Itaguyod ang pangarap at potensyal ng mga kabataang Pinoy

ni Bong Go @Bisyo Magserbisyo | June 5, 2024

Ang lumaking mahusay at mabuting miyembro ng lipunan — sapat na itong sukli para sa lahat ng pagtitiis, pagsasakripisyo, at pagmamahal ng magulang sa kanyang estudyanteng anak.

Ito ang naging mensahe ng inyong Senator Kuya Bong Go sa libu-libong mag-aaral na nakasama natin nitong mga nakaraang araw sa iba’t ibang pagtitipon o graduation ceremonies kung saan tayo ay naimbitahan.

Kakaibang saya talaga kapag kasama ang mga kabataan lalo na at ramdam ko sa kanila ang pag-asa, ambisyon, at kumpiyansa sa sarili na kaya nilang makamit ang kanilang mga pangarap.

Kaya naman nang makaharap natin ang mga magulang ng mga graduating students sa University of Cagayan Valley (UCV) sa Tuguegarao City, Cagayan noong June 3, alam ko ang kanilang pakiramdam. Alang-alang sa mga anak, sinisikap nating malampasan ang hirap, pagod, at puyat para mabigyan sila ng mas magandang kinabukasan.

Sa kanilang event na “Parents’ night,” isang mainit na pasasalamat sa mga nanay at tatay ang ating ibinida! Sabi ko nga sa mga mag-aaral doon, mag-aral silang mabuti para makapagtapos dahil iyon ang tanging maisusukli nila sa mga sakripisyo ng kanilang magulang. Basta unahin nila ang kapakanan ng kanilang kapwa ay hinding-hindi sila magkakamali para marating ang kanilang mga pangarap sa buhay. ‘Ika nga, gawin ang tama, go lang nang go!

Guest of Honor din tayo kahapon, June 4, sa commencement exercises ng Immaculate Conception Child Development Center, Inc. (ICCDCI) sa Pandi, Bulacan. Ipinaalala natin sa mga nagtapos na ang graduation ay hudyat pa lang ng tunay na pagsubok sa kanilang buhay. Malaki ang papel na gagampanan nila sa lipunan, pero huwag silang ma-pressure. Ang payo ng inyong Kuya Bong Go, magsumikap pero huwag magmadali dahil opportunity will come in God’s perfect time.

Bahagi ng ating pagmamalasakit ang suporta natin sa Republic Act 10931, o ang Universal Access to Quality Tertiary Education Act, na naisabatas sa ilalim ng administrasyon ni dating Pangulong Rodrigo Duterte. Isa itong mahalagang hakbang para maisakatuparan ang libreng edukasyon sa state colleges and universities.

Isinusulong din natin ngayon ang Senate Bill No. 1360 na naglalayon na mapalawak pa lalo ang coverage ng tertiary education subsidy sa pamamagitan ng pag-amyenda sa RA 10931. Kung maisabatas, malaking tulong ito sa mga qualified Filipino students dahil magkakaroon sila ng mas maraming options upang makapag-aral sa institution na nais nilang pasukan.

Co-author at co-sponsor din tayo ng RA 11984, o ang “No Permit, No Exam Prohibition Act,” na nagbigay ng proteksyon sa mga estudyante laban sa anumang polisiya na nagbabawal sa kanila na makakuha ng pagsusulit at iba pang educational assessments kung may pagkakautang gaya ng hindi pa nababayarang matrikula.

Para naman sa ating mimamahal na mga guro, co-author tayo ng Kabalikat sa Pagtuturo Act na naglalayong madagdagan ang kanilang teaching supplies allowance. Nilagdaan na ito ng ating Pangulong Ferdinand Marcos, Jr. noong June 3.

Isinusulong din natin ang Senate Bill No. 1864, o Student Loan Payment Moratorium During Disasters and Emergencies Act, na layuning magkaloob sa mga estudyante ng palugit kung mayroon silang loans na hindi mabayaran dahil sa mga kalamidad.

Bilang chair ng Senate Committee on Health, sinuportahan natin ang pangangalaga sa mental well-being ng ating mga estudyante at mga guro sa pamamagitan ng Senate Bill No. 379, na co-author tayo, at ng Senate Bill No. 1786, na naglalayong lumikha ng mental health offices sa mga paaralan mula sa basic education at maging sa higher education institutions.

Habang nasa Tuguegarao City tayo noong June 3, personal nating pinangunahan ang pagbibigay ng suporta sa 21 kooperatiba sa rehiyon sa pamamagitan ng programang Malasakit sa Kooperatiba ng Cooperative Development Authority na ating isinulong. Nagkaloob din tayo ng tulong sa 500 residenteng nawalan ng hanapbuhay katuwang si Mayor Maila Ting. Ang mga benepisyaryo ay mabibigyan din ng DOLE ng pansamantalang trabaho. Nag-abot din tayo ng tulong sa 700 youth leaders at miyembro ng Sangguniang Kabataan.

Noong Lunes, sinaksihan ng aking opisina ang groundbreaking ng itatayong Super Health Center sa Santa Catalina, Negros Oriental upang mailapit ang pangunahing serbisyo medikal sa komunidad.

Personal din nating sinaksihan kahapon, June 4, ang inagurasyon ng itinayong Super Health Center sa Angat, Bulacan. Matapos ito ay pinangunahan natin ang pagkakaloob ng tulong sa 500 residente sa lugar na nawalan ng hanapbuhay, na may natanggap ding tulong mula sa DOLE.

Dumalo rin tayo sa Liga ng mga Barangay Congress-Negros Occidental Provincial Chapter na ginanap sa Bai Hotel, Mandaue City, Cebu sa imbitasyon ni LnB President Provincial Board Member Richard Sablan.  

Tuluy-tuloy naman ang aking Malasakit Team sa pag-alalay sa ating mga kababayang nangangailangan tulad ng 31 residente ng Zamboanga City na nasunugan, at mga kababayan sa Lucban, Quezon na nabiktima ng Typhoon Aghon. Nagbigay din tayo ng dagdag na suporta sa 15 TESDA graduates sa Pasig City.

Umalalay tayo sa mga kababayan nating nawalan ng hanapbuhay at kabalikat ang DOLE ay natulungan natin ang 500 sa Marikina City kaagapay si Mayor Marcy Teodoro; 145 sa Cabarroguis, Quirino kasama si Vice Governor Jojo Vaquilar; 87 sa San Remigio at Sibalom, at 40 pa sa Patnongon sa Antique katuwang si Vice Governor Edgar Denosta; at 88 sa Meycauayan City, Bulacan kasama si Councilor Kath Hernandez.

Naniniwala ako sa potensyal ng mga kabataang Pilipino. Gabayan natin sila upang marating ang kanilang mga pangarap dahil sila ang pag-asa ng ating bayan. Bilang inyong Senator Kuya Bong Go, patuloy akong magseserbisyo sa inyo sa abot ng aking makakaya dahil bisyo ko na ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suportahan ang bawat Pilipinong nagsisikap na makamit ang pangarap

ni Bong Go @Bisyo Magserbisyo | June 1, 2024

Sa hilig ng bansa natin sa sports, marami sa ating mga kabataan ang nangangarap na maging atleta at maging tanyag sa professional sports. 

Bilang chair ng Senate Committee on Sports at isa ring sports enthusiast, sinisikap nating mabigyan ang ating mga kababayan ng oportunidad na makamit ang kanilang pangarap sa buhay lalo na ang mga kapus-palad.

Kamakailan, nasa Kayapa, Nueva Vizcaya ang inyong Senator Kuya Bong Go para maghatid ng kaunting tulong sa mga nawalan ng hanapbuhay. Doon ko nakilala ang siyam na taong gulang na si Japeth Gamson ng Sitio Tawang, Barangay Besong. Agad kong napansin si Japeth dahil wala siyang anumang suot sa paa. Kuwento niya, tulad daw ng inyong Kuya Bong Go ay mahilig din siyang mag-basketball. Kapangalan pa nga niya ang isa pa nating kaibigan na kilalang elite basketball player.

Ang problema ng batang si Japeth, ni minsan ay hindi raw siya nagkaroon ng bola at sapatos na pang-basketball.

Labis na naantig ang kalooban ng inyong Mr. Malasakit. Kaya naman agad nating binigyan si Japeth ng basketball at sapatos. Pero ang pinakadalangin ng inyong Kuya Bong Go — sana’y nabigyan natin siya ng pagkakataon na masimulan ang pagtupad niya sa kanyang pangarap na maging atleta.

Kapag may mga batang tulad ni Japeth na may pangarap, tungkulin natin na bigyan sila ng pag-asa at mga oportunidad na magtagumpay. Ang kailangan nila, hindi lang tulong, kundi isang fighting chance para maging champion sa buhay.

Nang maghatid naman tayo ng tulong sa mga taga-Caloocan City noong May 30, nakita ko ang mga kabataang naglalaro ng basketball. Nakipaglaro ako sa kanila. Bukod sa mabisang paraan ito para matutunan nila ang teamwork at disiplina, mapapanatili pa nilang malusog ang katawan at mapapalayo sila sa masamang bisyo tulad ng droga. Binigyan din natin ng mga bola ang mga bata sa Caloocan City. Ang ilan ay nabigyan pa natin ng sapatos.

Ang ating mga naging inisyatiba sa Kayapa at Caloocan City ay bahagi lang ng ating mas malaking commitment na suportahan ang sports bilang bahagi ng youth development. Tayo ang may-akda at co-sponsor sa Senado ng Republic Act No. 11470, na nagtatag ng National Academy of Sports sa New Clark City. Nagkakaloob ang NAS ng secondary education kung saan naka-integrate ang specialized sports curriculum, para mapagsabay ang ensayo at pag-aaral nang walang nasasakripisyo.

Principal sponsor din tayo ng Senate Bill No. 2514, o ang panukalang Philippine National Games (PNG) Act, na naglalayon na ma-institutionalize ang isang komprehensibong national sports program upang palawakin ang grassroots sports development. Pumasa na ito sa pinal na pagbasa sa Senado.

Mula May 22 hanggang 25, inalalayan ng aking tanggapan ang sports festival ng Mindanao State University sa Lanao del Norte kasama ang Philippine Sports Commission at ang tanggapan nina Sen. Sonny Angara at Sen. Pia Cayetano. Sinuportahan din natin ang Youth Inter Barangay Sports League sa Mallig, Isabela na magsisimula sa June 4.

Saludo naman ako sa ating team Alas Pilipinas na nagwagi ng bronze laban sa Australia sa ginanap na 2024 Asian Volleyball Confederation Challenge Cup for Women kamakailan sa Maynila. Katuwang ang Philippine Sports Commission, nagpahayag tayo ng inisyatiba na mabigyan ng PhP200,000 bawat qualified player and coaching staff ng ating women’s volleyball team.

Samantala, sinaksihan natin ang turnover at ribbon cutting ceremonies ng itinayong Super Health Center sa Kayapa, Nueva Vizcaya noong May 29. Inayudahan din natin ang 500 residenteng nawalan ng hanapbuhay, na sa ating suporta ay mabibigyan ng pansamantalang trabaho ng DOLE. Sinaksihan natin ang inagurasyon ng itinayong Kayapa Municipal Hall na ating isinulong na mapondohan noon. Nagpapasalamat naman tayo kay Mayor Elizabeth Balasya at sa kanilang konseho sa pagdedeklara sa atin bilang adopted son ng Kayapa at pinangalanan akong “Lacbongan”, hango sa pangalan ng isang magiting na lider ng tribong Kalanguya.

Katuwang sina Quezon City Mayor Joy Belmonte at Councilor Mikey Belmonte, personal tayong namahagi ng tulong noong May 30 sa 1,000 residente sa lungsod na nawalan ng hanapbuhay, bukod pa sa tulong mula sa DOLE. Nagsagawa rin tayo ng katulad na relief effort sa Caloocan City katuwang naman si Mayor Along Malapitan at nasuportahan ang 1,000 residenteng nawalan ng kabuhayan.

Sa Mandaluyong City naman tayo namahagi ng tulong kahapon, May 31, at naalalayan ang 500 residenteng nawalan ng trabaho katuwang si Mayor Ben Abalos; at 500 pa kasama naman si Congressman Boyet Gonzales, bukod sa programa mula sa DOLE.

Binisita natin ang ating mga kapwa-Batangueño at sinaksihan ang turnover ceremony ng ambulansya para sa Tanauan City at Alitagtag  sa Batangas; at Luisiana sa Laguna na ating isinulong para sa kanila. May dagdag-tulong din tayo sa 505 na taga-Tanauan na nawalan ng pagkakakitaan, na nabigyan din ng DOLE ng tulong; at para na rin sa 58 na naging biktima ng sunog sa bayan na iyon.

Nakarating naman ang aking Malasakit Team sa iba’t ibang komunidad para alalayan ang iba pa nating kababayan na nangangailangan tulad ng 300 indigent students sa Santo Tomas, at 536 sa San Luis sa Pampanga kaagapay si Congresswoman Anna York Bondoc; 1,148 na mahihirap sa Rizal, Nueva Ecija katuwang si Cong. GP Padiernos; 200 sa Pasig City; 826 residente mula sa iba’t ibang bayan ng Lanao del Norte katuwang sina Governor Angging Dimaporo at mga board members; 500 sa Baroy, Lanao del Norte katuwang sina Sen. Francis Tolentino at Mayor Grelina Lim.

Tuloy rin tayo sa pagtulong sa mga nawalan ng hanapbuhay tulad ng 500 sa Parañaque City katuwang si Cong. Gus Tambunting; 73 sa Muntinlupa City katulong si Councilor Raul Corro; 531 sa Santa Ignacia, Tarlac kaagapay si Governor Susan Yap; at 534 sa Biñan City, Laguna kabalikat sina Cong. Len Alonte at Vice Mayor Gel Alonte. Ang mga benepisyaryo ay mabibigyan din ng DOLE ng pansamantalang trabaho.

Nagbigay din ang aking opisina ng tulong sa 14 residenteng nasunugan sa Tubod, Lanao del Norte katuwang si Mayor Cabahug; at sa 237 TESDA graduates sa Iligan City katuwang ang Asian TechHub Academy.

Sama-sama nating suportahan ang bawat Pilipinong nagsisikap na makamit ang kanilang pangarap sa buhay. Bilang inyong Mr. Malasakit, patuloy akong tutulong sa abot ng aking makakaya dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagkilala sa mga sakripisyo ng mga karaniwang bayani ng lipunan

ni Bong Go @Bisyo Magserbisyo | May 29, 2024

Lutang na lutang talaga ang pagiging masayahin ng mga Pilipino kapag nasa abroad at kahalubilo ng ibang lahi. 

Nangingibabaw ang kumustahan at halakhakan ng mga kababayan natin tuwing may pagkakataong magsama-sama sa ibang bansa. Marahil, dahil ito sa labis na pananabik na makasama ang mga mahal sa buhay na milya-milya ang namamagitan.

Ganito na lamang kainit ang pagtanggap na nasaksihan ng inyong Senator Kuya Bong Go nang maimbitahan tayo bilang Guest of Honor at Speaker sa 2024 Jinseo Arigato International Film Festival sa Nagoya, Japan noong May 26. Sa harap ng mga kababayan natin sa Japan, tinanggap natin ang parangal na “Champion of Life, Hero of the Year” award bilang pagkilala sa ating patuloy na pagmamalasakit sa mga nangangailangan at pagsusulong na mailapit pa ang serbisyo ng pamahalaan sa taumbayan.

Lubos tayong nagpapasalamat sa pagkilala. Pero gaya nga ng nabanggit ko habang tinatanggap ang parangal, with or without an award ay patuloy lang ang aking pagseserbisyo. Tayo ay instrumento lamang ng Maykapal para makatulong sa kapwa.

Habang nasa entablado, tuwang-tuwa ang inyong Kuya Bong Go dahil nasa aking harapan noon ang mga karaniwang bayani ng ating bansa — ang mga Pilipinong nagtitiis sa ibang lugar para mabigyan ng mas magandang buhay ang kanilang pamilya.

May temang “Celebration of Filipino-Japanese cross-cultural collaboration” ang film festival na dinaluhan natin. Tampok dito ang husay ng mga Filipino artist at filmmakers. 

Pinasalamatan natin si Consul General Roy Ecraela, ang mga foreign service officer at mga empleyado ng ating konsulado sa Nagoya sa pag-aalaga sa ating mga kababayan doon. Kaisa natin sila sa panawagang gawing bukas 24/7 ang kanilang mga opisina dahil walang matatakbuhan ang ating mga kababayan kundi silang mga kinatawan ng gobyerno roon. 

Noong panahon ni dating Pangulong Rodrigo Duterte, ginawa nating prayoridad ang kapakanan ng ating mga OFW. Ipinasa natin ang Republic Act No. 11641, na lumikha sa Department of Migrant Workers, ang departamento na nakatutok sa mga OFWs sa buong mundo. Isa tayo sa author at co-sponsor ng batas na iyan, na nagpapatunay ng ating adhikain na pakikinggan, poprotektahan at ipaglalaban ang mga karapatan at kapakanan ng bawat migranteng manggagawang Pilipino. 

Bukod sa ating mga OFW, ipinaglalaban din natin ang ating mga manggagawa sa media at entertainment industry. Isinusulong natin sa Senado bilang miyembro ng Committee on Public Information ang pagpa-file ng Senate Bill No. 1183, o ang “Media and Entertainment Workers Welfare Act” na ating isinumite kamakailan. Layunin nito na magkaloob ng karagdagang proteksyon, seguridad at insentibo sa media workers sa Pilipinas — nasa radyo man sila, print, TV o pelikula.

Masaya rin tayong ibalita na naisabatas na ang Eddie Garcia Law na isa tayo sa co-author. Layunin nito na bigyan ng sapat na proteksyon at benepisyo ang mga manggagawa sa film and television industry na malaki ang naging ambag sa sining at kultura ng ating bansa. Ito ay ipinangalan sa yumaong aktor at direktor na si Eddie Garcia, na isa sa mga artistang ating hinahangaan.

Bilang miyembro naman ng MMFF Executive Committee, ipinanukala natin ang pagdaraos ng Metro Manila Summer Film Festival upang mabigyan pa ng karagdagang exposure ang ating mga artista at filmmakers. Patuloy din nating sinusuportahan ang pagsisikap ng MMFF na mas mapalaganap ang mga pelikulang Pilipino lalo na ngayon na 50th anniversary nila. 

Bukod sa mga kaganapan sa abroad ay patuloy ang aking tanggapan sa paghahatid ng tulong sa ating mga kababayan. Mula May 22 hanggang 25, sinaksihan ng aking Malasakit Team ang mga sports festival sa iba’t ibang branches ng Mindanao State University sa Maigo at Iligan City, Lanao Del Norte kasama ang Philippine Sports Commission at ang tanggapan nina Sen. Sonny Angara at Sen. Pia Cayetano. 

Kahapon, May 28, ay sinaksihan natin, bilang chair ng Senate Committee on Sports, ang ginaganap na Asian Volleyball Confederation (AVC) Challenge Cup. Sinaksihan naman ng aking opisina ang groundbreaking ng itatayong Super Health Center sa Mahayag, Zamboanga Del Norte kasama si Mayor Manuel Saladaga. 

Tuluy-tuloy din ang aking Malasakit Team sa pag-alalay sa ating mga kababayang nangangailangan. Rumesponde tayo sa 12 naging biktima ng insidente ng sunog sa Minglanilla, Cebu. Namahagi tayo ng dagdag na tulong sa 300 TESDA graduates sa Ormoc City, Leyte. 

Nagpadala rin tayo ng tulong sa mga pamilyang naapektuhan ng baha dulot ng Bagyong Aghon sa Lucena City, Quezon. Nakiramay tayo sa namatayan doon at nagbigay ng kaunting tulong. Nakisama rin kami sa kanilang Pasayahan Festival sa araw na iyon sa aming pagnanais na mag-iwan ng ngiti sa oras ng kanilang pagdadalamhati. 

Nagkaloob naman tayo ng suporta sa 100 mahihirap na residente ng Sindangan, Zamboanga del Norte na nabigyan din ng livelihood assistance mula sa gobyerno.

Habang 1,300 residente ng Sta. Cruz, Laguna ang natulungan katuwang si Vice Gov. Karen Agapay; at 70 senior citizens naman mula sa Binangonan, Rizal katuwang si Congresswoman Mila Magsaysay ang nabigyan din natin ng tulong.

Namahagi tayo ng tulong sa 56 nating kababayan sa General Trias City, Cavite, katuwang si Board Member Morit Sison. Nabigyan din sila ng pansamantalang trabaho ng DOLE.

Saan mang sulok ng bansa, lagi tayong handang maglingkod sa ating kapwa bilang inyong Mr. Malasakit na walang ibang bisyo kundi magserbisyo sa inyo sa abot ng aking makakaya. Minsan lang tayong dadaan sa mundong ito, kaya kung anong kabutihan at tulong na puwede nating gawin sa ating kapwa, gawin na natin ngayon dahil hindi na tayo babalik sa mundong ito. Ako’y  naniniwala na ang serbisyo sa tao, serbisyo iyan sa ating Panginoon.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.