40-M doses ng Pfizer, bibilhin ng ‘Pinas sa US

ni Mary Gutierrez Almirañez | April 13, 2021

Nakikipagnegosasyon na ang ‘Pinas sa American drug firm para sa 20 hanggang 40 milyong doses ng Pfizer-BioNTech na bakuna kontra COVID-19, ayon kay Vaccine Czar Carlito Galvez, Jr. ngayong Martes, Abril 13.

Aniya, “Natutuwa po kami sa Pfizer on their commitment… kasi we are negotiating 20 million to 40 million doses.”

Nilinaw din niyang nakahanda ang America upang ibigay sa mga kapanalig na bansa ang mga sosobrang bakuna kapag nabakunahan na ang kanilang buong populasyon.

Giit pa ni Galvez, “Nakita po namin by July 4, once na matapos ang inoculation sa US, sinabi naman po ng US, they would spare some of their excess doses to their allied countries.”

Matatandaang 29 na senior citizens sa Norway ang namatay matapos mabakunahan ng Pfizer kontra COVID-19. Gayunman, valid pa rin ang emergency use authorization na ibinigay ng ‘Pinas sa nasabing bakuna sapagkat nilinaw ng ilang eksperto na karamihan sa mga nabakunahan ay mayroon nang kumplikasyon.

"Norwegian authorities have said that based on about 13 autopsies of these people above 85 years old who actually have a lot of chronic illnesses, it's possible, it may have contributed to their demise but they are not categorically stating that it is the vaccine that caused their deaths," paglilinaw pa ng infectious disease expert na si Dr. Edsel Salvana.

Sa ngayon, ang may emergency use authorization (EUA) pa lang na bakuna ay ang Pfizer-BioNTech, AstraZeneca, CoronaVac ng Sinovac, at ang Sputnik V ng Gamaleya Institute.

Samantala, inaasahan namang maaaprubahan ang EUA ng Moderna ngayong linggo, kung saan mahigit 194,000 doses nito ang nakatakdang dumating sa Mayo.

500,000 doses ng Sputnik V, parating na sa 'Pinas

ni Mary Gutierrez Almirañez | April 13, 2021

Dalawampung milyong doses ng Sputnik V COVID-19 vaccines ang binili ng ‘Pinas sa Russia Gamaleya Institute at inaasahang darating na sa bansa ngayong Abril ang paunang 500,000 doses na nakalaan para sa mga senior citizens, ayon kay Vaccine Czar Carlito Galvez, Jr..

Aniya, "Puwede po siyang gamitin po sa elderly, so from 18 and above. So 'yun po ang gagamitin namin at 'yun po ang maganda dahil at least in the absence of AstraZeneca… Considering na ang nakikita natin na maganda ang production ng Russia and at the same time, they are supporting only the developing countries.”

Sa kabuuang bilang ay 3,025,600 doses ng bakuna na ang dumating sa bansa, kung saan 2,500,000 ay mula sa Sinovac at ang 525,600 ay galing sa AstraZeneca.

Tiniyak naman ni Galvez na darating ‘on time’ ang 20 million doses ng Sputnik V sa loob lamang ng apat na buwan. Nilinaw din niyang mapipirmahan na ngayong linggo ang supply agreement upang masimulan ang distribusyon.

Sa ngayon ay 1,007,356 indibidwal na ang nabakunahan ng unang dose kontra-COVID-19, habang 132,288 naman ang nakatanggap na ng second dose.

Sa kabuuan, tinatayang umabot na sa 1,139,644 ang lahat ng nabakunahan sa bansa o mahigit 0.19% na target mabakunahan ng Department of Health (DOH).

Ribbon-cutting sa modular hospital, sayang-oras lang — Binay

ni Mary Gutierrez Almirañez | April 7, 2021

Pinalagan ni Senator Nancy Binay ang ribbon-cutting ceremony sa binuksang Quezon Institute Offsite Modular Hospital na pinangunahan nina Senator Bong Go, Department of Health Secretary Francisco Duque III at Vaccine Czar Carlito Galvez, Jr. sa Quezon City kahapon, Abril 6.

Komento ni Binay, "Pakiusap, kung puwedeng buksan na lang para magamit agad. Sayang lang ang oras sa ribbon-cutting at photo ops. These things are unnecessary and leave a bad taste for families of Covid patients who are racing against life and time.”

Binuksan ang bagong pasilidad bilang extension ng Jose R. Reyes Memorial Medical Center dahil sa patuloy na pagdami ng mga pasyenteng naa-admit sa ospital dulot ng COVID-19.

Sa ngayon, tinatayang 110 na pasyente ang kayang i-accommodate ng modular hospital mula sa referral ng One Hospital Command at hindi muna umano tatanggap ng mga walk-in patients.