ng mga bagyo ang ating bansa. Kaaalis lang ng Bagyong Neneng at nag-iwan ng pinsala sa kabuhayan ng mga kababayan natin sa Cagayan at Ilocos. Labis akong nalulungkot sa ganitong pangyayari dahil unti-unti na tayong nakababangon mula sa hagupit ng pandemya, pero patuloy tayong pinipilay ng mga kalamidad at iba pang krisis.

Napakahalaga ng disaster resiliency dito dahil halos 20 bagyo ang pumapasok sa ating bansa taun-taon, bukod pa ang mga kalamidad tulad ng lindol, landslide, storm surge at iba pa. Ito ang isa sa mga dahilan kaya naging adhikain ko na simula nang ako’y maging senador na gawing mas matatag o resilient at palaging handa sa mga kalamidad ang mga komunidad, lalo na sa mahihirap at liblib na lugar.

Para makamit ito, sa 19th Congress ay muli kong isinulong ang paglikha sa Department of Disaster Resilience. Layunin nitong mapabilis ang mga mekanismo sa paghahanda kapag may kalamidad at iba pang emergency. Kapag naitatag ang DDR, may sarili tayong kalihim na magbibigay ng malinaw na direktiba sa iba pang sangay ng pamahalaan kung paano tutugunan ang sitwasyon bago dumating at pagkatapos tayong tamaan ng kalamidad.

Nariyan din ang panukalang Mandatory Evacuation Center Act of 2022 na akin ding inihain sa Senado. Layunin nitong magtayo ng matitibay na evacuation center sa bawat probinsya, lungsod at munisipalidad. Bukod sa maayos na tulugan at palikuran, kumpleto ito dapat sa mga pangunahing pangangailangan tulad ng pagkain, tubig, gamot at damit upang mas madaling makabangon ang ating apektadong mga kababayan.

Isa pa ang Rental Housing Subsidy Bill na akin ding iniakda na ang layunin ay pagkalooban ng rental housing subsidy ang mga Pilipinong nawalan ng bahay para mayroon silang disenteng matitirahan. Kapag naisabatas ito, mas matutulungan nating makakuha ng marerentahang tirahan ang mga tinamaan ng sakuna.

Isinumite ko rin ang SBN 1181 o ang Philippine Building Act para masigurong mas maayos at ligtas ang disenyo at pagkagawa ng mga pribado at pampublikong gusali. Taong 1977 pa nabuo ang ating National Building Code at kailangan na itong mapag-aralang mabuti para maging akma sa patuloy na nagbabagong panahon ngayon.

Kasama rin sa disaster resiliency ang pagsigurong handa ang ating serbisyong pangkalusugan, may krisis man o wala. Kaya bilang Chair ng Senate Committee on Health, napakahalaga rin para sa akin ang mabigyan ng proteksyon laban sa anumang sakit ang mga Pilipino at mapalakas ang ating healthcare system.

Isinusulong ko sa Senado ang SBN 2155, o ang panukala para sa pagtatayo ng Virology Science and Technology Institute of the Philippines (VIP) para mapaigting ang ating kakayahan sa siyensya at magkaroon ng sapat na sariling gawang medisina at bakuna laban sa mga bagong lumalabas na sakit.

Dapat na one-step ahead tayo sa mga darating pang public health emergencies kaya isinulong ko rin ang SBN 2158 o ang pagkakaroon ng Center for Disease Control and Prevention (CDC) para mas maayos at mabilis nating matutugunan ang anumang krisis pangkalusugan.

Nariyan din ang SBN 1180 o ang Medical Reserve Corps. Sa ilalim nito, papayagan ang mga nakapagtapos sa mga kursong may kaugnayan sa medisina pero hindi pa lisensyado na tumulong at makapagserbisyo sa pamahalaan kapag may national emergencies.

Tugma ang tatlong ito sa mga prayoridad na panukalang batas ni Pangulong Ferdinand Marcos, Jr. na binanggit niya sa kanyang unang State of the Nation Address. Natutuwa rin ako na kamakailan ay sinabi ni Senate President Juan Miguel Zubiri na ang pagtatayo ng VIP at CDC ay kabilang sa mga panukalang batas na prayoridad ng Mataas at Mababang Kapulungan.

Ipinapangako ko na gagawin ko ang lahat ng aking makakaya upang tuluyang maging batas ang mga ito at mapakinabangan ng ating mga kababayan, lalung-lalo na ang mahihirap at walang malalapitan maliban sa pamahalaan.

Ginagawa ko ang mga pagsisikap na ito dahil patuloy pa rin ako sa aking hangarin na magkaroon tayo ng mas matatag na bansa na ligtas sa mga kalamidad at banta ng mga sakit. Kapag natugunan natin ang mga pangunahing problemang ito, nasa tamang landas tayo sa sama-samang pagbangon at walang Pilipinong maiiwan sa ating pagkakamit ng kaunlaran.

At lalo na ngayon na papalapit na ang Kapaskuhan, patuloy ako sa pagkakaloob ng serbisyo sa inyong lahat, dahil tulad ng madalas kong sabihin, “Ang serbisyo sa tao ay serbisyo rin sa Diyos.”

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pondo ng bayan, gamitin sa tama

ni Bong Go - @Bisyo Magserbisyo | October 14, 2022

Nitong Oktubre 10, 2022 ay nilagdaan na ni Pangulong Ferdinand “Bongbong” Marcos, Jr. ang Republic Act No. (RA) 11934 o ang “An Act Requiring the Registration of SIM Cards” sa Malacañang. Isa ako sa nagsulong ng nasabing batas bilang co-author at co-sponsor sa Senado. Kabilang din ako sa mga opisyal ng pamahalaan na sumaksi sa kauna-unahang batas na nilagdaan ng ating kasalukuyang Pangulo.

Layunin ng bagong batas na ma-regulate ang pagbebenta ng subscriber identity module o SIM cards para masugpo ang paglaganap ng mga manloloko gamit ang text scams sa ating bansa. Ako ay natutuwa ngayong ipatutupad na ang RA 11934 dahil ako mismo ay madalas maging biktima ng text scams at nagagamit pa ang aking pangalan, maging ang aking opisina, sa panloloko nitong mga scammers. Sa batas na ito, kailangan na magparehistro ng mga SIM owners, maaari nang ma-identify kung sino ang gumagamit nito at gamitin man nila sa kalokohan o kriminal na paraan ay maaari na silang ma-identify at mas madali na rin silang mahuhuli.

Sa Senado naman ay patuloy ang pagdinig nitong linggong ito para sa mga hinihiling na pondo ng mga ahensya ng pamahalaan para sa 2023. Bilang isa sa mga Vice-Chair ng Senate Committee on Finance, pinamunuan ko ang committee hearing na tumalakay sa budget ng Philippine Sports Commission at Games and Amusements Board. Bilang Chair rin ng Senate Committee on Sports, sisiguraduhin nating may sapat na pondo para sa ating grassroots sports development programs upang masuportahan ang mga Pilipinong atleta at para mailayo rin ang mga kabataan sa masasamang bisyo, tulad ng ilegal na droga. Sabi ko nga, “Get into sports and stay away from drugs!”

Kabilang din sa mga tinalakay ngayong linggo ay ang budget ng Office of the President, kasama ang Presidential Management Staff, at iba pang mga ahensya ng gobyerno, tulad ng Department of Social Welfare and Development. Suportado ko ang pagkakaloob ng pondo sa mga ahensya at institusyong ito para mas mapalawak pa ng pamahalaan ang paghahatid ng tulong at serbisyo sa bawat Pilipino.

Sa budget hearing ng OP at PMS ay naikuwento ko na ako mismo, alam ko ang trabaho nila dahil ilang taon ko ring nakasama ang mga empleyado sa Malacañang noong panahon ni dating Pangulong Rodrigo Duterte. Saksi ako sa kanilang sipag, integridad at propesyonalismo.

Bilang senador, hangad ko rin ang tagumpay ng bagong administrasyon ni P-BBM, at handa akong suportahan ang mga legislative agenda na sa tingin ko ay makakabuti sa mamamayan. Nasa likod ninyo ang milyun-milyong Pilipino, kaya sigurado akong maipatutupad ang mga programa na maghahatid sa ating bansa at mga kababayan ng kaunlaran.

Tiwala rin akong gagamitin nila sa tama ang ilalaang budget para sa kapakanan ng buong sambayanang Pilipino. Ako naman, basta ang hininging pondo ng alinmang ahensya ay ginagamit sa tama at napakikinabangan ng mga Pilipino, lalo na ng pinakamahihirap, suportado ko 'yan.

At tulad ng dati, sa kabila ng ating pagiging abala sa ating tungkulin bilang senador ay hindi ko kinakaligtaan ang paghahatid ng serbisyo at malasakit sa mga kababayan nating apektado pa rin ng pandemya at iba pang krisis ang kabuhayan.

Personal akong bumisita sa San Juan City at naghatid ng pagkain, vitamins, face masks at damit para sa 300 maliliit na negosyante sa lungsod. May ilang napagkalooban ng phablets, relo, sapatos, bisikleta at bola ng basketball at volleyball. Katuwang ang pamahalaang lokal at ang DSWD, inalalayan natin ang mga benepisaryong makabangong muli sa pamamagitan ng livelihood assistance grants.

Maagap din tayong umayuda sa 15 pamilyang nasunugan sa Bgy. Ususan at New Lower Bicutan sa Taguig City para sa kanilang mga pangunahing pangangailangan.

Pinagaan din natin ang dalahin ng 1,600 residente ng Dasmariñas City, Cavite; 1,000 benepisaryo sa Taal, at 551 pa sa Ibaan sa Batangas; 983 sa Bgys. Umapad, Casili, Cubacub at Casuntingan sa Mandaue City, Cebu; 498 sa Baliuag, Bulacan; 400 sa Tigbauan, Iloilo; at 187 pa sa Hermosa, Bataan.

Patuloy din tayo sa pagkakaloob ng suportang pangkabuhayan sa maliliit na negosyante na backbone ng ating ekonomiya. Sa Pangasinan, natulungan natin ang 250 MSMEs sa Dagupan City; 200 sa San Jacinto; at 178 sa Manaoag. Katulad na ayuda rin ang inihatid natin sa Negros Occidental para sa 300 benepisaryo sa Pontevedra; at 200 pa sa Don Salvador Benedicto. Sa Batanes, sumaya rin ang 117 benepisaryo sa Uyugan at 93 pa sa Basco.

Sinaklolohan din natin ang mga MSMEs sa iba pang komunidad, tulad ng 1,000 benepisaryo sa Sibalom, Antique; 400 sa Suyo, Ilocos Sur; 330 sa San Gabriel at San Juan sa La Union; 229 sa Mangaldan at San Fabian sa Pangasinan; 134 sa Hilongos, Leyte; at 100 pa sa Sudipen, Bangar, Luna, La Union.

Payo ko sa mga benepisaryo, gamitin nila sa tama ang puhunang nakuha nila at iuwi nila sa kanilang pamilya ang kanilang kikitain. Mas masarap sa pakiramdam kapag pinaghirapang lumago ang maliit na negosyo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.