Carlos Yulo, hindi lang isang kampeon, isa nang alamat!

ni Bong Revilla @Anak ng Teteng | August 19, 2024

Ngayong araw, Lunes (August 19) ay nakatakdang salubungin ng buong Senado ang ating golden boy na si Carlos Yulo kasama ang ibang Pinoy Olympians na nagpakitang gilas sa 2024 Paris Olympics kasunod ng inihain nating resolusyon patungkol sa pagbibigay parangal sa mga ito.

Noong August 5, 2024 ay nagsumite tayo ng Senate Resolution No. 1097 na naggagawad ng parangal kay Carlos Yulo sa pag-uwi ng 2 gintong medalya sa bayan, at Senate Resolution No. 1128 na kumikilala sa ipinamalas na galing ng buong delegasyon ng Philippine Team na sumabak sa 2024 Paris Olympics.

Sa Senado, tayo ang kauna-unahang may akda ng mga nasabing resolusyon kung kaya’t ikinagalak nating tumindig sa bulwagan noong nakaraang Miyerkules nang kilalanin ng kapulungan ang tagumpay ni Caloy at buong Philippine Team. Bilang principal author ng Senate resolutions na na-adopt at nilagdaan din ng Senado noong August 14, 2024, masaya nating kinilala ang husay, giting at puso nila, na siya namang naging daan upang makamit nila ang pangarap para sa sarili at bayan.

Nais ko ring ibahagi ang ilan sa nilalaman ng aking sponsorship speech nang lumusot sa Senado ang mga nasabing resolusyon, narito: 

“Sa pagkakataong ito, taas-noo nating sinasaluduhan ang isang partikular at natatanging atleta na sadyang kahanga-hanga ang ipinakitang husay at galing – si Carlos “Caloy” Yulo.

Huli nating nakapiling si Caloy dito sa bulwagan ng Senado just a few months ago. Hindi naman sa pagyayabang – pero noon pa lang naramdaman ko na, na maaabot niya ang tugatog ng tagumpay.

Carlos “Caloy” Yulo, ngayon, hindi ka lamang isang kampeon, isa ka nang alamat. 

Parang isang kawayang hindi nabali ng hampas ng hangin… hindi napayuko ng ano mang balakid; bagkus ay sumayaw, lumundag at umimbay sa himig ng tadhana upang makamit ang pinakamataas na tagumpay hindi lamang para sa sarili kung hindi para sa buong bayan.

Nakakatindig-balahibo nang tugtugin ang Pambansang Awit ng Pilipinas na nasaksihan ng buong daigdig – not once but twice. 

Ang sarap sambitin ang mga kataga sa Lupang Hinirang dahil alam nating buhay na buhay sa puso ni Carlos ang alab ng pagkamakabayan sa bawat paglukso at pagsirko. The fire burned so fiercely in his heart for all the world to see, and it brought immense joy and pride to us Filipinos.

‘Yung isang gintong medalya nga ay sapat nang rason ng pagbubunyi. But Caloy did not stop… did not falter… did not tire… even when he already proved himself worthy of recognition. 

Dalawang beses pang tumaginting ang titik at himig ng ating sinisintang bayan upang masaksihan ng buong mundo. 

You are truly our golden boy. Subalit sa kabila ng kinang ng ginto, alam namin ang mga sakripisyo mo na siyang naging kabayaran upang makamit mo ang inaasam-asam na tagumpay. 

Today we honor the pain and struggles that propelled you to the top. At kinikilala rin natin ang bawat segundong iginugol, bawat sakripisyong inialay, at ang mga sugat at pasang natamo sa training na siya namang naging bagwis ng mga pakpak ng iyong pangarap… upang makalipad sa tugatog ng iyong tagumpay.

Kung susumahin ang lahat ng hakbang na nagdala sa iyo sa araw na ito, alam nating dugo, pawis at luha ang naging kabayaran. But you are an epitome of the great Filipino spirit of resilience… never wavering, never bending, never cowering… always ready to soar towards the achievement of your dreams.  

Tunay ngang nananalaytay sa iyo… ang dugo ng Pilipinong malakas, matapang at masikap. At ito mismo ang paulit-ulit mong ipinamalas sa buong daigdig.

Sa araw na ito, nagpapasalamat kami sa iyong pagpupunyagi upang patunayan sa buong mundo na ang Pilipino ay may angking kakayahan na hindi lamang makipagsabayan, kung hindi ang magwagi ano mang hamon, kahit sino ang katunggali.”

Wala na tayong ibang maitatawag kay Carlos Edriel Yulo kundi bayani ng palakasan at kayamanan ng bansa dahil sa kanyang natatanging ipinamalas na galing sa men’s floor exercise final kaya nakapag-uwi ng gintong medalya mula sa 2024 Paris Olympics.

Para naman sa buong Philippine Team, ito ay bahagi rin ng aking talumpati: 

“Alam po natin ang hirap ng training na pinagdaraanan ng ating mga atleta. Madalas naisasantabi ang kanya-kanyang mga personal na pangangailangan upang matutukan ang pagsasanay. 

Upang pandayin ang kanilang mga talento at kakayahan, madalas higit pa sa panahon ang kailangang ialay. Dugo at pawis ang puhunan ng mga kumikinang na medalya at pagkilala.

Ito ang kapalit ng lahat ng iyon… at masasabi naman nating sulit dahil hindi lamang personal na tagumpay ang inyong nakamit kung hindi isang testamento sa buong mundo na ang Pilipinas ay hindi pahuhuli.

In the global stage, you have proven how the Filipino resilient spirit will always shine through… no matter the challenges and hurdles thrown your way. Against the odds, you have not only etched your legacy, you have paved the way for aspiring Filipino athletes to follow in your footsteps.”

Sila ay panghabambuhay na magsisilbing inspirasyon na siya namang tutularan ng mga susunod sa kanilang mga yapak. Ang kuwento nila ang pinakamalinaw na pruweba na ang Pilipinong masikap at mahusay ay Pilipinong nagtatagumpay.

Ang makasaysayang ambag nila sa ating bayan ay nararapat lamang kilalanin at bigyang papuri dahil ang tagumpay nila ay tagumpay ng buong bayan. 

Kaya tiyak na hero’s welcome ang mag-aabang sa kanila ngayong Lunes sa nakatakda nilang pagdating sa Senado. At muli, sa araw na ito, sasaluduhan natin ang tibay ng dibdib na ipinamalas nina Caloy at ng buong Philippine Team.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Maganda ang polisiya ng DPWH na paggamit ng plastic waste sa aspalto

ni Bong Revilla @Anak ng Teteng | August 14, 2024

Kapag palpak ay hindi natin pinalalampas ngunit kung maayos naman ay marapat lang bigyan naman natin ng papuri tulad ng bagong polisiya ng Department of Public Works and Highways (DPWH) hinggil sa paggamit ng plastic waste para patagalin ang lifespan ng semento ng aspalto.

Sa pamamagitan ng Department Order No. 139, s. 2024, na nagsasaad ng ‘prescribing the department’s standard specification for the use of the recycled material dubbed Item 310 (15) – bituminous concrete surface course with low-densitypolyethylene (LDPE) plastic bag waste, hot laid ay inaprubahan ng DPWH.

Kaugnay sa naturang polisiya ay inatasan ni DPWH Sec. Manuel Bonoan ang lahat ng regional offices, district engineering offices, at Unified Project Management Office clusters na sumunod sa naturang kautusan pagdating sa road construction projects.

We congratulate the DPWH for their innovative policy of integrating plastic waste in their infra projects, especially on road construction. Nakakatuwa kasi hindi lang ito para mas maging sustainable ang mga proyekto kundi malaking tulong din ito sa waste management.

Nakakatuwang makita na sa kabila ng ating mga pagpuna ay hindi naman tumitigil ang DPWH sa paghahanap ng solusyon at sa wakas ay isang malaking hakbangin ang polisiya nilang ito at sana ay hindi magkaroon ng hadlang na maisagawa agad ito sa lalong madaling panahon.  

Kung matatandaan natin nitong nakaraan lamang ay nagpatawag tayo ng hearing sa Senado patungkol sa pagbaha. Isa sa mga lumabas na rason ng mabilis na pagbaha ay ang dami ng basura na bumabara sa daluyan ng mga tubig, lalo na ang plastik. Kaya malaking tulong itong bagong polisiya ng DPWH para mabawasan ang problema natin sa basura.

Matagal na nating pinupukpok ang ahensya para makapaghanap ng solusyon gamit ang mga infrastructure projects upang masugpo ang pagbaha. Noon pa ito sa public hearing sa Senado ng Senate Committee on Public Works taong 2022 na pareho rin ang problemang tinalakay.

Noon pa man ay iminumungkahi ko na sa DPWH na gawing resilient at sustainable ang mga proyekto nila, and they did not disappoint with this new policy. Suportado natin basta i-assure lang nila na compliant sa standards ang mga materyales para masigurong hindi rin makompromiso ang mga infra project natin.

Sabagay, tiniyak naman ng ahensya na dapat isulong ang recycling ng LDPE plastic bag waste sa pamamagitan ng paggutay-gutay sa mga ito para mabawasan ang “susceptibility to permanent deformation of bituminous concrete surface course or asphalt concrete”.

Nabatid natin na ang paggamit pa umano ng LDPE plastic bag waste sa asphalt cement mix ay nagtala ng bagong panuntunan sa DPWH Bureau of Research and Standards.

Ngayon pa lamang ay excited na ako sa naturang polisiya dahil sa ganda ng paliwanag nito ay kitang-kita na ang magiging kapakinabangan. Sabagay, hindi naman ito natuklasan ng iisang tao lamang dahil binubuo ito ng mga eksperto sa DPWH na alam nating mahuhusay basta’t kikilos lang.  

Lalo pa at may babala na naman ang PAGASA hinggil sa paparating na Southwest Monsoon o Habagat na patuloy na magdadala ng mga pag-ulan sa National Capital Region, ilang bahagi ng Luzon at sa kanlurang bahagi ng Visayas at Mindanao. 

Sa pinakahuling weather forecast na inilabas ng PAGASA, ang Habagat ay inaasahang magdudulot ng maulap na kalangitan na may kalat-kalat na pag-ulan at pagkidlat-pagkulog sa rehiyon ng Ilocos, Zambales, Bataan, Occidental Mindoro at Palawan.

Samantala, bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dahil sa Habagat ang inaasahan sa Metro Manila, nalalabing bahagi ng Luzon, Western Visayas, Negros Island Region, Zamboanga Peninsula, SOCCSKSARGEN, at Bangsamoro Autonomous Region in Muslim Mindanao.

Bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog rin ang maaaring maramdaman sa natitirang bahagi ng bansa dahil sa mga localized na thunderstorm.

Ayon pa sa weather bureau, posibleng magkaroon ng flash flood o landslide sa ilang bahagi ng bansa sa gitna ng sama ng panahon.

Babala ito ng PAGASA na hindi dapat balewalain para hindi tayo mapahamak. 

Marahil ay alam na ito ng pamunuan ng DPWH at Metro Manila Development Authority (MMDA) upang pangunahan din ang paghahanda at hindi na maulit pa ang masama nating karanasan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Naipanalo natin ang laban ng mga guro

ni Bong Revilla @Anak ng Teteng | August 12, 2024

Labis ang ating kagalakan nang lagdaan na sa wakas ang Implementing Rules and Regulations (IRR) ng Republic Act No. 11997, o ang Kabalikat sa Pagtuturo Act (KAP).

Ang inyong lingkod kasi ang may-akda at sponsor ng naturang batas, at ang pag-apruba sa IRR ay pagtatapos ng mahabang proseso na pinagdaanan nito at ngayon ay handa nang ipatupad dahil isa nang ganap na batas.

Kung inyong matatandaan, ang inyong lingkod din ang nagsulong sa pagkakapasa ng batas, mula sa pagsulat at pagbuo ng panukala, maging sa sponsorship nito hanggang sa interpellation kung saan humarap tayo sa mga kapwa natin senador upang iparating at ipagdiinan ang kahalagahan ng agarang pagsasabatas nito.

Sa wakas, the long wait is over! Matagal man ang naging laban, naipanalo pa rin natin ang kapakanan ng ating mga guro. Ang pag-apruba ng IRR ang hudyat na ready for implementation na ang batas na ating inilaban na maipasa. Garantisadong matatanggap na ng ating mga bayaning guro ang P10,000 teaching allowance. Ito ang pangarap natin para sa kanila bilang suporta at pagkilala sa napakahalagang papel na ginagampanan nila sa sektor ng edukasyon.

Pinasasalamatan din natin ang bagong kalihim ng Department of Education (DepEd) na si Senador Sonny Angara sa agarang pag-approve sa nasabing IRR.

Itinatag ng KaP Act at ginawa nitong permanente ang pagbibigay ng teaching allowance sa mga guro ng pampublikong paaralan. Umpisa next year, makakatanggap na ang mga titser ng P10,000 para ipambili ng mga kagamitan para sa aktwal na pagtuturo ang mga kaakibat na gastusin.

Sa ating mga guro, natupad na natin ang ating pangako sa kanila. Pero gaya nga ng lagi kong sinasabi, this is not the last, marami pa tayong mga isusulong na mga panukala para sa kanilang mga karapatan at kapakanan.

Alam din naman natin ang hirap na pinagdaraanan ng iba nating mga manggagawa at sana ay huwag silang managhili sa mga guro dahil alam din naman natin kung gaano kahirap ang kanilang sitwasyon kaya bahagya natin silang inuna ngunit hindi naman natin pababayaan ang hanay ng mga manggagawa.

Nais ko lang bigyang-pugay ang kabayanihan ng mga guro na marami ang kinakailangan pang tumawid ng ilog at maglakad ng milya-milya sa mga lalawigan para lamang makapagturo.

Kung tutuusin ay hindi naman para sa sarili ang karagdagang P10,000 allowance dahil sa ibinibili rin nila ng chalk at iba pang materyales sa pagtuturo na dati-rati ay ibinabawas nila sa  kanilang suweldo na kanilang pasanin sa pang-araw-araw na gastusin.

Ganyan nagsasakripisyo ang ating mga guro, hindi baleng mag-abono basta makapagturo lang sa kanilang mga estudyante na isa sa sandigan ng pag-unlad ng bansa.

Kaya ang bahagyang pagpaparayang ito ng ibang manggagawa para sa ating mga guro ay hindi naman nakapanghihinayang dahil sila ang nagtataguyod sa ating mga anak at sila rin ang tumatayong pangalawang magulang sa oras na nasa eskwela ang ating mga anak.

Lalo na noong nakaraang pandemya, maraming mga guro na bukod sa itinataya nila ang kanilang buhay ay nag-aabono rin sa pambili ng tingi-tinging internet connection para lamang makapagsagawa ng online classes. 

Kumpara sa ibang propesyon ay hindi sila nagrereklamo sa dusang kanilang pinagdaraanan araw-araw basta’t maitawid lamang ang pangangailangan ng mga mag-aaral.

Medyo may katagalan din ang tiniis ng ating mga guro bago ito inaprubahan, ngunit ngayong isa nang ganap na batas ay malaking inspirasyon ito hindi lang sa hanay ng mga guro dahil pag-asa rin ito sa iba pang manggagawa na ipinaglalaban din na mabigyan ng karagdagan at permanenteng benepisyo.

At dahil naipanalo natin ang laban na ito ay isusunod naman natin ang kalagayan ng mga manggagawa. Hindi rin kasi tayo si engkatada na sa isang kumpas ay mangyayari ang lahat, medyo may kahirapan din ang pakikipagtalastasan sa mga kapwa natin mambabatas para makapagpasa ng isang batas.    

Pero labis ang ating kagalakan na natupad ang pangako natin sa mga guro dahil nakitaan na natin ng pag-asa ang iba pa nating panukala na isang araw ay magiging matagumpay din para sa kapakanan ng ating mga kababayan.

Hindi naman tayo nagpapabaya sa ating trabaho — wala tayong iniisip kundi ang mapagaan ang kalagayan ng marami nating kababayan sa pamamagitan ng pagsusumite ng mga kinakailangang batas.

Dahil sa karagdagang allowance na ito ng mga guro ay inaasahan nating mas magiging mabuti ang performance ng ating mga guro na sa huli ay ang mga mag-aaral din ang makikinabang at sa kalaunan ay ikauunlad ng ating bansa.

Sana lang ay naipaliwanag natin ng maayos at naunawaan ng iba pang manggagawa kung bakit bahagya nating binigyang prayoridad ang ating mga guro.

Kumbaga ay una-una lang, pero lahat naman ay iniisip natin. Ang panalong ito ng mga guro ay panalo rin ng maraming manggagawa.

Sana ay maibsan na ang mga gurong nagtitinda ng kung anu-ano sa loob ng classroom para lamang may pandagdag sa kanilang mga gastusin sa kanilang pagtuturo.

Muli tayong nagpapasalamat sa ating newly confirmed DepEd Sec. Angara for making the approval of Kabalikat sa Pagtuturo Act’s IRR one of the first acts of his good and promising administration.

Wala naman tayong ibang hangad kundi ang mabigyan ng disenteng pamumuhay ang ating mga guro gayundin ang iba pang manggagawa, at naniniwala akong matutupad ang pangarap nating ito sa mga darating na panahon.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com