74 katao sa Gaza at Lebanon, patay sa kamay ng Israel

ni Angela Fernando @Overseas News | Oct. 28, 2024

Mga nasirang building sa Western Gaza City. Photo: Hasan N. H. Alzaanin-Anadolu

Nasawi ang 74 katao mula sa Gaza at Lebanon matapos na umatake ng hukbong Israel nu'ng Linggo. Matatandaang napatay ng mga puwersang Israeli ang hindi bababa sa 53 katao sa Gaza at 21 katao naman mula sa Lebanon.

Kasabay nito, nagpahayag ang UN Chief na si Antonio Guterres ng kanyang pagkabigla sa nakapanlulumong bilang ng kamatayan, pinsala, at pagkasira sa ginigipit na northern Gaza.

Samantala, inihirit ng Egypt ang limitadong 2 araw na tigil-putukan sa lugar ng Gaza para sa palitan ng apat na Israeli at ng mga bilanggong Palestinian.

Israel, umatake sa mga base militar ng Iran

ni Eli San Miguel @Overseas News | Oct. 26, 2024

Photo: Unconfirmed image, Tehran explosion site sa Iran - The Times of Israel / Circulated

Inatake ng Israel ang mga pasilidad ng militar sa Iran ngayong Sabado ng madaling-araw bilang tugon umano sa mga kamakailang pag-atake ng Tehran sa Israel. Ilang oras ang lumipas, inihayag ng militar ng Israel na natupad na ang kanilang mga layunin.

Iniulat ng media ng Iran ang sunud-sunod na pagsabog sa loob ng ilang oras sa kabisera at sa mga kalapit na base militar, na nagsimula bandang 2 a.m. (2230 GMT noong Biyernes).

Bago magbukang-liwayway, sinabi ng pampublikong brodkaster ng Israel na natapos na ang tatlong bugso ng pag-atake at tapos na ang operasyon.

Sinabi ng Iran na matagumpay na na-counter ng kanilang air defense system ang mga pag-atake ng Israel sa mga military target sa mga lalawigan ng Tehran, Khuzestan, at Ilam, na nagdulot lamang ng "limitadong pinsala" sa ilang lugar.

Mga pera at ginto, itinago ng Hezbollah sa ospital sa Beirut

ni Eli San Miguel @World News | Oct. 22, 2024

Israeli military / Hezbollah al Sahel hospital. Photo: Israel Defense Forces

Inihayag ng militar ng Israel, na nagtago ang Hezbollah ng daan-daan milyong dolyar na pera at ginto sa ilalim ng isang ospital sa Beirut, ngunit hindi nila tatargetin ang pasilidad sa kabila ng patuloy na pag-atake sa mga pinansyal na ari-arian ng grupo.

Sinabi ni Fadi Alameh, isang mambabatas ng Lebanon mula sa Shi'ite Amal Movement at direktor ng Al-Sahel hospital, na ang mga pahayag ng Israel ay mali at mapanira. Ayon pa sa kanya, ini-evacuate na ang ospital.

Itinanggi naman ng Israel na target nilang bombahin ang pasilidad. Hindi pa nakukumpirma ng Reuters ang mga detalye mula sa punong tagapagsalita ng militar ng Israel na si Rear Admiral Daniel Hagari. Hindi rin agad nakapagbigay ng pahayag ang Hezbollah.