Tulong sa mga kasamahan sa radyo, telebisyon at pelikula, natupad din

ni Bong Revilla @Anak ng Teteng | Oct. 15, 2024

Pinangunahan natin noong nakaraang Linggo, Okt. 13, 2024, ang pagdaraos ng Bagong Pilipinas Serbisyo Fair (BPSF): Paglinang sa Industriya ng Paglikha sa Philippine Sports Arena sa Pasig City kung saan mahigit sa 13,000 na mga manggagawa sa industriya ng radyo, telebisyon, at pelikula ang direkta nating nabigyan ng tulong mula sa pamahalaan.

Ang BPSF ay ang pinakamalaking convergence caravan sa bansa kung saan lagpas 60 mga ahensya ng pamahalaan ang nagsasama-sama upang makapaghatid ng lagpas 400 programa at serbisyo ng gobyerno.

Natutuwa ako na magkakasama kami sa makasaysayang programa na ito hatid ng ating mahal na Pangulong Ferdinand Bongbong Marcos at ni Speaker Martin Romualdez, kung saan hindi na ang taumbayan ang kailangang kumatok sa gobyerno dahil ang gobyerno na mismo ang lumalapit sa tao. At sa aking ngang pagsama sa BPSF sa pag-ikot nito sa buong Pilipinas, sa bawat lugar na puntahan namin, kitang-kita ang tuwa, saya, at ligaya ng ating mga mamamayan.

Mas ikinagagalak ko lang lalo dahil ang mga kaharap ko ngayon ay ang mga taong malapit na malapit sa puso ko — ang mga kasamahan kong manggagawa sa industriya ng radyo, telebisyon, at pelikula.

Ako mismo ang nanguna sa pagbubukas ng BPSF na ako rin ang nagbigay ng pangunahing talumpati, kung saan binigyan natin ng pagkilala ang iba pa nating kasamahan sa naturang okasyon katulad nina Pasig City Mayor Vico Sotto, at si Cong. Roman Romulo na nakatuwang natin sa pagpasa ng Kabalikat sa Pagtuturo (KaP) Act.

Binigyang-pugay din natin ang mga kinatawan ng Film Development Council of the Philippines (FDCP) na si Dir. Jose Javier Reyes at ng MOWELFUND Film Institute na si Ms. Boots Anson Roa-Rodrigo.

Sa kauna-unahang pagkakataon ay ngayon lamang nakaranas ng ganito ang industriya. Tinipon natin ang mahigit 13,000 kasamahan natin sa industriya para matulungan ng BPSF at ng pamahalaan. Sa kauna-unahang pagkakataon, ang mga creatives, writers, crew, stuntmen, cameramen, mga announcer, at iba pang mga manggagawa, makakatanggap ng direktang suporta mula sa gobyerno. 

Alam naman ng marami nating kababayan na sa industriyang ito ako nagmula bilang isang artista bago pa man ako pumalaot sa larangan ng paglilingkod-bayan.

Lagi ko ngang sinasabi, hindi ako magiging si Senador Ramon “Bong” Revilla, Jr. kung hindi dahil sa industriya ng pelikula, telebisyon, at radyo na kumupkop sa‘kin at naghubog upang ako ay maging artista, na naging daan para ako ay makilala at pagkatiwalaan ng sambayanan upang paglingkuran sila.

Kahit kailan ay hindi ko ikakaila – parte ako ng industriyang ito, at kahit kailanman ay hindi ko pababayaan ang sektor na aking pinagmulan.

Kaya ibang kasiyahan ang aking nararamdaman na ang mga kapatid ko naman sa industriya ang aking nabigyan ng pagkakataong tumanggap ng tulong katuwang ang BPSF.

Matagal ko nang iniisip kung paano matutulungan ang mga kasamahan ko sa industriya ng showbiz at nagpapasalamat ako kay PBBM dahil nagkaroon na ito ng katuparan.

Isa sa nakakaligtaang sektor ang showbiz industry at hindi alam ng marami na napakaraming manggagawa sa likod ng kamera ang nangangailangan din ng tulong at suporta.

Sana lang hindi ito ang una at huli, at sisikapin nating muling maulit ang pamamahaging ito ng tulong sa mga manggagawa sa industriya, maging sa telebisyon man o pelikula.

Lalo pa at alam naman nating halos ngayon lang uli nagkaroon ng trabaho ang ilan sa kanila dahil sa nagdaang pandemya.

Kaya napapanahon talaga ang ayudang ito na marahil ay iniisip ng ilang kasamahan natin sa showbiz na nalimutan natin sila, hindi dahil araw at gabi ay palagi ko kayong naaalala. 

Salamat sa langit at nagkaroon na ito ng katuparan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Tuloy ang paghahatid ng tulong sa mga kababayan sa Mindanao

ni Bong Revilla @Anak ng Teteng | Oct. 11, 2024

Tuluy-tuloy ang ginawa nating pamamahagi sa mga kababayan sa Mindanao nang magbalik tayo noong nagdaang Huwebes (Oktubre 9) upang manguna ulit sa pagbibigay ng cash assistance sa libu-libong benepisyaryo sa mga lalawigan ng Lanao del Sur, Misamis Oriental, at Bukidnon.

Ito na ang ikatlong pagkakataon na nagtungo ang inyong lingkod sa Mindanao sa loob lamang ng lagpas isang linggo. Noong Setyembre 30 ay nagpunta na tayo sa mga lalawigan ng Maguindanao del Norte, Maguindanao del Sur, at Sultan Kudarat kung saan pinangunahan rin natin ang pamamahagi ng financial assistance sa halos 10,000 na mga benepisyaryo. At nito lamang Oktubre 3 ay nagtungo naman tayo sa Davao Region upang mag-abot ng kaparehong ayuda sa mahigit 6,000 na mga kababayan.

Nang lumapag tayo sa Laguindingan airport ay agad tayong nagpunta sa Wao, Lanao del Sur kung saan namahagi rin tayo ng ayuda sa halos 2,000 na mga benepisyaryo -- sa pamamagitan ng Assistance to Individual in Crisis Situations (AICS) ng Department of Social Welfare and Development (DSWD) ay pinangunahan natin ang pagbibigay ng cash assistance kasama sina Lanao del Sur Gov. Mamintal Adiong Jr. at Cong. Zia Adiong.

Pagkaraan nito ay nagtungo naman tayo sa lalawigan ng Misamis Oriental kung saan ay sinalubong tayo nina Gov. Peter Unabia at Cong. Christian Unabia para ipagpatuloy ang pagbibigay ng ayuda sa kanilang mga kababayan. Mahigit sa 1,600 ang nabiyayaan ng ayuda na nagkakahalaga ng tig-P3,000 bawat residente.

Bandang hapon naman ay nagpunta tayo sa Bukidnon, at doon ay kasama natin sina Gov. Rogelio Roque at Cong. Laarni Roque, upang muling mamigay ng ayuda sa kanyang mga kababayan doon na may kabuuang halaga na P4 milyon para sa nasabing lalawigan.

Dire-diretso lang tayo sa pagtulong dito sa ating mga kababayan sa Mindanao at talagang sobrang lapit sa puso ko ang lugar na ito. Kaya asahan niyo na hindi rito matatapos ang ating paghahatid ng tulong at malasakit sa ating mga kababayan.

Gaya nga ng lagi kong sinasabi, binibigay lang natin sa ating mga kababayan ang mga dapat naman talaga nilang natatanggap mula sa gobyerno. Nawa ay makatulong ito sa inyong mga pang-araw-araw na pangangailangan hanggang sa tuluyang umunlad ang inyong mga buhay.

Nakakalungkot lamang dahil sa papalapit na ang halalan at marami na ang gumagalaw na pulitiko kahit malayo pa ang kampanya kaya hindi malayong isipin ng iba na pulitika lamang ang lahat sa kabila ng napakatagal na natin itong ginagawa kahit noong wala pang eleksyon.

Sabagay, kung iintindihin natin ang sasabihin ng ating mga kalaban sa pulitika ay wala tayong magagawa kaya mas mabuting kumilos na lamang tayo nang kumilos at bahala na ang mga basher sa sasabihin nila.

Ang mahalaga ay seryoso tayo sa ating ginagawa at hangad lang natin ay ang kapakanan ng ating mga kababayan at kahit ang mga basher ay tinutulungan din naman natin dahil hindi tayo namimili ng tutulungan.

Nakatakda rin akong magpunta sa Aklan at Antique ngayong araw na ito para ikutin natin ang mga bayan sa mga nasabing lalawigan upang maipamahagi rin ang AICS sa lahat ng ating mga nangangailangang kababayan.

Magbibigay din ako ng tig-P2,000 bawat residente na dadalo sa mga lugar na aming pupuntahan kasama si Gov. Joen Miraflores na aabot sa mahigit P8 milyon sa kabuuan na mula rin sa AICS o posibleng tumaas pa.

Sa susunod na labas natin ay ikukuwento ko sa inyo ang naging karanasan namin sa Aklan at Antique dahil alam kong excited na ang ating mga kababayan bago pa man tayo magtungo roon – tulad ko rin, excited  na ako makadaupang-palad ngayong araw ang ating mga kababayan doon.

Marami pa tayong mga lalawigang pupuntahan sa mga darating na araw at marami tayong mga kababayang mapapasaya bago pa sumapit ang Pasko.

Kaya bantayan n’yo lang ang schedule ng ating ikot upang sakaling magawi tayo sa inyong lugar ay magkita-kita tayo at mabahaginan kayo ng mga biyaya na matagal na nating ginagawa at hindi ito papansin lang. 

Nakakataba ng puso nang magtungo tayo sa Mindanao dahil halos hindi tayo makalakad sa dami ng taong sumalabong sa atin na lahat ay gusto tayong halikan at yakapin bukod pa sa mga nais magpakuha ng larawan.

Dahil sa sobrang pagmamahal na naranasan natin sa Mindanao ay hindi malayong magpabalik-balik ako sa lugar na ito para makasama natin ang ating mga kababayan na nagmamahal din sa atin.

May mga kababayan talaga tayong maganda ang tingin sa ating ginagawa ngunit hindi rin talaga maiiwasan na may mga kababayan tayong minamasama pa ginagawa natin lalo na sa social media. Ngunit hindi tayo magpapaapekto — tuloy lang ang mabuting gawa! 

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Muli tayong sasabak sa pagka-senador sa 2025 Election

ni Bong Revilla @Anak ng Teteng | Oct. 9, 2024

​Noong nakaraang Lunes, Oktubre 7 ay pormal na tayong nagsumite ng certificate of candidacy (COC) sa Manila Hotel kasama ang aking buong pamilya at sa kauna-unahang pagkakataon ay sumama rin ang anak kong abogado na si Inah Revilla na lalong nagpalakas ng aking loob para muling sumabak sa aking kandidatura bilang senador sa 2025 midterm elections. 

Tatakbo tayo sa ilalim ng Lakas-Christian Muslim Democrats (Lakas-CMD), ang pinakamalakas at pinakamalaking partido sa kasalukuyan kung saan ako mismo ang chairman. Ako ay kaanib ng Lakas-CMD simula pa noong ako ay unang pumalaot sa pulitika tatlong dekada na ang nakararaan. 

Kaya naman nitong Lunes ay pormal na nating sinelyuhan ang ating kandidatura sa pagka-senador sa darating na halalan. Ang inyong lingkod, na sa loob ng tatlong termino bilang mambabatas sa Senado na pinagkatiwalaan ng sambayanan, ay muling lalaban at titindig para patuloy na maging tagapagsulong ng kapakanan ng bawat isang ordinaryong Pilipino.

Bahagi tayo ng Alyansa Para sa Bagong Pilipinas Senate slate ni Pangulong Ferdinand Bongbong Marcos, Jr. (PBBM) na binubuo ng 12 senatorial candidates mula sa iba’t ibang major political parties sa bansa kabilang ang Lakas-CMD.

Nagpapasalamat ako sa ating Pangulo at kay Lakas-CMD President Speaker Martin Romualdez sa tiwala na pinagkaloob nila sa akin upang maging isa sa mga kandidato na ilalaban ng Alyansa Para sa Bagong Pilipinas. It’s an honor to run under this slate whose great aspiration is to stand up for the welfare, interests, and rights of every Filipino.

Nagsilbi na tayo ng tatlong termino sa Senado (2004-2010; 2010-2016; 2019-hanggang sa kasalukuyan) at naging kasangkapan  sa pagpasa ng maraming landmark laws na direktang magbebenepisyo sa maraming Pilipino hanggang sa kasalukuyan kabilang dito ang “Kabalikat sa Pagtuturo Act” (RA 11997), Expanded Coverage of Centenarians Act (RA 11982), “No Permit, No Exam Prohibition Act” (RA 11984), “Free College Entrance Examinations Act” (RA 12006), Granting Night Shift Differential Pay to Government Employees (RA 11701), at “Permanent Validity of the Certificates of Live Birth, Death, and Marriage Act” (RA 11909). 

Ako rin ang author ng batas upang maging lehitimo na ang mga batang isinilang sa labas ng pagsasama ng legal na mag-asawa at idagdag pa ang motorcycle helmet act, at napakarami pang iba.

Hindi naman sa pagyayabang ngunit ako ay nagtala ng perfect attendance sa Senado at nakapagsumite ng kabuuang 1,979 bills and resolutions, kung saan 339 sa mga ito ay umiiral ng batas.

Sa ating halos dalawang dekadang paninilbihan bilang senador, marami na tayong naipasang mga batas na talagang pinakikinabangan ng ating mga kababayan. Hindi natin sinayang ang tiwala ng sambayanang Pilipino. Sinigurado ko na bawat sentimo na pinapasahod sa akin gamit ang buwis ng taumbayan, naibalik natin sa kanila sa pamamagitan ng pagsusulong at pakikibaka sa pagpasa ng mga makabuluhang batas.

Kaya nang tanungin tayo ng mga sumalubong sa ating media hinggil sa mga balakin natin para sa ikaapat na termino natin sa Senado ay sinabi kong ipagpapatuloy natin ang pakikipaglaban sa social justice, kapakanan ng mga manggagawa, seguridad sa pagkain, public infrastructure, at karagdagang benepisyo pa para sa mga government employee. 

I am happy to say that because of the people’s trust, I was able to deliver my pact with the people. Ngayon, muli kong iniaalok ang aking kakayahan sa ating mga kababayan para patuloy silang paglingkuran.

While we have accomplished so much, work never ceases and there is still much to be done. Kagaya ng pagtugon sa pagtaas ng presyo ng bilihin, paghahatid ng pagkain sa bawat hapag, mga programa para sa mga magsasaka at mangingisda, pagbibigay solusyon sa baha, pagbubuo ng makabagong Philippine Building Code, pagsasaayos ng retirement system sa hudikatura, dagdag benepisyo para sa mga barangay worker, nurses, guro, at iba pa. Ayan ang ating mga isusulong kung tayo ay muling mabibigyan ng pagkakataon upang makapaglingkod para sa ating ikaapat na termino.

Ang midterm election ay nakatakda sa Mayo 12, 2025 kung saan 12 senador ang kailangang ihalal.

Kung ibabase natin sa track record ay kitang-kita naman na hindi tayo nagbutas lang ng upuan sa Senado. Posibleng mapalawak pa natin ang tinatamasang benepisyo ng ating mga senior citizen na tayo rin naman ang may akda.

Kaya naniniwala akong hindi naman tayo pababayaan ng ating mga tagasuporta. Sabagay matagal pa naman ang campaign period at hindi ko kailangang isa-isahin pa ang ating mga nagawa sa Senado pero halos dalawang libong bills at resolusyon lahat ‘yan — hindi na masama.

Wala naman tayong ibang hangad kundi ang mapabuti ang kalagayan ng ating mga kababayan at hindi na ito pangako dahil nagawa na natin ang marami sa mga ito at napakarami ko pang nagawang panukala na hindi pa naisusumite.

Ito rin ang dahilan kaya nais ko na muling tumakbo bilang senador dahil gusto kong ipagpatuloy ang santambak na inihanda ko pang panukala para sa kapakanan ng ating mga kababayan.

Mahirap lang kasing magsalita, pero kung ihahambing sa iba pang senador ang ating mga nagawa — hindi man tayo nangunguna ngunit sigurado akong hindi tayo nahuhuli dahil halos 400 batas ang ating naipanalo na ngayon ay pinakikinabangang batas na ng bawat Pilipino.

Ayoko namang ipamukha sa taumbayan ang aking mga nagawa — ngunit dinaluhan natin lahat ng mga lugar na naging biktima ng kalamidad at nabahaginan natin ng ayuda tulad ng food packs at cash assistance sa tulong ng ating Bayanihan Relief (BR) staff na araw at gabing naghahanda para makapagbigay ng tulong sa ating mga kababayan.  

Matapos ang napakaraming pagsubok — heto at nabigyan tayong muli ng pagkakataong mapasama sa Alyansa Para sa Bagong Pilipinas Senate slate ni PBBM na may pinakamalinaw na adhikain kung paano isasaayos ang bansa at kung paano mapapalawak pa ang benepisyo ng ating mg kababayan. Saan pa ba tayo? Alam na this!

Anak Ng Teteng! 

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com