Dagdag-ayuda sa mga batang Ukrainian na na-deport sa Russia

ni Justine Berganio @Overseas News | September 30, 2026

Photo: 10 million crowns (P29M) ang ilalaan sa International Committee of the Red Cross para sa Central Tracing Agency Bureau na tumutulong sa paghahanap at pagkakakilanlan. File

Dinagdagan ng Norway ang tulong para sa mga Ukrainian children na na-deport umano sa Russia, mga detained civilian at prisoners of war sa gitna ng giyera.

Magbibigay ang Norway ng 15 million crowns (P43M) sa UNICEF para sa pagbabalik at reintegration ng mga batang nakauwi na sa Ukraine, pati sa paghahanap sa mga nawawalang bata.

Isa pang 10 million crowns (P29M) ang ilalaan sa International Committee of the Red Cross para sa Central Tracing Agency Bureau na tumutulong sa paghahanap at pagkakakilanlan ng mga nawawalang tao.

Ayon kay Foreign Minister Espen Barth Eide, layunin ng suporta na matulungan ang mga pamilya na muling makapiling ang kanilang mga mahal sa buhay at matulungan ang mga biktima sa rehabilitasyon.

Ang ayuda ay inihayag bago ang ministerial conference sa Toronto, Canada, na pangungunahan ng Canada, Norway at Ukraine para talakayin ang usapin ng Ukrainian children at human rights violations.

---

ONLINE DONATIONS SA OPPOSITION, 21 KULONG

TIMBOG ang 21 katao sa Myanmar matapos umano silang magpadala ng pera sa online fundraising platform na konektado sa opposition National Unity Government (NUG).

Ayon sa state-run Global New Light of Myanmar, natukoy ng awtoridad ang detalye ng mahigit 2,700 katao na umano’y nagbigay ng financial support sa People’s Revolution Supply Family (PRF), isang platform na itinatag ng NUG.

Sinabi ng militar-backed government na ang mga naaresto ay mula sa iba’t ibang township at haharap sa legal na aksyon. Patuloy din ang imbestigasyon habang isasara at kukumpiskahin umano ang mga account na konektado sa pondo.

Hindi pa naglalabas ng pahayag ang NUG. Mula sa military coup noong 2021, patuloy ang labanan sa Myanmar sa pagitan ng junta forces, NUG-aligned groups at ethnic armed organizations.

Matagal nang gumagamit ang mga opposition group ng online fundraising, cryptocurrency, bonds at overseas transfers para makalikom ng pondo dahil kontrolado ng militar ang banking system ng bansa.

Hindi pa umano siya target... Trump, pinalalakas ang kampanya kontra-ICC

ni Justine Berganio @World News | August 2, 2026

Photo: File

Nagbiro si US President Donald Trump na hindi pa siya target ng International Criminal Court (ICC), ngunit sinabi niyang posible itong mangyari sa hinaharap habang pinalalakas ng kanyang administrasyon ang kampanya laban sa international tribunal.

Sa isinagawang cabinet meeting sa Camp David nitong Biyernes, sinabi ni Trump na wala siyang impormasyon na hinahabol siya ng ICC, ngunit pabirong inamin na hindi niya isinasantabi ang posibilidad. Natawa naman ang mga miyembro ng kanyang gabinete sa naging pahayag.

Inihayag ito ni Trump habang nagsasalita si US Secretary of State Marco Rubio, na muling iginiit ang matinding pagtutol ng Estados Unidos sa ICC. Ayon kay Trump, hindi ang kanyang sarili ang ipinagtatanggol ng Amerika kundi si Israeli Prime Minister Benjamin Netanyahu at iba pang lider na nahaharap sa imbestigasyon ng korte.

Noong Nobyembre 2024, naglabas ang ICC ng arrest warrant laban kay Netanyahu kaugnay ng digmaan sa Gaza at mga alegasyon ng war crimes. Hindi kabilang ang Estados Unidos at Israel sa mga bansang lumagda sa Rome Statute, ang kasunduang lumikha sa ICC.

Samantala, sinabi ni Rubio na nagpapatuloy ang kampanya ng Trump administration upang hikayatin ang iba’t ibang bansa na kumalas sa ICC. Ayon sa kanya, limang bansa na ang nagpahayag ng planong umalis sa tribunal, kabilang ang Chad at Venezuela.

Iginiit din ni Rubio na itinuturing ng Estados Unidos ang ICC bilang isang “illegitimate international organization,” dahilan upang ipagpatuloy ng administrasyon ang panawagang i-boycott ang nasabing korte.

WHO, ‘di pa tiyak kung sa cruise ship nakuha ang unang kaso ng Hantavirus

ni Jenny Rose Albason @Overseas News | May 9, 2026

Maaaring hindi nakuha ng unang kaso ng hantavirus ang impeksiyon habang nasa cruise ship na MV Hondius, ayon sa isang eksperto mula sa World Health Organization (WHO).

Ayon kay Anaïs Legand, technical expert on viral hemorrhagic fevers sa WHO, ang incubation period ng sakit—o ang panahon mula sa pagkaka-impeksiyon hanggang sa pagsisimula ng sintomas—ay karaniwang nasa isa hanggang anim na linggo.

Sa kaso ng 70-anyos na Dutch national na pasahero, na kabilang sa walong kumpirmado at pinaghihinalaang kaso ng hantavirus, siya ang unang nagkasakit. Nagsimula siyang makaranas ng mga sintomas tulad ng lagnat, pananakit ng ulo, at mild diarrhea noong Abril 6. Kalaunan, nagkaroon siya ng respiratory distress noong Abril 11 at pumanaw sa parehong araw habang nasa barko.

Dahil dito, posible umanong hindi sa barko o sa mga islang pinuntahan patungong Cape Verde nakuha ng pasyente ang impeksiyon. Ayon sa WHO, mas malamang na nagkaroon na siya ng exposure sa hantavirus bago pa man sumakay sa cruise ship, partikular na kaugnay ng pagkakalantad sa rodent o daga.

Samantala, patuloy na naglalayag ang barko patungong Canary Islands ng Spain matapos ang tatlong araw na pag-stay malapit sa Cape Verde mula noong Linggo.

Ang hantavirus ay karaniwang naipapasa sa tao mula sa infected na rodent sa pamamagitan ng ihi, dumi, o laway nito. Gayunman, ang isang partikular na strain nito na tinatawag na “Andes virus” ay maaaring maipasa rin mula tao patungo sa tao.

Ang nasabing strain ay na-detect sa parehong buhay na kumpirmadong kaso ng hantavirus. Ayon sa datos, ang case fatality rate nito ay maaaring umabot ng hanggang 40%, kaya itinuturing itong mataas ang panganib.

Batay sa paunang ebidensya mula sa WHO, ang Andes virus ay maaaring maipasa sa pamamagitan ng close contact, kabilang ang “exchange of saliva” o halik sa pagitan ng magkapareha.