Trak na puno ng bomba, sumalpok sa bahay... Defense Minister ng Mali, todas sa suicide bombing

ni Jenny Rose Albason @World News | April 29, 2026

Nasawi umano ang Defense Minister ng Mali na si Sadio Camara matapos ang isang suicide truck bombing sa kanyang tirahan malapit sa kabisera na Bamako, kasabay ng malawakang coordinated attacks sa iba’t ibang bahagi ng bansa.

Ayon sa mga ulat, isang sasakyang puno ng pampasabog ang sumalpok sa kanyang residence sa Kati, na umano’y isinagawa ng mga militanteng grupong konektado sa al-Qaeda.

Nasawi rin ang ilang miyembro ng kanyang pamilya at mga sibilyan, matapos gumuho ang bahagi ng gusali at maapektuhan ang kalapit na mosque.

Kinumpirma ng state media na si Camara ay namatay dahil sa tinamong mga sugat, matapos umanong makipagbakbakan sa mga umatake bago siya dalhin sa ospital.

Samantala, iniulat din na nailikas si junta leader Gen. Assimi Goïta matapos umanong ma-target din ang kanyang tirahan.

Ang mga sabayang opensiba ay iniuugnay sa mga jihadist group na kaugnay ng al-Qaeda at Islamic State, pati na rin sa separatist group na Azawad Liberation Front na aktibo sa hilagang bahagi ng bansa.

Kasabay nito, lumabas din ang ulat ng pag-atras ng mga Russian mercenaries na kasama ng militar ng Mali sa ilang lugar sa Kidal matapos ang ilang araw ng bakbakan, bagama’t wala pang opisyal na kumpirmasyon mula sa Russia.

Dahil sa kakulangan ng lethal injection drugs... Firing squad at electrocution, posibleng dagdag sa death penalty sa Amerika

ni Jenny Rose Albason @Overseas News | April 26, 2026

Isinusulong ng administrasyon ni Donald Trump ang pagdaragdag ng firing squad, electrocution, at gas asphyxiation bilang mga alternatibong paraan ng execution sa federal level, ayon sa ulat ng United States Department of Justice.

Ayon sa report, layunin nitong tugunan ang kakulangan sa lethal injection drugs at matiyak na maipapatupad ang parusang kamatayan kahit may limitasyon sa supply.

Bahagi ito ng hakbang upang muling palakasin ang federal executions matapos alisin ang moratorium na ipinatupad ng nakaraang administrasyon.

Sa kasalukuyan, mahigit 40 kaso ang isinusulong para sa death penalty, bagaman wala pang umaabot sa aktwal na execution. Tatlo na lamang ang natitirang nasa federal death row matapos i-commute ng dating administrasyon ang karamihan ng mga sentensya.

Umani naman ito ng batikos mula sa mga human rights group at ilang mambabatas, na nagsabing ang mga naturang paraan ay malupit at hindi makatao.

Sa kabila nito, iginiit ng Justice Department na kinakailangan ang mga alternatibong ito upang matiyak ang pagpapatupad ng batas.

Iranian boat na maglalagay ng mina sa Strait of Hormuz, barilin — Trump

ni Jenny Rose Albason @World News | April 25, 2026

Inutusan ni US President Donald Trump ang United States Navy na paputukan ang anumang Iranian boat na mahuhuling naglalagay umano ng mga mina sa Strait of Hormuz.

Sa isang post sa social media, sinabi ni Trump: “I have ordered the United States Navy to shoot and kill any boat, small boats though they may be (Their naval ships are ALL, 159 of them, at the bottom of the sea!), that is putting mines in the waters of the Strait of Hormuz. There is to be no hesitation.”

Ayon kay Trump, patuloy na nagsasagawa ng operasyon ang Estados Unidos upang alisin ang mga mina sa naturang strategic waterway. Iniulat din niya na ang mga American mine sweepers ay aktibong tumutulong sa pagpapanatili ng kaligtasan ng daluyan ng langis at kalakalan sa rehiyon, at inatasan umano niya ang pagpapalawak ng naturang operasyon ng tatlong beses.

Sa gitna ng tumitinding tensyon sa rehiyon, muling iginiit nina Trump at Defense Secretary Pete Hegseth na malaking bahagi na ng naval capabilities ng Iran ang nawasak na, kabilang ang tinatayang 150 barko.

Gayunman, iniulat na ang Islamic Revolutionary Guard Corps (IRGC) ay may natitirang mga asset, kabilang ang maliliit na bangka na patuloy na ginagamit sa mga operasyon sa dagat.