‘Monster ship’ ng China, muling namataan malapit sa WPS

ni Angela Fernando @Overseas News | July 3, 2024

Muling namataan malapit sa Ayungin Shoal sa West Philippine Sea (WPS) ang pinakamalaking coast guard ship sa mundo na pagmamay-ari ng China Coast Guard (CCG) na mas kilala sa tawag na ‘The Monster’ nitong Miyerkules, ayon sa isang maritime expert na nagmomonitor ng mga paggalaw ng barko sa South China Sea.

Sa isang post sa X, sinabi ng dating opisyal ng US Air Force at noo'y Defence Attaché na si Ray Powell na ang CCG 5901 ay sumali sa CCG 5203 sa Ayungin Shoal nu'ng 7:26 ng umaga.

"The 165-meter China Coast Guard 5901 ('The Monster') has returned for another intrusive patrol in the Philippines' exclusive economic zone and has just joined the 102-meter CCG 5203 at 2nd Thomas (Ayungin) Shoal," saad ni Powell.

Matatandaang huling namataang naglalayag ang CCG 5901 sa WPS nu'ng Hunyo 24, na nagsimula matapos ang marahas na insidenteng naganap nu'ng Hunyo 17 sa pagitan ng China at 'Pinas.

Hirit ni SP Escudero, isyu sa WPS, dalhin sa ASEAN

ni Angela Fernando @News | June 5, 2024

Iminungkahi ni Senate President Francis "Chiz" Escudero nitong Miyerkules na itaas ang isyu sa West Philippine Sea (WPS) sa Association of Southeast Asian Nations (ASEAN) sa gitna ng pinakabagong agresyon ng China laban sa mga Pilipinong military.

Sinabi ito ng bagong luklok na pinuno ng Senado nang tanungin kung dapat bang magsampa ng panibagong kaso ang 'Pinas laban sa China.

"Option palagi ‘yan ng ating pamahalaan pero isang concern din na nais kong i-bring up ay sana subukan, kung kakayanin ng ating DFA, na dalhin ito sa ASEAN.

‘Yan ang regional organization na kinabibilangan ng Pilipinas at hindi maikakaila ang isyung ito kaugnay sa West Philippine Sea ay nagaganap sa loob na nasasakupan ng ASEAN," saad ni Escudero.

Dagdag pa ni Escudero, hindi man kilala ang ASEAN bilang politikal na asosasyon, magagamit pa rin ang forum para mapag-usapan ang nagaganap sa WPS.

Tugon ito sa video na inilabas ng Armed Forces of the Philippines (AFP) na nagpapakita ng mga tauhan ng China na kinukuha ang mga supply na nakalaan para sa mga sundalong Pilipino na nakatalaga sa BRP Sierra Madre sa Ayungin Shoal, sinabi ni Escudero na tila pinapalala nito ang tensyon sa lugar.

Ngunit nanawagan ang mambabatas sa lahat ng partido na manatiling kalmado sa kabila ng mga kamakailang kilos ng mga tauhan ng China, binigyang-diin na walang nagnanais ng digmaan sa rehiyon.

9 Chinese vessels, naispatan sa Ayungin Shoal

ni Eli San Miguel - Trainee @News | December 14, 2023

Kinumpirma ng Armed Forces of the Philippines (AFP) ngayong Huwebes ang presensya ng mga barkong Tsino sa Ayungin Shoal sa West Philippine Sea.

Ayon kay AFP Western Command commander Vice Admiral Alberto Carlos, may limang Chinese maritime militia vessels (CMMV) sa loob ng Ayungin, habang apat na iba ang nasa labas ng shoal.

Sinabi ni Carlos na nagsimula ang pagsulpot ng CMMVs sa shoal, kung saan nakalubog ang BRP Sierra Madre, ngayong taon.

Kasama sina Carlos at AFP chief General Romeo Brawner, Jr. sa misyon sa Ayungin Shoal noong Linggo. Sakay sila ng supply boat na Unaizah Mae 1.

Nasaksihan ng mga opisyal kung paano sinundan, binara ng water cannons, nagsagawa ng mga delikadong maniobra ang mga barko ng Chinese coast guard at maritime militia laban sa resupply team ng Pilipinas.

Binantayan nila ang 40 barkong Tsino sa paligid ng Ayungin Shoal sa kasagsagan ng misyon, ayon kay Carlos.