Health emergency allowance, ibigay na

ni Bong Go @Bisyo Magserbisyo | July 7, 2024

Sa tuwing nakakausap ng inyong Senator Kuya Bong Go ang ating healthcare workers na nagsakripisyo at buong giting na nagserbisyo lalo na noong panahon ng pandemya, nakakarinig tayo ng sigaw na, “HEA! HEA!” Halos magmakaawa sa gobyerno ang ilang mga healthcare worker para makuha na ang kanilang Health Emergency Allowance.

Kaya sa mga hearing natin sa Senate Committee on Health na ako ang chair, binibigyan natin sila ng pagkakataon na mapakinggan. Tulad ng sabi ko sa kanila: “ang Komite na ito ay inyo. Gamitin ninyo ito bilang avenue para mapakinggan kayo ng gobyerno at ng taumbayan”.

Kaya masaya ako sa balita ng pag-release ng pondo para sa HEA nitong July 5 upang mabayaran na raw ang natitirang HEA ngayong taon. Sa wakas ay napakinggan na ang ating hinaing. Pero tuluy-tuloy pa rin ang ating pagtutok para siguraduhin na ang bawat isa sa ating HCWs ay mabibigyan ng nararapat na suporta at karampatang pagkilala.

Wala ni isang healthcare worker na kuwalipikado sa HEA ang dapat mapag-iwanan!

Lagi nating sinasabi na services rendered na ito, pinaghirapan at pinagpawisan ito ng healthcare workers natin. Kaya tiyakin dapat na ang pondong inilaan ay mapunta sa dapat makatanggap. Nananawagan muli tayo sa DBM at DOH na i-reconcile ang kanilang records para matiyak na lahat ng kuwalipikado ay mababayaran at ang lahat ng obligasyon sa kanila ng gobyerno ay matutupad.

Makakaasa ang ating healthcare workers na hindi tayo titigil sa pagsuporta sa kanilang kapakanan at paglaban sa kanilang karapatan. Katulad na lamang noong nakaraang 18th Congress na co-author at co-sponsor tayo ng Republic Act No. 11712 na nagkakaloob sa kanila ng mga benepisyo at allowances sa panahon ng public health emergencies gaya ng COVID-19 pandemic. Ito ang basehan ng HEA na ating isinusulong.

Samantala, tuluy-tuloy tayo sa paghahatid ng serbisyo sa iba’t ibang sektor ng ating lipunan. Nasa Davao City tayo noong July 3 at naging panauhin sa ginanap na Liga ng mga Barangay - Aklan Chapter Provincial Congress 2024 sa paanyaya ni LNB Aklan President Ralf Tolosa.

Personal nating nakaharap noong July 4 ang mga miyembro ng Gilas Pilipinas Women’s Under-18 basketball team sa kanilang pagbisita sa Senado. Bilang chair ng Senate Committee on Sports, inihayag natin ang paghanga sa kanilang husay at sa karangalang iniuwi nila sa ating bansa matapos makapasok sa FIBA U18 Women’s Asia Cup Division A nang talunin nila ang Lebanon sa kanilang laban sa Division B Finals noong June 30 sa Futian Sports Park sa China. Inihayag ko rin ang aking hangarin kasama ang Philippine Sports Commission na mabigyan ng karampatang suporta ang bawat manlalaro at coaching staff.

Nakasama rin natin sa isang get-together ang ilang local officials ng Palompon, Leyte sa pangunguna ni Mayor Ramon Oñate na bumisita sa Maynila. Bilang adopted son ng Leyte, sisikapin kong suportahan sila sa pagseserbisyo sa kanilang bayan.

Binisita naman natin noong July 5, ang ating mga kababayan sa Zambales at personal na pinangunahan ang pamamahagi ng tulong pinansyal sa 2,000 mahihirap na residente ng bayan ng Iba katuwang ang lokal na pamahalaan. Bilang adopted son ng bayan ng Iba at maging ng probinsya ng Zambales, patuloy ako sa aking pagsisikap na ilapit ang serbisyo ng gobyerno sa mga nangangailangan.

Binisita rin natin ang Malasakit Center na nasa President Ramon Magsaysay Memorial Hospital, at namahagi ng pagkain para sa mga pasyente at staff ng ospital. Sinaksihan natin ang pagbabasbas sa itinayong Super Health Center sa Iba. Dumalo tayo sa inagurasyon ng bagong Iba Municipal Hall na napondohan dahil sa ating inisyatiba bilang vice chair ng Senate Finance Committee.

Matapos nito, sinaksihan natin ang pagbubukas ng Mayors Cup sa Zambales Sports Gymnasium na lalahukan ng mga manlalaro ng basketball at volleyball. Isinulong natin bilang Senate Sports Committee chair na mapagkalooban ng PSC ng pondo ang pagdaraos ng palarong ito upang i-promote ang sports sa komunidad at mailayo ang kabataan sa ilegal na droga.

Hindi rin tumitigil ang aking Malasakit Team sa pag-alalay sa mga kababayan nating nahaharap sa iba’t ibang pagsubok, na ating tinulungan tulad ng 22 residente ng Gingoog City, Misamis Oriental na nasunugan; at ang 400 mahihirap sa Laua-an, Antique katuwang si Vice Governor Ed Denosta kasabay ng isinagawa niyang medical and dental mission sa lugar.

Nagbigay tayo ng tulong sa mga nawalan ng hanapbuhay tulad ng 65 sa Bulan, Sorsogon katuwang sina Board Member Ramie Robles at Vice Mayor Chezka Robles; 17 sa Brgy. Bibiclat, Aliaga, Nueva Ecija katuwang si Brgy. Captain Kit Cerezo; 203 sa Hindang, Leyte kaagapay si Mayor Betty Cabal; 500 sa Marikina City kasama si Congw.

Stella Quimbo; 145 sa Nueva Vizcaya sa pakikipagtulungan ni Vice Governor Eufemia Dacayo; at 90 sa San Jose de Buenavista, Antique na ineendorso noon sa atin ng pumanaw na si Mayor Elmer Untaran. Ang mga kuwalipikadong benepisyaryo ay mabibigyan din ng pansamantalang trabaho sa ating pakikipag-ugnayan sa DOLE.

Katuwang si Mayor Myca Vergara ay napagkalooban natin ng dagdag na tulong tulad ng shirts, bola, pagkain at iba pang uri ng suporta ang 1,500 na mahihirap sa Cabanatuan City, Nueva Ecija bukod sa pinansyal na ayuda mula sa local government na ating isinulong para sa kanila. Sa Palawan ay 1,700 mahihirap na residente naman ang ating natulungan kasama si Councilor Elgin Damasco.

Binalikan din natin ang mga nawalan ng tirahan na ating natulungan noon upang muling bigyan ng suporta at makabangon gaya ng 13 sa Malabon City; at 25 sa San Juan City. Nakatanggap din ang mga ito ng tulong pinansyal sa NHA sa ilalim ng ating isinulong na programa noon at patuloy na sinusuportahan ngayon para may pambili ang mga benepisyaryo ng pako, yero, semento at iba pang materyales sa pag-aayos na muli ng kanilang tirahan.

Ang bawat Pilipino na hangad ay makapagserbisyo sa kanyang kapwa, para sa akin, ay isang bayani. Tulad ng ating healthcare workers, dapat lamang silang kilalanin, bigyang pugay, at ibuhos ang suporta. Isa sila sa aking inspirasyon sa patuloy kong pagseserbisyo sa abot ng aking makakaya dahil ang bisyo ko ay magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo sa abot ng makakaya, lalo na sa higit na mga nangangailangan

ni Bong Go @Bisyo Magserbisyo | July 3, 2024

Palagi kong sinasabi na sa bawat batas na ating ipinapasa, bawat programang isinusulong, at bawat inisyatiba na sinusuportahan, dapat unahin ang mga pinakanangangailangang Pilipino. Kaugnay ito ng pagsisikap natin na walang maiiwan sa ating pagbangon.

Ganoon din ang aking paniniwala sa paghahatid ng serbisyo sa kapwa. Wala tayong pinipili. Mahalaga na lahat ng sektor ay ating mapakinggan para matugunan ang kani-kanyang suliranin na pinagdaraanan.

Tulad na lamang noong naghatid tayo ng tulong sa Mati City, Davao Oriental noong Sabado, June 29, kasama ang ating Malasakit Team. Doon natin binigyan ng suporta ang mga solo parents and daycare workers, food delivery riders, persons with disabilities o PWDs, out-of-school youth, fish porters, indigenous people o IPs, vendors at iba pa. Naging katuwang natin sa relief effort sina Mayor Michelle Rabat, Vice Mayor Lorenzo Rabat, Coun. Tara Rabat-Gayta at iba pang mga lokal na opisyal.

Sa ating pagbisita sa Mati City ay personal nating pinangunahan ang pagkakaloob ng tulong pinansyal sa 1,500 mahihirap na residente. Ang pondo ay nagmula sa sama-sama naming pagsisikap ng aking mga kapwa mambabatas na sina Sen. Francis Tolentino at Sen. Robin Padilla, ni Mayor Rabat at ng national government. Sa hiwalay na okasyon ay panibagong grupo ng 1,500 mahihirap na residente ang nabigyan natin ng tulong pinansyal katuwang pa rin ang lokal na pamahalaan.

Sinabi ni Mayor Rabat na ang pondo na ating isinulong ay malaking tulong sa kanilang Daycare Parents Association dahil napakahalaga na masuportahan ang mga magulang na nag-aalaga ng kanilang mga anak, gayundin ang tulong na naipagkakaloob natin sa food delivery workers at tricycle operators sa lugar. Ang kapakanan ng PWDs naman ay lagi ring una sa ating mga inisyatiba.

Hindi tayo tumitigil sa pagsuporta sa mga solo parents. Co-author at co-sponsor tayo ng Republic Act No. 11861 na nag-amyenda sa Solo Parents’ Welfare Act of 2000. Sa pamamagitan nito, napagkalooban ang mga solo parent — na ang mayorya ay mga kababaihan — ng karagdagang mga benepisyo sa kanilang matapang na pagtataguyod na mag-isa sa kanilang mga anak.

Para naman sa karagdagang proteksyon sa mga nasa delivery services, isinumite natin sa Senado ang Senate Bill No. 1184, o ang panukalang “Food, Grocery, and Pharmacy Delivery Services Protection Act of 2022” upang maisulong ang kanilang karapatan at kabuhayan.

Bilang chair ng Senate Committee on Health, iniiwasan natin na may mga Pilipinong makararanas ng gutom kaya patuloy kong isusulong ang aking mga inisyatiba at susuportahan ang mga programang makapaghahatid ng tulong sa mga pinakamahihirap nating kababayan.

Sa araw ding iyon ay dumalo tayo sa ginanap na Liga ng mga Barangay-Davao Oriental Chapter Provincial Congress na ginanap sa A57 Techno Park Mati sa paanyaya ni Provincial President Jossone Michael Dayanghirang. Sinaksihan natin ang turnover ng ambulansya para sa San Isidro at Caraga, mga bayan sa Davao Oriental, kasama si Cong. Nelson “Boy” Dayanghirang, na ating isinulong katuwang ang DOH.

Naging panauhing tagapagsalita naman tayo sa Davao Oriental State University Commencement Exercises sa paanyaya ni SUC President Roy Ponce. Bilang chair ng Senate Committee on Sports, sinaksihan din natin ang pagbubukas ng isang sports cup sa Brgy. Sainz, Mati City. Nilahukan ito ng 11 koponan mula sa iba’t ibang munisipalidad ng Davao Oriental.

Nakiisa naman tayo sa pagdiriwang ng ika-57 Araw ng Davao del Sur noong July 1 sa paanyaya ni Gov. Yvonne Cagas. Sinaksihan natin ang turnover ng Super Health Center sa Digos City kasama si Mayor Josef Cagas. Matapos ito, pinangunahan natin ang pagkakaloob ng tulong pinansyal sa 2,000 mahihirap na residente ng Digos City katuwang ang lokal na pamahalaan.

Kahapon, July 2, ang mga kababayan naman natin sa Surigao del Sur ang hinatiran natin ng serbisyo. Katuwang si Gov. Ayec Pimentel, nagkaloob tayo ng tulong pinansyal sa 2,000 mahihirap na residente ng Bislig City. Namahagi tayo ng tulong sa 23 iba’t ibang kooperatiba sa Caraga Region sa ilalim ng ating inisyatiba na “Malasakit sa Kooperatiba” sa pakikipag-ugnayan sa Cooperative Development Authority.

Hindi rin tumitigil ang aking Malasakit Team sa pag-alalay sa mga sektor na nangangailangan. Natulungan natin ang 20 residente ng Capoocan, Leyte na naging biktima ng sunog.

Naayudahan din ang 187 displaced workers sa Cebu City katuwang si Congw. Marissa del Mar Magsino ng OFW Partylist. Ang mga benepisyaryo ay mabibigyan din ng DOLE ng pansamantalang trabaho.

Nagbigay tayo ng dagdag na tulong sa 20 TESDA scholars sa Binangonan, Rizal. Naghandog din tayo ng munting regalo sa mga kalahok sa MB Cup sa Quezon City katuwang si Councilor Mikey Belmonte.

Sa abot ng aking makakaya ay patuloy akong magseserbisyo sa ating mga kababayan lalung-lalo na sa mga walang ibang matatakbuhan kundi ang gobyerno. Bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga atletang Pinoy na sasabak sa 2024 Paris Olympics, suportahan

ni Bong Go @Bisyo Magserbisyo | June 30, 2024

Napakalapit sa aking puso ng mga atletang Pilipino. Bilang isa ring atleta at sports enthusiast, naniniwala akong sa pamamagitan ng sports ay mailalayo natin sa ilegal na droga ang mga kabataan. At siyempre, healthy and fit tayo dahil dito.

Kaya bilang chair ng Senate Committee on Sports ay walang tigil ang ating suporta sa mga manlalarong Pilipino. Masaya akong ibalita sa inyo na naibigay na ng Philippine Sports Commission ang isinulong nating tulong pinansyal na P200,000 kada player at coaching staff ng Alas Pilipinas Women’s Volleyball Team sa isang seremonya na ginanap sa Maynila noong June 26.

Nasungkit ng Alas Pilipinas ang bronze medal sa Asian Volleyball Challenge Cup noong May 29. Personal kong napanood ang laban. Sabi ko sa volleyball team, alam kong hindi sila ang pinakamalalaki at pinakamatatangkad na players sa court, pero ang kanilang puso — ang pusong Pilipino — ay talagang lumalaban. Malaking karangalan ang kanilang regalo kaya dapat madagdagan ang suporta at incentives nila mula sa gobyerno. Magagamit din nila ito sa kanilang susunod na laban sa FIVB Challenger Cup dito sa bansa next week.

Noong nakaraang linggo, sa atin pa ring inisyatiba ay nakatanggap ang bawat atleta ng Php500,000 na sasabak sa 2024 Paris Olympics. Pinasalamatan natin ang pamunuan ng PSC sa kanilang patuloy na suporta sa ating adbokasiya. Maliit na halaga lamang ito kapalit ng karangalan na dala nila habambuhay sa bansa. Dahil at stake ang ating bandila at bayan, lagi kong paalala sa mga atleta na ibigay ang lahat ng makakaya.

Katuwang ng suporta natin sa elite athletes ay ang pagsusulong din sa sektor kung saan sila nanggaling — ang grassroots sports. Mahalagang sa simula pa lamang ay ganado na ang isang atleta na ibuhos ang lahat dahil alam niyang nasa likod niya ang gobyerno at buong sambayanan.

Isa sa ating inisyatiba ay ang R.A. No. 11470, na isa tayo sa may-akda at co-sponsor. Sa pamamagitan ng naturang batas ay naitayo ang National Academy of Sports sa New Clark City, Tarlac, na nagkakaloob ng specialized education and training para sa mga aspiring student-athletes.

Isinulong din natin ang Senate Bill No. 2514, o ang Philippine National Games Act na tayo ang principal sponsor at isa sa may-akda. Pasado na ito sa ikatlong pagbasa. Kung maisabatas, layunin nito na ma-institutionalize ang pagdaraos ng national sports competition na paglalaanan ng karampatang pondo para makalahok ang mga kabataang atletang nasa kanayunan at matukoy mula sa kanila ang may potensyal na magiging bahagi ng national team. Parang mini-Olympics ito ng bansa.

Dahil marami pa rin sa mga kababayan ang nangangailangan ng tulong, hindi tayo tumitigil sa paghahatid ng serbisyo at malasakit nasaan man sila sa bansa.

Bumisita tayo sa Nueva Ecija noong June 26 at personal na pinangunahan ang pamamahagi ng tulong sa 1,000 mahihirap sa Lupao katuwang si Cong. GP Padiernos. Sa Santa Rosa, 2,000 mahihirap ang naayudahan katuwang si Gov. Aurelio Umali, na may natanggap ding tulong mula sa lokal na pamahalaan. Ininspeksyon natin ang itinayong Multipurpose Facility na magagamit ding evacuation center doon. Tayo ang nagsulong para mapondohan ito bilang vice chair ng Senate Committee on Finance.

Ang mga taga-Puerto Princesa City, Palawan ang ating personal na hinatiran ng tulong noong June 27.

Nagkaloob tayo ng tulong sa 1,000 residenteng nawalan ng hanapbuhay, na nabigyan naman ng DOLE ng pansamantalang trabaho. Nabigyan din ng karagdagang tulong ang 2,000 mahihirap sa lugar na nakatanggap ng suportang pinansyal mula sa lokal na pamahalaan. Sa hiwalay na okasyon ay panibagong batch na binubuo ng 1,300 mahihirap ang naayudahan katuwang sina Mayor Lucilo Bayron, Councilors Raine Bayron at Elgin Damasco, na sa ating pagtutulungan ay nabigyan ng gobyerno ng ayuda.

Naging panauhin tayo sa Philippine Elementary School Principals Association 41st Principals Training and Development Program and National Board Conference na idinaos sa Puerto Princesa Coliseum. Binigyan natin ng halaga ang papel ng mga educators sa paghubog sa mga kabataan na pag-asa ng bayan.

Nasa Sarangani province tayo noong June 28, at sinaksihan ang inagurasyon ng itinayong Super Health Center sa Alabel. Pagkatapos, personal nating pinangunahan ang pagkakaloob ng suporta sa 500 residenteng nawalan ng hanapbuhay, na mabibigyan ng pansamantalang trabaho.

Isinulong nating tulungan ang 667 mahihirap katuwang sina Gov. Rogelio Pacquiao at Sen. Joel Villanueva. Karagdagang tulong mula sa ating opisina ang naipagkaloob sa binisita nating 1,000 nawalan ng hanapbuhay sa General Santos City kasama si Mayor Lorelie Pacquiao. Naging panauhin tayo sa Philippine Councilors League-Sarangani Federation General Assembly sa paanyaya ni PCL President BM Evelyn Alegario, kasama rin si General Santos City PCL President Lourdes Casabuena.

Tuluy-tuloy ang aking Malasakit Team sa pag-alalay sa mga kababayang nahaharap sa iba’t ibang krisis. Binalikan natin ang 56 residente ng Navotas City at muling nagkaloob ng suporta sa mga ito, bukod pa ang tulong pinansyal na kanilang natanggap mula sa NHA na ating isinulong para may pambili sila ng pako, yero, semento at iba pang materyales sa pagpapaayos ng kanilang tirahan.

Natulungan natin ang 1,000 mahihirap na residente sa Mandaue City, Cebu katuwang ang tanggapan ni Sen. Villanueva. Sa Northern Samar, nasuportahan natin ang 1,000 sa Catubig sa pakikipagtulungan ni Mayor Solomon Vicencio; at 1,000 rin sa Lapinig kasama si Mayor Luisa Menzon. Sa Mataas na Kahoy, Batangas ay natulungan natin ang 508 nawalan ng hanapbuhay kasama si Mayor Janet Ilagan at ang DOLE.

Sa mga ikot namin sa iba’t ibang sulok ng bansa, at bukod sa mga programa na naihatid sa mga mahihirap, nagpamigay din ako at ang aking tanggapan ng tulong tulad ng food packs, bitamina, pagkain, shirts at ilang bisikleta, sapatos, relos at iba pang uri ng suporta sa mga nangangailangan.

Mga kababayan, isang beses lang tayong daraan sa mundong ito. Kaya anumang tulong na puwedeng ibigay sa kapwa at karangalan ang maaari nating dalhin sa bansa, gawin na natin ngayon. Patuloy akong susuporta sa ating mga atleta at magseserbisyo sa inyong lahat sa abot ng aking makakaya. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.