May pinagdaraanang krisis…

PETITE NA AKTRES, PRESS RELEASE NA AYAW NANG MAG-SHOWBIZ PERO ANG TOTOO, 'DI NA NI-RENEW NG NETWORK ANG CONTRACT

ni Erlinda Rapadas - @Teka Nga! | November 21, 2020

BLIND ITEM:

Hindi na pinagtatakhan ng ilang showbiz observers kung bakit kumupas na ang ningning ng isang petite na aktres na ilang taon ding naging bahagi ng isang malaking network.

Noong mga unang taon niya sa kanyang home studio ay magagandang projects ang ibinigay sa kanya. Inalagaan naman siya at binigyan pa ng ka-love team para mas uminit ang kanyang career.

Pero, marami ang nakakapansin na medyo may attitude ang aktres at kulang sa PR sa kanyang mga co-stars at fans. Kung kumilos siya ay parang big star na at pa-VIP. Eh, kung tutuusin, kapos siya sa karisma!

Magaling naman siyang umarte at kaya niya ang mga challenging roles na ibinibigay sa kanya, pero sa tagal ng ipinamalagi niya sa network ay hindi siya gaanong nag-create ng impact. Hindi siya masyadong pinag-uusapan at hindi pinapansin kung anuman ang narating ng kanyang career.

Nang magkaroon ng non-showbiz BF ang aktres na super rich businessman, may press release agad siya na hihinto na sa pag-aartista kapag nag-asawa na. May negosyo na rin naman ang aktres na naipundar sa tulong ng kanyang fiancé at ito na raw ang aasikasuhin niya.

Pero, ang latest na balita ay tumanggap ng show sa ibang network ang petite na aktres. Hindi niya kayang basta talikuran ang showbiz. Kahit na milyonaryo pa ang kanyang mapangasawa, hahanap-hanapin pa rin niya ang pag-arte at gugustuhin pa rin niyang mag-showbiz.

Masakit ang loob niya na hindi siya hinabol ng dati niyang network. Gustung-gusto pa naman niya na magkaroon ulit ng isang serye. Kahit may offer sa kanya ang ibang network, iba pa rin kung sa dati niyang network siya babalik at mapapanood.

Aray! Sa bahay na lang ang bagsak…

AKTRES NA ATAT SUMIKAT KAYA INIWAN ANG NETWORK, NABUNTIS NAMAN KAYA GOODBYE CAREER NA!

ni Erlinda Rapadas - @Teka Nga! | November 11, 2020

BLIND ITEM:

Hindi man aminin, tiyak na sobra-sobra ang panghihinayang at pagsisisi ngayon ng isang aktres na iniwan ang network na nagbigay sa kanya ng big break at magagandang projects.

Sumikat lang nang husto ang aktres nang mapansin ang kanyang pagiging kontrabida sa isang serye. Lutang na lutang kasi ang kanyang character at marami ang bumati sa mahusay niyang pag-arte.

Ang bilis-bilis na nalunod sa isang baso ng tagumpay ng aktres. Umakyat agad sa kanyang ulo ang mga papuri at palakpak. Dati-rati, ang sabi niya ay hinding-hindi niya iiwan ang network na nagtiwala sa kanya. Tumatanaw daw siya ng utang na loob dahil sa big break na ibinigay sa kanya.

Pero, nang matapos na ang kanyang kontrata sa network ay agad na siyang lumundag sa ibang talent management. Excited na siyang magbida at makatrabaho ang malalaking artista sa bago niyang network. Kaso, ginawa lang naman siyang support ng bida sa seryeng nilabasan niya.

Unti-unting nawala ang ningning ng kanyang pangalan. Hindi na rin siya masyadong pinag-uusapan, lalo nang mag-asawa na siya at nagkaanak.

Sinasabi lang niya na masaya siya sa pagiging wife and mommy, pero ramdam naman ng lahat na hindi ito ang pinangarap niyang mangyari.

Ngayon ay hindi na maaabot ng aktres ang mataas na level ng kanyang career. Nabali na ang kanyang mga pakpak. At sakaling mabigyan pa siya ng project kapag bumalik, tiyak na kontrabida at hindi na bida ang kanyang role. At posibleng mother role na lang din ang babagay sa kanya ngayon.

Korek! Wow na wow lang talaga siya!...

FEMALE CELEB, TINUTULUNGAN NA NG MALE HOST SA CAREER, TRAYDOR PA, SINUSULOT SIYANG ENDORSER, NABUKING!

ni Erlinda Rapadas - @Teka Nga! | November 9, 2020

BLIND ITEM:

Hopeless na talaga at hindi na magbabago pa ang pagiging mapagmataas, makasarili at feeling high and mighty ng isang kontrobersiyal na female celebrity.

Maraming projects na ang nakawala sa kanyang kamay dahil may kakaiba siyang attitude. Naka-ilang palit na siya ng manager. Ilang beses na ring naudlot ang malalaking projects na kanyang gagawin. Naging masasakitin pa ang female celeb dahil na-depressed nang husto.

Awang-awa at nakisimpatya naman sa kanya ang kaibigang sikat na host-comedian. Kung kani-kanino na inilapit ng male host ang kaibigang maangas na female celeb, pero sadyang may pagka-Jinkee Suzara (jinx) ito, lagi siyang tinatanggihan. Hindi natutuloy ang mga plano para muling umangat ang kanyang career.

May mga taong nagmamalasakit sa male host-comedian at pinayuhan siyang mag-ingat sa kaibigang female celeb dahil may ginagawa itong katrayduran para sulutin ang mga sponsors sa show niya.

Pero, mas wise ang male host, natunugan niya agad ang balak ng kaibigang female celeb. Hindi nagtagumpay ang female celeb sa kanyang maitim na balak.

Pinaliit nang husto ni female celeb ang kanyang mundo! Hindi pa siya nakakabalik sa telebisyon ay umaariba na naman ang ugali niyang mapagmataas at mapanghamak.