Fan favorite Gonzales-Carro at Bello twins, matibay sa BPT Challenge

ni MC @Sports News | Dec. 1, 2024

Photo: Ang fan favorites na sina Sofia Gonzalez at Maria Belen-Carro ng Spain.

Makapigil-hiningang laban ang nalampasan ng fan favorite na sina Sofía González at María Belén Carro ng Spain laban kina Piper Ferch at Madison Shields ng US, 21-18, 14-21, 20-18 nitong Sabado sa Round of 12 sa Volleyball World Beach Pro Tour Challenge Nuvali Santa Rosa City.

Ang world No. 66 na mula sa kampeonato sa Copa de La Reina Madrid, nangunguna ang Spaniards sa bakbakan sa Nuvali Sand Courts kung saan nagtala si Gonzalez ng 24 attack points at si Carro ay may 11 kontra Shields’ 24 at Ferchs’ 11.

Isang magarang laro ang ipinakita nina Gonzalez at Carro laban kina world No. 84 Malgorzata Ciezkowska at Urszula Lunio ng Poland na tumalo kina Hailey Harward at Kylie DeBerg ng US, 21-14, 21-15.

Napanatili pa rin ng top-rated men’s pair nina Javier at Joaquin Bello ang kanilang tikas at nagpatuloy na maging paborito ng fans lalo na nang idispatsa ng English twins ang Dutch rising stars na sina Leon Luini at Ruben Penninga, 21-18, 21-19, sa torneo na inorganisa ni Philippine National Volleyball Federation head Ramon “Tats” Suzara, na pangulo rin ng Asian Volleyball Confederation and Executive Vice President of the world governing body Federation Internationale de Volleyball.

Kumamada si Javier ng 26 attack points habang si Joaquin ay umiskor ng 4 at five blocks.

“Whenever you’re the No. 1 seed in any international tournament and to have a target on your back is sometimes difficult but for us we think of the same way every tournament,” ani Joaquin.

“Regardless of what seed we are or what the expectation is if we go game by game, point by point, stay together united and just fight point by point, that’s what we do,” dagdag niya.

Ginapi muna nina Germany Sagstetter brothers Jonas at Benedikt ang Alas Pilipinas pair nina James Buytrago at Rancel Varga bago isinunod na biniktima sina No. 44 Vinicius at Heitor ng Brazil, 21-13, 21-18. Unang tinalo nina Ferch at Shields sia Aleksandra Wachowicz at Julia Radelczuk, 21-16, 17-21, 15-13.

Back-to-back crown target ng NU Lady Bulldogs sa UAAP

ni Gerard Arce @Sports | Nov. 26, 2024

Photo: Itinanghal na Most Valuable Player si Bella Belen, habang Best Opposite Spiker si Alyssa Solomon, Best Libero si Shaira Jardio at si Camilla Lamina ang Best Setter sa katatapos na Shakey's Super League Tournament.

Kasunod ng makasaysayang three-peat grand slam title na iginiya ng National University Lady Bulldogs sa 2024 Shakey’s Super League, plano namang ipagpatuloy at dalhin ang nakuhang momentum sa pagkuha ng back-to-back na korona sa 87th University Athletics Association of the Philippines (UAAP) women’s volleyball tournament sa 2025.

Nakahandang pangunahan nina Alas Pilipinas standout Bella Belen at Alyssa Solomon, na ginawaran din bilang MVP at Best opposite spiker, kaagapay ang paggabay ng dekoradong coach na si Sherwin Meneses, ipaparada ng Lady Bulldogs ang ikatlong sunod na titulo sa Collegiate Pre-Season Championships bago ang pinananabikang UAAP tourney.

Kinumpleto ng powerhouse squad ang matinding laban sa finals series nang walisin ang De La Salle University sa bisa ng 23-25, 25-18, 25-16, 25-20 sa Game 2 nitong Linggo ng gabi sa Rizal Memorial Coliseum upang makuha ang ikatlong kampeonato upang patuloy na mag-reyna sa torneong suportado ng Shakey’s Pizza Parlor.

“Siyempre sobrang excited din ako na nanalo kami. Malaking tulong talaga ‘to sa preparation for UAAP. ‘Yun naman talaga ‘yung goal kaya sumali kami rito,” wika ng multi-titled tactician.

Babalik bilang coach sa UAAP ang multi-titlist coach mula sa Cool Smashers matapos ang huling paggabay sa Adamson Lady Falcons noong 2016, hinalinhinan si coach Norman Miguel bilang coach ng Lady Bulldogs kasunod ng kauna-unahang National Invitationals championship noong Hulyo.

Nagtulong sina Solomon at Belen para dalhin pabalik sa kampeonato ang NU at talunin ang mahigpit na karibal na Lady Spikers sa inaugural SSL titular showdown makalipas ang dalawang taon.

Kumamada si Solomon ng 19 puntos sa lahat ng atake, habang nagdagdag pa si Belen ng 15 puntos, katuwang si Vange Alinsug sa 10 puntos kabilang ang championship kill.

NU Lady Bulldogs 3 peat na sa Shakeys V-League Pre-season Cup

ni Anthony E. Servinio @Sports | Nov. 25, 2024

Photo: NU Lady Bulldogs - Shakey’s Super League

Walang nakapigil sa National University at kinolekta nila ang pangatlong sunod na Shakey’s Super League Collegiate Pre-season Champion kontra De La Salle University Linggo ng gabi sa Rizal Memorial Coliseum.

Kinuha ng Lady Bulldogs ang Game Two sa apat na set – 23-25, 25-18, 25-16 at 25-20 – at tapusin ng maaga ang seryeng best-of-three, 2-0. Idinampot ng NU ang sarili matapos madulas sa unang set at inilabas ang bangis.

Nagpalitan ng pagkakataon ang mga bumida noong Game One noong Biyernes na sina Bella Belen, Alyssa Solomon at Evangeline Alinsug para sa kanilang bagong talagang coach Sherwin Meneses patungo sa kanyang unang tropeo para sa paaralan. Bumanat ng 19 puntos si Solomon habang 15 ang ambag ni Belen at 10 galing kay Alinsug.

Walang naka-10 sa Lady Spikers at siyam lang ang nagawa ni Angel Canino na hindi napigil ang kanilang pangalawang sunod na pagkabigo matapos walisin ang walong laro ng elimination hanggang semifinals.

Samantala, napunta ang pangatlong puwesto Far Eastern University na kinailangan ang limang set para manaig sa University of Santo Tomas. Kinuha ng Lady Tamaraws ang huling dalawang set – 20-25, 25-19, 23-25, 25-19 at 15-12 – tampok ang 18 puntos ni Tin Ubaldo.

Pagkatapos ng mga mainitang laro ay pinarangalan si Belen bilang Most Valuable Player at Best Open Spiker. Dinomina ang seremonya ng mga kakamping sina Best Opposite Spiker Solomon, Best Setter Camilla Lamina at Best Libero Shaira Jardio.

Ang iba pang mga tumanggap ng parangal ay sina Best Middle Blocker Amie Provido ng DLSU, Second Best Middle Blocker Jazlyn Ellarina ng FEU at Second Best Open Spiker Angeline Poyos ng UST. Paghahandaan na ng 18 lumahok na koponan ang kanilang mga liga na UAAP at NCAA na nalalapit na ang pagbubukas.