P-BBM, kailangan ng payo ng legit na magsasaka 'di ng ekspert sa akademya

ni Ka Ambo @Bistado | September 18, 2023

NAIKUMPIRMA ng Commission on Appointment (CA) si Defense Secretary Gibo Teodoro.

Klap, klap, klap.

---$$$---

EXCELLENT ang credentials ni Teodoro, walang kaduda-duda lalo pa’t isa siyang Bar topnotcher.

Siya talaga ang dapat maging kanang kamay ni P-BBM.

---$$$---

SA totoo lang, ang unang exposure ni Sec. Gibo sa gobyerno ay ang manungkulan siyang KB (Kabataang Barangay noon, Sanggunian Kabataan ngayon) noong 1980 nang tinedyer pa siya.

Siya rin siyempre, ang KB municipal president, KB Provincial president at Region 3 Regional President.

Hindi man sa pagbubuhat ng bangko, kasabay ni Sec. Gibo, ang inyong abang-lingkod naman ang KB municipal president ng Balagtas, Bulacan — kaya siya ang ating “boss” ng mga panahong iyon sa Central Luzon.

---$$$---

KUNG magaan na nakalusot sa CA si Teodoro, tipong magdaraan sa butas ng karayom naman si Health Secretary Teodoro Herbosa.

Ngayon pa lamang ay laman ng mga “marites” si Herbosa.

---$$$---

MAY mga isyu kontra kay Herbosa na dapat niyang masagot sa CA sakali mang may magtanong mula sa kanyang mga kritiko.

May ilang kumukuwestiyon sa kanyang kuwalipikasyon.

---$$$---

KAPAG nai-Google ang kanyang pangalan, doon na lilitaw ang mga maseselang isyu na posibleng kalkalin ng mga CA members.

May nagdududa rin kung paano nakakakuha ng clearance sa Ombudsman ang pobre dahil may nagtatanong kung totoo na mayroon siyang “perpetual disqualification” sa gobyerno?

Sana ay masagot niya ‘yan nang maayos.

---$$$---

MAY mga kakaibang behavior o diskarte si Herbosa na pinagpipiyestahan ng kanyang mga kritiko.

Iyan ay maselang isyu na puwedeng dumiskaril sa kanyang posisyon.

---$$$---

TAHIMIK na ang isyu sa presyo ng bigas.

Pero, nakapagtatakang walang nagsusulong nga industrial farming para sa pagtatanim ng palay.

Ibig sabihin, bakit walang korporasyon na nag-i-invest sa industrial farming?

---$$$---

IISA lang ang solusyon sa rice sufficiency.

Ito ay ang pagpaparami o pagdagdag ng rice field o lupain na mapagtataniman ng palay.

Mahirap bang isipin ‘yan?

Nakapagtataka talaga.

---$$$---

MALINAW ang ating rekomendasyon, bungkalin at gawing rice terraces ang mga panot na bundok at idle lands na pag-aari ng malalaking korporasyon.

Maraming idle lands din na pag-aari ng Republika ng Pilipinas, ipamigay at ipabungkal ito sa mga lehitimong magsasaka o kooperatiba?

Bakit walang ganyang ideya, desisyon at aksyon?

Hindi ba kayo nagdududa?

---$$$---

LILINAWIN natin, magkaiba ang bigas at palay.

Bigas ang tawag kapag giniling na o naiproseso ang palay.

Palay ang tawag kapag hindi pa ipinoproseso sa ricemill ang inani ng mga magsasaka.

---$$$---

PAGPAPARAMI ng produksyon ng palay ang susi sa krisis.

Hindi solusyon ang pagpaparami ng bigas na inangkat mula sa ibang bansa para pababain ang presyo.

---$$$---

KAILANGAN ni P-BBM ay hindi ang eksperto mula sa akademya.

Kailangan ng Malacañang ay payo mula sa lehitimo at aktuwal na MAGSASAKA.

Price cap sa bigas, panopla sa mga sindikato

ni Ka Ambo @Bistado | September 6, 2023

NASA Indonesia na si P-BBM.

Magtagumpay sana ang kanyang biyahe.

---$$$---

BAGO tumulak sa ASEAN Summit, nilagdaan muna ng Pangulo ang executive order sa price cap ng bigas.

Isang malaking isyu.

Kumbaga, napuno na ang salop!

---$$$---

PARA sa ilan, isang suntok sa buwan ang pagpigil sa presyo ng bigas.

Pero, malinaw ang mensahe: Isang kongkretong hakbang ito laban sa cartel at hoarders ng bigas.

---$$$---

HINDI simpleng babala ang Executive Order 39, bagkus ay isang matalas na armas ito kontra sa mga sindikato ng bigas.

Hindi nagbibiro si P-BBM.

---$$$---

KINUMPIRMA ni Trade Assistant Secretary Agaton Uvero na hindi dapat lumobo ang presyo ng bigas dahil sa liberalisasyon sa pag-angkat ng bigas.

Malinaw na malinaw, ang kamay ng mga sindikato.

---$$$---

NILINAW na ng Department of Agriculture (DA) at Department of Trade and Industry (DTI) na nagiging steady na ang supply ng bigas dahil sa inaasahang surplus pa ng lokal na rice production at rice importation.

Meaning, peke ang mataas na presyo ng bigas.

---$$$---

SA katunayan, ang total supply ng bigas sa bansa ay “more than enough” para sa current demand o kasalukuyang pangangailangan sa konsumo na 7.76 MMT.

Ito ay magkakaroon pa ng ending stock na 2.39 MMT na sasapat hanggang sa susunod pang 64 na araw.

---$$$---

Sa EO 39 ay iniulat ng DA at DTI na may nagaganap na “widespread practice of alleged illegal price manipulation, such as hoarding by opportunistic traders and collusion among industry cartels in light of the lean season…”

Kaya agad ikinatuwa ang pag-apruba ni P-BBM sa EO 39 na nagtakda ng price ceilings sa bigas.

---$$$---

MATIGAS ang disposisyon ni P-BBM kaugnay ng West Philippine Sea.

Hindi siya papayag na mabawasan kahit isang pulgada ang teritoryo ng Pilipinas.

---$$$---

UMAABUSO na ang China dahil sa pambobomba ng tubig sa mga mangingisdang Pinoy.

At pinakahuli, ang paglalabas ng 10-dash line map.

---$$$---

POSIBLENG maglabas din ng 11-dash line map ang China sa mga susunod na panahon.

Pero, matikas ang paninindigan ni P-BBM.

Ipaglalaban ng Pangulo ang soberanya ng bansa sa ASEAN leaders.

---$$$---

NANININDIGAN ni Pangulong Marcos, Jr. na dapat umiral ang international law particular ang United Nations Conventions on the Law of the Sea.

Malinaw na sakop ng Pilipinas ang West Philippine Sea at 'yan ang dapat maganap.

---$$$---

DAPAT maunawaan ng China na hindi dapat nila hinahamon ang soberanya ng Pilipinas.

Aantayin pa ba nilang mapuno ang salop?

Masarap pa rin namnamin ang sikat ng araw!

More mandarambong, more utang, ‘di aahon ang ‘Pinas

ni Ka Ambo @Bistado | September 1, 2023

BER month na.

May pamahiin: Umaangat daw ang buhay pagpasok ng Setyembre.

Huh, ‘di nga?

---$$$---

HINDI makarekober ang ekonomiya, kasi’y sangkatutak pa rin ang mandarambong sa pamahalaan.

Kapag naresolba ang corruption mula sa lahat ng antas, hindi na kailangan pang mangutang nang mangutang ang Pilipinas.

---$$$---

NAKATOKA sa pagbabantay sa pandarambong ang Commission on Audit (COA).

Pero, paano kung makipagkutsaba sila sa mga kawatan?

---$$$---

MAY nagma-marites na may tropa ng “Super Friends” sa loob ng COA.

Sila ang hinihinalang utak ng mga kabulastugan.

---$$$---

HULAAN ninyo in “one-minute”, sino si Superman sa loob ng COA?

Sino si Super Cat?

Sino si Super Boy?

Sino si Batman at Robin?

---$$$---

ISA sa ‘Super Friends’ ay kilalang tirador ng mga kontrata sa gobyerno gamit ang iba’t ibang construction companies na dating dyowa na isang promdi.

---$$$---

NAKAKAKILABOT ang tsismis dahil higit bilyon-pisong government contracts ang naimamaniobra ng Super Friends.

Ano ang modus?

Siyempre simple lang, ang maluwag na auditing system.

---$$$---

NAPAPASOK nila ang nasyonal o local mang kontrata.

Talagang bigtaym.

---$$$---

ALAM kaya ni P-BBM ang lihim na diskarteng ito ng mga kawatan sa kanyang administrasyon.

Nagpipiyesta ang mga “’marites”.

---$$$---

NASILAYAN ang Super Blue Moon kahapon.

Hindi na ito magbabalik hanggang taong 2037.

---$$$---

NAKASABAY nito ang Mercury Retrograde.

Ito ang pag-aatras na pagbaliktad ng ikot ng merkuryo.

Meaning, isang rebooth o reset ang mararanasan.

---$$$---

KUMBAGA, sa kompyuter o electronic gadgets, kailangang mai-rebooth upang mag-back-to-zero ang program o operation.

Hindi lang ang mabubuti ang mabubura, bagkus ay maging ang mga negatibong karga tulad ng virus.

---$$$---

BAHAGI ng kasaysayan ang “rebooth o reset”.

Ito ay naganap sa panahon ng Malaking Baha sa panahon ni Noe sa Bibliya.

Naganap din ito nang bumagsak ang dambuhalang asteroid sa earth na ikinalipol ng mga dinosaurs.

---$$$---

PINAKAHULI, sa ating panahon, maituturing na rebooth o epekto ng Mercury retrograde ang COVID pandemic.

Malaking pagbabago ang mararanasan sa dekadang ito.

---$$$---

HINDI ang negatibong epekto lamang ang dapat pagtuunan ng pansin sa panahon ng reset o rebooth, bagkus ay maging ang positibong epekto nito sa kasaysayan.

Matapos ang dekadang ito, mahirap paniwalaan ang mga inobasyon, imbensyon at pag-unlad ng siyensya ang maranasan.

Matitikman pa ng ating henerasyon ang isang modernong panahon.