SINGER-ACTOR, REKLAMADOR AT DEMANDING NA, WA' PA PAKISAMA, BINAWASAN ANG EKSENA SA SERYE

ni Reggee Bonoan @Sheet Matters | May 10, 2022

BLIND ITEM:

How true na iiklian na ang exposure ng kilalang singer-actor sa TV series na kinabibilangan niya dahil sobrang pasaway?

Nu’ng nagreklamo ang singer-actor tungkol sa call time niya ay in-adjust ito. Ang dami rin niyang hinahanap sa set, bagay na alam naman niyang limitado ang galawan dahil nga locked-in shoot dahil sa pandemya.

Malapit na ang airing ng TV series at lahat ng cast ay hiningan ng video promo, pero tumanggi ang singer-actor dahil nagmamadali na siyang umuwi, hindi na raw niya ito magagawa pa.

Naloka ang bossing ng show dahil halos lahat ng cast ay naglaan ng ilang minuto para sa video promo lalo na ang mga bida ng show, considering na support role lang itong si singer-actor at it turned out na siya pa ang nagmamaldito.

Hindi na nahilot ang singer-actor at umalis na nang tuluyan na dedma sa pakiusap ng staff ng TV series.

Kaya para mabawasan ng sakit ng ulo ang buong production kasama pa ang ilang cast na hindi na rin siya gusto ay super-binawasan ang araw na magsu-shoot siya. Hindi lang niliwanag sa amin kung alam na niya ito.

Anyway, magaling naman talagang umarte si singer-actor pero kung sasakit naman ang ulo ng buong production dahil sa pagiging ‘diva’ niya, eh, mas maganda ngang bawasan siya ng trabaho.

“Sa panahon ng pandemya at maraming walang trabaho, magpasalamat siya at nabigyan siya, sana pala, nakinig na lang kami sa tsika na mahirap siyang ka-work,” sabi mismo ng bossing ng network.

PLAYBOY NA AKTOR, BEAUTY QUEEN-ACTRESS NA KAHIHIWALAY LANG SA BF ANG BAGONG TARGET

ni Erlinda Rapadas @Teka Nga | May 3, 2022

BLIND ITEM:

Markadong chickboy ang isang hindi naman kasikatang aktor. Ilang artista na rin ang kanyang nakarelasyon, pero it seems wala siyang sineseryoso.

Naging GF niya ang young singer-actress nang magtambal sila sa isang serye. Sinamantala ng aktor ang kainosentehan ng singer-actress sa larangan ng pag-ibig. Hindi rin nagtagal at siya ay nakipag-break. Isang bagay na labis na dinamdam ng young singer-actress.

Ang sumunod na diniskartehan ng aktor ay ang maganda at sikat na sikat na aktres. Tutol ang partidos ng aktres sa aktor dahil bukod sa walang ambisyon sa buhay, super-tamad at walang gustong gawin kundi matulog maghapon.

Mabuti na lang at maagang nauntog at nagising sa katotohanan ang sikat na aktres at humiwalay sa tamad na aktor.

Ngayon, isang actress-beauty queen naman ang bagong target ng chickboy na aktor. Kabe-break lang ng beauty queen-actress sa kanyang boyfriend na aktor, kaya tiyak na madaling mapapaibig ng chickboy at tamad na aktor.

YOUNG ACTRESS, ‘DI PA MAN SIKAT, MAY ATTITUDE NA, NAGPAPA-SELFIE NA FANS, NILAYASAN

ni Erlinda Rapadas @Teka Nga | April 28, 2022

BLIND ITEM:

Dapat na pangaralan at gisingin sa kanyang ilusyon ang isang young actress na kung umasta ay feeling big star na. Buong-akala niya ay kasingsikat na siya nina Kathryn Bernardo, Liza Soberano at Maine Mendoza na pinagkakaguluhan ng mga fans.

Imbiyerna sa kanya ang ilang grupo ng mga fans na gusto sanang magpa-picture sa kanya nang makita siya sa isang event. Nag-request kasi ang mga fans ng hand sign sa young actress pero ayaw niya dahil hindi niya gusto ang kandidatong gumagamit ng nasabing hand sign sa mga rally. Bigla na lang niyang iniwan ang mga fans na gustong magpa-picture sa kanya.

Well, hindi dapat ganito ang attitude ng sinumang artista, lalo na kung nagsisimula pa lang sumikat. Hindi sila dapat na namimili ng mga fans kahit sino ang bitbit nilang kandidato. Siya rin, baka bumalik sa kanya ang ginawa niya at ayawan na siya ng mga fans.

Marami pang kuwento ng kamalditahan ang young actress kaya nega ang image niya sa publiko at maging sa mga nakatrabaho niya.

Wala pa namang puwedeng ipagmalaki ang young actress. Hindi rin siya gaanong magaling kumanta at sumayaw. Kapag hindi siya nagbago ng ugali, tiyak na hindi niya mararating ang kasikatan nina Kathryn at Liza, kahit na punuin pa niya ng brilyante ang kanyang buong katawan.