Pangmatagalang programa para sa kalusugan at kaligtasan ng bawat Pilipino, kailangan!

ni Bong Go @Bisyo Magserbisyo | September 4, 2024

Malaking bahagi ng ating bansa ang nakaranas ng malakas na pagbuhos ng ulan at mga pagbaha dulot ng pananalasa ng Bagyong Enteng at hanging habagat. 

Bukod sa Metro Manila, apektado rin ang mga karatig na lalawigan at maging ang ilang bahagi ng Visayas at Bicol region. 

Bilang chairperson ng Senate Committee on Health, nananawagan ako sa mga kababayan na mag-ingat sa ganitong panahon ng kalamidad at gawing prayoridad ang ating kalusugan. Tandaan natin na ang kalusugan ay katumbas ng buhay ng bawat Pilipino. 

Hangga’t maaari ay iwasan ang lumusong sa baha para makaiwas sa mga sakit partikular ang leptospirosis. Sikapin natin na walang naiimbak na tubig sa paligid na maaaring pamugaran ng lamok na maging sanhi naman ng dengue at iba pang sakit. 

Ipinapaalala rin natin sa mga kababayan, lalo na ang mga nangangailangan ng tulong medikal sa panahon ng kalamidad, na magtungo sa alinmang Malasakit Center na malapit sa inyo para sa tulong pampagamot. Mayroon ding Super Health Centers kung saan puwedeng magpakonsulta kung may karamdaman. Nangunguna tayo sa pagsulong ng mga programang ito para mapangalagaan ang kalusugan at mailapit ang serbisyo ng gobyerno sa bawat isa.

Habang nananalasa pa lang ang bagyo, nagsimula nang makipag-ugnayan ang tanggapan ng inyong Senator Kuya Bong Go sa mga lokal na pamahalaan para matukoy ang mga komunidad na nangangailangan ng agarang tulong para maikasa na ang relief operations ng ating Malasakit team.

Sa kabila ng mga sakuna at iba pang suliranin, hangad natin na hindi lamang tayo magsilbing tagapaghatid ng tulong sa mga nasalanta, dapat din tayong magbigay ng pangmatagalang solusyon sa mga problema tulad ng pagbaha. Proteksyunan natin ang buhay ng bawat Pilipino. 

Kaya patuloy ang ating panawagan sa mga ahensya ng gobyerno na maging proactive at gawing prayoridad ang pagkakaroon ng flood control master plan. Umapela na tayo sa DPWH noong nakaraang taon na ayusin ang implementasyon ng flood control projects at siguraduhing walang nasasayang na pondo, pati na rin kung ano talaga ang kanilang flood control master plan at paano ba ang prioritization nito sa iba’t ibang lokasyon sa bansa. Paulit-ulit na ang suliranin na ito na kailangan ng agarang solusyon. 

Ang tanong, saan na napunta ang ilang bilyong pisong nakalaan sa flood control? 

Malaking abala ang pagbaha para sa mga kababayan at malaki rin ang pinsalang dulot nito sa mga ari-arian at kabuhayan nila. Higit sa lahat, inilalagay nito sa alanganin ang buhay ng mga tao, kaya naman nararapat lamang na masolusyunan ito sa lalong madaling panahon. 

Samantala, anuman ang lagay ng panahon, patuloy lang tayo sa pagseserbisyo sa mga kapwa natin Pilipino. Dumalo tayo sa ginanap na Philippine Councilors League-Masbate Chapter Congress noong August 31 na idinaos sa Maynila bilang guest speaker sa paanyaya ni Councilor Rani Sia, ang kanilang provincial chairperson. Dumalaw din tayo sa ginanap na Liga ng mga Barangay National Congress Cluster 3 na isinagawa sa Pasay City upang paigtingin ang ating pakikipagtulungan sa mga barangay. 

Sa kasagsagan ng bagyo, binisita naman ng aking opisina noong September 2 ang Biñan City, Laguna upang mamahagi ng tulong sa 2,000 senior citizens. Nabigyan sila ng pinansyal na suporta na ating isinulong kasama ang lokal na pamahalaan sa pamumuno nina Mayor Arman Dimaguila, Vice Mayor Gel Alonte at sa tulong din nina Vice Gov. Karen Agapay, Cong. Len Alonte at iba pang opisyal.

Nabigyan din ng agarang tulong ang 76 residente na apektado ng Bagyong Enteng sa Mabitac, Laguna sa pakikipagtulungan nina Mabitac Mayor Al Reyes at Paete Mayor Bokwet Cosico noong Lunes. Kahapon naman ay nagpadala ang aking tanggapan ng 500 food packs sa mga binagyo sa Tanay, Rizal katuwang si Gov. Nina Ynares; 250 sa Morong, Rizal kasama si Mayor Sydney Soriano; at 500 sa Antipolo City kaakibat si Mayor Jun Ynares. 

Ibinabahagi ko rin na noong September 1 ay dumalo ang aking tanggapan sa inagurasyon ng itinayong Super Health Center sa Villaverde, Nueva Vizcaya. 

Tuluy-tuloy din ang aking Malasakit Team sa pag-alalay sa mga kababayang nahaharap sa iba’t ibang krisis tulad ng mga nawalan ng hanapbuhay na nabigyan ng pansamantalang trabaho na ating isinulong. Kabilang dito ang 368 sa Hermosa, Bataan kaagapay si VM Patrick Rellosa; 155 sa Hinatuan, Surigao del Sur katuwang si Mayor Shem Garay at mga barangay captain na sina Melchor Gingoyon, Renald Fundador, Andres Dadat at Merlyn Albial; at 127 sa Balete, Aklan kaagapay si VG Reynaldo Quimpo. 

Sa Davao del Sur, natulungan ang 1,214 mula sa Digos City at mga bayan ng Bansalan, Matanao Magsaysay, Kiblawan, Malalag, Padada at Sulop, katuwang sina VG Ai-Ai Cagas-Fernandez, BM Shiela Cagas, BM Frank Tongos, BM Dyane Idulsa, BM Vic Cadungog, BM Bae Rivera, BM Rey Ayo, BM Mark Gallardo, BM Fely Latasa, BM Lanier Cadungog, BM Carmelo Delos Cientos, Bansalan Mayor Edwin Reyes, Kiblawan Mayor Joel Calma, Malalag Mayor Peter Paul Valentin, Padada Mayor Francisco Guerrero, Sulop Mayor Jimmy Sagarino, Matanao Mayor Vincent Fernandez at VM Irick Agbon, Digos City VM Johari Baña, Coun. Rey Abella; at Hagonoy VM Michael Balindoa.

Nagbigay-suporta rin tayo sa idinaos na Kababaihan ng Kalawaan (Kabaka) Gift Giving Project sa Pasig City kaagapay ang mga lokal na lider ng lugar. 

Bilang inyong Mr. Malasakit, prayoridad ko na maproteksyunan ang kalusugan, kapakanan at buhay ng bawat Pilipino. Sa harap ng maraming pagsubok, huwag tayong mawalan ng pag-asa, magtulungan lang tayo. Bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pondo sa kalusugan, dapat para sa kalusugan!

ni Bong Go @Bisyo Magserbisyo | August 31, 2024

Hindi titigil ang inyong Senator Kuya Bong Go na manawagan sa Philippine Health Insurance Corporation (PhilHealth) na gamitin ang nakalaang pondo para sa pangangailangang pangkalusugan ng mga Pilipino. Ang pondong para sa health ay dapat gamitin para sa health!

Hindi natin tatantanan ang pagbusisi sa ginagawang paglilipat sa Php 89.9 bilyon na sobrang pondo ng PhilHealth pabalik sa National Treasury. Bahagi ito ng P500 bilyon na reserve fund na natutulog at nakatengga lang habang patuloy ang pagdami ng mga mahihirap na pasyenteng naghihingalo at nangangailangan ng tulong mula sa gobyerno.

Sa ating privilege speech sa Senado noong August 27, tiniyak natin na mahigpit nating hihimayin ang ihihirit na budget ng PhilHealth para sa susunod na taon. Humihingi ang ahensya ng P74 bilyong subsidiya mula sa national government para sa 2025. Pero kung sobra-sobra na at hindi naman nagagamit ng PhilHealth ang pondo nila ngayon, marahil ay mas maiging palakasin, palawakin at rebisahin muna nila ang kanilang kasalukuyang mga polisiya at benepisyo upang mapakinabangan ng taumbayan.

Alinsunod sa Universal Health Care Law, bawat Pilipino ay miyembro at benepisyaryo ng PhilHealth. Sa kabila nito, maraming pasyente ang hindi malaman kung saan kukuha ng pambayad sa pagpapaospital. Marami ang napipilitang magbenta o magsangla ng kanilang mga naipundar na ari-arian para lang may maibayad sa kanilang medical expenses. Hindi katanggap-tanggap para sa akin, at lalo na para sa isang mahirap na Pilipinong may sakit, na hindi niya mapakinabangan ang mga serbisyo sa panahong kailangang-kailangan ito.

May mga idinulog sa atin na mga karanasan ng PhilHealth members na talagang nakakalungkot. Nag-contribute sila, nagbayad nang wasto, at nabawasan ang suweldo. Pero nang pumanaw dahil sa sakit, lugi na nga sa natanggap na benepisyo, baon pa sa utang ang naulilang pamilya! Dapat mabigyan ng maayos na serbisyo ang ating mga kababayan. Kung ano ang ikino-contribute nila, dapat ay mapakinabangan nila.

Narito ang mga panawagan natin pati na mismong mga pangako ng PhilHealth sa pagdinig ng Senate Committee on Health na tayo ang chairman: dagdagan ang case rates, palawakin ang mga benepisyo ng kanilang mga programa, alisin na ang single period of confinement policy, irekomendang babaan ang premium contributions ng mga miyembro, itigil ang paglilipat ng sobrang pondo sa National Treasury, at gamitin ang kanilang pondo para matulungan lahat ng mga may sakit lalo na ang mahihirap. Ang kontribusyon ng bawat miyembro ay dapat natutumbasan ng sapat at angkop na serbisyo mula sa PhilHealth.

Kaugnay nito, sinuportahan natin ang panukalang pag-amyenda sa Universal Health Care (UHC) Act para mapababa ang premium contributions ng direct members ng ahensya. Layon ng Senate Bill No. (SBN) 2620, na rebisahin ang Republic Act (RA) No. 11223. Pumasa na ito sa ikatlo at huling pagbasa sa Senado noon ding August 27, at isa tayo sa may akda at co-sponsor.

Bilang inyong senador, nanawagan din tayo sa mga kapwa mambabatas at mga kapwa nasa gobyerno na magtulungan para marating ang full implementation ng UHC Law at, higit sa lahat, para maisakatuparan natin ang pagkakaroon ng epektibong healthcare system na mapakikinabangan ng bawat Pilipino.

Samantala, patuloy rin tayo sa paglalapit ng serbisyo sa ating mga kababayan. Kahapon, August 30, ay nasa Cateel, Davao Oriental tayo at namahagi ng tulong para sa 720 mahihirap na residente katuwang si Mayor Emilou Nuñez, na sa ating inisyatiba ay nakatanggap din ng tulong pinansyal mula sa national government. Kasama ang butihing mayora, nag-inspection tayo sa Super Health Center sa Brgy. Poblacion, at sinaksihan din ang turnover ng isa pang Super Health Center sa Cateel.

Pinangunahan din natin sa Cateel ang pamamahagi ng tulong gaya ng para sa 1,750 mahihirap katuwang si BM Nonoy Villademosa, at sa 1,500 residenteng kapos ang kinikita kasama natin si Cong. Nelson Dayanghirang. May tulong pinansyal din mula sa national government.

Naghatid naman tayo ng tulong sa mga taga-Baganga katuwang si Mayor Pepot Lara kabilang ang 1,015 mahihirap na may natanggap ding tulong mula sa pamahalaan, at ang 610 na nawalan ng hanapbuhay na nabigyan naman ng pansamantalang trabaho. Nag-inspeksyon din tayo sa itinayong Super Health Center sa Barangay Dapnan kasama si Mayor Lara. Sa Brgy. Salingkumot ay 1,750 mahihirap ang nabigyan natin ng tulong katuwang si Councilor Roy Nazareno.

Samantala, sinimulan na noong August 28 ang pagtatayo ng Super Health Center sa Brgy. Torralba, Banga, Aklan na sinaksihan ng aking tanggapan. Kinumusta ko rin ang mga barangay officials ng Tarlac City sa pamamagitan ng video call nang sila ay bumisita sa Davao City para sa kanilang study tour.

Patuloy din ang aking Malasakit Team sa pag-alalay sa mga nahaharap sa iba’t ibang krisis at natulungan ang 58 residente ng Brgy. Buli, Muntinlupa City na naging biktima ng sunog.

Kasama si Mayor Jeri Mae Calderon, binalikan natin at muling tinulungan ang 54 residente ng Angono, Rizal, bukod sa tulong pinansyal mula sa NHA sa ilalim ng programang ating isinulong para may pambili sila ng pako, yero, semento at iba pang materyales sa pagpapaayos ng kanilang tahanan.

Naghatid din tayo ng tulong sa mga nawalan ng hanapbuhay bukod sa pansamantalang trabaho na isinulong natin para sa kanila. Sa Bataan, naalalayan ang 177 sa Balanga katuwang si Gov. Joet Garcia; 384 sa Samal kasama si VM Ronnie Ortiguerra at mga konsehal; 88 sa Mariveles kaagapay si BM Iya Roque; 297 sa Limay katuwang si VM Richie David at mga konsehal; at 88 sa Abucay kaagapay si Mayor Robin Tagle. Sa Batangas City ay natulungan ang 50 katuwang si former Brgy. Chairman Emma Tumambing, at 50 pa kasama si BM Claudette Ambida. May 505 din sa Tanauan City katuwang sina Mayor Sonny Collantes, VM Junjun Trinidad, BM Rodolfo Balba, at BM Alfredo Corona. May 450 sa Muñoz, Nueva Ecija katuwang si Mayor Vener Muñoz at mga iba pang lokal na opisyal; 33 sa Casiguran, Aurora kaagapay si VG Jennifer Araña; 41 sa Kapitolyo, Pasig City kasama si Kap. Alex Torres; at 18 sa Rizal, Zamboanga del Norte katuwang si Mayor Marissa Manigsaca.

Natulungan din natin ang 814 estudyante sa Balayan, Batangas katuwang si BM Armie Bausas; at 198 residente ng Mapanas, Northern Samar kaagapay si OCD RD Byron Torrecarion.

Bilang inyong Mr. Malasakit, patuloy akong magseserbisyo dahil bisyo ko na ang magserbisyo. Naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Sapat na suporta sa Pinoy athletes para sa patuloy na tagumpay

ni Bong Go @Bisyo Magserbisyo | August 28, 2024

Ito na marahil ang “Golden Age of Sports” sa Pilipinas dahil sa sunud-sunod na karangalan ang nakakamit ng ating bansa sa international competitions. 

Sa 2024 Paris Olympics ay nakapag-uwi ng dalawang gold medals ang ating gymnast na si Carlos Yulo, at nakasungkit naman ng bronze medals ang ating mga Pinay boxers na sina Nesthy Petecio at Aira Villegas. 

Noong 2020 ay nakuha natin ang ating unang gold medal sa Olympics nang magwagi si Hidilyn Diaz sa weightlifting, habang nakapag-uwi naman ng silver sina Nesthy Petecio at Carlo Paalam, at bronze si Eumir Marcial sa boxing. 

Bilang chair ng Senate Youth Committee, gawin natin ang lahat ng ating makakaya para maipagpatuloy ang momentum na ito at mas marami pang kabataang Pilipino ang mabigyan ng oportunidad na sumabak at magtagumpay sa sports o sa anumang larangang kanilang pipiliin sa buhay. 

Kaya kahapon ay nagsagawa ang Senate Committee on Sports, na aking pinamunuan, ng post evaluation sa naging paglahok ng bansa sa 2024 Paris Olympics at iba pang international competitions. Tulad ng aking sinabi, hindi natin nais magturuan kung mayroon mang pagkukulang. Ang gusto lang natin ay maibigay ang sapat na suporta sa ating mga magigiting na atleta. Once in a lifetime lang ang mga oportunidad na ito kaya ibigay na natin ang buong suporta na nararapat. 

Bawat taon, simula 2019 na ako ay naging chair ng Sports Committee at vice chair ng Finance Committee sa Senado, patuloy kong isinusulong ang pagtaas ng budget para sa sports. Kasama na rito ang pagpapaayos ng mga pasilidad tulad ng Rizal Memorial Coliseum at ang PhilSports Arena, pagbibigay ng sapat na suporta sa ating mga atleta na sumasabak sa international competitions, at maging sa pagpo-promote ng grassroots sports development upang makadiskubre ng iba pang kabataan na may potensyal. 

Bukod pa riyan ang pagtatayo ng National Academy of Sports sa New Clark City base sa batas na isa tayo sa nag-akda at nag-co-sponsor sa Senado. Sa pamamagitan nito, puwede nang mag-aral at mag-ensayo ang ating mga student-athletes nang walang nakokompromiso. Nais nating mas palakasin ang NAS para mas dumami pa ang mabigyan ng oportunidad na mag-aral at magtagumpay sa palakasan. 

Ang mga panalo natin ay patunay na kapag nagtulungan ang pribadong sektor at ang gobyerno ay malayo ang ating mararating. Kaya sana ay palaging magkaisa ang Philippine Sport Commission, Philippine Olympic Committee at National Sports Associations para mas matitiyak na hindi mapapabayaan ang training, preparation, at maging sa financial, moral at mental support ang ating mga atleta. 

Sa katunayan, isinulong natin kasama ang PSC na mabigyan ang bawat Olympian ng tig-P500,000 financial support bago pa sila pumuntang Paris noong Hunyo. Maging ang mga paralympians natin na sasabak sa Paris Paralympics ngayong linggo ay nabigyan din. 

Moving forward, importante talaga ang pagkakaisa dahil kapag panalo ang ating atleta, lahat ay nakikisaya. Pero kung talo o may aberyang nangyari, iwasan sana ang sisihan at mag-focus tayo kung paano ia-address ang anumang pagkukulang. 

Ito rin ang dahilan kaya dumulog sa akin ang ating Olympian golfer na si Dottie Ardina na nagkaroon ng problema sa kanilang uniporme noong Paris Olympics, at isa ito sa ating natalakay sa pagdinig. Sabi niya, sa susunod ay kailangang i-improve pa natin ang ating preparasyon, maging mas maayos ang koordinasyon at dagdagan pa ang suporta sa ating mga atleta sa hinaharap. 

Naging plataporma ang ating ginawang pagdinig sa Senado para maipahayag ng mga atleta ang kanilang mga saloobin, mapunan ang anumang kakulangan, at mahikayat ang iba pang stakeholders na makiisa para mas makapag-produce ng mga bagong bayaning atletang Pilipino. 

Naririto lang ang komite handang makinig sa inyo.

Naibalita rin kamakailan ang ruling ng Supreme Court na nag-uutos sa PAGCOR at PCSO na mag-remit ng parte ng kanilang kita sa PSC ayon sa batas. Tututukan natin ito bilang mambabatas para magamit ang pondo sa sports development programs. 

Pahalagahan natin ang sports dahil bukod sa mga medalya, isa itong paraan upang magabayan ang mga kabataan, mailayo sila sa masasamang bisyo tulad ng ilegal na droga, at para maging healthy at fit ang ating mga kababayan. Sabi ko nga, minsan lang tayong dadaan sa mundong ito, kaya kung anong kabutihan ang puwede nating gawin sa ating kapwa at kung anong karangalan ang maibibigay natin sa ating bansa ay gawin at ibigay na natin ngayon! 

Ito ang dahilan kung bakit tayo patuloy na nagseserbisyo sa abot ng ating makakaya nitong nakaraang mga araw. 

Naging guest of honor tayo sa graduation ceremony ng National Fire Training Institute (NFTI) Fire Officer Basic Course (FOBC) noong August 24 na idinaos sa NFTI Compound sa Calamba City, Laguna. Bukod sa tulong na ating ibinigay sa mga graduate, iminungkahi natin ang ating buong suporta sa ating mga fire officer at iba pang uniformed personnel. 

Muli naman nating binalikan noong August 26 ang 746 na naging biktima ng sunog sa Cavite City at pinagkalooban ng tulong. Bukod sa ating ipinamahagi, nakatanggap din sila ng emergency housing assistance mula sa NHA na ating isinulong para may pambili ang mga biktima ng pako, yero, semento at iba pang materyales sa pagpapaayos ng kanilang nasirang tahanan. 

Naging panauhing tagapagsalita rin tayo sa Graduate School Program Commencement Exercises ng Philippine Christian University (PCU) sa Taft Avenue, Manila. Pinayuhan natin ang 1,700 graduates na gamitin ang edukasyon para makapagserbisyo sa kapwa. Lagi rin tandaan na ang kabataan ay ang pag-asa at future leaders ng bayan.

Tuluy-tuloy din ang aking Malasakit Team sa paghahatid ng tulong sa mga nawalan ng hanapbuhay sa iba’t ibang komunidad. Sa San Jose, Batangas ay natulungan natin ang 50 katao katuwang si VM Renji Arcilla, at 254 pa kasama naman si Mayor Ben Patron. Natulungan din natin ang 650 sa Macalelon, Quezon kaagapay si VM Carmen Vidal; 500 sa Alabel, Sarangani katuwang si Mayor Vic Paul Molina Salarda; at 500 sa San Agustin, Surigao del Sur kasama si Mayor Nick Alameda. Sa ating suporta ay nabigyan din sila ng pansamantalang trabaho mula sa gobyerno. 

Sinuportahan din natin ang 986 estudyante sa Malitbog, Bukidnon katuwang si Mayor Gary Casiño; at 1,000 na mahihirap sa Labason, Zamboanga del Norte katuwang si Mayor Jed Quimbo. Nakatanggap din sila ng tulong pinansyal mula sa gobyerno. 

Namahagi rin tayo ng dagdag na tulong sa 2,500 na mahihirap sa Kumalarang, Zamboanga del Sur. Nakatanggap sila ng hiwalay pang suportang pinansyal mula sa lokal na pamahalaan na ating isinulong kasama si Mayor Ruel Molina. 

Asahan na ang inyong Senator Bong Go ay patuloy na magseserbisyo sa inyo dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos. Magkaisa at magmalasakit tayo para sa karangalan ng bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.