Ilapit ang serbesiyo sa mga kababayang nangangailangan

ni Bong Go @Bisyo Magserbisyo | May 15, 2024

Sa ating pagbisita sa iba’t ibang sulok ng bansa para tumugon sa pangangailangan ng marami kahit man lang sa munting paraan, umaapaw ang saya ng inyong Senator Kuya Bong Go sa oportunidad na tayo ay nakakatulong sa ating kapwa.

Pero naniniwala ako na ang tunay na pagseserbisyo ay hindi lang sa entablado o sa loob ng Senado. Kaya naman sinisikap ko, kasama ang aking Malasakit Team, na makakuwentuhan ang mga kababayan natin sa bawat kanto at bawat sulok ng mga bayang ating napupuntahan — dahil bawat isa ay may pangangailangang sinisikap nating punan sa abot ng ating makakaya.

Sa Calauan, Laguna kamakailan, habang pinapakyaw namin ang paborito kong sago at gulaman na tinda ni Nanay Julieta Kawit, hindi mababakas sa kanyang mga ngiti ang simpleng bagay na kanyang hiling — bagong tungkod. Mabuti na lamang at may dala kaming aluminum na baston. Hindi na magtitiis sa lumang kahoy na tungkod si Nanay Julieta.

Nang maghatid naman tayo ng serbisyo sa Rosales, Pangasinan nitong May 10, tatlong college students ang nakilala natin na nagbebenta ng talong na pinirito sa harina. Napapabilib ako sa mga tulad nila na nagsusumikap makapag-aral at makapag-ambag sa gastusin ng pamilya. Kaya ako ay nagbigay ng kaunting tulong sa kanila. Nakakamangha na bukod sa tulong mula sa atin, sila mismo ay kusang loob na tinutulungan ang kanilang sarili at pamilya.

Habang nakasama naman natin ang isang TODA rider, naisipan nating magmeryenda ng ice buko na tinda ni Mang Jun. Laking pasasalamat niya nang ating maubos ang kanyang paninda. Sabi ko naman, ako ang dapat na magpasalamat. Inspirasyon kasi ang kanyang sipag, at pamawi ng gutom naman ang kanyang ice buko!

Pagkatapos namang saksihan ang pagbubukas ng Malasakit Center sa Rosales, Pangasinan kamakailan, nakilala natin ang isang matandang babaeng nagtitinda ng ice candy sa labas ng stadium doon. Bumili tayo sa kanya at nag-abot na rin ng kaunting tulong at pagkain. Pinayuhan natin si nanay na ingatan ang kalusugan at lumapit sa pinakabagong Malasakit Center na nasa Conrado F. Estrella Regional Medical and Trauma Center kung kailangan niya ng tulong pampagamot.

Sa pakikisalamuha sa taumbayan, doon mo malalaman ang tunay nilang kalagayan, ang kanilang mga hinaing at kung ano ang inaasahan nila mula sa pamahalaan. Ang mga karaniwang mamamayan ang salamin ng ating lipunan. Magmalasakit tayo sa kanilang mga pinagdaraanan at ilapit natin sa kanila ang serbisyo na dapat nilang makuha upang makaahon sa hirap.

Ang nabanggit na Malasakit Center sa Rosales, Pangasinan ang ika-165 na sa buong bansa. Isa ito sa ating isinulong na maisabatas noon bilang principal author at sponsor sa Senado para mailapit ang tulong pampagamot mula sa gobyerno sa mga nangangailangan nito.

Sa Calauan, Laguna noong May 12, nag-inspeksyon ako sa itinayong Super Health Center doon. Isa itong pasilidad pangkalusugan upang ilapit ang pangunahing serbisyong pangkalusugan sa mga komunidad. Kasama sina Cong. Amben Amante, Gov. Ramil Hernandez, Vice Gov. Karen Agapay, Mayor Osel Caratihan at Vice Mayor Dong Sanchez, naging panauhing pandangal din tayo at tagapagsalita sa ginanap na Pinya Festival Parade and Street Dancing Competition ng bayan ng Calauan.

Nakarating naman ang aking Malasakit Team sa iba’t ibang komunidad para maghatid ng tulong. Nabigyan natin ng suporta ang 127 residente ng Pasig City; at sampu sa Davao City na naging biktima ng insidente ng sunog.

Nagbigay din tayo ng karagdagang tulong para sa TESDA scholars kabilang ang 22 sa Daet, Camarines Norte katuwang ang Innotech Career and Development Center, Inc., 24 sa Malabon City katuwang ang Perpetual Help Technological School; at 350 graduates katuwang naman ang Call Center Academy sa Danao City, Cebu.

Nagkaloob naman tayo ng tulong sa 930 residente sa Nagcarlan, Laguna kasama si Mayor Elmor Vita. Nakatanggap din sila ng tulong mula sa national government.

Sinaksihan naman ng aking tanggapan noong May 14 ang turnover ceremony ng itinayong Super Health Center sa Goa, Camarines Sur kasama si Mayor Marcel Pan.

Tulad ng nabanggit ko na noon, hindi ko matitiis na nakaupo lang sa loob ng opisina at nagpapalamig habang ang marami sa ating mga kapwa Pilipino ay naghihirap at nangangailangan ng ating tulong. Basta kaya ng aking katawan at oras, pupuntahan ko kayo kahit saang sulok ng bansa upang makapaghatid ng tulong lalo na sa mga may sakit, masuportahan ang mga proyektong makakapagpaunlad ng inyong lugar, maisulong ang mga programa tulad ng Malasakit Centers at Super Health Centers upang ilapit sa tao ang serbisyo mula sa gobyerno, at makapag-iwan ng ngiti sa panahon ng inyong pagdadalamhati.

Bilang inyong Mr. Malasakit, patuloy akong magserbisyo sa inyong lahat sa abot ng aking makakaya, dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Walang pinipiling araw ang pagtulong at pagseserbisyo sa mamamayan

ni Bong Go @Bisyo Magserbisyo | May 11, 2024

Isang simpleng probinsyano ang inyong Senator Kuya Bong Go na nais lamang maglingkod sa ating bayan. 

Nakakataba ng puso tuwing may natutulungan tayo, lalo na ‘yung mga buhay na ating naisasalba dahil sa ating hangaring ilapit ang serbisyong pangkalusugan sa mga nangangailangan nito.

Ngunit nais ko lang ipaalala na hindi ninyo kailangang magpasalamat sa amin dahil trabaho namin ang tumulong sa inyo. Sa katunayan, kami ang lubos na nagpapasalamat sa inyo dahil nabigyan kami ng pagkakataon na maging instrumento ng Panginoon para magserbisyo sa milyun-milyong Pilipino. Kaya hinding-hindi ko sasayangin ang bawat oportunidad na makatulong sa kapwa sa abot ng aking makakaya.

Hanggang ngayon, naaantig pa rin ang puso ko sa tuwing may lalapit sa akin para magbahagi ng kanilang kuwentong ‘Malasakit’. Bilang halimbawa, noong isang araw, May 7, nakausap ko ang mga mag-aaral mula sa University of the East Political Society na bumisita sa Senado kung saan nakilala ko si Krystelle Morales na may brain tumor ang ama.

Nang makapanayam siya ng aming Malasakit Team, halos hindi mapigil ni Krystelle na maluha. Napakalaki ng hospital bill noon ng kanyang tatay na si Jimbo. Sa awa ng Diyos, at sa tulong ng Malasakit Center na ating isinulong, nagpapagaling na ngayon si Mang Jimbo.

Nakausap ko rin ang college student na si Jaymes Mamorno. Na-diagnose na may stage IV breast cancer naman ang kanyang nanay na si Aida. Dahil daw sa Malasakit Center, nahanapan ng solusyon ang lumobo nilang hospital bill.

Sabi ko nga kina Krystelle at Jaymes, huwag silang magpasalamat sa akin dahil pera naman ng taumbayan iyan, na ibinabalik lang sa kanila sa pamamagitan ng mas maayos at mabilis na serbisyo. Dapat lang na maihatid sa kanila at sa iba pa nating kababayang Pilipino ang nararapat na serbisyo ng gobyerno.

Sa rami na ng nagpapasalamat dahil sa tulong na naipagkaloob sa kanila ng Malasakit Center, laging naroon ang tuwa sa aking puso na may mga buhay ng Pilipino na nailigtas ng naturang programa, na ating naging inisyatiba upang matulungan ang mga Pilipino — lalo na ang mga mahihirap, hopeless, helpless at walang malalapitan maliban sa gobyerno.

Instrumento lamang ang inyong Senator Kuya Bong Go sa ating inisyatiba na Malasakit Centers program, na naisabatas sa pamamagitan ng Republic Act No. 11463 noong 2019. Tayo ang principal author at sponsor nito. Simbolo ito ng ating walang tigil na paglilingkod at malasakit para sa bawat Pilipino.

Layunin nating gawing mas accessible ang serbisyong medikal para sa lahat, lalo na sa ating mga kababayang higit na nangangailangan. Sa naturang programa, pinagsama-sama na sa iisang bubong sa loob ng kuwalipikadong pampublikong ospital ang mga kinatawan ng iba’t ibang ahensya na may medical assistance programs para hindi na magpapalipat-lipat ang mga pasyente para makakuha ng tulong medikal mula gobyerno. Sa datos ng DOH, nasa mahigit-kumulang 10 milyong Pilipino na ang natulungan ng Malasakit Centers.

Bilang chair ng Senate Committee on Health, personal nating sinaksihan ang paglulunsad ng ika-165 Malasakit Center sa bansa na nasa Conrado F. Estrella Regional Medical and Trauma Center sa Rosales, Pangasinan nitong May 10 kasama ang mga lokal na opisyal at mga kinatawan ng DOH, PCSO, DSWD at PhilHealth. Nakasama rin natin si Agrarian Reform Sec. Conrado Estrella III na tubong Pangasinan din.

Bilang adopted son ng Pangasinan, masaya akong nabigyan ng oportunidad na makapagserbisyo sa aking mga kababayan doon. Namahagi rin tayo ng tulong para sa mga pasyente at empleyado ng nasabing ospital. Ito na ang ikalawang Malasakit Center sa Pangasinan. Ang isa pa ay nasa Region 1 Medical Center sa Dagupan City.

Matapos naman ito ay pinangunahan natin ang pagkakaloob ng tulong para sa mga miyembro ng kooperatiba at mga residenteng nawalan ng hanapbuhay na isinagawa sa RBE Stadium. Kasama natin sa pagbigigay ng suporta ang Cooperative Development Authority, ang Department of Labor and Employment, at lokal na pamahalaan.

Sa hangaring ilapit lalo ang serbisyo medikal sa mga komunidad, masaya kong ibinabalita na sinimulan na noong May 8 ang pagtatayo ng Super Health Center sa Brgy. del Carmen, Iligan City na sinaksihan ng aking tanggapan. Binigyang-pugay din natin ang lokal na pamahalaan ng Calatrava sa Romblon matapos isagawa ang inagurasyon ng Super Health Center sa lugar noong May 9.

Binisita naman natin noong May 9 ang mga kababayan natin sa Tiaong, Quezon at personal na namahagi ng dagdag na tulong sa 1,800 mahihirap na residente sa lugar katuwang si Mayor Vincent Arjay Mea. Nakatanggap din ang mga ito ng tulong mula sa national government. Nagkaloob tayo ng tulong sa karagdagang 2,000 mahihirap na residente, na nakatanggap din ng tulong mula sa lokal na pamahalaan mula sa pondong ating isinulong para sa bayan ng Tiaong. Namahagi rin tayo ng suporta sa 600 na nawalan ng hanapbuhay na mabibigyan din ng DOLE ng pansamantalang trabaho.

Kahapon ay binalikan ng aking opisina ang 483 residente ng Muntinlupa City na naging biktima ng insidente ng sunog noon. Bukod sa tulong mula sa aming tanggapan, nakatanggap din ang mga ito ng tulong mula sa National Housing Authority sa ilalim ng programang ating isinulong noon para may pambili ang mga benepisyaryo ng pako, yero, semento at iba pang materyales sa pagtatayong muli ng kanilang tahanan.

Dumalo naman tayo sa ginanap na Philippine Nurses Association International Nurses 8th Summer Conference sa paanyaya ni Summer Conference Chair Joseph Stephen Descallar noong May 10 para magbigay ng suporta sa ating mga medical frontliners na aking itinuturing na bayani dahil sa kanilang sakripisyo para makapagsalba ng buhay ng kapwa nila.

Sa nakaraang araw, naghatid din ang aking Malasakit Team ng tulong sa mga naging biktima ng mga insidente ng sunog kabilang ang 44 sa Cagayan de Oro City; 165 sa Bacolod City, Negros Occidental; at 20 sa Saguiaran, Lanao del Sur.

Nag-abot din tayo ng tulong sa mga mahihirap na residente at naalalayan ang 350 sa Mendez, Cavite katuwang ang mga konsehal ng bayan. Nagbigay tayo ng dagdag na suporta sa 20 TESDA graduates sa Pasig City. Maliban pa riyan ay nasa Enrile, Cagayan ang aking Malasakit Team para makibahagi sa Serbisyo Caravan ni Mayor Miguel Decena.

Tulad ng palagi kong sinasabi, walang pinipili dapat ang pagseserbisyo. Anumang araw, saan man kayo naroroon, ay sisikapin kong makatulong at makapagserbisyo sa inyo sa abot ng aking makakaya dahil bisyo ko na ang magserbisyo sa kapwa ko Pilipino at naniniwala ako na ang serbisyo sa tao ay serbisyo sa Diyos.

Sama-sama nating ilapit sa tao, lalo na sa pinakanangangailangan ang serbisyo na dapat nilang makuha mula sa gobyerno pagdating sa kalusugan. Tandaan natin na ang kalusugan ay katumbas ng buhay ng bawat Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Proteksyunan ang kalusugan ngayong tag-init

ni Bong Go @Bisyo Magserbisyo | May 8, 2024

Sinusuportahan natin ang pahayag ni Pangulong Bongbong Marcos, Jr. at ng Department of Education na kailangan nang ibalik sa dating kalendaryo ang pasok sa mga paaralan. Magandang balita ito dahil dapat unahin ang kapakanan at kalusugan ng ating kabataang mag-aaral.

Talaga namang napakainit ng panahon ngayon. Malaking pasakit ito sa mga guro at estudyante, at nakakaantala sa pag-aaral nila. Unahin dapat natin ang kalusugan ng mga kabataan sa paraang hindi masasakripisyo ang edukasyon.

Kung tayong mga nakatatanda, umaaray sa tindi ng init, paano pa kaya ang kanilang murang mga pangangatawan?

Sa ating pagbisita sa maraming lugar para tumugon sa pangangailangan ng marami nating kababayan, nasasaksihan natin kung gaano kalaking parusa, lalo na sa mga musmos, ang tindi na singaw ng dingding at kisame sa mga classroom na wala namang aircon. Kaya nagpapasalamat tayo sa DepEd dahil sa anunsyong pagpapatupad ng asynchronous classes o distance learning sa mga apektadong pampublikong paaralan dahil sa grabeng init ng panahon sa ilang mga lugar.

Habang isinusulong natin na makapag-aral ng maayos ang kabataan, siguraduhin din nating ligtas sila mula sa kapahamakan at banta sa kalusugan lalo na’t sila ang kinabukasan ng ating bayan. Palagi nating tandaan na ang kalusugan ay katumbas ‘yan ng buhay ng bawat Pilipino.

Nito nga lang Lunes, May 6, naitala ng PAGASA ang 50 degrees Celsius na heat index, o ang init na nararamdaman ng ating katawan, sa Clark Airport, Pampanga. Nasa “danger level” na ito at maaaring maglagay sa atin sa peligro, katulad ng heat stroke. Kaya sa aking mga kababayan, huwag maliitin ang init ng panahon, ugaliing uminom ng maraming tubig, at iwasang magbilad sa tirik ng araw.

Bilang chair ng Senate Committee on Health, pinapaalalahanan natin at ng PhilHealth na kung sinuman ang tamaan ng heat stroke, tumaas na nang hanggang P8,450 ang existing package nila upang tulungan kayong magpagamot. Huwag ding kalimutan na puwedeng-puwede kayong kumonsulta sa pinakamalapit na mga operational Super Health Center sa inyong lugar. May mga government hospitals din na maaari kayong magpa-check-up at makahingi ng medical assistance sa mga Malasakit Centers sa inyong lugar. Isinulong natin ang mga programa’t proyektong iyan para ilapit ang serbisyong medikal sa mga Pilipinong nangangailangan nito.

Bukod sa kabataan, ikonsidera rin sana ng pampubliko at pribadong sektor ang pagkakaroon ng adjustments sa oras ng trabaho at pag-aralan ang work-from-home arrangements kung maaari. Bigyan din ng “heat breaks” ang mga manggagawang nakabilad sa araw dahil mas magastos sa lahat kung magkasakit ang mga empleyado dahil sa init.

Lagi rin nating isinasaalang-alang ang ating mga magsasaka. Sa kanila tayo umaasa para sa ating pagkain, pero karamihan sa kanila, isang kahig, isang tuka. Kung maaari nga lang ay bigyan sila ng dagdag na ayuda, sapat na kagamitan at kinakailangang pagsasanay para mas umasenso. Patuloy din tayong nananawagan sa Department of Agriculture na maglatag ng pangmatagalang solusyon sa tagtuyot. Ngayon pa lang, dapat na ring magplano kung paano matutugunan ang mga suliranin na idudulot ng pagpalit-palit ng panahon. Dapat ay lagi tayong one-step ahead.

Huwag ding kalimutan ang ating mga alagang hayop dahil sila ay nasa panganib din sa sobrang init ng panahon. Kung iiwan man sa labas, siguraduhing meron silang sapat na tubig. Bahagi rin sila ng ating pamilya.

Bilang inyong Mr. Malasakit, patuloy akong nakatutok sa pang-araw-araw na suliranin ng ating mga kababayan upang makatulong sa abot ng aking makakaya, mapangalagaan ang kalusugan ng bawat Pilipino, at mailapit ang serbisyo publiko sa mga nangangailangan nito.

Naging panauhing tagapagsalita tayo sa 48th Founding Anniversary ng Universal Guardians Brotherhood noong May 4 na ginanap sa Marikina Sports Center sa paanyaya ni UGB President Melvin “UGMF ISAAC” Contapay. Dumalo rin tayo sa ginanap na Liga ng mga Barangay - Pangasinan Chapter Provincial Congress sa paanyaya ni Pangasinan LNB President Raul Sabangan noong May 5 na idinaos sa Clark, Pampanga. Ibinahagi ko sa mga pagtitipong ito na iisa ang ating hangarin na makatulong sa mga komunidad dahil bisyo ko na ang magserbisyo sa kapwa ko Pilipino.

Bilang tayo ang chair ng Senate Committee on Sports, sinaksihan ng aking opisina ang opening ceremonies ng Eastern Visayas Regional Athletic Meet sa Ormoc City Sports Complex; gayundin ang Brgy. BF Homes Parañaque Summer League sa paanyaya ni SK Chair Julia Labarda. Ang aking adbokasiya sa sports ay isang simpleng paraan upang ilayo ang kabataan sa ilegal na droga at mahubog sila bilang responsable, disiplinado at produktibong mamamayan.

Kahapon, May 7, bumisita naman tayo sa Cavite at pinangunahan ang pamamahagi ng tulong para sa 2,000 mahihirap na residente ng General Trias City katuwang si Mayor Jonjon Ferrer. Binisita rin natin ang itinayong Super Health Center sa lugar.

Tuluy-tuloy naman ang aking Malasakit Team sa paghahatid ng tulong sa mga kababayan nating nahaharap sa krisis. Kasama na rito ang 35 na mga naging biktima ng sunog sa Talisay City, Cebu na ating binigyan ng agarang tulong.

Sinuportahan din natin ang mga nawalan ng hanapbuhay kabilang ang 206 residente ng Rizal, Kalinga kasama si Mayor Karl Baac; 500 sa Victorias City, Negros Occidental katuwang si Mayor Javi Benitez; at 53 sa General Trias City, Cavite kasama naman si Provincial Board Member Morit Sison. Ang mga benepisyaryo ay nabigyan din ng pansamantalang trabaho ng gobyerno.

Napagkalooban din ng tulong ang mga mahihirap na taga-Palawan kabilang ang 1,217 sa Narra katuwang si Provincial Board Member Ferdinand Zaballa; 412 pa sa Puerto Princesa City kasama si Mayor Lucilo Bayron; 912 sa San Vicente kasama si Mayor Amy Alvarez; at 975 sa Bataraza katuwang si Mayor Abraham Ibba.

Kung gaano katindi ang init ng panahon, ganoon din katindi ang aking pagsisikap na maproteksyunan ang kapakanan at kalusugan ng bawat Pilipino. Hindi ko matiis na manatili sa opisina maghapon habang ang ating mga kababayan ay araw-araw na sumusuong sa matinding init ng panahon at nagsasakripisyo para sa kanilang mga pamilya. Hindi dahilan ang matinding init para hindi makarating ang tulong at serbisyo, lalung-lalo na sa mga walang ibang malalapitan kundi ang pamahalaan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.