Palawakin ang benepisyo ng PhilHealth para sa mahihirap

ni Bong Go @Bisyo Magserbisyo | August 3, 2024

Naging kontrobersyal ang P90 bilyon na sobrang pondo ng Philippine Health Insurance Corp. (PhilHealth) na nakatakdang ibalik sa National Treasury. Pero mas marami ang nagulat nang maungkat natin sa pagdinig ng Senate Committee on Health kamakailan na meron pang reserve fund ang PhilHealth na aabot naman sa P500 bilyon!

Bilang chairperson ng naturang komite, hindi matanggap ng inyong Senator Kuya Bong Go na sobra-sobra ang pondo ng PhilHealth na hindi naman nagagamit pero napakaraming Pilipino ang naghihingalo at hindi makapagpagamot dahil walang pambayad sa ospital! Tandaan natin na alinsunod sa Universal Health Care Law, lahat ng Pilipino ay miyembro ng PhilHealth. Dapat gamitin nang tama ang sapat na pondo ng PhilHealth para mapakinabangan ng mga mahihirap na Pilipinong may sakit.

Naiintindihan ko ang trabaho ng ating finance managers kung bakit nila kailangang walisin ang mga natutulog na pondo sa iba’t ibang ahensya para magamit sa priority programs ng gobyerno. Kung legal man ito, morally para sa akin ay hindi katanggap-tanggap na ang pondong para sa kalusugan ay gagamitin sa ibang paraan habang maraming kababayan natin ang humihingi ng tulong pampagamot.

Kaya ang apela natin sa PhilHealth, gamitin ang kanilang pondo nang tama — taasan ang case rates, i-expand ang benefit packages, at irekomendang babaan ang kontribusyon ng mga miyembro lalo na’t may sapat na pondo naman pala sila.

Sa packages pa lamang ng PhilHealth, maraming buhay ang maililigtas kung magagamit ang pondo para ma-expand ang benefits tulad sa pagpapalawak ng dialysis treatments, mental health services, at Z-benefit packages para sa iba’t ibang severe illnesses.

Sana ay taasan rin ng PhilHealth ang coverage ng kasalukuyang case rates nito para lalo pang mabawasan ang out-of-pocket o dudukuting pera mula mismo sa bulsa ng pasyente. Bakit hindi nila dagdagan ang tulong pinansyal na makukuha ng mga pasyente mula PhilHealth sa Malasakit Centers?

Humigit-kumulang 10 milyong Pilipino na ang nakabenepisyo sa medical assistance mula sa Malasakit Centers na ating isinabatas noong 2019 na aking pangunahing ini-sponsor at iniakda sa Senado. Kung palalawakin ang benepisyo mula sa PhilHealth at tataasan ang case rates, hindi na sana kailangang pumila at magmakaawa pa ang mga may sakit para humingi ng tulong. Pera naman ng Pilipino ‘yan, dapat ibalik sa kanila sa pamamagitan ng maayos na serbisyo.

Tututukan din natin ang PhilHealth sa kanilang pangako na irerekomenda sa Pangulo na babaan ang premium contribution ng PhilHealth members. Bawat piso ay napakahalaga lalo na sa karaniwang Pilipino. Kaya babantayan natin ang binitawang mga salita ng PhilHealth at patuloy nating sisiguruhin na ang pondong para sa kalusugan ay magagamit sa mga programang pangkalusugan.

Habang inilalaban natin ang kalusugan ng bawat Pilipino, hindi naman tayo tumitigil sa paglalapit ng serbisyo ng gobyerno sa ating mga kababayan.

Nagkaloob tayo ng tulong para sa 5,000 mahihirap na residente ng Malabon City katuwang si Mayor Jeannie Sandoval noong July 31. Sa ating inisyatiba ay nakatanggap din ang mga benepisyaryo ng tulong pinansyal mula sa lokal na pamahalaan bukod sa ating ibinigay.

Naghatid naman tayo ng tulong at personal na pinangunahan ang pamamahagi ng ayuda sa mga taga-Davao Oriental noong August 1 kabilang ang 267 maliliit na negosyante na biktima ng sunog o kalamidad noon na nagtipon sa Mati City kung saan nakatanggap sila ng livelihood kits mula sa DTI na ating isinulong. Sa pakikipagtulungan naman kasama sina Senator Robin Padilla at Senator Francis Tolentino, San Isidro Mayor Angel Go at Lupon Mayor Erlinda Lim, natulungan natin ang 1,500 mahihirap na residente ng San Isidro at 1,625 naman sa Lupon. Sinaksihan din natin ang turnover ceremony ng itinayong Super Health Center sa San Isidro.

Kahapon, August 2, ay nasa Boston, Davao Oriental tayo at sinaksihan ang turnover ceremony ng bagong Super Health Center doon. Pinangunahan natin ang pagkakaloob ng tulong para sa 3,000 mahihirap na residente katuwang sina Mayor Rowell Rosit, Vice Mayor JP Lampig at Cong. Nelson Dayanghirang.

Kahapon din ay nai-turnover ang itinayong Super Health Center sa Maitum, Sarangani na sinaksihan ng aking tanggapan. Isinagawa naman ang groundbreaking ceremony ng itatayong Super Health Center sa Libon, Albay.

Patuloy din ang aking Malasakit Team sa pag-alalay sa mga kababayan nating nahaharap sa iba’t ibang krisis. Namahagi tayo ng food packs sa mga naging biktima ng Bagyong Carina kabilang ang 800 sa Ilocos Sur; 1,300 sa Bulacan; at 300 sa Marikina City.

Hindi natin kinaligtaang suportahan ang mga nawalan ng hanapbuhay tulad sa Camarines Norte kung saan natulungan natin ang 65 sa Sta. Elena katuwang si VM Ryan Mendoza; 65 sa Capalonga kasama si VM Marcia Esturas; 65 sa Basud kaagapay si VM Ramir Barrameda; 65 sa San Lorenzo Ruiz katuwang si VM Arnulfo Bacuño; at 171 sa Daet kasama sina VM Godfrey Parale at Councilor Jose Angelo Coreses. Sa Morong, Bataan ay 84 ang ating natulungan katuwang si Mayor Sidney Soriano. Sa Pangasinan, naalalayan ang 98 sa Basista kaagapay si Mayor Jr Resuello; 100 sa Lingayen katuwang si VM Dexter Malicdem, at 100 sa Binmaley kasama si Councilor Amelito Sison. Natulungan din ang mga kapwa ko Batangueño kabilang ang 128 sa Mataas na Kahoy katuwang ang kanilang walong konsehal; at 224 sa Lipa City kaagapay ang 14 na barangay captain ng lungsod. May 59 din sa Sudipen, La Union kaagapay si Cong. Francisco Ortega. Sa ating inisyatiba, nabigyan ang mga kuwalipikadong benepisyaryo ng pansamantalang trabaho mula DOLE.

Naayudahan din natin ang mga maliliit na negosyante sa Masbate City kabilang ang 24 residente katuwang sina Board Member Allan Cos at Mayor Socrates Tuason.

Tumulong naman ang aking tanggapan sa mga mahihirap na residente gaya ng 1,239 sa Janiuay, Iloilo kaagapay si VM Corel Locsin Yap; at 800 sa Laur, Nueva Ecija katuwang si Cong. GP Padiernos. Nagpatuloy ang tulong sa barangay health workers at nutrition scholars sa Mati City, Davao Oriental katuwang si Gov. Niño Uy.

Binalikan natin at tinulungan ang 230 na naging biktima ng flash flood sa Talisay City, Negros Occidental. Nakatanggap din sila ng emergency housing assistance mula sa NHA sa ilalim ng programang ating isinulong para may pambili sila ng mga materyales sa pagtatayong muli ng kanilang tahanan.

Minsan lang tayong dadaan sa mundong ito, kaya kung anong kabutihan ang puwede nating gawin sa ating kapwa, gawin na natin ngayon. Sa abot ng aking makakaya ay magseserbisyo ako sa aking kapwa Pilipino saan mang sulok ng bansa. Bisyo ko ang magserbisyo at naniniwala ako na ang serbisyo sa tao ay serbisyo sa Diyos!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pondong nakalaan para sa kalusugan, dapat gamitin sa kalusugan!

ni Bong Go @Bisyo Magserbisyo | July 31, 2024

Gaya ng laging sinasabi ng inyong Senator Kuya Bong Go, inilaan natin ang pagdinig kahapon, July 30, ng Senate Committee on Health, na tayo ang Chairperson, para may boses ang ating mga kababayan tungkol sa kanilang mga hinaing at matinding pangangailangang medikal.

Mga mahihirap na pasyente man o magigiting nating healthcare workers o HCW, ginagawa natin ang lahat ng ating makakaya para siguraduhing nakakarating sa kanila ang serbisyo ng gobyerno. Kaya naman maliban sa Health Emergency Allowance o HEA na marami pa ring HCWs ang naghihintay na mabigyan na, binusisi rin natin sa pagdinig kung nabibigyang prayoridad ba ang kalusugan ng mahihirap na mga Pilipino. Idiniin natin na ang pondong nakalaan para sa kalusugan ay dapat na gamitin para sa kalusugan!

Sa anunsyo ng Department of Finance na ibabalik sa national treasury ang P90 bilyon na unused o sobrang government subsidy para sa PhilHealth, simple lang ang mga tanong ng taumbayan: Tama at legal ba ang ginawa ng DOF at PhilHealth? Saan ito gagamitin? Para ba sa mahihirap o para sa projects? May kinalaman pa rin ba sa health ang paggagamitan o wala?

Legally, baka nga naman may sagot kayo o lulusot ito. Pero morally, para sa akin ay hindi ito katangap-tanggap kung hindi ito gagamitin para rin sa kalusugan.Napakasakit malaman na napakaraming pasyente natin ang naghihingalo at hindi malaman kung saan kukuha ng pambayad sa ospital, tapos sobra pala ng bilyun-bilyong piso ang pondo ng PhilHealth na hindi nagagamit?

Puwede pa sanang magamit ang pondo para mas palawakin at palakasin pa ang benefit packages ng PhilHealth. Makakatulong ito sa marami nating mga kababayan para sa kanilang dialysis benefit, mental health, at mga malalang sakit, konsulta, libreng gamot, dental services at maraming pang iba. Idagdag pa rito na marami ring ospital ang hindi pa nababayaran ng PhilHealth.

Malayo pa tayo sa pagkakamit ng full implementation ng Universal Health Care Law kung saan bawat Pilipino ay ginawang miyembro ng PhilHealth. Nanawagan tayo sa administrasyon na sana ay gamitin nang maayos ang pondo sa pagpapalawak ng mga benepisyo. At kung sobra naman ang pera ng gobyerno, baka puwedeng huwag munang mangolekta ng contributions mula sa OFWs, o huwag munang magtaas ng contributions para sa mga direct contributors na mahihirap.

To our finance managers, alam kong ginagawa lang ninyo ang trabaho ninyo. But please prioritize health! Ang kalusugan ay katumbas ng buhay ng bawat Pilipino. Aanhin natin ang pondo kung patay na ang Pilipino! Samantala, tuluy-tuloy naman ang ginagawa nating paglalapit ng serbisyo sa ating mga kababayan.

Nasa Laguna tayo noong July 29 at personal na sinaksihan ang inagurasyon ng itinayong Pila Municipal Hall na napondohan sa ating inisyatiba bilang Vice Chair ng Senate Committee on Finance.

Pinangunahan natin ang pagkakaloob ng tulong sa 500 na nawalan ng hanapbuhay kasama si Mayor Egay Ramos at DOLE. Nagpapasalamat din tayo dahil kinilala tayo bilang adopted son ng Pila.

Nakapag-abot din tayo ng tulong sa 2,500 mahihirap na residente ng Sta. Cruz katuwang si Gov. Ramil Hernandez. May tulong pinansyal tayong isinulong na naipagkaloob sa kanila mula sa lokal na pamahalaan.

Ang aking Malasakit Team ay dumalaw naman sa mga komunidad para hatiran ng tulong ang mga naging biktima ng Bagyong Carina. Namahagi tayo ng food packs, damit at iba pang tulong sa mga binaha tulad ng 100 residente ng bayan ng Magalang at dagdag na higit 1,000 pa para sa iba’t ibang bayan ng Pampanga; halos 500 sa Siniloan, Laguna; higit isang libo sa iba’t ibang mga bayan ng Bulacan; 200 sa Quezon City; at dagdag 200 pa sa Manila City at 150 sa Pasig City bukod sa natulungan na natin nang bumisita tayo noong nakaraang linggo.

Nabigyan din ang higit isang libong nabahaan sa Malabon City; 400 sa Caloocan City; 300 sa Navotas City; mahigit 1,000 din sa iba’t ibang bayan ng Rizal; 100 sa Valenzuela City; 250 sa Pasay City; higit 1,150 sa Marikina City; at 950 sa San Juan City.

Maliban sa mga naapektuhan ng bagyo, naayudahan natin ang 1,516 mahihirap na residente ng Digos City katuwang si Gov. Yvonne Cagas; at 800 sa Carranglan, Nueva Ecija kaagapay si Cong. GP Padiernos.

Binalikan din natin at binigyan ng tulong ang mga nawalan ng tahanan sa Negros Occidental kabilang ang 139 sa Valladolid, at tatlong pamilya sa La Carlota City. Nakatanggap din sila ng emergency housing assistance mula sa National Housing Authority sa ilalim ng programang ating isinulong.

Hindi natin kinaligtaan ang mga nawalan ng hanapbuhay gaya ng 181 sa La Castellana sa Negros Occidental katuwang si Mayor Mhai Nicor; 358 sa Santa Fe, Nueva Vizcaya kasama sina Vice Mayor Jonathan Tindaan, Councilor Lovely Petonio at ilang mga barangay officials; at 123 sa Castillejos, Zambales katuwang si Mayor Jeffrey Khonghun. Sa ating inisyatiba, sila ay nabigyan ng DOLE ng pansamantalang trabaho.

Inalalayan natin ang mga naging biktima ng sunog kabilang dito ang 23 sa Malabon City; 10 sa Cebu City; at 18 sa Marikina City. Nagbigay din tayo ng dagdag na tulong sa ating 79 TESDA scholars sa Lamitan City, Basilan.

Bilang inyong “Mr. Malasakit,” patuloy akong magseserbisyo sa abot ng aking makakaya dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo at malasakit, walang pinipiling oras

ni Bong Go @Bisyo Magserbisyo | July 28, 2024

Habang pahupa pa lang ang baha sa Metro Manila, nag-ikot na ang inyong lingkod kasama ang ating Malasakit Team para maghatid ng tulong at serbisyo sa mga naapektuhan ng pananalasa ng Habagat at Bagyong Carina. Laging tinitiyak ng inyong Senator Kuya Bong Go na walang masasayang na oras para makatulong dahil mahalaga ang bawat minutong lumilipas lalo na sa mga mahihirap at maysakit.

Kaya nitong July 25, agad tayong sumugod sa Cancer Institute ng Philippine General Hospital (PGH) sa Maynila. Hindi nakaligtas ang PGH sa pagbaha at dagdag pa r’yan ang alalahanin ng mga pasyente na marahil binaha rin ang mga naiwang bahay habang nagpapagamot sa ospital. Nagdala tayo ng mainit na lugaw para sa mga pasyente at staff, gayundin sa mga bantay at mga nakapila sa Malasakit Center sa PGH. May hatid din tayong grocery packs, damit, pamasahe at mga bola para sa ilang pasyente at watchers doon.

Binisita natin ng araw na iyon ang 400 pamilyang naapektuhan ng bagyo sa Barangay 519, Zone 51, Sampaloc, Maynila. Napagkalooban natin sila ng grocery packs, mga de-lata, pagkain, vitamins, masks, at damit. May ilan na nakatanggap din ng mga bola at bagong sapatos.

Pinasalamatan natin sina Manila Mayor Honey Lacuna at Vice Mayor Yul Servo Nieto, maging ang mga opisyal ng Barangay 519 na sina Kapitana Joan dela Cruz, at former barangay chairman Carlo dela Cruz sa kanilang maagap na pagtulong sa mga apektadong residente.

Pinuntahan natin ang Barangay Manggahan sa Pasig City at nagkaloob ng tulong sa 250 pamilyang naapektuhan din ng bagyo, katuwang si former councilor at Kapitan Quin Cruz. Bukod sa food packs, nagbigay tayo ng pamasahe sa mga benepisyaryo.

Mensahe ko sa mga nabahaan, huwag silang mag-alala dahil ang damit ay nalalabhan, ang gamit ay nabibili. Ang pera ay kikitaing muli, pero ang pera ay hindi nabibili ang buhay. A lost life is a lost life forever dahil ang importante ay buhay tayo.

Patuloy ang aking Malasakit Team sa paghahatid ng tulong sa iba pang mga residente at komunidad na naapektuhan ng bagyo. Bilang chairperson ng Senate Committee on Health, ipinaaalala natin sa ating mga kababayan na unahin ang kalusugan. Kung kailangan ng tulong medikal ay lumapit sa mga Malasakit Center. Maaari ring magpakonsulta sa mga Super Health Centers na operational na.

Napakahalaga para sa akin ang buhay at kalusugan ng mga Pilipino kaya lagi tayong mag-iingat sa panahong ito na may kalamidad at maraming sakit ang umuusbong lalung-lalo na ang leptospirosis. Iwasan nating lumusong sa baha hangga’t maaari, at ugaliing maglinis ng katawan.

Ang panibagong kalamidad na hatid ng Bagyong Carina ang isa sa mga dahilan kaya patuloy nating isinusulong ang Senate Bill No. (SBN) 188, o ang pagtatatag ng Department of Disaster Resilience (DDR) na ating matagal nang nai-file.

Kung saka-sakaling maisabatas, magkakaroon ng departamentong nakatutok na may cabinet-secretary level na timon. Hindi lang coordinating council o task force. Ibig sabihin, ito na ang makikipag-coordinate bago dumating ang bagyo, preposition of goods, and coordination with LGUs para ilikas ang mga kababayan natin sa ligtas na lugar. At pag-alis ng bagyo ay restoration of normalcy kaagad at rehabilitation efforts para tuluy-tuloy silang makabangon.

Isinusulong din natin na magkaroon ng Mandatory Evacuation Centers sa bawat lugar sa pamamagitan ng SBN 2451, o ang Ligtas Pinoy Centers Act na isa tayo sa authors at co-sponsors. Kung maisabatas, hindi na magsisiksikan pa sa temporary shelters ang mga kababayan natin sa oras na may sakuna. Dapat ay malinis, maayos, at kumportable ang tutuluyan ng mga kababayan natin para hindi magkasakit.

Anuman ang lagay ng panahon, hindi tayo tumitigil sa paglalapit ng serbisyo sa ating mga kababayan. Bukod sa pagtulong sa mga nabahaan at pagbisita sa PGH, naimbitahan tayo bilang inducting officer noong July 25 ng mga bagong opisyal ng League of Local Planning and Development Coordinators of the Philippines, Inc. (LLPDCPI).

Nasa Bicol naman tayo noong July 26, at nag-inspeksyon sa itinayong Super Health Center sa Legazpi City. Pinangunahan din natin ang pagkakaloob ng tulong sa 1,000 mahihirap na residente sa lugar katuwang si Mayor Geraldine Rosal. Nag-abot tayo ng tulong sa 1,200 pang mga nawalan ng hanapbuhay, na nabigyan din ng DOLE ng pansamantalang trabaho.

Bilang chairperson ng Senate Committee on Sports, sumama tayo sa closing ceremonies ng Private Schools Athletic Association (PRISAA) National Games na ating sinuportahang mailunsad at mapondohan kasama ang Philippine Sports Commission.

Tuluy-tuloy din ang aking Malasakit Team sa pag-alalay sa mga kababayan nating nangangailangan tulad ng 2,000 mahihirap na residente ng Tagudin, Ilocos Sur katuwang si Mayor Roque Verzosa.

Nakatanggap din ng tulong ang 500 residente ng Sto. Domingo, Nueva Ecija katuwang si Cong. GP Padiernos. May dagdag na suporta naman tayong ipinagkaloob sa ating 100 TESDA scholars na naka-graduate sa Danao City, Cebu.

Nabigyan din ng tulong ang 36 manggagawa mula sa Pandan, Antique katuwang si Councilor Plaridel Sanchez. Nakatanggap naman sila ng pansamantalang trabaho mula sa ating inisyatiba kasama ang DOLE.

Binalikan natin at tinulungang makabangon ang mga nawalan ng tahanan sanhi ng mga kalamidad at sunog sa Negros Occidental kabilang ang 170 sa Bacolod City; pito sa Cauayan; 17 sa Pulupandan; 106 sa Bago City; 16 sa Silay City; at 13 sa San Carlos City.

Namahagi rin tayo ng food packs sa mga naging biktima ng Bagyong Carina sa Bulacan. Sa kabuuan ay nakapamigay tayo sa 1,000 benepisyaryo mula sa Meycauayan City katuwang si Councilor Kat Hernandez; sa Hagonoy kaagapay naman si Mayor Baby Martinez; at sa Calumpit katuwang sina Mayor Glorime Faustino at Councilor Mau Torres. Nagpadala rin tayo ng 150 food packs kasama si Brgy. Capt. Ziffred Ancheta sa Brgy. Tumana, Marikina City.

Nagpapasalamat naman tayo sa ating mga rescuer at sa volunteers na nagsakripisyo at tumulong sa ating mga kababayan ngayong may sakuna. Napakaimportante talaga na magtulungan tayo at magbayanihan upang maprotektahan ang bawat isa, lalo na ang ating mga mahihirap na kababayan na pinakaapektado tuwing may kalamidad.

Ano man ang sakuna na ating pagdadaanan, may kalamidad man o wala, handa akong magserbisyo sa abot ng aking makakaya. Bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.