Ekspertong akademisyan sa usapin kay VP Sara, nabahiran na rin ng pulitika

ni Ka Ambo @Bistado | June 14, 2025

Araw ng Kalayaan noong Huwebes.

Mabuhay ang Republika ng Pilipinas!

----$$$--

Kaliwa’t kanang patutsadahan ang mga maka-VP Sara at anti-VP Sara.

Pati ang mga nagpapakilalang ekspertong akademisyan ay nabahiran na rin ng partisan politics.

----$$$--

LUMALABAS na walang lantay o dalisay na eksperto.

Lahat ay plastic at kumakampi sa kursunada nilang manok.

----$$$--

ANG masakit, ang sagradong “Konstitusyon” ay ginagasgas ng mga nagpapakilalang eksperto.

Bistadong-bistado na ang mga nag-oopinyon — ay may lihim na kulay ng “pagpanig” gamit kuno o ikinakatwiran ay pagmamalasakit sa Konstitusyon.

----$$$--

GUSTONG palabasin ng mga maka-VP Sara ay ipinagtanggol kuno ang Konstitusyon.

Sa kabilang panig, nagkukunwari ring idinedepensa ang Konstitusyon ng mga anti-VP Sara.

----$$$--

NAKAKAKONSENSIYA dahil ang integridad at dignidad ng mga unibersidad ay kinakalakal nila upang manghimasok at idepensa ang opinion o argumento na pabor nang lihim sa iniidolo nilang pulitiko o partido.

Nakakahiya at nakapanlulumo ang mga nagpapakilalang dalubhasang ito.

----$$$--

NALIMUTAN ng mga dalubhasa na ang isyung binabanggit ay nasa sala o mesa o hurisdiksyon na ng Korte Suprema, pero patuloy silang nagyayabang na ang kanilang opinion ang dapat paniwalaan.

Isang klase ng pambabastos ito sa Korte Suprema at mismo sa ipinangangalandakan nilang Konstitusyon.

----$$$--

HINDI natin alam kung bayaran o sinasaniban sila ng mga ideolohiyang nalipasan na ng panahon.

Wala sa mga nagpapakilalang eksperto ang may malawak na pag-iisip.

----$$$--

MAS maganda sana ay pumagitna sila — ibigay nila ang panig ng mga maka-VP Sara at ilantad din nila ang argumento ng mga anti-VP Sara.

Hindi puwede na ang kanilang opinion ay sobrang pabor sa iisang panig lamang.

----$$$--

DAPAT igalang ng mga nagpapakilalang eksperto sa batas ang hurisdiksyon at reglamento ng Korte Suprema.

Malinaw na may nilalabag silang regulasyon sa hudikatura at etika bilang mga abogado. 

----$$$--

KUNG tayo ay garapal na mag-oopinyon — ang lahat ng nababasa, nakikita at naririnig na argumento kaugnay ng impeachment — ay garapalang pamumulitika.

Santambak na plastic ang mga iyan — huwag ninyong paniwalaan.

Antayin ninyo ang desisyon ng Korte Suprema, at pakiusapan ang mga mamamayan na tanging makakapagbigay ng “gabay” ay ang Kataas-taasang Hukuman lamang — at wala nang iba pa!

-----$$$--

MALINAW ang isinasaad sa Konstitusyon.

Isang klase ng political exercise ang impeachment.

Ang mga ebidensya rito ay segundaryo lamang — iyan ang esensiya ng pinagdedebatehan.

Mismong ‘pusakal’ na mga pulitiko — ang uusig at hahatol dito!

Iyan mismo ang itinatadhana ng Saligang Batas.

Mahirap bang isipan ‘yan ng mga maka-VP Sara at maka-Romualdez?

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Kahulugan ng ‘forthwith’ samu’t sari, pero popular ang ‘walang tsetseburetse’

ni Ka Ambo @Bistado | June 10, 2025

Magkakaiba ang opinion ng mga nagpapakilalang eksperto sa batas kaugnay ng isyu sa impeachment proceedings kay VP Sara.

Pero, bakit walang nagsasabi sa kanila na humingi ng opinion o antayin ang desisyon ng Korte Suprema?

-----$$$--

BINABALAK kasi ng ilang senador na gamitin ang poder ng mayorya upang ibasura agad ang impeachment na sa paniniwala nila ay walang katuturan dahil “wala nang oras”.

Pero ayon sa ilang kritiko, hindi isyu ang “kawalan ng panahon” para hindi maipatupad ang isinasaad na “forthwith” kaugnay ng aksyon sa impeachment complaint.

----$$$--

NAG-UGAT ang problema nang agarang isinumite ang impeachment complaint ng Kamara sa Senado sa alanganing araw — oras-de-peligro — sa bingit ng pagsasarado ng Kongreso.

Malinaw na nagkagulo dahil sa terminong “forthwith” na walang ispesipikong bilang ng oras o araw — bago aksyunan ng Senado ang reklamo.

----$$$--

AYON sa co-pilot chat: “Forthwith” is an adverb that means immediately or without delay. It’s often used in formal or legal contexts. For example, if a court orders someone to cease an activity forthwith, it means they must stop right away. Synonyms include instantly, at once, directly, and right away.

Kahit ganyang kalinaw ang depinisyon, hindi agad inaksyunan ang impeachment na siyang ugat ng kaguluhan.

----$$$--

SA Tagalog, ginamit na katumbas ng forthwith ay “agad-agad” — pero walang ispesipikong bilang ng oras o araw.

Sa mas malinaw na Tagalog, ang forthwith ay “walang bantulot”.

---$$$--

Sa popular na lengguwahe, ang forthwith ay “walang tsetseburetse, awtomatik at madyik”.

Pero, kung gusto nating nasusukat ang forthwith, ibig sabihin — ‘sang iglap o simbilis ng kidlat. 

----$$$--

Puwedeng ipakahulugan sa forthwith ay “isang kisap-mata”.

Nasusukat ‘yan.

Ibig sabihin, pagkaabot-na-pag-abot sa Senado — ay walang patumanggang ililipat agad sa komite upang bumuo agad ng impeachment court — nang WALANG KURAP ANG MATA!

----$$$--

Hindi tayo abogado, pero ang nagkamali dito ay ang mga gumamit ng “terminong forthwith” kung saan ang bilis o ispesipikong panahon ay hindi binanggit.

ARAL: Kapag gagawa ng batas o maglalabas ng regulasyon o reglamento, dapat ay ESPESIPIK!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Senado, nagkakaisa yata ng opinyon: Lusot sa impeachment si VP Sara

ni Ka Ambo @Bistado | June 4, 2025

Nagbalik na ang Senado.

Tila nagkakaisa ang opinyon: Lusot sa impeachment si VP Sara.

----$$$--

Imbes si VP Sara ang inililitis, tipong si Senate President Chiz Escudero, ang mahahatulan.

Ang kaso?

‘Doble kara at pagbalimbing’!

----$$$--

HINDI sinasadya, naikukumpara si Sen. Chiz sa kanyang yumaong ama na si ex-Agriculture Secretary Sonny Escudero.

Hindi kailanman nagbago ng posisyon o nagpalit ng “mascara” ang Matandang Escudero.

----$$$--

MULA sa rank-and-file at ehekutibo ng DA si Sir Sonny hanggang sa maging kalihim at kongresista — nananatiling solid-Marcos.

Hindi loyalist si Sec. Escudero, bagkus ay “organic Marcos” hanggang maging kongresista at yumao.

-----$$$--

MALINAW ang disposisyon ng Matandang Escudero — maka-Matandang Marcos siya kahit nasa minorya.

Ni isang hibla ng buhok — ay hindi pinagdudahan ang kanyang postura bilang ‘organic Marcos’.

----$$$--

HINDI kailanman, namangka sa dalawang ilog si Sonny Escudero.

Nakakahiya man sabihin, hindi ganyan si Sen. Chiz.

---$$$--

ANG isyu ngayon sa totoo lang, hindi iyong kung guilty o hindi guilty si VP Sara, bagkus ang tunay na isyu ay kung mananatili bilang Senate President si Sen. Chiz.

At ugat nito ay hindi mismo si Sen. Chiz, itanong na lang ninyo kay Cong. Toby Tiangco ang tunay na puno’t dulo ng krisis!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.