Gilas Pilipinas nanaig sa Macau Bears exhibition match

ni Anthony E. Servinio @Sports | July 28, 2025

Photo : Gilas Pilipinas vs Macau Bears - Samahang Basketbol ng Pilipinas - SBP

Nagising ang Gilas Pilipinas sa tamang panahon upang talunin ang bisitang Macau Black Bears, 103-98, sa kanilang exhibition game noong Lunes ng gabi sa Araneta Coliseum.

Nagsilbing nararapat na despedida ang tagumpay bago sumabak ang pambansang koponan sa 2025 FIBA Asia Cup sa Jeddah, Saudi Arabia.

Bumira ng sunod-sunod na tres sa huling quarter si Justin Brownlee simula sa unang nagpatikim ng lamang sa mga Pinoy, 84-83. Tumira pa siya ng apat pang three-points at isang three-point play para lumayo ang Gilas, 101-94, at 1:41 ang nalalabi.

Lamang ang Black Bears sa halftime, 63-46, subalit inilatag ng kombinasyon nina Dwight Ramos, Cjay Perez at AJ Edu ang pundasyon ng paghabol ng mga Pinoy.

Tinuldukan ng three-points ni Scottie Thompson ang pangatlong quarter pero lamang para maging dalawa na lang ang lamang ng Macau, 81-79. Ayon kay Coach Tim Cone, napakahalaga na makapaglaro sila sa harap ng mga kababayan dahil mas madalas silang nasa ibayong-dagat.

Inimbitahan niya ang mga Filipino sa Saudi Arabia na panoorin ang kanilang mga laro. Nagtapos si Brownlee na may 32 puntos buhat sa limang tres at humakot ng 15 rebound sa 35 minuto.

Sumunod si Ramos na may 19 at anim na assist at Edu na may 15. Nanguna sa Macau sina Will Douglas na may 23 at Amorie Archibald na may 22 bilang reserba. Nag-ambag ng 17 si Jenning Leung. Maglalaro ng isa pang exhibition ang Gilas kontra Jordan pagdating nila sa Saudi. Ang FIBA Asia Cup ay tatakbo mula Agosto 5 hanggang 17.

Beermen kampeon uli sa All-Filipino Cup, sinipa sa grand slam ang Tropang 5G

ni Anthony E. Servinio @Sports | July 25, 2025

Photo by Reymundo Nillama / Bulgar Sports

Nanigurado ang San Miguel Beer at inuwi na ang 2025 PBA Philippine Cup matapos daigin ang TNT Tropang 5G, 107-96, sa Game Six kagabi sa Philsports Arena. Nagwakas ang seryeng best-of-seven, 4-2, at walang iniwan na duda ang Beermen.

Bumalik ang malupit na opensa at nagsama sina June Mar Fajardo at Jericho Cruz para itulak ang Beermen sa kanilang pinakamalaking lamang sa pangatlong quarter, 80-60.

Patuloy na pumalag ang TNT sa likod nina Jordan Heading, Kelly Williams at Almond Vosotros subalit may nakahandang sagot ang Beermen. Walang shoot sa unang tatlong quarter, biglang uminit si Marcio Lassiter para sa mga pandiin na puntos.

Kasama ang mga napapanahong buslo nina Fajardo at Cjay Perez ay sinigurado ang resulta. Parehong nagtapos na may tig-24 puntos sina Fajardo at Perez at humakot din ng 12 rebound si Fajardo.

Nagtapos si Cruz na may 13 at siya rin ang napiling Finals MVP ng PBA Press Corps. Nanguna sa TNT si Calvin Oftana na may 14 ng kanyang 19 sa unang quarter na kinuha ng Tropa, 25-23.

Sumunod sina Williams na may 17 at Brandon Ganuelas-Rosser na may 15. Nagwagi ang TNT sa Game One, 99-96. Bumangon ang Beermen at nagwagi ng tatlong sunod – 98-92, 108-88 at 105-91 – bago humabol ng isa pa ang Tropa sa Game Five, 86-78.

Magpapahinga muna ang mga koponan at magtitipon muli sa Oktubre para sa ika-50 season liga. Magsisimula ang taon sa Philippine Cup kaya ilang buwan malalasap ng Beermen ang tagumpay.

Roberson MVP sa ika-2 C'ship ng Strong Group

ni Anthony E. Servinio @Sports | July 22, 2025

Photo: Pormal na naigawad ang tropeo bilang kampeon ang Strong Group Athletics ng Pilipinas nang talunin ang UAE sa 44th William Jones Cup sa Taiwan. (sgapix)

Naabot ng Strong Group Athletics (SGA) ang hindi pa naabot ng mga nakalipas na kinatawan ng Pilipinas – ang magwagi ng dalawang magkasunod na William Jones Cup.  Pormal silang kinoronahan matapos manaig sa United Arab Emirates, 82-67, sa huling araw ng ika-44 edisyon torneo sa Xinzhuang Gym, New Taipei City. 

Kahit hindi siya ginamit laban sa UAE, sapat na ang ginawa ni Andre Roberson upang mapiling MVP ng torneo. Sinamahan siya ni kakampi Tajuan Agee at sina Chen Ying-Chung at magkapatid Robert Hinton at Adam Hinton ng host Chinese-Taipei A. 

Si Agee ang nanguna sa puntusan sa SGA na 15.3 bawat laro kahit lumiban siya ng dalawang beses dahil masakit ang paa. Pangalawa si Roberson sa 12.3 habang nanguna sa mga Filipino si Kiefer Ravena na humabol para sa huling limang laro para gumawa ng 11.2. 

Noong Sabado na pangalawa sa huling araw ng torneo ay itinahi na ng SGA ang kampeonato nang tambakan ang Bahrain, 92-68. Masasabing nakatanggap sila ng “tulong” mula sa Chinese-Taipei A na itinapal ang unang talo sa mga Bahraini noong Biyernes, 93-50.

Nagtapos ang mga Taiwanese (7-1) ng pangalawa sa ikatlong sunod na taon at pangatlo ang Bahrain (6-2) na natamasa ang pinakaunang medalya sa kompetisyon. Tabla sa 4-4 ang Chinese-Taipei B, Australia-NBL1 Rising Stars at Malaysia habang nasa ilalim ang Japan (2-6), Qatar (1-7) at UAE (0-8). 

Sinamahan nila ang listahan ng mga kampeong Pinoy na Northern Cement (1981), San Miguel Beer (1985), RP Centennial Team (1998), Gilas Pilipinas (2012 at 2016) at Mighty Sports (2019). Winalis din ng SGA ang 2024 Jones Cup para sa kabuuang 16-0 kartada.

Kung bibigyan ng pagkakataon, sisikapin ng SGA na pantayan ang tatlong sunod na kampeonato ng Iran mula 2009 hanggang 2011.