Chargers magbabawi kontra Chameleons, Titans at High Speed Hitters magpapatatag

ni Gerard Arce @Sports News | Jan. 23, 2025

Photo: Premier Volleyball League (PVL)

Mga laro ngayong Huwebes

(Philsports Arena)

4 n.h. – Akari vs NXLed

6:30 n.g. – Choco Mucho vs PLDT

Asahan na ang matinding paluan at hampasan sa pagitan ng 4 na koponan na magtatagisan ngayong Huwebes ng hapon upang makuha ang kani-kanilang panalo sa pagpapatuloy ng aksyon sa 2024-25 Premier Volleyball League (PVL) All-Filipino Conference sa Philsports Arena sa Pasig City.

Tatangkain ng Akari Chargers na hindi pahabain ang losing skid laban sa  sister-team na NXLed Chameleons na  susundan ng birahan ng 2-time finalists na Choco Mucho Flying Titans at kokonektang PLDT High Speed Hitters. 

Nais ng Akari na makabawi sa pangwawalis na naranasan kontra PLDT sa 22-25, 16-25, 15-25 noong Sabado, tanging si Faith Nisperos ang tumapos ng doble pigura sa 11 puntos habang may ambag sina Ivy Lacsina, Erika Raagas at Princess Madrigal ng 6,5,4 puntos. 

Bumagsak sa 3-4 rekord ang Chargers na inaabangan ang pagbabalik sa laro nina Gretchel Soltones at Ced Domingo. Nablangko ang Chameleons na galing sa pambobokya ng Farm Fresh Foxies noong Sabado na nasayang ang doble pigura ni Jaila Atienza sa 11 pts, mas matatag ang opensa ng koponan kina EJ Laure, gayundin ang tulong nina Lycha Ebon, Kirch Macaslang at Chiara Permentilla.

Hindi man makakasama ng Choco Mucho sa koponan si Kat Tolentino na naoperahan sa appendix, sasandalan sina Cherry Ann “Sisi” Rondina, Dindin Manabat, Isa Molde, ace playmaker Deanna Wong, floor defender Thang Ponce at rookie middle blocker Lorraine Pecan na natakasan ang batang Zus Coffee Thunderbelles sa reverse sweep sa bisa ng 20-25, 20-25, 25-22, 25-19, 15-9 sa huling laro nito.  

Patuloy naman babanat para sa High Speed Hitters si Fil-Canadian Savi Davison katulong sina Majoy Baron, Erika Santos, Dell Palomata, Fiola Ceballos, playmaker Angelica Alcantara, ace libero Kath Arado at beteranong si Mika Reyes. 

Fil-foreign Van Sickle at Davison sakalam kapag nagtambal sa team

ni Gerard Arce @Sports News | Jan. 3, 2025

Photo: Van Sicle at Davison - Circulated sports

Sakaling magsama sa iisang koponan ang dalawa sa mga hard-hitting spikers ng bansa na sina dating MVP Brooke Van Sickle ng Petro Gazz Angels at Savi Davison ng PLDT High Speed Hitters, paniguradong maraming magugulantang sa mga atake nito sa taraflex court.

Kahit pa man magkatunggali sa Premier Volleyball League (PVL) ang dalawang Filipino-Foreigner volleybelles ay nagkakasundo ang mga ito ayon sa pagtataguyod ng iisang pagkakabuklod na batay sa kapwa paghanga sa isa’t isa na nakatuntong naman bilang ikalawa at ikatlong scorer sa liga, ayon sa pagkakasunod.

Pumasok sa lokal na volleyball tourney ang Filipino-American na si Van Sickle noong Enero na sinundan ng isang komperensiya ang Filipino-Canadian na si Davison. Parehong lumalaro sa iisang posisyon ang dalawang hard-hitting spikers na nagkamabutihan bilang ‘best friend’ sa labas ng court.

Kung mabibigyan ng pagkakataon na maayos ang pagkakakumpleto ng pagpapalit ng kanilang pederasyon at iba pang mga kinakailangang asikasuhin ay maaaring magsanib-puwersa ang dalawa sa Alas Pilipinas national team.

Hindi maiaalis ang pagkakapanabik ng dalawang Fil-Foreign spikers na maaring magsama sa National squad, o maaari ay sa iisang koponan sa PVL sa mga darating na panahon.

“(Savi) is a beast on the court. One day, I don't know if that will ever happen, but it'd be cool to be able to be teammates with her at some point. She's just a cool girl,” pahayag ni Van Sickle sa isang report.

Naging positibo rin ang tugon ni Davison patungkol sa posibilidad na magsama sila sa iisang koponan ni Van Sickle, na kasalukuyang nangunguna sa team standings sa 5-1 kartada, habang nakatuntong sa 3-2 rekord ang PLDT sa 5th spot.

Romero tuloy ang hanap sa bagong stars ng volleyball

ni MC @Sports News | Dec. 15, 2024

Photo: Patuloy ang paghahanap ng susunod na superstar ng volleyball sa Cebu sa pangunguna ni 1Pacman Partylist No. 1 nominee Milka Romero kasama ang Capital1 players na nakapag-recruit na para sa isang training clinic na inorganisa ng batang entrepreneur sa Cebu. (GV)

Walang tigil ang mga programang naghahanap para maging susunod na superstar sa volleyball tulad ni Alyssa Valdez.

Sa pangunguna ng PVL team Capital1 itataguyod ang volleyball clinics nina Solar Spikers stars Iris Tolenada, Leila Cruz, Roma Mae Doromal, Jorelle Singh, at Des Clemente at coach Roger Gorayeb.

Ito ang unang inisyatibo ni 1Pacman Partylist at Capital1 co-owner Milka Romero - ang palakasin ang sports sa mga komunidad, makapagpayabong ng mga binhi at masuportahan ang mga grassroots program ng mga volleyball clinics sa Cebu City at Lapu-Lapu City.

Ang mga PVL games sa pagitan ng Capital1 at Galleries Towers, at Cignal at NXLED ay idinaos doon para bigyang inspirasyon ang 5,000 Cebuanos na nanood sa Minglanilla Sports Complex.

“Ako po bilang atleta na-experience ko yung laban, yung pride to play for your country and I want to make that accessible for any dreamers, for any Filipino, young or experienced to be able to have the needs and essentials to grow in their field of sports,” ani Romero, na naging recipient ng Honorary Modern Filipina Heroism of the Year sa nagdaang 7th Nation Builders at MOSLIV Awards.

At dahil ilalapit ang PVL stars sa mga bagong henerasyon, layon ni Milka na maging inspirasyon ang mga volleyball players.

“Di ito nalalayo sa mga ginagawa na natin ngayon which is empowering women in sports not just volleyball but in all sports across the Philippines,” saad pa ni Romero.

“Yung sports in the Philippines are very important. It is actually an integral part of the development not just for youth but for every Filipino. Mentally and physically, lumalakas ‘yung loob natin with sports,” aniya.