Magna Carta of Filipino Seafarers, ganap nang batas!

ni Bong Go @Bisyo Magserbisyo | Sep. 25, 2024

Masaya kong ibinabalita na batas na ang “Magna Carta of Filipino Seafarers” o ang Republic Act No. 12021. 

Isa tayo sa may akda at co-sponsor ng bagong batas na ito na naglalayong maprotektahan ang mga karapatan at kapakanan ng mga marinong Pilipino, at tiyakin na nabibigyan sila ng patas na pagtrato nasa dagat man o nakadaong. Matagal na nating isinusulong at ipinaglalaban ito, hindi lang para matiyak ang kanilang kaligtasan, kundi para maiangat rin ang antas ng pagmamarino sa bansa.

Ang ating seafarers ang bumubuo sa pinakamalaking bilang ng marino sa buong mundo. Katunayan, 25 percent o isa sa bawat apat na marino sa buong daigdig ay Pilipino! Kaya naman ang Pilipinas ang itinuturing na single biggest nationality bloc sa maritime industry. Malaki ang kontribusyon ng Filipino seafarers hindi lang sa ating ekonomiya kundi pati na rin sa pandaigdigang komersyo.

Kabilang sa mga itinatakda ng Magna Carta ang ilang mahahalagang karapatan ng ating mga marino katulad ng makatarungang terms and conditions sa kanilang trabaho, karapatan na magkaroon ng self-organization, collective bargaining, access sa abot-kayang edukasyon at pagsasanay, at proteksyon laban sa diskriminasyon.

Layunin ng mga probisyong ito na matiyak na ang mga marinong Pilipino ay hindi lang nakatatanggap ng karampatang sahod kundi nabibigyan din ng mga oportunidad para sa kanilang professional growth at napangangalagaan laban sa mga banta sa trabaho.

Itinatakda rin ng batas ang karapatan ng mga marinong Pilipino sa ligtas na paglalakbay, pangangalaga sa kanilang kalusugan, access sa komunikasyon at legal na tulong lalo na kapag may aksidente sa karagatan. Alinsunod din sa batas, makatatanggap sila ng nararapat na sertipikasyon ng kanilang employment records, na isang mahalagang dokumento para sa kanilang pag-angat sa puwesto. Bukod naman sa pangangalaga sa kanilang mga karapatan, binibigyang-diin din sa batas ang mga responsibilidad ng mga marino gaya ng pagsunod nila sa nakasaad sa kanilang employment contracts, at tuparin nang maayos ang kanilang tungkulin.

Bilang chairperson ng Senate Committee on Health, hangad ko ang sapat at agarang tulong medikal para sa ating mga marino at iba pang OFWs. Itinataya ng Filipino seafarers ang kanilang buhay at isinasakripisyo ang oras kasama ang pamilya. Umaasa tayo na sa pagsasabatas ng Magna Carta, hindi lang tataas ang pamantayan para sa kapakanan ng ating mga marino, magiging modelo rin ang Pilipinas pagdating sa maritime labor rights.

Binibigyan natin ng importansya ang ating OFWs na itinuturing na mga bagong bayani ng bansa. Noong 2021 ay naisabatas din ang RA 11641, o ang Department of Migrant Workers Act, na isa tayo sa mga may akda at co-sponsor. Layunin natin na mapalakas, mapabilis at maging sentralisado ang pagbibigay ng proteksyon at serbisyo sa ating OFWs.

Sa ating kapasidad bilang vice chair ng Senate Committee on Migrant Workers ay nagkakaloob din tayo sa kanila ng maitutulong sa abot ng ating makakaya. Patuloy nating sinisikap na maipaabot ang serbisyo at malasakit ng gobyerno sa mga Pilipino nasaan man sila sa mundo.

Samantala, naging panauhing tagapagsalita tayo noong September 21 sa ginanap na Dr. Carl Balita Review Center Licensure Examination for Teachers (LET) Final Coaching para sa 5,000 aspiring teachers. Bilang chair ng Senate Youth Committee, ipinarating natin ang ating suporta sa kabataan na future leaders at pag-asa ng ating bayan.

Dumalo rin tayo bilang guest speaker sa 26th anniversary at national congress ng COOP-NATCCO, sa imbitasyon nina Cong. Felimon Espares at President Alex Raquepo. Opisyal tayong nakipag-partner sa kanilang grupo upang maipaglaban at isulong ang ating mga adbokasiya para sa kapakanan ng mga kooperatiba.

Noong September 23 ay sinaksihan naman ng aking opisina ang turnover ceremony ng isang ambulansya na ating isinulong para sa Koronadal City, South Cotabato kasama si VM Erlinda Pabi Araquil.

Kahapon, September 24, personal nating pinangunahan ang pamamahagi ng personal na tulong para sa higit 2,000 residente ng Brgy. 105, Tondo, Manila na naging biktima ng malawakang sunog. Dumalo rin tayo sa ginanap na Liga ng mga Barangay National Congress Cluster 4 na nagtipon sa Pasay City.

Tuluy-tuloy naman ang aking Malasakit Team sa pagtulong sa mga nangangailangan. Muli tayong sumuporta sa mga nawalan ng tirahan kabilang ang anim na biktima sa Matalam at apat sa Makilala, North Cotabato; at tatlo sa Lebak, Sultan Kudarat. Sa South Cotabato ay nabigyan din ang dalawa sa Sto. Niño; apat sa Surallah; at tatlo sa Koronadal City. Sa ating inisyatiba ay nabigyan din sila ng emergency housing allowance ng NHA para may pambili sila ng materyales na pampaayos ng tahanan.

Namahagi rin tayo ng tulong sa mga nawalan ng hanapbuhay, na nabigyan din ng DOLE ng pansamantalang trabaho gaya ng 183 sa Cebu City katuwang si Cong. Marissa Magsino; at 44 sa Polomolok, South Cotabato kasama si Kap. Rogen Ermitaño. Sa Batangas, may 134 na natulungan sa Lemery kaagapay sina Kap. Edward Catibog at VM Geraldine Ornales; 134 sa Taal kasama sina Mayor Pong Mercado at VM Michael Villano; at 50 sa Cuenca katuwang si VM Aurea Pantas.

Inayudahan din ng aking tanggapan ang mga kapos ang kinikita gaya ng 100 sa San Jorge, Samar katuwang si Councilor Rita Rama; at 900 sa Bongabon, Nueva Ecija kaagapay si Cong. GP Padiernos. May tulong din tayong ipinamahagi para sa 1,250 mahihirap sa San Vicente, Camarines Norte kasama si Mayor Jhoana Ong. Nakatanggap din ang mga ito ng tulong pinansyal mula sa gobyerno.

Natulungan naman natin ang 1,000 mahihirap na residente sa Bago City, Negros Occidental kaagapay si Mayor Niko Yulo. Sa ating pakikipagtulungan sa lokal na pamahalaan ay nabigyan din sila ng tulong pinansyal. Nagbigay din tayo ng dagdag na suporta sa 249 scholars ng Batangas State University.

Bilang inyong Mr. Malasakit, patuloy akong magseserbisyo sa inyong lahat sa abot ng aking makakaya dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos. Pangalagaan natin ang buhay ng bawat Pilipino nasaan man sila sa mundo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pangalagaan ang kaligtasan, kalusugan, at dignidad ng mga biktima ng kalamidad

ni Bong Go @Bisyo Magserbisyo | Sep. 21, 2024

Sa tuwing may mga kalamidad, gaya ng bagyo, baha, lindol, pagputok ng bulkan, o kaya’y sakuna, gaya ng sunog, doble ang hirap na pinagdaraanan ng ating mga kababayan. Bukod sa hamon ng muling pagtatayo ng nasira nilang mga bahay, maraming mahihirap na evacuees ang walang choice kundi ang sumilong muna sa evacuation centers.

Sa aking pag-iikot sa bansa upang ilapit ang serbisyo sa mga nangangailangan, saksi ako sa malungkot na sitwasyon sa ibaba sanhi ng kakulangan ng angkop na imprastraktura sa ngayon. Kalimitang nagsisilbing evacuation centers ang eskwelahan, basketball court, o kaya’y multi-purpose hall ng komunidad. Karaniwan ay walang maayos na comfort room, walang gamot, walang supply ng malinis na tubig at pagkain, walang privacy, siksikan, kaya marami ang nagkakasakit. Mahirap na ngang maging biktima ng sakuna, mas napapahirapan pa sila.

Kapag nataon naman na may klase, naaantala ang pag-aaral ng mga estudyante dahil ginagamit ang mga silid-aralan. Apektado rin ang ibang mga gusali na pansamantalang nagiging tirahan ng evacuees.

Oras na para solusyunan ito! Titiyakin natin, hindi lang ang kaligtasan at kalusugan ng evacuees, kundi pati na ang kanilang dignidad upang mas mabilis silang makabangon.

Kaya naman isinulong natin sa Senado ang Senate Bill No. 2451, o ang Ligtas Pinoy Centers Bill. Base ito sa Mandatory Evacuation Centers Bill na ating nai-file noon. Layunin ng panukalang ito na sa bawat munisipalidad at siyudad ay magkakaroon ng dedicated at maayos na evacuation center. Ang inyong Senator Kuya Bong Go ang principal author at co-sponsor nito, na naipasa na sa pangalawang pagbasa noong Miyerkules.

Dahil ang Pilipinas ay laging dinadaanan ng natural disasters, kailangang maging mas handa tayo. Isinusulong din natin ang SBN 188, na naglalayong itatag ang Department of Disaster Resilience (DDR) upang may nakatutok bago pa man dumating ang kalamidad, habang nananalasa ito, sa rescue and recovery period, hanggang sa restoration of normalcy para matiyak na mas maayos ang koordinasyon ng mga sangay ng gobyerno.

Hindi natin mapipigilan ang mga kalamidad pero nasa kamay natin kung paano tutugon sa mga ito at kung paano matitiyak na ligtas ang bawat Pilipino. May kalamidad man o wala, hindi tayo tumitigil sa paglalapit ng serbisyo sa ating mga kababayan.

Noong September 19, bumisita tayo sa Camarines Sur at personal na pinangunahan ang pamamahagi ng tulong para sa 1,000 nawalan ng hanapbuhay sa Naga City, na sa ating inisyatiba ay nabigyan din ng pansamantalang trabaho. Sinaksihan natin ang pagdaraos ng Peñafrancia Voyadores Festival and Street Dance Competition sa paanyaya ni Mayor Nelson Legacion, at nagtungo tayo sa Naga Cathedral.

Nasa Lapu-Lapu City tayo kahapon, September 20, at nagkaloob ng tulong sa mga miyembro ng 23 kooperatiba sa ilalim ng isinulong nating programang Malasakit sa Kooperatiba katuwang ang Cooperative Development Authority. Dumiretso tayo sa bayan ng San Fernando, Cebu at nagbigay ng tulong para sa 656 na BHWs, nutrition scholars at fire victims katuwang si Mayor Mytha Canoy. Sa ating pagsisikap ay nakatanggap din ang mga benepisyaryo ng tulong pinansyal mula sa lokal na pamahalaan. Sinaksihan din natin ang groundbreaking ng itatayong Super Health Center sa lugar na ating isinulong.

Sa araw ding iyon ay nagkaloob ng tulong ang aking opisina kasama ang ating kaibigang si Philip Salvador para sa 500 residente ng Cebu City na nawalan ng hanapbuhay, katuwang si Acting VM Dondon Hontiveros.

Mula Cebu ay bumiyahe tayo papuntang Davao City at muling inayudahan ang 382 residenteng naging biktima ng sunog. Nakatanggap din sila ng emergency assistance mula sa NHA sa ilalim ng programang ating isinulong para may pambili sila ng materyales sa pagpapatayong muli ng kanilang tahanan. Dumalo rin tayo sa PDP National Assembly na pinamunuan ng aming party chairman na si dating Pangulong Rodrigo Duterte.  

Ipinadala ko naman ang aking Malasakit Team sa iba’t ibang komunidad para maghatid ng tulong sa ating mga kababayang nangangailangan tulad ng 17 residente ng Tagoloan, Misamis Oriental na naging biktima ng sunog.

Binalikan at muling inayudahan natin ang mga nawalan ng tahanan sa Davao del Norte kabilang ang tatlo sa Panabo City; anim sa New Corella; at 16 sa Island Garden City of Samal. May 51 naman sa Brgy. Culiat, Quezon City; at 66 sa Sta. Mesa, Manila. Dagdag pa riyan ang 189 residente sa Bacoor City, Cavite na ang tahanan ay nasira ng kalamidad. Sa ating inisyatiba ay nakatanggap din ang mga ito ng tulong pinansyal upang maipaayos ang kanilang mga bahay.

Nabigyan natin ng tulong ang 340 residente ng Caloocan City na kapos ang kita kasama ang sectoral leaders ng kanilang komunidad.

Tuluy-tuloy din ang ating pagsuporta sa mga nawalan ng hanapbuhay, na sa ating inisyatiba ay nabigyan ng pansamantalang trabaho ng gobyerno. Sa Davao del Sur, naging benepisyaryo ang 651 residente ng Digos City at 563 sa Padada katuwang si VG Riafe Cagas-Fernandez, mga board members, mayors, vice mayors at konsehal ng kanilang mga lugar.

Sa Batangas, nasuportahan natin ang 50 manggagawa sa Mataas na Kahoy kaagapay si VM Jay Ilagan; at 50 sa Nasugbu kasama si BM Armie Bausas. Sa Iloilo, 54 sa Miag-ao, katuwang si VM Doc Mac Napulan; at 88 sa Santa Barbara kaagapay si Coun. Ramon Sullano.

Mga manggagawa rin ang natulungan natin kabilang ang 306 sa Villanueva, Misamis Oriental katuwang si VM Jeric Emano, mga konsehal at mga kapitan ng barangay; 98 sa Pagudpud, Ilocos Norte kaagapay si Mayor Raffy Benemerito; 243 sa Calauag, Quezon kasama ang mga konsehal na sina Marlon Noscal, Melvin Labasan, Marina Umali, Mildred Villareal at ang kanilang 31 kapitan ng mga barangay; at 69 sa Brgy. Caniogan, Pasig City katuwang sina TODA President Enrico Tolentino at Andy Cheng. Dagdag pa rito ang mga natulungan nating 50 katao sa General Trias City, Cavite; 50 sa Binangonan, Rizal at 155 kababaihan sa Tantangan, South Cotabato.

Lubos akong nagpapasalamat sa ating mga kababayan sa patuloy na tiwala at suporta. Ito ay inspirasyon para lalo kong ipagpatuloy ang pagseserbisyo sa inyo. Hindi ko sasayangin ang oportunidad na ibinibigay ninyo sa akin, at sa abot ng aking makakaya ay patuloy kong ipaglalaban ang kapakanan ng bawat Pilipino at magseserbisyo sa aking kapwa lalo na sa mga mahihirap at pinakanangangailangan. Bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Huwag pahirapan ang mga mahihirap, tulong ng gobyerno agad ibigay

ni Bong Go @Bisyo Magserbisyo | September 18, 2024

Mandato ng gobyerno na tulungan ang bawat Pilipinong nangangailangan. Wala dapat pinipili, walang pinapaboran, at walang pamumulitika. Ito ang batayan para matiyak na ang mga mahihirap ay nabibigyan ng sapat na atensyon at agarang tulong para sa iba’t ibang krisis na kanilang pinagdadaanan.

Kaya mula noon hanggang ngayon, suportado ng inyong Senator Kuya Bong Go ang mga programa ng Department of Social Welfare and Development. Malaki ang papel ng DSWD para iangat ang antas ng kabuhayan ng mga Pilipinong nangangailangan. Basta’t nakakatulong ang isang programa sa ating mga kababayan lalo na sa mahihirap, makakaasa kayong katuwang tayo sa pagsusulong nito.

Bilang vice chairperson ng Senate Committee on Finance, titiyakin nating sapat at para sa tama ang panukalang 2025 budget ng iba’t ibang ahensya ng gobyerno. Sa ginanap na deliberasyon nitong Lunes para sa pondo ng DSWD, mariin ang paalala natin na siguraduhing mapakikinabangan ng mga kuwalipikadong benepisyaryo ang mga programang para sa kanila lalo na sa mga walang ibang matakbuhan maliban sa gobyerno. 

Panawagan natin sa DSWD, dumaraan na nga sa krisis ang nais na maging benepisyaryo kaya huwag na sana silang pahirapan at paghintayin pa bago mabigyan ng ayuda. Sa kabila rin ng mga reklamong idinudulog sa atin, nagpaalala tayo sa DSWD na siguraduhing may ayudang nakahanda sa mga lugar na tinamaan ng kalamidad sa lalong madaling panahon. 

Itinanong din natin sa DSWD ang pagkaantala sa implementasyon ng kanilang mga programang pangkabuhayan. Isa ito sa mga programa na isinulong natin at ipinaglaban para mabigyan ng mas disenteng kabuhayan ang mga pamilya at indibidwal na maliit ang kinikita. Dapat maimplementa ito nang walang delay at halong pulitika.  

Iginiit din natin sa DSWD na gawing prayoridad ang pondo para sa social pension ng mga kuwalipikadong mahihirap na senior citizens. Naisabatas ang dagdag na social pension na ito ayon sa Republic Act No. 11916 na isa ako sa mga co-authors at co-sponsors sa Senado. Marami pa ring nasa waitlist na kailangang pagtuunan ng pansin para malaman natin kung ilan ang kuwalipikado at magkano ang kailangan para mapondohan ang social pension nila ayon sa batas.

Inalam din natin sa DSWD ang status ng pagtatalaga ng personnel sa bawat Malasakit Center. Parte ang DSWD sa mga ahensyang dapat nasa Malasakit Centers para hindi na kailangang bumiyahe at pumila pa sa iba’t ibang opisina ang mga nangangailangan ng tulong pampagamot. Sa datos ng DOH ay nasa 12 milyong Pilipino na ang natulungan ng programang ito na ating naisabatas bilang principal sponsor at author nito. 

Tugma sa adbokasiya ko bilang inyong Mr. Malasakit ang tema ng DSWD na “Bawat Buhay Mahalaga.” Ang trabaho natin sa gobyerno ay tulungang gumaan ang buhay ng mga Pilipino, kaya huwag dapat silang pahirapan bago makatanggap ng tulong. Unahin natin ang kapakanan ng mga mahihirap sa ating pagseserbisyo! 

Kamakailan ay naging guest speaker tayo sa ginanap na Higpit nga Pagkaurusa ng Calbayognons Association Inc. noong September 14 sa paanyaya ni association President Paz Tuazon, kasama sina Cong. Stephen James Tan, Calbayog City Mayor Raymund Uy, at VM Rex Daguman. 

Personal naman nating pinangunahan kahapon, September 17, ang pamamahagi ng ayuda para sa 2,500 mahihirap na residente ng Pasay City. Isinulong natin na makatanggap sila ng tulong pinansyal mula sa lokal na pamahalaan na pinamumunuan ni Mayor Emi Calixto-Rubiano. 

Nagtungo rin ang ating Malasakit Team sa iba’t ibang bahagi ng bansa para maghatid ng tulong sa mahihirap kabilang ang 1,000 sa Bulan, Sorsogon katuwang si VM Chezka Robles. 

Nagbigay din tayo ng dagdag na tulong para sa 80 scholars sa Cagayan Province na ating sinuportahan bilang chair ng Senate Youth Committee. 

Umalalay tayo at naghatid ng tulong para sa mga naging biktima ng sunog gaya ng 11 sa Brgy. Agdao, Davao City; at 33 sa Brgy. NBBS, Navotas. 

Natulungan din natin ang 108 na nawalan ng tirahan sa San Juan City kaagapay ang DHSUD, na nabigyan ng ayudang pampaayos ng kanilang mga bahay na ating isinulong. Bukod dito, binalikan at muli nating sinuportahan ang isang pamilya sa Mabini, Davao de Oro, na nakabenepisyo rin sa NHA sa ilalim ng programang ating isinulong para may pambili ng materyales na pampaayos ng kanilang tirahan. 

Tuluy-tuloy din tayo sa pagtulong sa mga nawalan ng hanapbuhay, na sa ating inisyatiba ay nabigyan ng pansamantalang trabaho. Naging benepisyaryo nito ang 316 sa Santo Tomas, Pangasinan katuwang sina Mayor Dickerson Villar, VM Timoteo Villar, mga konsehal at SK Pres. Ronill Asuncion. Sa Surigao del Sur, 22 sa Barobo ang natulungan kaagapay si Kapitan Alfredo Rodriguez; at 266 sa Bislig City katuwang sina Mayor Florencio Garay, Councilors Winston Sia at Soriano Casas at Brgy. Capts. Aaron Castillo at Junelyn Lagunday. May 111 din sa Socorro, Surigao del Norte na nasuportahan natin kaagapay ang De Oro Farmers Association, Inc. Tumulong din tayo sa Davao del Norte para sa 58 sa Kapalong katuwang si Coun. Larry Casimero; at 60 sa Tagum City kaagapay si Coun. Ana Alvarez. May 280 din sa Minalin, Pampanga na ating tinulungang muli kasama si VM Rondon Mercado.

May suporta rin tayong ipinamahagi sa mga kalahok sa ginanap na sports fest sa Mindanao State University sa Naawan, Misamis Oriental. Ang pagdaraos ng kanilang sports fest ay napondohan sa ating inisyatiba kasama ang Philippine Sports Commission. 

Ilapit natin ang serbisyo ng pamahalaan sa mga kababayang higit na nangangailangan. Bilang inyong Mr. Malasakit, patuloy akong magseserbisyo sa inyong lahat dahil bisyo ko ang magserbisyo at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.