Pangalagaan ang matamis na ngiti ng mga Pinoy

ni Bong Go @Bisyo Magserbisyo | May 25, 2024

Saan man may Pilipinong nangangailangan, gumagawa ang inyong Senator Kuya Bong Go ng paraan sa abot ng aking makakaya na mapuntahan at makapaghatid ng tulong sa ating mga kababayan. Wala nang mas nakakapawi pa ng pagod maliban sa mga ngiting isinusukli sa atin ng mga ating natutulungan.

Nakakabilib talaga ang tibay ng Pilipino. Anumang pagsubok sa buhay, kaya nating salubungin ng ngiti at halakhak. Naalala ko tuloy nang minsang nasa Cebu tayo at may isang kapwa Bisaya na lumapit sa akin. Abot-tenga ang kanyang ngiti pero napansin ko — wala na siyang ngipin! Naawa naman ako, kaya nangako akong tutulungan ko siyang magpagamot at magkapustiso.

Napasubo ako nang aking malaman na sa ilalim ng kasalukuyang mga regulasyon ng medical assistance programs ng gobyerno, hindi kabilang ang pagbibigay ng pustiso. Nakakalungkot ito. May kasabihan nga na ang ngipin ng isang tao ay mas mahalaga pa kaysa diyamante. Kaya naman kung ang bilang ng mga Pilipinong walang ngipin ang pagbabasehan, masasalamin ang estado ng pamumuhay sa bansa.

Nakakagulat malaman na pito sa bawat 10 Pilipino ay may dental health issues — katumbas ito ng 73 milyong mga kababayan natin. Naisiwalat ito ni Sen. Raffy Tulfo sa public hearing ng Senate Committee on Health na ang inyong Kuya Bong Go ang chairman.

Sa aming pagtatalakay, kabilang ang mga kabataang Pilipino sa mga hindi nakatatanggap ng angkop na dental care sa buong mundo. Base rin daw sa pag-aaral, tumataas ang tsansa na tamaan ng stroke o ibang malubhang sakit kapag hindi maganda ang oral health ng isang tao.

Isang mungkahi na natalakay sa pagdinig ng ating komite ay isama ang comprehensive dental services sa Medical Assistance for Indigent Patients (MAIP) program na pinangangasiwaan ng Department of Health para magkaloob ng tulong pinansyal sa mga pasyenteng hindi kayang magpagamot.

Nakakabahala na marami sa ating mga kababayan ang hindi nagpapakonsulta sa dentista dahil walang pambayad. Kapag masakit ang ngipin, apektado ang kabuhayan at ang gawain sa araw-araw. Kaya naman umaapela tayo sa DOH na gawing prayoridad ang komprehensibong dental care, kasama na ang pagbibigay ng pustiso, sa mga libreng serbisyong medikal na maibibigay ng gobyerno.

Kung hindi kabilang sa implementing rules and regulations ang pagkakaloob ng kahit murang pustiso, maaari sigurong ikonsidera na amyendahan ito dahil para naman sa mga mahihirap ang naturang programa.

Ang good news, kasama ang dental care sa mga serbisyong matatagpuan sa mga Super Health Centers sa iba’t ibang sulok ng bansa na ating isinulong noon at patuloy na sinusuportahang maipatayo. Sa tulong ng DOH, LGUs, at kapwa natin mambabatas, higit kumulang 700 Super Health Centers na ang napondohan sa nakaraang tatlong taon upang ilapit ang primary care, medical consultations at early disease detection sa mga komunidad.

Tandaan natin na ang kalusugan ay katumbas ng buhay ng bawat Pilipino. Alalahanin din natin na ang maayos na dental health ay susi sa matamis na ngiti na kilalang-kilala ang mga Pilipino!

Ang importansya ng serbisyong pangkalusugan ay tinalakay din natin nang maging guest of honor tayo sa annual convention ng Association of Medical Social Workers of the Philippines, Incorporated. Ginanap ang okasyon noong May 22 sa City of Manila. Pinahalagahan natin ang papel ng social workers sa paglalapit ng serbisyo ng gobyerno sa mga tao lalo na pagdating sa kalusugan.

Sa araw ding iyon ay isinagawa ang groundbreaking ng itatayong Super Health Center sa Culasi, Antique na sinaksihan ng aking opisina kasama si Mayor Jose Lomugdang, bukod pa ang itatayo sa San Enrique, Iloilo katuwang naman si Mayor Trix Fernandez.

Noong May 23 naman, personal nating pinangunahan ang pagkakaloob ng tulong sa 1,000 residente ng Maynila na nawalan ng hanapbuhay katuwang ang tanggapan nina Mayor Honey Lacuna at Vice Mayor Yul Servo Nieto. Ang mga kuwalipikadong benepisyaryo ay nabigyan din ng DOLE ng pansamantalang trabaho.

Binisita naman natin ang ating mga kababayan sa Lucena City, Quezon kahapon, May 24 at pinangunahan ang pagkakaloob ng tulong sa halos 2,000 mahihirap na residente, na nakatanggap din ng pinansyal na tulong sa pamamagitan ng ating pakikipagtulungan sa kanilang local government. Sinuportahan din natin ang 500 residenteng nawalan ng hanapbuhay, bukod pa ang tulong na ibinigay sa kanila ng DOLE.

Sa araw ding iyon, sinaksihan ng aking Malasakit Team ang inagurasyon ng itinayong Super Health Center sa San Jose, Romblon at ang turnover ng isa pang Super Health Center sa San Jose, Dinagat Islands.

Hindi rin tumitigil ang aking Malasakit Team sa pag-alalay sa mga kababayan nating nasunugan tulad sa Iloilo City at Banate sa Iloilo kung saan nahatiran natin ng tulong ang 42 biktima.

Tinulungan din natin ang mahihirap na residente sa iba’t ibang komunidad tulad ng 34 sa Lavezares, Northern Samar katuwang si Provincial Board Member Quintin Saludaga; 1,000 sa Cauayan, Isabela kasama si Mayor JC Dy, at 1,000 pa kaagapay naman si Vice Governor Bojie Dy; 650 sa Trece Martires City, Cavite kasama ang Sangguniang Panlungsod; at 500 sa Cabiao, at 538 sa San Isidro, Nueva Ecija katuwang si Cong. GP Padiernos.

Nagkaloob din ang aking opisina ng dagdag na suporta sa mga benepisyaryo ng programang pangkabuhayan ng gobyerno, tulad ng 50 sa Gutalac, Zamboanga del Norte kasama si Mayor Justin Quimbo; 30 sa San Francisco at 39 sa San Ricardo na mga bayan sa Southern Leyte kasama sina Governor Damian Mercado, San Ricardo Mayor Roy Salinas, at San Francisco Mayor Benedicto Tiaozon; at 28 sa Masbate katuwang sina Mayor Socrates Tuason at Provincial Board Member Allan Cos.

Hindi rin natin kinaligtaang tulungan ang mga nawalan ng hanapbuhay kabilang ang 500 sa Malabon City katuwang si Cong. Jaye Lacson Noel; at 177 sa Zambales katuwang si Cong. Bing Maniquis.

Binalikan naman natin at muling tinulungan ang 575 residente ng Zamboanga City, na nakatanggap din ng tulong sa NHA mula sa programang isinulong natin noon para may pambili ang mga benepisyaryo ng pako, yero, semento at iba pang materyales sa pagpapaayos ng kanilang tahanan.

Patuloy nating ilapit ang serbisyo ng gobyerno sa mga nangangailangan at sama-sama nating pangalagaan ang kalusugan ng bawat Pilipino.

Bisyo ko na ang magserbisyo sa inyong lahat. Kaya hanggang kaya ng aking katawan at panahon, tutulong ako sa abot ng aking makakaya upang maiahon sa hirap ang ating mga kababayan, maalalayan ang mga mahihirap na pasyente, maisulong ang mga proyekto’t programang makakapagpaunlad ng inyong komunidad, at makapag-iwan ng ngiti sa oras ng inyong pagdadalamhati.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Bahagi ng pagseserbisyo ang maging boses ng mga Pinoy

ni Bong Go @Bisyo Magserbisyo | May 22, 2024

Malaking hamon para sa mga pangkaraniwang Pilipino ang magkaroon ng boses para maiparating sa kinauukulan ang kanilang mga hinaing. 

Hindi ito iba sa sitwasyon ng mga healthcare workers na hanggang ngayon, naghihintay pa rin at paulit-ulit na nagtatanong kung nasaan na ang kanilang HEA o Health Emergency Allowance na pinagtrabahuhan nila noon pang panahon ng pandemya.

Bilang chair ng Senate Committee on Health, iniaalay ko ang panahon, pati na ang komite na ito bilang kanilang ‘avenue’, para direktang makadulog sa pinakamataas na opisyal ng Department of Health at Department of Budget and Management ang ating magigiting na healthcare workers. Palagi ko ngang sinasabi, services rendered na ang HEA. Pinaghirapan at pinagpawisan na nila ‘yan kaya dapat naman talagang maibigay na sa kanila.

Kaya naman nitong Lunes, May 20, muli nating pinangunahan ang pagdinig sa state of public health services sa bansa, kasama na riyan ang isyu ng HEA. Isa ako sa mga may-akda at co-sponsors ng Republic Act No. 11712, o ang Public Health Emergency Benefits and Allowances Act na siyang basehan ng ilang benepisyo para sa healthcare workers noong pandemya. Pero hindi nagtatapos sa pagsasabatas ang pagmamalasakit natin sa kanila. Obligasyon ng gobyerno na maimplementa ito! 

a hearing, maraming damdamin ang naantig, kabilang na ako bilang inyong Mr. Malasakit, dahil sa mga kuwento ng healthcare workers na halos mawalan na raw ng pag-asang makuha pa ang kanilang HEA. Kabilang diyan si Rowel Pahati na hindi napigilan ang emosyon at sinabing sila naman dapat ngayon ang gawing prayoridad ng pamahalaan dahil inialay nila ang kanilang mga sarili para sa kaligtasan ng publiko noong pandemya.

Ibinahagi rin natin na noong guest of honor tayo sa Philippine Nurses Association Convention at bisita ng mga barangay health workers sa Laguna kamakailan, iisa ang sigaw ng mga kawani ng kalusugan: “Ibigay na ang HEA! HEA! HEA!”

Bilang lingkod bayan, katuwang nila ako sa pag-apela sa DOH at sa DBM na siguraduhing hindi mauuwi sa wala ang ganitong mga hinaing. Ibinigay nina Health Sec. Ted Herbosa at Budget Sec. Amenah Pangandaman ang kanilang pangako na sa susunod na taon, lahat ng kuwalipikadong healthcare workers ay may HEA na.

Babantayan ng ating komite ang pangako nilang ito alang-alang sa ating mga health worker. 

Bukod sa ating patuloy na pagsisikap at pagmamalasakit na matulungan ang ating healthcare workers, hindi tayo tumitigil sa paghahatid ng serbisyo saan mang sulok ng bansa sa abot ng ating makakaya. 

Nasa Biñan City, Laguna tayo noong May 18 at personal na pinangunahan ang pagkakaloob ng tulong sa 3,300 senior citizens, na nakatanggap din ng tulong pinansyal mula sa kanilang lokal na pamahalaan kasama sina Mayor Arman Dimaguila, Vice Mayor Gel Alonte, Cong. Len Alonte, Vice Gov. Karen Agapay, at iba pa nilang opisyal. 

Sinaksihan natin ang inagurasyon ng itinayong Super Health Center sa Biñan City kung saan nakilala ko ang mga batang magkapatid na sina Sky at Rain Cruz. Dahil nagbebenta sila ng banana cue at camote cue, pinakyaw natin ang kanilang paninda, at pinatingnan sa mga doktor doon ang sakit sa balat ni Sky. 

Nagkaloob tayo ng tulong sa 464 na nawalan ng hanapbuhay sa Biñan City, na bibigyan din ng DOLE ng pansamantalang trabaho. May higit pang 500 residente ang ating tutulungan sa susunod na mga araw kasama ang DOLE at lokal na pamahalaan.

Naabutan din natin ng tulong ang 150 barangay health workers. Matapos ito ay bumiyahe tayo sa Davao City at dumalo sa ginanap na Vice Mayors’ League of the Philippines Batangas Chapter seminar na idinaos sa Grand Regal Hotel. Bilang adopted son ng CALABARZON, masaya ako na makatulong sa aking mga kababayan doon. 

Bumisita naman tayo sa Navotas City noong May 20 at namahagi ng dagdag na tulong para sa 1,000 residente na nawalan ng hanapbuhay, habang nakatanggap din ng tulong mula sa DOLE. Nagkaloob din tayo ng tulong katuwang sina Mayor John Rey Tiangco at Senator Bato dela Rosa sa 500 mahihirap na residente. 

Sa parehong araw, namahagi ng tulong ang aking opisina para sa mga 906 nawalan ng hanapbuhay sa Las Piñas City katuwang si Mayor Mel Aguilar, bukod sa tulong mula sa DOLE. Bilang tayo ang chair ng Senate Committee on Sports, sinaksihan ng aking opisina ang pagsisimula ng isang sportsfest sa Mindanao State University sa Dimaporo, Lanao del Norte.

Nasa Iloilo naman tayo kahapon, May 21, at dumalo sa ginanap na 2nd Rose Festival sa bayan ng Anilao, sa paanyaya ni Mayor Nathalie Debuque. Sinaksihan din natin ang inagurasyon ng itinayong Super Health Center. Naging panauhin naman tayo sa Liga ng mga Barangay - Capiz Provincial Congress na ginanap sa Bacolod City sa paanyaya ni Governor Fred Castro. 

Sa araw ding iyon ay idinaos ang inagurasyon ng itinayong Super Health Center sa Candelaria, Quezon na sinaksihan ng aking tanggapan upang mailapit ang serbisyo medikal sa mga komunidad. 

Ipinadala ko naman ang aking Malasakit Team sa iba’t ibang komunidad para maalalayan ang ating mga kababayang mahihirap tulad sa Isabela kabilang ang 1,000 sa Burgos kasama si Mayor Isis Uy, 1,000 sa Sta. Maria kasama si Mayor Hilario Pagauitan, 1,000 sa Santiago City kasama si Mayor Sheena Tan-Dy, at 1,000 sa Echague kasama si Mayor Kiko Dy; pati na rin ang 1,000 sa Marihatag, Surigao del Sur kasama si Mayor Justin Marc Pelenio. 

Sa Caloocan City ay naayudahan ang 44 residenteng nawalan ng hanapbuhay katuwang si Kagawad Nol Quilinguen. Maliban pa riyan, kasama si Mayor Anthony Uy, nabigyan din ng tulong ang 651 magsasaka sa Impasug-ong, Bukidnon na apektado ng tagtuyot ang kabuhayan.

Bilang inyong senador, magseserbisyo ako sa inyong lahat dahil bisyo ko ang magserbisyo. Bukas ang aking tanggapan at handa akong umalalay sa inyo sa abot ng aking makakaya at kapasidad. Bukod sa pagiging mambabatas, hindi ko sasayangin ang pagkakataon na ibinigay ninyo sa akin para kayo ay irepresenta at mapaglingkuran.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga opisyal ng barangay, katuwang natin sa pagseserbisyo

ni Bong Go @Bisyo Magserbisyo | May 18, 2024

Sa mahigit dalawang dekada niya bilang tauhan ng gobyerno, naging miyembro ng Sangguniang Kabataan at ngayo’y kapitan ng Barangay Ipil sa Bongabong, Oriental Mindoro si Kapitana Elsie Osorio. Dahil sa bigat ng kanilang trabaho sa barangay, minsan na raw na-stroke si kapitana. At nito ngang pandemya, dahil sila lang ang

inaasahan ng buong komunidad noong panahon ng lockdown, tinamaan ng COVID-19 si Kap Elsie.

Nitong nakaraang linggo, nakasama ng inyong Senator Kuya Bong Go si Kap. Elsie nang dumalaw ang kanilang grupo sa Senado. Dito niya naikuwento kung paano siya natulungan ng ating isinulong at naisabatas na Malasakit Centers Program sa pagpapagamot. Nais daw niyang maging patunay na napapakinabangan natin ang serbisyong hatid ng Malasakit Centers.

Lubos ang pasasalamat sa atin ni Kap. Elsie. Pero sabi ko sa kanya, ang Malasakit Centers ay para talaga sa mga Pilipino. Pera ito ng taumbayan, ibinabalik lang natin sa mas mabilis at epektibong paraan pagdating sa serbisyong pangkalusugan. At higit sa lahat, sa Panginoon dapat magpasalamat, huwag sa akin, sabi ko pa kay kapitana.

Nakakataba ng puso kapag ako ay naiimbitahan tuwing may pagtitipon ang mga Liga ng mga Barangay (LNB) sa iba’t ibang sulok ng bansa. Isa lamang ang lagi kong mensahe sa ating mahuhusay na barangay officials: mataas at malaki ang respeto ko sa kanila. Kaya unahin nila palagi ang kapakanan ng mga mahihirap nating kababayan. Tiyak na hindi sila riyan magkakamali.

Magkaiba man kami ng posisyon, pare-pareho kaming mga lingkod bayan. Sinumpaang tungkulin namin ang magserbisyo sa mga tao at panatilihin ang kaayusan sa komunidad. Ang pakiusap ko sa kanila, panatilihin ang pagiging tapat sa tungkulin upang manatili ring buo ang tiwala ng taumbayan sa kanila at sa mga nasa pamahalaan.

Sa parte ko, patuloy tayo sa pagsusulong ng mga panukala para masuportahan ang ating mga barangay officials. Isinumite natin sa Senado ang Senate Bill No. 197, o ang Magna Carta for Barangays, na kung maisabatas, ang layunin ay matiyak na makatatanggap sila ng karampatang tulong kabilang ang kanilang suweldo, allowances at iba pang benepisyo para sa mas maayos na pamamahala sa kanilang mga nasasakupan.

Nariyan din ang SBN 427, o ang Barangay Health Workers Act, na kung maging ganap na batas, layuning magkaloob ng karagdagang suporta sa barangay health workers sa pamamagitan ng monthly honorariums, seguridad sa kanilang tungkulin, pagpapayabong ng kanilang kaalaman at pagkakataong mabigyan ng civil service eligibility.

Samantala, hindi man tayo personal na nakapunta sa kanilang mga pagtitipon, nagbigay pa rin tayo ng mensahe at kinumusta ang mga barangay official ng Davao del Norte at Iloilo province sa kanilang mga Liga ng mga Barangay Provincial Congress noong May 15.

At dahil marami pa rin sa ating mga kababayan ang nahaharap sa iba’t ibang krisis, tuluy-tuloy ang ating paghahatid ng serbisyo. Walang malayo o malapit, basta kailangan ang ating serbisyo ay tutulong tayo sa abot ng ating makakaya bilang Mr. Malasakit na ang tanging bisyo ay magserbisyo.

Nasa Pampanga tayo noong May 16 at sinaksihan ang inagurasyon ng bagong Guagua Public Market Building, gayundin ang New Guagua Community College Building and Student Center — na natulungan naman nating mapondohan. Nagbigay din tayo ng tulong sa mga market vendors at estudyante na nandoon kasama sina Congresswoman Gloria Macapagal Arroyo, Sen. Bato dela Rosa, Gov. Delta Pineda, Mayor Anton Torres at iba pang opisyal.

Personal din nating pinangunahan ang paghahatid ng suporta para sa 500 residente ng Santa Rita na nawalan ng hanapbuhay kasama si Mayor Arthur Salalila at lokal na mga opisyal. Nagkaloob naman ang tanggapan ni former president at Congresswoman Gloria Macapagal Arroyo ng tulong sa karagdagang 242 benepisyaryo. Ang mga ito ay nabigyan din ng DOLE ng pansamantalang trabaho.

Dumalo rin tayo sa ginanap na Philippine Association of Local Government Accountants 19th Annual National Conference bilang guest of honor at tagapagsalita kung saan pinahalagahan natin ang papel ng mga accountant sa maayos at malinis na pamamalakad sa pamahalaan. Ang okasyon ay idinaos sa Baguio City.

Nasa Baguio City din tayo kahapon, May 17, para sa Senate Committee Hearing ukol sa posibleng pag-amyenda ng ilang economic provisions ng ating Saligang Batas. Idiniin ko roon na anumang panukala o pag-amyenda sa Konstitusyon ay dapat dumaan sa tamang proseso, napag-aralang mabuti nang hindi minamadali, at dapat ang ordinaryong Pilipino lalo na ang mga mahihirap ang makikinabang dito, hindi kaming mga pulitiko.

Sa araw na iyon ay pinangunahan ko rin ang pamamahagi ng tulong sa ilalim ng programang Malasakit Sa Kooperatiba ng Cooperative Development Authority na ating sinuportahang maisulong para sa 94  benepisyaryo na mula sa mga kooperatiba sa Cordillera.

Sa pamumuno naman si Sen. Sonny Angara na chair ng Senate Finance Committee, binisita ng aming tanggapan ang Baguio General Hospital na nabigyan ng karagdagang pondo upang mas mapaganda ang kanilang serbisyong pangkalusugan.

Naisakatuparan ito sa pamamagitan ng ating pakikipagtulungan bilang chair ng Senate Health Committee and vice chair ng Senate Finance Committee. Namahagi naman ang aking Malasakit Team ng tulong sa mga naging biktima ng sunog kabilang ang isang residente ng General Santos City; isa sa Surallah, South Cotabato; at apat sa Belison, Antique.

Naalalayan natin ang mga nawalan ng hanapbuhay kabilang na rito ang 500 sa Macalelon, Quezon, kasama ang mga local official; 44 sa Brgy. UP Village, Quezon City katuwang si Brgy. Captain Virgilio Leo Ferrer; 500 sa Malabon City kasama si Mayor Jeannie Sandoval, at 500 pa katuwang naman si Vice Mayor Bernard dela Cruz.

Nagkaloob din tayo ng dagdag na tulong sa mahihirap nating kababayan gaya ng 949 sa Naguilan kasama si Mayor Juan Capuchino, at 1,000 sa Tumauini kasama si Mayor Venus Bautista, mga lugar sa Isabela; 500 sa Gapan, at 500 sa Nampicuan, mga lugar sa Nueva Ecija katuwang si Cong. GP Padiernos.Nabigyan din natin ng dagdag na suporta ang 48 TESDA scholars sa Dagupan City at San Carlos City, mga lugar sa Pangasinan; at ang 20 TESDA graduates sa Pasig City.

Patuloy tayong magtulungan para mapangalagaan at maiangat ang buhay ng ating mga kapwa Pilipino. Ilapit natin ang serbisyo ng gobyerno sa mga nangangailangan nito. Patuloy din akong magseserbisyo sa inyo dahil bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.