Mas paghandaan ang 7 pang bagyo kesa Pasko

ni Bong Revilla @Anak ng Teteng | Nov. 18, 2024

Hindi naman masamang maghanda para sa darating na Kapaskuhan ngunit huwag sana nating isasantabi ang paghahanda para sa bagyo dahil apat hanggang pitong bagyo pa ang inaasahan nating papasok sa bansa bago matapos ang taong 2024.

Noong isang linggo lamang ay nanawagan tayo na maghanda para sa pagpasok ng Bagyong Pepito ngunit ngayon ay may dobleng paalala pa ang ating ipinakikiusap dahil baka hindi na natin kayanin ang mga paparating na bagyo na ayon sa PAGASA ay may bitbit ding malalakas na pag-ulan.

Bilang chairman ng Committee on Public Works ay mariin din nating kinakalampag ang Department of Public Works and Highways (DPWH) at mga Local Government Units (LGUs) sa buong bansa na tiyaking handa ang kani-kanilang nasasakupan upang maiwasan na natin ang mga hirap na ating dinanas nitong mga nagdaang bagyo.

Heto at marami na naman ngang sinalanta ng Bagyong Pepito kaya mas dapat talaga tayong matuto sa mga karanasang dulot nito para hindi tayo mapahamak.

Mismong PAGASA na ang nag-anunsyo na hanggang pitong bagyo pa ang inaasahan nating papasok sa bansa bago matapos ang taon at sa ayaw man natin o sa gusto ay tiyak na malaki ang epekto nito sa pagsalubong natin sa araw ng Pasko at Bagong Taon.

Oo nga at kailangang masiguro ng DPWH at ng mga tatamaang LGUs ngayon pa lang -- na malinis at maluwag ang mga daluyan ng tubig at ma-clear lahat ng mga maaaring maging debris, pero huwag tayong puro asa sa gobyerno, dapat sa mga personal nating kapasidad ay maghanda rin tayo para matiyak na walang maging problema.

Hindi baleng binabayo tayo ng bagyo sa panahon ng Kapaskuhan basta’t ligtas lang ang bawat isa at wala tayong nawawalang kaanak o pinaglalamayan.

‘Yung mga nakatira sa mga delikadong lugar ay makipag-ugnayan na sa lokal na pamahalaan at huwag matigas ang ulo kapag pinapalikas para walang madisgrasya.

Ngayon pa lamang dapat ay palaging naka-ready ang mga kagamitan partikular na ang mga damit at gamot upang isang bitbit na lamang sakaling rumagasa ang pagtaas ng tubig baha.

Marami kasing napapahamak dahil sa may nakalimutan na mahalagang bagay sa bahay at kapag binalikan ay doon nangyayari ang trahedya.

Alam naman na natin ang mga lugar na palaging binabaha -- maliban na lamang sa mga binaha sa unang pagkakataon, kaya sana alam na natin ang mga dapat nating gawin kung ayaw naman nating lumipat ng bahay.

Tulad sa lalawigan ng Bulacan na sanay na ang mga tao sa baha, marami sa kanila ang may sariling bangka at salbabida dahil alam nilang kailangan sa tuwing umuulan.

‘Yung mga lugar na may pag-asa pa namang hindi binabaha ay inaasikaso na ngayon ng DPWH pero ang mga lugar na ilang dekada na ay talagang may pagbaha, dapat na mas doble ang paghahandang ginagawa.

Baka kasi nakatuon lahat ng panahon ng mga kababayan natin sa papalapit na Pasko at ang konsentrasyon ay nasa pagbili ng mga damit at regalo para sa Christmas party, tapos nakaligtaan na may paparating palang bagyo at iba pa.

Basta’t maging alerto lang, huwag tayong papatay-patay para sa susunod na pag-ikot natin ay hindi ayuda ang ating ipamimigay kundi regalo na para sa Pasko.

Siyempre napakasaya kung kumpleto tayo sa pamilya na sasalubong sa Pasko at Bagong Taon kahit wala tayong maraming handa basta’t magkakasama lang ay ayos na.

Kaya para maging maligaya ang Pasko at Bagong Taon ay maghanda tayo para sa kaligtasan natin laban sa pitong bagyo pa bago matapos ang taong 2024.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Huwag natin iwan sa ere ang mga empleyado ng OMB

ni Bong Revilla @Anak ng Teteng | Nov. 15, 2024

Hindi masama ang pagbabago, pero dapat walang maiiwan sa ere — dapat na unahin muna ang kapakanan ng mga empleyado ng Optical Media Board (OMB) na biglang mababago ang takbo ng buhay dahil lamang sa biglang pagre-resign ng dating namumuno.

Nadiskubre kasi sa budget hearing sa Senado noong nakaraang Lunes na walang lumalagda ngayon sa mga voucher para sa suweldo, benepisyo at iba pang dokumento ng mga empleyado ng OMB matapos magbitiw bilang OIC-CEO si James Ronald Macasero na naghain ng kandidatura para sa darating na eleksyon.

Dahil dito, nanganganib na walang sasahurin ang mga empleyado ng OMB ngayong Disyembre kung kailan nalalapit na ang pagdiriwang ng Pasko.

Bukod dito, may panukala na rin ang mga kasama kong senador na tuluyan nang buwagin ang OMB dahil wala na umanong function ang ahensya kung saan wala nang namimirata ng mga pelikula ngayong online streaming na ang uso.

Ang inyong lingkod ay dating chairman ng Videogram Regulatory Board na naging OMB, at ngayon at chairman ng Senate Committee on Civil Service, Government Reorganization and Professional Regulation, na nakikisimpatya sa mga kawani ng pamahalaan na maaaring mawalan ng trabaho sakaling matuloy ang panukalang pagbuwag sa OMB. 

Nakakaawa kasi ang sitwasyon ng mga empleyado ng OMB dahil sa pagkawala ng namumuno sa kanila na nagbibigay ng direksyon. Nandiyan din ang pangamba na tuluyan nang buwagin ang kanilang ahensya. Ang sa akin lang, kung talagang aabot man doon ay hindi dapat pabayaan ang mga empleyado. 

Dapat munang isaayos ang kalagayan ng mga empleyado bago pa man ituloy ang anumang uri ng pagbabago para masigurong nasa maayos na sitwasyon ang mga empleyado. Puwede silang bigyan ng training para mailipat sa ibang mga ahensya ng pamahalaan. Huwag lang natin sila iwan sa ere ng basta-basta.

Ramdam ko ang mga empleyado na mawawalan ng trabaho sakaling matuloy ang pagbuwag dito — lalo na ‘yung mga padre de pamilya at mga breadwinner na sila lamang ang inaasahan sa kanilang pamilya na ang tanging nalalaman lang naman ay manatiling tapat sa naturang ahensya.

Hindi magandang balita ito para sa kanila lalo pa’t ilang linggo na lamang ay Pasko na at nahaharap ang lahat sa mga gastusin.

Marahil, ilan sa mga empleyado na mawawalan ng trabaho ay kilala ko pa at naisaayos natin ang kanilang sitwasyon noong tayo pa ang namumuno sa OMB. Kaya masakit din sa akin kung aabot sa ganito ang kahihinatnan.

Napakarami ng accomplishments natin noong tayo pa ang namumuno sa OMB. Ilang matagumpay na pagsalakay ang dating isinagawa sa mga bentahan at gawaan ng piniratang pelikula na ipinagbibili sa pamamagitan ng DVD at VCD.

Ilang ulit nating pinasagasaan sa pison sa loob ng Camp Crame ang mga nakumpiska nating DVD at VCD upang masigurong hindi na babalik sa pamilihan ang mga nasamsam nating piniratang pelikula at kanta.

Dahil sa sunud-sunod na pagsalakay natin sa mga ito ay muling sumigla ang paggawa ng mga pelikula at napakalaki talaga ng naitulong ng OMB sa entertainment industry. Kasama natin sa pagtatrabaho ang mga empleyadong ngayon ay nanganganib na mawalan ng hanapbuhay.

‘Yung ilan sa kanila ay itinaya pa ang buhay para lamang sa mga isinagawa nating pagsalakay at dahil nga sa pagre-resign ng namumuno sa kanila ay bigla na lamang silang mapapariwara.

Sa kapasidad ko bilang senador ay hindi ako papayag na basta na lamang mauwi sa wala ang kanilang pagsisikap at sana ay makumbinsi ko ang mga kasamahan kong senador na unahin muna ang mga empleyado bago magdesisyon sa nais nilang pagbabago. Sana, maitawid ko ito!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Revilla, inalerto ang DPWH at LGUs sa paghahanda sa pagpasok ng Bagyong Pepito

by Info @Brand Zone | Nov. 15, 2024

Nalulungkot si Revilla dahil hindi pa man nakakabangon ang Northern Luzon ay isang bagyo na naman ang papasok kaya mahalaga na may pre-positioning na ng mga emergency at relief goods at umaasa na walang magiging matinding pinsala sa buhay at ari-arian.

Inalerto ni Senador Ramon Bong Revilla Jr. ang Department of Public Works and Highways (DPWH) at mga Local Government Units na tiyaking nakalatag na ang mga paghahanda pagpasok ng bagyong Pepito sa Sabado.

Ayon kay Revilla na chairman ng Senate Committee on Public Works, dapat paspasan ang clearing operations sa mga lugar na nagkaroon ng landslide at pagguho ng mga puno matapos hagupitin ng bagyong Ofel.

"Eto pa lang nga si Ofel, paparating naman agad itong si Pepito," Revilla said. "So we must spare no time in cleaning up after Ofel and bracing for Pepito, ayon pa sa Senador.

Sinabi ni Revilla na hindi inaalis ng PAGASA na maging super typhoon si Pepito kaya kailangang masiguro na ngayon pa lang malinis at maluwag na ang mga daluyan ng tubig at malinis ang lahat ng mga maaring maging debris.

Nalulungkot si Revilla dahil hindi pa man nakakabangon ang Northern Luzon ay isang bagyo na naman ang papasok kaya mahalaga na may pre-positioning na ng mga emergency at relief goods oras na kailanganin.

Umaasa ang Senador na walang magiging matinding pinsala sa buhay at ari-arian kung ang publiko ay nakahanda.

"We are hoping na wala masyadong pinsala. Preparations are in place," he said. "Pero dapat handa pa rin tayo for whatever that may come. Dapat safe on ground na lahat ng kailangan at mga tauhan, para anuman ang mangyari, agad natin itong matutugunan,” dagdag pa ng Mambabatas.