18 patay, 42 nadale... Dorm ng mga estudyante inatake ng Ukraine, Russia, gaganti

ni Jenny Rose Albason @World News | May 25, 2026

Tiniyak ni Russian President Vladimir Putin na gaganti ang Russia matapos ang umano’y pag-atake ng Ukraine sa isang dormitoryo ng mga mag-aaral.

Ayon sa ulat, umabot sa 18 katao ang nasawi at 42 ang nasugatan sa insidente sa Starobilsk, sa Luhansk region.

Samantala, sinabi ng Ukraine military na ang kanilang isinagawang airstrike ay tumama umano sa Rubicon drone military unit na matatagpuan sa parehong lugar.

Giit naman ni Putin, walang anumang military facilities sa naturang lokasyon na tinamaan ng pag-atake.

Kasunod nito, inutusan ng Russian President ang kanyang mga sundalo na maghanda para sa posibleng pagganti.

Trahedya sa airstrike... Bahay tinamaan, 19 patay

ni Jenny Rose Albason @World News | May 22, 2026

Nasawi ang 19 katao sa panibagong inilunsad na airstrikes ng Israel sa Lebanon.

Batay sa ulat ng Ministry of Public Health, sampu sa mga nasawi, kabilang ang tatlong bata at tatlong kababaihan, ang namatay matapos tamaan ng pag-atake ang isang bahay sa bayan ng Deir Qanoun.

Nairekord ang panibagong mga pagkasawi wala pang isang linggo matapos ianunsiyo ng Amerika na nagkasundo ang Lebanon at Israel na palawigin pa ng 45 araw ang ceasefire habang nakatakdang ipagpatuloy ng magkabilang panig ang usapan pagsapit

ng Hunyo.

Sa kabila ng pagpapalawig ng ceasefire, nagpapatuloy pa rin ang palitan ng pag-atake sa pagitan ng Israel at Hezbollah, partikular sa southern Lebanon.

Sa inilabas na pahayag ng health ministry ng Lebanon, sinabi nitong bukod sa mga nasawi sa Deir Qanoun ay mayroon ding tatlong katao ang nasugatan, kabilang ang isang batang babae.

Samantala, siyam pang katao ang napatay habang 29 ang nasugatan sa air strikes ng Israel sa mga distrito ng Nabatieh at Tyre.

Batay sa pinakahuling ulat ng health ministry noong Lunes, umabot na sa mahigit 3,000 katao ang nasawi sa Lebanon dahil sa mga strike ng Israel sa gitna ng labanan laban sa Hezbollah simula noong Marso.

---

Patay na raw si King Charles 

RADIO STATION, NAG-SORRY SA PEKENG BALITA

HUMINGI ng paumanhin ang isang dating British pirate radio station sa mamamayan ng United Kingdom at sa hari matapos nitong aksidenteng maipahayag ang maling balita tungkol sa umano’y pagpanaw ni King Charles III.

Ayon sa pahayag ng istasyon, ang insidente ay dulot ng computer error sa pangunahing studio nito sa Maldon, Essex, na nagresulta sa maling pag-activate ng tinatawag na “death of a monarch procedure,” isang protocol na naka-standby sa ilang broadcast stations sa United Kingdom para sa mga emergency announcements.

Agad na naitama ang pagkakamali matapos itong mapansin ng mga tauhan, at naglabas ang istasyon ng on-air apology. Nilinaw ng management na isa lamang itong teknikal na aberya at walang katotohanan ang naunang ulat.

Humingi rin ng paumanhin ang station manager sa hari at sa mga tagapakinig, at inaming nakalulungkot ang naging epekto ng insidente.

Ang naturang radyo, na itinatag noong 1964 bilang pirate radio station na lumaban noon sa monopolyo ng BBC, ay dati ring nag-ooperate mula sa mga barko sa dagat bago tuluyang nagbago ang operasyon nito sa mga sumunod na dekada.

Sa oras ng insidente, nasa Northern Ireland si King Charles III kasama si Queen Camilla para sa isang royal engagement, at wala namang kumpirmadong kaganapan na may kaugnayan sa maling ulat.

Patuloy na ipinapaliwanag ng istasyon na ito ay isang isolated technical error at humihingi sila ng pang-unawa mula sa publiko.

Kahit may ceasefire... Nuclear plant ng UAE, binomba ng Iraq

ni Jenny Rose Albason @World News | May 21, 2026

Kinumpirma ng United Arab Emirates (UAE) na mula sa Iraq ang mga drone na umatake sa Barakah nuclear power plant nito noong nakaraang linggo, na lalong nagpapataas ng pangamba sa seguridad sa Gitnang Silangan sa gitna ng nagpapatuloy na tensyon sa rehiyon.

Nangyari ang insidente noong Linggo, Mayo 17, matapos tumama ang isang drone sa electrical generator malapit sa planta sa Abu Dhabi.

Dahil dito, sumiklab ang sunog ngunit wala namang naiulat na nasugatan o anumang radiation contamination. Ayon sa mga otoridad, dalawa pang drone ang kanilang na-

intercept bago pa makapinsala.

Ang Barakah Plant ang nag-iisang nuclear facility ng UAE at nagsusuplay ng halos isang-kapat ng kabuuang kuryente ng bansa.

Bagama’t umiiral na ang ceasefire na ipinatupad noong Abril 8, patuloy pa rin ang mga ulat ng mga pag-atake mula sa teritoryo ng Iraq patungo sa mga bansang Gulf.

Noong Marso, isinama rin ang Barakah sa listahan ng mga posibleng target na inilathala ng ilang pahayagan sa Iran.

---

Tino-torture, inaabuso at pinapatay ang mga preso... EX- LIBYA PRISON CHIEF, HUMARAP SA ICC

HUMARAP sa International Criminal Court (ICC) ang dating hepe ng kulungan sa Libya na si Khaled Mohamed Ali El Hishri kaugnay ng mga alegasyon ng war crimes at crimes against humanity na umano’y naganap sa Mitiga prison mula 2015 hanggang 2020.

Ayon sa mga prosecutor, si El Hishri umano ang nasa likod ng torture, sexual abuse, at pagpatay sa mga detainee sa naturang pasilidad. Kabilang umano sa mga naging biktima ang mga kababaihan at isang 15-anyos na lalaki.

Sinabi rin ng prosekusyon na maraming bilanggo ang nasawi dahil sa umano’y pagmamaltrato, sekswal na pang-aabuso, at pagpaslang sa mga detainee.

Ang kasalukuyang pagdinig sa ICC ay hindi pa itinuturing na pormal na paglilitis. Layunin nitong matukoy kung sapat ang ebidensya upang ituloy ang full trial laban sa akusado. Maaari ring aprubahan ng mga hukom ang pagsasampa ng kaso, ibasura ito, o baguhin ang mga isinampang paratang.

Mariin namang itinanggi ni El Hishri ang lahat ng akusasyon at humiling ng kanyang paglaya.

Bahagi ang kaso ng mas malawak na imbestigasyon ng International Criminal Court sa mga krimen sa Libya matapos ang 2011 uprising na nagpatalsik kay Muammar Gaddafi.

Samantala, kabilang din sa mga pinaghahanap ng ICC ang isa pang opisyal ng Libya na si Osama Almasri Najim kaugnay ng kahalintulad na mga alegasyon ng pang-aabuso sa kulungan. Naging kontrobersyal ang kanyang kaso matapos umano siyang palayain ng mga otoridad sa Italya.

---

Dahil sa price fixing noong COVID-19 pandemic

7 CHINESE EXECUTIVES AT 4 SHIPPING COMPANIES, KINASUHAN

SINAMPAHAN ng kaso ng pamahalaan ng United States ang pitong Chinese executives at apat sa pinakamalalaking shipping container companies sa buong mundo dahil umano sa sabwatan upang limitahan ang suplay at pataasin ang presyo ng mga shipping container noong kasagsagan ng COVID-19 pandemic, ayon sa mga opisyal ng Department of Justice (DOJ) nitong Martes.

Ayon sa DOJ, ang mga kumpanyang sangkot ay gumagawa ng humigit-kumulang 95 porsyento ng mga standard dry shipping container sa buong mundo. Pinaniniwalaang nagkaroon umano ng sabwatan ang mga ito mula Nobyembre 2019 hanggang Enero 2024 upang kontrolin ang produksyon at manipulahin ang presyo ng mga container.

Dahil umano sa nasabing gawain, naapektuhan ang supply chain at napilitan ang mga mamimili sa Amerika na magbayad nang mas mataas para sa mga produkto habang mas tumagal din ang paghihintay sa pagdating ng mga ito noong panahon ng pandemya.

Isa sa mga akusado na si Vick Ma, 54-anyos at marketing director ng Singamas Container Holdings Ltd, ay inaresto sa France noong Abril. Wala pang inilalabas na pahayag ang kumpanya kaugnay sa mga alegasyon laban sa kanila.