Unahin lagi ang kapakanan ng mahihirap at higit na nangangailangang mga Pilipino

ni Bong Go @Bisyo Magserbisyo | April 22, 2023

Gaya ng madalas kong sabihin, hangga’t kaya ng aking oras at katawan ay nililibot natin ang buong Pilipinas para ilapit ang serbisyo ng pamahalaan sa ating mga kababayan.

Bukod sa aking mga gawain sa Senado, gusto kong personal na nakakausap ang aking mga kapwa Pilipino, naririnig ang kanilang mga hinaing, at sa abot ng aking makakaya at kapasidad ay makapagbigay ng tulong at ngiti sa oras ng kanilang pagdadalamhati.

Ngayong Abril 22, nasa probinsya tayo ng Quirino upang makiisa sa 6th Quirino Motorismo event. Dinadaluhan ito ng libu-libong motorcycle enthusiasts, at isa sa tourist attraction sa nasabing lugar. Suportado natin ang mga ganitong aktibidad dahil isa ang turismo sa mga behikulo para umunlad ang ekonomiya sa mga probinsya.

Matapos ito ay nagtungo ako sa Quirino Province Medical Center sa Cabarroguis upang magsagawa ng Malasakit Center monitoring at mag-abot ng tulong sa mga pasyente at frontliners doon.

Patuloy nating sinusubaybayan ang mga naitatag na Malasakit Center para matiyak na maayos na nagagampanan nito ang pagkakaloob ng tulong medikal sa ating mga kababayan, lalo na ang mahihirap at walang malalapitan maliban sa pamahalaan, nang hindi na sila magpapalipat-lipat sa mga tanggapan ng pamahalaan dahil nasa iisang bubong na ang mga ahensyang makakatulong sa kanila.

Pumunta rin ako sa bayan ng Saguday upang tingnan ang kasalukuyang kalagayan ng itinatayong Super Health Center sa nasabing bayan. Ang Super Health Center ay bahagi ng ating adhikain bilang Chair ng Senate Committee on Health, at sa suporta na rin ng aking mga kapwa mambabatas at Department of Health (DOH), na mas mapalakas pa ang ating healthcare system at mailapit sa ating mga kababayan sa malalayong komunidad ang kinakailangan na serbisyong medikal.

Kabilang sa mga serbisyong hatid ng SHCs ang database management ng mga pasyente, outpatient, birthing, isolation, diagnostic (laboratory: X-Ray at ultrasound), pharmacy, and ambulatory surgical unit. Ang iba pang kayang maipagkaloob nito ay eye, ear, nose and throat (EENT); oncology centers; physical therapy and rehabilitation center; at maging telemedicine kung saan maaaring magpakonsulta ang pasyente sa pamamagitan ng pagtawag sa SHC. Nagbigay din ako ng tulong sa 500 benepisyaryo sa lugar.

Tumutulong din tayo sa pagpapatayo ng mga imprastruktura na makakatulong sa iba’t ibang sulok ng bansa. Kahapon ay sinaksihan natin ang groundbreaking ng itatayong Girl Scouts of the Philippines Training Center Multi Purpose Hall sa Toril, Davao City. Matapos nito ay bumisita tayo sa Calbayog City, Samar para alamin ang sitwasyon ng 216 residente na biktima ng sunog. Pinagkalooban natin sila ng tulong, gayundin ang 1,000 mahihirap na residente roon. Nag-inspeksyon din tayo sa itinatayong Super Health Center sa bayan ng Sta. Margarita sa Samar, at pinangunahan din ang pamamahagi ng tulong sa 1,000 mahihirap na residente sa lugar.

Masugid din nating sinusuportahan ang local government units na lagi nating katuwang sa paghahatid ng serbisyo sa ating mga kababayan, lalo na kapag naghahatid tayo ng tulong sa kanilang mga nasasakupan.

Dinaluhan natin noong Abril 20 ang Philippine Councilors League Quezon Chapter seminar na ginanap sa Davao City. Kinagabihan ay sinamahan ko ang mga konsehal sa pagbisita kay dating Pangulong Rodrigo Duterte. Nagpasalamat sila sa anim na taong serbisyo ni Tatay Digong bilang pangulo ng bansa.

Ipinagbilin namin sa kanila na importanteng tandaan ng lahat na halal na opisyal—national man o local—na iisa ang aming layunin: ang maglingkod sa taumbayan. Sabi ko nga sa kanila, sa totoo lang, pareho lang ang trabaho namin. Ang ipinagkaiba lang, sila ay sa municipal o city level, habang kaming mga senador ay sa national level.

Nanawagan din tayo sa mga konsehal na sa kanilang pagganap sa tungkulin, laging isaisip ang mga prinsipyong nagsisilbing gabay sa kanila bilang mga lingkod-bayan.

Ipakita natin at maging halimbawa tayo ng katapatan, maging masugid sa ating tungkulin at magkaroon ng pananagutan sa ating mga responsibilidad. Lagi nating unahin ang kapakanan ng mahihirap at higit na nangangailangan, lalo na ang mga hopeless at helpless nating kababayan na walang ibang malalapitan kundi ang pamahalaan.

Masaya naman akong ibalita na kasabay ng kanilang 25th Charter Anniversary, ginanap ang groundbreaking ceremony noong Abril 20 ng Tarlac City General Hospital sa Bgy. Binauganan, Tarlac. Naging instrumento tayo para mapondohan ang pagpapatayo ng nasabing ospital na magiging malaking tulong sa paghahatid ng de-kalidad na serbisyong medikal sa mga Tarlaqueños at karatig na lugar. Bahagi rin ito ng ating adhikain na mas mapalakas pa ang healthcare system sa buong bansa. Kung mas maraming ospital na maipatatayo, mas mapapangalagaan ang kalusugan ng mga Pilipino.

Hindi naman natin kinakaligtaang marating at mapagkalooban ng tulong ang iba pa nating kababayan sa iba’t ibang lugar na nahaharap sa iba’t ibang krisis. Naalalayan ng aking opisina ang mga biktima ng magkakahiwalay na insidente ng sunog gaya ng 118 residente ng Bgy. Lapasan, Cagayan de Oro City; at 27 pa sa Tagoloan, Misamis Oriental.

Pinagaan din natin ang dalahin ng mahihirap na residente sa malalayong komunidad gaya ng 1,427 benepisyaryo mula sa iba’t ibang bayan ng Zambales; at 350 sa Bgy. 17, Cagayan de Oro City.

Nagsagawa rin tayo ng serye ng pamamahagi ng ayuda sa mga lugar sa Agusan del Sur at naabutan ang 200 sa Talacogon; 100 sa Sibagat; 100 sa Bayugan; 100 sa Esperanza; 100 sa Prosperidad; at 100 pa sa La Paz.

Umaasa ako na sa ating paghahatid ng serbisyo at malasakit sa ating mga kababayan ay maging inspirasyon din ito sa ating kapwa na gawin ang abot ng makakaya upang makatulong sa iba pang nangangailangan. Magkaisa at magbayanihan tayo para alalayan ang ating mga kapwa Pilipino tungo sa mas magandang kinabukasan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Walang pinipiling panahon ang pagmamalasakit at pagseserbisyo

ni Bong Go @Bisyo Magserbisyo | April 19, 2023

Anuman ang panahon—tag-ulan o tag-araw—patuloy tayo sa ating layunin na makapagbigay ng sapat at tamang serbisyo sa ating mga kapwa Pilipino, lalo na pagdating sa kalusugan. Dahil wala ring pinipiling panahon ang pagkakasakit, kailangang laging handa ang ating serbisyong pangkalusugan para sa ating mga kababayan, lalo na sa malalayong komunidad.

Bilang Chair ng Senate Committee on Health, naging adhikain ko na ang ilapit ang serbisyong medikal, partikular sa mga higit na nangangailangan, mga hopeless at helpless at walang malalapitan maliban sa pamahalaan.

Ito ang dahilan kung bakit nais nating ipagpatuloy ang Malasakit Centers program na ating naisabatas noon upang mas marami pang mga pasyente ang mabigyan ng karampatang medical assistance mula sa gobyerno. Higit pitong milyong Pilipino na ang natulungan nito, ayon sa Department of Health (DOH), at sana ay mas dumami pa dahil para sa Pilipino naman ito. Kung tutuusin, pera naman ‘yan ng taumbayan, ibinabalik lang sa kanila sa pamamagitan ng maayos at mabilis na serbisyong pangkalusugan.

Ipinaglalaban din natin na mas marami pang Super Health Centers ang maitayo sa iba’t ibang sulok ng bansa upang mailapit sa tao ang serbisyong medikal mula sa gobyerno.

Hindi na dapat nila kailangang maglakbay pa para magpagamot kung nasa komunidad na nila mismo ang pasilidad na puwedeng tumugon sa kanilang pangangailangang pangkalusugan.

Suportado rin natin ang panawagan ni Pangulong Ferdinand “Bongbong” Marcos, Jr. na magtayo ng specialty centers sa iba pang mga rehiyon. Ang pagtatayo ng specialty centers ay kabilang sa health-related legislative agenda na nakapaloob sa Philippine Development Plan 2023-2028 na nilagdaan ng ating Pangulo.

Bagama’t nakatutok ako sa ating mga gawain bilang mambabatas, doble ang aking kayod kapag tinutupad ang bahagi ng aking tungkulin na pakinggan ang mga hinaing at matulungan ang mga kababayan nating mahihirap sa iba’t ibang sulok ng bansa.

Kahapon ay biyaheng Pangasinan tayo at sinaksihan ang groundbreaking ng itatayong Super Health Center sa bayan ng Umingan. Nagkaroon din ako ng pagkakataon na makaharap ang 700 persons with disability sa nasabing lugar, at personal nating pinangunahan ang pagkakaloob sa kanila ng tulong.

Matapos ito, lumipat naman tayo sa Nueva Ecija sa parehong araw at sinaksihan din ang groundbreaking ng itatayong Super Health Center sa Cabanatuan City. Namahagi rin tayo ng tulong sa 1,000 mahihirap na residente ru’n. Nagsagawa rin tayo ng monitoring visit sa Malasakit Center na nasa Paulino L. Garcia Memorial Research and Medical Center, at namahagi ng tulong sa mga pasyente at frontliners. Ito ang ika-76 na Malasakit Center at inilunsad noong Hulyo 29, 2020. Bukod sa tulong ng aking tanggapan, may hiwalay ding ayuda ang Department of Social Welfare and Development (DSWD) sa mga pasyente.

Noong Lunes ay bumisita naman tayo sa Roxas City para magsagawa ng monitoring visit sa Malasakit Center na nasa Roxas Memorial Provincial Hospital. May tulong kaming naipamahagi sa ilang pasyente at medical frontliners. May hiwalay ding tulong ang DSWD sa ilang pasyente sa ospital at mga kuwalipikadong personnel du’n.

Pagkaraan ay sinaksihan natin ang groundbreaking ng itatayong dalawang Super Health Center sa Panay at Panitan, sa Capiz. Nagkaloob din tayo ng tulong sa 1,000 mahihirap na residente ng Roxas City; 1,100 mula sa Panay at 1,100 mula sa Panitan.

Pagkatapos sa Capiz, bumiyahe rin tayo patungong Bacolod City para daluhan ang pagbubukas ng Panaad Festival kung saan naimbitahan tayo bilang isa sa mga guest speaker. Suportado natin ang ganitong adhikain para sa preserbasyon at pagpapatuloy ng mga tradisyon at kultura sa bawat rehiyon ng ating bansa, na nagiging daan para sa ating pagkakaisa, pagtutulungan at bayanihan.

Pagkatapos ay nagkaroon tayo ng relief activity para sa 1,000 mahihirap na residente sa Bacolod City. Personal din tayong bumisita sa Malasakit Center na nasa Corazon Locsin Montelibano Memorial Regional Hospital, at namahagi ng tulong sa 375 pasyente at 1,877 frontliners. May hiwalay ding tulong ang DSWD sa mga pasyente, security at utility staff ng ospital.

Noong Sabado, tumulong tayo sa mga nasunugan sa Cebu City at pagkatapos ay nagtungo tayo sa Zamboanga Del Norte at namahagi ng tulong sa mahihirap na residente sa Dipolog City. Nag-inspeksyon din tayo sa itinatayong Oval Track sa Dipolog Sports Complex, na ating sinuportahang mapondohan noon.

Bilang Chair ng Senate Committee on Sports, suportado natin ang grassroot sports development sa layuning makatuklas ng mahuhusay na manlalalaro sa mga lalawigan.

Naniniwala rin ako na isa ang sports sa mabisang instumento para mailayo ang ating mga kabataan sa kaway ng droga at iba pang krimen. Ang lagi kong payo sa ating mga kabataan, tapusin ang pag-aaral, get into sports and stay away from drugs.

Kaya noong Linggo naman ay nagbigay tayo ng suporta sa Capiztahan Swimfest sa Roxas City, Capiz bilang paghanga rin sa mga kabataang nakilahok sa laro. Inengganyo natin sila na lalong pagbutihin ang kanilang pag-eensayo at inihayag natin ang mga inisyatiba na makakatulong sa mga atletang kabataan tulad ng National Academy of Sports na ating naisabatas na, pati rin ang Philippine National Games na ating kasalukuyang isinusulong bilang mambabatas.

Samantala, hindi rin tumitigil ang aking tanggapan sa paghahatid ng tulong sa ating mga kababayan sa iba’t ibang lugar na nahaharap sa iba’t ibang krisis. Naalalayan ang 54 na naging biktima ng magkakahiwalay na insidente ng sunog sa Maramag, Valencia City, Malaybalay City at Manolo Fortich sa Bukidnon. Tumulong tayo sa mahihirap nating kababayan tulad ng 750 residente ng Botolan, Zambales; 432 sa Dipaculao, Aurora; 550 sa Sta. Josefa at Trento sa Agusan del Sur; 500 sa Binuangan, Misamis Oriental; at 33 pa sa Sta. Rita, Pampanga nitong nakaraang mga araw.

Walang pinipiling oras o panahon ang ating pagseserbisyo. Basta kaya ng aking katawan, patuloy kong lilibutin ang iba’t ibang sulok ng Pilipinas para makapaghatid ng tulong sa abot ng aking makakaya, masolusyunan ang inyong mga hinaing, at makapag-iwan ng ngiti sa oras ng inyong pagdadalamhati.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Prayoridad pa rin ang kalusugan ng bawat Pilipino—pisikal man o mental

ni Bong Go @Bisyo Magserbisyo | April 15, 2023

Nananatiling prayoridad ko ang kalusugan ng bawat Pilipino. Sa aking kapasidad bilang Senador at Chair ng Senate Committee on Health, patuloy ako sa aking adhikain na mas mapalakas pa ang ating healthcare system sa hangaring mapagkalooban ng maaasahan na serbisyong medikal ang ating mga kababayan, lalo na ang mahihirap at walang ibang malalapitan. Kaya bukod sa pagpapatuloy ng mga Malasakit Center at pagtatatag ng Super Health Centers sa iba’t ibang bahagi ng ating bansa, suportado natin ang panawagan ni Pangulong Ferdinand “BongBong” Marcos, Jr. na magtayo ng specialty centers sa iba pang mga rehiyon. Ang pagtatayo ng specialty centers ay kabilang sa health-related legislative agenda na nakapaloob sa Philippine Development Plan 2023-2028 na nilagdaan ng ating Pangulo. Sa Senado, patuloy nating isinusulong ang pagpasa ng aking isinumiteng panukalang-batas, ang Senate Bill No. 1321 o Specialty Centers in Every Region Act of 2022. Kung maisasabatas, layunin nito na magtatag ng regional specialty centers sa mga ospital ng Department of Health (DOH) sa iba’t ibang bahagi ng ating bansa. Maraming kababayan natin sa malalayong probinsya ang kailangan pang bumiyahe sa Metro Manila para lang magpagamot sa specialty centers. Noong panahon ni dating Pangulong Rodrigo Duterte, napakaraming lumalapit sa amin, hindi lang para magpagamot, humihingi rin ng pamasahe para bumiyahe sa mga specialty hospitals na kayang gumamot sa kanila tulad ng Philippine Heart Center, Lung Center of the Philippines, Philippine Children’s Medical Center, at National Kidney and Transplant Institute, na lahat ay nasa Kamaynilaan. Kung magkakaroon ng mga dagdag na specialty centers maging sa labas ng Metro Manila, hindi na mahihirapan ang mga Pilipino nasaan man silang sulok ng bansa dahil mas mapapalapit sa kanila ang specialty health facilities. Kung tutuusin, sabi ko nga, pera naman nila ito, ibalik natin sa kanila sa pamamagitan ng maayos at mabilis na serbisyo. Isa pang isyung pangkalusugan na ating tinututukan ay ang mental health, lalo na sa ating kabataan. Patuloy din nating isinusulong sa Senado ang pagpasa ng ating isinumiteng Senate Bill No. 1786, na kung maisasabatas ay aatasan ang public higher education institutions (HEIs) na magtayo ng Mental Health Offices sa kani-kanilang campus, at mag-empleyo ng karagdagang HEI-based mental health service personnel. Gaya ng ibang isyung pangkalusugan, mahalagang matugunan ang mental health disorders. Maraming apektado ng depresyon noong panahon ng pandemya at hanggang ngayon. Kailangang mabigyan ng espesyal na atensyon ang mga matutukoy na may mental health problems, lalo na ang mga may tendency na mag-suicide. Samantala, iro-rollout na sa general population ang ikalawang COVID-19 booster shot.

Inihayag ito ni DOH officer-in-charge Maria Rosario Vergeire noong Abril 12, sa ginanap na DOH Media Forum. Batay aniya sa updated emergency use authorization ng Food and Drug Administration (FDA) at positibong rekomendasyon ng Health Technology Assessment Council, maaari na nating magamit ang mga bakuna na mayroon tayo ngayon upang makapag-second booster na ang mga kuwalipikado rito. Hinihintay na lang ang implementing guidelines bago simulan ang rollout ng second boosters para sa general population. Kaya muli, nananawagan ako sa ating mga kababayan na hindi pa bakunado at wala pang booster na huwag nang magpatumpik-tumpik pa. Tandaan natin na kapag bakunado, mas protektado! Tuluy-tuloy naman ang ginagawa nating paglalapit ng serbisyo sa ating mga kababayan.

Ngayong araw, biyaheng Cebu City tayo para pangunahan ang pamamahagi ng ayuda sa mga pamilyang biktima ng magkahiwalay na insidente ng sunog sa Barangay Ermita at Barangay Bulacao. Tumuloy naman tayo sa Dipolog City para mag-inspeksyon sa itinatayong Super Health Center du’n, at pagkatapos ay personal nating pinangunahan ang pagkakaloob ng tulong sa mahihirap na residente sa lugar. Nagsagawa rin tayo ng monitoring visit sa Malasakit Center na nasa Zamboanga del Norte Medical Center. Kahapon, Biyernes, personal din nating pinangunahan ang pamamahagi ng ayuda sa higit 200 residenteng nasunugan sa Bgy. Pinagbuhatan, Pasig City, habang ang aking opisina naman ay nagdala rin ng tulong sa 77 pamilyang nasunugan sa Bgy. Sta. Lucia at Kalawaan sa parehong siyudad. Nahatiran din ng para sa kanilang mga pangunahing pangangailangan ang mga naging biktima ng magkakahiwalay na insidente ng sunog gaya ng 72 residente ng Bgy. Don Galo, Parañaque City na personal kong binisita; at 39 pang residente ng Bacoor City, Cavite. Naabutan din ng tulong ang 100 pasyente sa Bataan na sumasailalim sa dialysis, gayundin ang mahihirap na pamilya sa Marilao, Bulacan na kinabibilangan ng 33 indibidwal. Masaya tayo kapag nakikitang may mga kababayan tayong natutulungan at nakakapag-iwan tayo ng ngiti sa oras ng kanilang pagdadalamhati. Nagsisilbing karagdagang lakas ‘yun sa atin na makapagserbisyo pa sa abot ng ating makakaya. Sa aking kapasidad, patuloy kong gagampanan ang tungkuling ibinigay n’yo sa akin, at maraming salamat sa patuloy na pagtitiwala sa isang simpleng probinsyanong ang bisyo ay magserbisyo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.