Zelenskyy, kinondena ang mga kaalyado sa kawalang-aksyon vs. NK military

ni Angela Fernando @World News | Nov. 1, 2024

Photo: KBS / Pres. Volodymyr Zelenskyy

Binatikos ni Pres. Volodymyr Zelenskyy ang kawalan ng reaksyon ng kanyang mga kaalyado sa pag-deploy ng mga North Korean military para sa giyera sa Ukraine, at binigyang-diin na ang kawalang-tugon ay magbibigay-lakas ng loob kay Vladimir Putin ng Russia na palakasin pa ang kanilang pwersa.

Sa isang panayam sa KBS television channel ng South Korea (SK), sinabi ng lider ng Ukraine na naniniwala siyang sinusubukan na ng Moscow na makipagkasundo sa North Korea (NK) para magpadala ng mga engineering troops at malaking bilang ng mga sibilyan upang magtrabaho sa mga plantang militar ng Russia.

Pres. Volodymyr Zelenskiy / KBS

"Putin is checking the reaction of the West ... And I believe that after all these reactions, Putin will decide and increase the contingent ... The reaction that is there today is nothing, it is zero," saad ni Zelenskyy.

Matatandaang nagsimula siyang magbigay ng babala tungkol sa pakikialam ng NK sa giyera nu'ng Oktubre 13. Inilarawan ito ng mga kaalyado sa West bilang mabigat na paglala ng sitwasyon, ngunit wala pang inihahayag na anumang hakbang na gantihan o paghahandang ipatupad laban dito.

Tigil-putukan sa Israel vs. Lebanon, posible na

ni Angela Fernando @World News | Oct. 31, 2024

Photo: Lebanon Prime Minister na si Najib Mikati / Lebanese Prime Minister's Press Office-AFP / Jalaa Marey-AFP

Nagpahayag ng pag-asa ang Lebanon Prime Minister na si Najib Mikati sa posibilidad na ianunsyo sa loob ng ilang araw ang kasunduan para sa tigil-putukan kasama ang Israel, matapos iulat ng pampublikong broadcaster ng nasabing bansa ang isang draft ng kasunduan na naglalaan ng paunang 60-araw na ceasefire.

Ayon sa dokumentong inilabas ng Kan, na sinasabing isang leaked proposal mula sa Washington, ang ilang mga puwersang Israel ay panandaliang aatras mula sa Lebanon sa loob ng unang linggo ng nasabing 60-araw na tigil-putukan.

Magugunitang ang mga detalye ng tinutukoy na draft ay halos tugma sa mga naunang ulat ng Reuters mula sa dalawang source na may alam sa usapin.

Sinabi ni Mikati na hindi siya naniniwalang posible ang isang kasunduan bago ang eleksyon ng pagka-pangulo sa United States (US), ngunit naging mas positibo ang kanyang pananaw matapos makipag-usap nu'ng Miyerkules sa U.S. Envoy para sa Middle East na si Amos Hochstein, na nakatakdang magtungo sa Israel ngayong Huwebes. "Hochstein, during his call with me, suggested to me that we could reach an agreement before the end of the month and before November 5th," paglilinaw ni Mikati.

Israel ipagbabawal ang aid agency ng UN

ni Angela Fernando @World News | Oct. 29, 2024

Photo File: UN humanitarian / Aid truck sa UN storage facility - Reuters / Mohammed Salem

Nagpasa ang parliament ng Israel ng batas nu'ng Lunes upang ipagbawal ang ahensya ng UN na United Nations Relief and Works Agency (UNRWA) na mag-operate sa loob ng bansa, na nagdulot ng pangamba sa ilan sa mga kaalyado ng Israel mula sa west na natatakot na mas lumala ang kasalukuyang sitwasyon ng humanitarian sa Gaza.

Binigyang-diin ng mga opisyal ng Israel ang pagkakasangkot ng ilan sa mga tauhan ng UNRWA sa pag-atake nu'ng Oktubre 7, 2023, sa southern Israel, at ang pagiging miyembro ng ilang tauhan nito sa Hamas at iba pang mga armadong grupo.

"UNRWA workers involved in terrorist activities against Israel must be held accountable," saad ni Prime Minister Benjamin Netanyahu. Samantala, nagsalita ang lider ng UNRWA, na si Philippe Lazzarini, na ang pagboto ay salungat sa U.N. charter at lumalabag sa batas internasyonal.

"This is the latest in the ongoing campaign to discredit UNRWA and delegitimize its role towards providing human-development assistance and services to #Palestine Refugees," sinabi niya sa social media platform na X.